Хорз уынаффӕ раттӕн куыд ис?

1. Уынаффӕтӕ чи хъуамӕ дӕтта ӕмӕ цӕмӕн?

УЫНАФФӔТӔ дӕттын дӕ зӕрдӕмӕ цӕуы? Иуӕй-иутӕ уарзынц уынаффӕтӕ дӕттын. Иннӕтӕ та нӕ уарзынц кӕнӕ уымӕ сӕ ныфс нӕ хӕссынц. Куыдфӕнды ма уа, не ’ппӕты дӕр хаттӕй-хатт фӕхъӕуы уынаффӕ раттын. Цӕмӕн? Йесо загъта, йе ’цӕг фӕдылдзӕуджыты-иу ын адӕм уымӕй кӕй базондзысты, ӕмӕ сӕ кӕрӕдзийы куы уарзой (Иоан. 13:35). Ӕмӕ уыцы уарзондзинад бӕрӕг вӕййы, куы фӕхъӕуы, уӕд хо кӕнӕ ӕфсымӕрӕн уынаффӕ кӕй раттӕм, уымӕй дӕр. Библийы «зондджын уайдзӕфгӕнӕджы» уынаффӕ барст цӕуы, адӕймаджы чи срӕсугъд кӕны, ахӕм зынаргъ аивгӕнӕнимӕ (Ӕмб. 25:12).

2. Хистӕр нӕлгоймӕгтӕн сӕ бон цы хъуамӕ уа аразын ӕмӕ цӕмӕн? (Кӕс рамкӕ дӕр «Уынаффӕтӕ, „Нӕ чырыстон цард ӕмӕ лӕггад“ чи хуыйны, уыцы фембӕлды».)

² Уӕлдайдӕр хистӕр нӕлгоймӕгты хъӕуы зонын, уынаффӕтӕ дӕттын куыд хъӕуы, уый. Йегъовӕ ӕмӕ Йесо уыцы нӕлгоймӕгты сӕвӕрдтой, цӕмӕй ӕмбырдыл тыхсой (1 Пет. 5:2, 3). Кӕй ныл тыхсынц, уый бӕрӕг у, зӕгъӕм, сӕ раныхӕсты нын Библимӕ гӕсгӕ уынаффӕтӕ кӕй фӕдӕттынц, уымӕй. Уымӕй уӕлдай ма сӕ фӕхъӕуы хотӕ ӕмӕ ӕфсымӕртӕй кӕмӕндӕрты хицӕнӕй уынаффӕ раттын, уыимӕ, Йегъовӕйы чи ныууагъта, уыдонӕн дӕр. Уӕдӕ хистӕр нӕлгоймӕгтӕн ӕмӕ махӕн не ’ппӕтӕн дӕр нӕ бон куыд у иннӕтӕн хорз уынаффӕтӕ дӕттын?

3. а) Хорз уынаффӕтӕ дӕттын цӕй фӕрцы сахуыр уыдзыстӕм? (Исай 9:6; кӕс рамкӕ дӕр «Уынаффӕ дӕтгӕйӕ Йесойы фӕзм».) б) Ацы статьяйы цӕуыл аныхас кӕндзыстӕм?

³ Хорз уынаффӕтӕ дӕттӕн куыд ис, уый нӕ бон у базонын, Хуыцауы рагон лӕггадгӕнджытӕ, уӕлдайдӕр та Йесо, уынаффӕтӕ куыд лӕвӕрдтой, уымӕй. Йесойы кадджын нӕмттӕй иу у «Диссаджы уынаффӕгӕнӕг». (Бакӕс Исайы 9:6.) Ацы статьяйы аныхас кӕндзыстӕм, нӕ бон цы у аразын, исчи нӕ уынаффӕ куы ракура, уӕд ӕмӕ нӕ куы нӕ бафӕрсой, афтӕмӕй нӕ уынаффӕ раттын куы бахъӕуа, уӕд. Стӕй ма аныхас кӕндзыстӕм, ахсджиаг кӕй у, цӕмӕй-иу уынаффӕ раттӕм, хуыздӕр кӕд уа, уӕд ӕмӕ, хуыздӕр куыд уа, афтӕ.

ИСЧИ НӔ УЫНАФФӔ КУЫ РАКУРА

4, 5. Исчи нӕ уынаффӕ куы ракура, уӕд цавӕр фарстатыл хъуамӕ ахъуыды кӕнӕм? Ӕрхӕсс цӕвиттон.

⁴ Исчи нӕ уынаффӕ куы ракуры, уӕд нын, ӕвӕццӕгӕн, ӕхсызгон вӕййы ӕмӕ нӕ фӕфӕнды, цӕмӕй йын уайтагъд баххуыс кӕнӕм. Фӕлӕ-иу фыццаг хъуамӕ ахъуыды кӕнӕм: «Уыцы фарстайы фӕдыл уый фаг зонын, цӕмӕй йын мӕ бон хорз уынаффӕ раттын уа?» Хатт адӕймагӕн уынаффӕ раттыны бӕсты хуыздӕр вӕййы, уыцы фарстайы фӕдыл фылдӕр чи зоны, ахӕм искӕй йын бацамонын.

⁵ Зӕгъӕм, де ’мбал цавӕрдӕр низӕй фӕрынчын ӕмӕ дын загъта, йӕ низ сдзӕбӕх кӕнынӕн цалдӕр мадзалы кӕй ис, ӕмӕ дӕ фӕрсы, дӕумӕ гӕсгӕ дзы хуыздӕр кӕцы у, зӕгъгӕ. Чи зоны дӕм кӕцыдӕр мадзал иннӕтӕй хуыздӕр кӕсы. Фӕлӕ дохтыр нӕ дӕ, ӕмӕ уыцы низ дзӕбӕх кӕнын нӕ зоныс. Ахӕм уавӕры хуыздӕр куыд уаид бакӕнын? Дӕ бон уаид де ’мбалӕн баххуыс кӕнын, уыцы низ дзӕбӕх кӕнын чи зоны, ахӕм адӕймаджы ссарынӕн.

6. Хуыздӕр цӕмӕн уаид, уынаффӕ раттыныл-иу куы нӕ фӕтагъд кӕниккам?

⁶ Кӕд нӕм афтӕ кӕсы, ӕмӕ уыцы фарстайы фӕдыл уый фаг зонӕм, цӕмӕй адӕймагӕн уынаффӕ раттӕм, уӕддӕр-иу хуыздӕр уаид, ууыл-иу куы нӕ фӕтагъд кӕниккам. Цӕмӕн? Ӕмбисӕндты 15:28 стихы фыст ис, зӕгъгӕ, «рӕстгӕнӕджы зӕрдӕ дзуапп раттыны размӕ дзӕбӕх ахъуыды кӕны». Уӕдӕ нӕм кӕд афтӕ кӕсы, ӕмӕ, цы зӕгъӕм, уый зонӕм, уӕддӕр хуыздӕр уаид, фыццаг уал-иу уыцы фарста куы раиртасиккам, Хуыцаумӕ-иу куы скувиккам ӕмӕ, адӕймагӕн цы уынаффӕ ратдзыстӕм, ууыл-иу лӕмбынӕг куы ахъуыды кӕниккам. Уӕд нӕ дзуапп Йегъовӕйы цӕстӕй кӕсгӕйӕ уыдзӕн раст.

7. Пехуымпар Нафаны хабарӕй цӕуыл ахуыр кӕнӕм?

⁷ Ӕркӕсӕм-ма пехуымпар Нафаны хабармӕ. Паддзах Давид ын загъта, Йегъовӕйӕн кувӕндон саразын кӕй фӕнд кӕны. Ӕмӕ йын Нафан уайтагъд дзуапп радта, дӕ зӕрдӕйы цыдӕриддӕр ис, уый кӕн, зӕгъгӕ. Фӕлӕ уый Йегъовӕйы фӕнд нӕ уыд. Уӕдӕ уал Нафаны фыццаг хъуыди Йегъовӕйы бафӕрсын (1 Аз. 17:1–4). Ацы хабарӕй цӕуыл ахуыр кӕнӕм? Исчи нӕ уынаффӕ куы ракуры, уӕд-иу хъуамӕ исты зӕгъынмӕ ма фӕтагъд кӕнӕм (Иак. 1:19).

8. Ноджыдӕр ма цӕмӕн фӕхъӕуы уынаффӕ раттыны размӕ дзӕбӕх ахъуыды кӕнын?

⁸ Ноджыдӕр ма цӕмӕн фӕхъӕуы уынаффӕ раттыны размӕ дзӕбӕх ахъуыды кӕнын? Уымӕн ӕмӕ адӕймагӕн уынаффӕ куы раттӕм ӕмӕ исты куы ’рцӕуа, уӕд дзы мах аххос дӕр уыдзӕн. Уӕдӕ уал-иу уынаффӕ раттыны размӕ хорз уаид лӕмбынӕг ахъуыды кӕнын.

УЫНАФФӔ ЧИ НӔ РАКУЫРДТА, АХӔМ АДӔЙМАГӔН УЫНАФФӔ РАТТЫН КУЫ БАХЪӔУА

9. Хистӕр нӕлгоймӕгты уынаффӕ раттыны размӕ цы фӕхъӕуы сбӕрӕг кӕнын? (Галатӕгтӕм 6:1).

⁹ Хатгай хистӕр нӕлгоймӕгты бахъӕуы, «рӕдыд къахдзӕф» чи сарӕзта, ахӕм хо кӕнӕ ’фсымӕрӕн уынаффӕ раттын. (Бакӕс Галатӕгтӕм 6:1.) Чи зоны, уӕззау тӕригъӕд нӕма сарӕзта, фӕлӕ, цы уынаффӕтӕ хӕссы, уыдон ӕй, гӕнӕн ис, уымӕ ӕркӕной. Хистӕр нӕлгоймӕгтӕн сӕ хӕс у, цӕмӕй йын баххуыс кӕной, ӕмӕ, ӕнусон цардмӕ чи кӕны, уыцы фӕндагӕй ма адзӕгъӕл уа (Иак. 5:19, 20). Фӕлӕ сӕ уынаффӕ раттыны размӕ хъӕуы сбӕрӕг кӕнын, ӕцӕгдӕр сарӕзта рӕдыд къахдзӕф ӕви нӕ. Уыдон ӕмбарынц: уый цы уынаффӕтӕ хӕссы, уыдон кӕд сӕ уынаффӕтӕй хицӕн кӕнынц, уӕддӕр уый ууыл дзурӕг нӕу, ӕмӕ, Йегъовӕйы зӕрдӕмӕ цы нӕ цӕуы, ахӕм цыдӕр аразы (Ром. 14:1–4). Фӕлӕ, зӕгъӕм, хо кӕнӕ ’фсымӕр ӕцӕгдӕр сарӕзта рӕдыд къахдзӕф, ӕмӕ хистӕр нӕлгоймӕгтӕ аскъуыддзаг кодтой, уынаффӕ раттын ын кӕй хъӕуы. Ахӕм уавӕры куыд хъуамӕ бакӕной?

10–12. Хистӕр нӕлгоймаг цы хъуамӕ араза, уынаффӕ дзы чи нӕ ракуырдта, ахӕм адӕймагӕн уынаффӕ дӕтгӕйӕ? Ӕрхӕсс цӕвиттон. (Кӕс нывтӕм дӕр).

¹⁰ Хистӕр нӕлгоймӕгтӕн ӕнцон нӕ вӕййы, уынаффӕ сӕ чи нӕ ракуры, ахӕм адӕймагӕн уынаффӕ раттын. Цӕуылнӕ? Апостол Павел загъта, уый гӕнӕн кӕй ис, ӕмӕ адӕймаг рӕдыд къахдзӕф сараза, ӕмбаргӕ дӕр ӕй ма бакӕна, афтӕмӕй. Уӕдӕ уал уынаффӕ раттыны размӕ хистӕр нӕлгоймӕгтӕн сӕ бон у цыдӕр саразын, цӕмӕй адӕймагӕн ӕнцондӕр уа сӕ уынаффӕмӕ байхъусын.

¹¹ Уынаффӕ чи нӕ ракура, ахӕм адӕймагӕн уынаффӕ дӕттын абарӕн ис, хъӕбӕр зӕххыл исты куыд рӕзын кӕнай, уыимӕ. Фӕлӕ зӕхкусӕг куыд фӕкӕны? Фыццаг уал зӕхх сфӕлмӕн кӕны, ома йӕ бацӕттӕ кӕны. Ӕмӕ дзы мыггаг ӕрмӕстдӕр уый фӕстӕ ныппары. Фӕстагмӕ та йыл ныккӕны дон. Афтӕ хистӕр нӕлгоймаг дӕр фыццаг «зӕхх сфӕлмӕн кӕны», ома, уынаффӕ раттынмӕ кӕмӕн фӕхъавы, уымӕн йӕ зӕрдӕ рагацау бацӕттӕ кӕны. Зӕгъӕм, хуыздӕр рӕстӕг равзары ӕмӕ йын фӕзӕгъы, йӕ хорзыл ын кӕй хъуыды кӕны ӕмӕ йӕ йемӕ цӕуылдӕр аныхас кӕнын кӕй фӕнды. Хистӕр нӕлгоймаджы фӕлмӕн, хӕларзӕрдӕ адӕймагӕй куы зоной, уӕд-иу иннӕтӕн йӕ уынаффӕмӕ байхъусын ӕнцондӕр уыдзӕн.

¹² Ӕфсымӕримӕ ныхас кӕнгӕйӕ хистӕр нӕлгоймагӕн йӕ бон у дарддӕр дӕр «зӕхх фӕлмӕн кӕнын», ома йын йӕ зӕрдыл ӕрлӕууын кӕнын, алчидӕр кӕй рӕдийы ӕмӕ алкӕмӕн дӕр рӕстӕгӕй-рӕстӕгмӕ кӕй бахъӕуы уынаффӕ раттын (Ром. 3:23). Йемӕ фӕлмӕнӕй фӕныхас кӕны ӕмӕ бӕрӕг вӕййы, кӕй йӕ нымайы. Ӕмӕ йын афтӕмӕй Библийы фӕрцы бамбарын кӕны, цавӕр рӕдыд къахдзӕф сарӕзта, уый. Ӕфсымӕр йӕ рӕдыд куы бамбары, уӕд хистӕр нӕлгоймаг «мыггаг ныппары» – фӕзӕгъы йын, цы хъӕуы саразын, цӕмӕй йӕ рӕдыд сраст кӕна. Фӕстагмӕ та «мыггагыл дон ныккӕны» – зӕрдиагӕй дзы раппӕлы ӕмӕ йемӕ иумӕ скувы (Иак. 5:15).

13. Хистӕр нӕлгоймагӕн йӕ бон цы у саразын, цӕмӕй фена, ӕфсымӕр ын йӕ уынаффӕ бамбӕрста ӕви нӕ?

¹³ Хатт афтӕ вӕййы, ӕмӕ адӕймагӕн зӕгъгӕ иу цыдӕр фӕкӕнынц, уый та ӕндӕр цыдӕр фехъусы. Хистӕр нӕлгоймагӕн йӕ бон цы у саразын, цӕмӕй афтӕ ма рауайа? Йӕ бон у ӕфсымӕрмӕ фӕлмӕнӕй раттын, чи йӕ нӕ фӕхъыг кӕна, ахӕм фарстатӕ, цӕмӕй фена, цы уынаффӕ йын радта ӕмӕ йӕ цы аразын хъӕуы, уый бамбӕрста ӕви нӕ (Еккл. 12:11).

КӔД ӔМӔ КУЫД ХЪӔУЫ УЫНАФФӔ ДӔТТЫН?

14. Уынаффӕ мӕстыйӕ цӕуылнӕ хъуамӕ дӕттӕм?

¹⁴ Не ’ппӕт дӕр ӕнӕххӕст кӕй стӕм, уымӕ гӕсгӕ хатт нӕ хъуыддӕгтӕй кӕнӕ нӕ ныхӕстӕй иннӕты фӕхъыг кӕнӕм (Кол. 3:13). Библийӕ куыд зыны, афтӕмӕй хатт кӕрӕдзимӕ цӕйдӕрты тыххӕй смӕсты вӕййӕм (Еф. 4:26). Фӕлӕ-иу хъуамӕ уынаффӕ мӕстыйӕ ма дӕттӕм. Цӕуылнӕ? Уымӕн ӕмӕ «адӕймагӕн мӕстыйӕ йӕ бон нӕу, Хуыцауы цӕсты раст цы у, уый аразын» (Иак. 1:20). Уынаффӕ мӕстыйӕ куы раттӕм, уӕд, уавӕр фыддӕр цы фӕуа, ӕндӕр ницы. Фӕлӕ уый ууыл дзурӕг нӕу, ӕмӕ нӕ чи фӕхъыг кодта, уымӕн нӕ бон ӕппындӕр нӕу зӕгъын, цы хъуыды кӕнӕм ӕмӕ цы ’нкъарӕм, уый тыххӕй. Хуыздӕр уаид, фыццаг уал-иу куы ’рсабыр уаиккам ӕмӕ-иу уый фӕстӕ куы аныхас кӕниккам йемӕ.

15. Елиуйӕ цӕуыл ахуыр кӕнӕм? (Кӕс нывмӕ дӕр.)

¹⁵ Ныр та ӕркӕсӕм, Иовӕн хорз уынаффӕ чи радта, уыцы адӕймаджы, Елиуйы, хабармӕ. Иовы йе ’ртӕ мӕнг хӕлары ӕнаххосӕй аххосджын кодтой. Ӕмӕ Елиуй цалдӕр боны фӕхъуыста, Иов йӕхи куыд рӕстытӕ кодта, уымӕ. Елиуй Иовӕн тӕригъӕд кодта. Фӕлӕ йӕм мӕсты дӕр сси, уымӕн ӕмӕ Йегъовӕйӕ, раст цы уыд, уый нӕ дзырдта ӕмӕ йӕхиуыл ӕгӕр сси. Фӕлӕ йын Елиуй уайтагъд уынаффӕтӕ дӕттынмӕ нӕ фӕци. Ӕмӕ стӕй дзурын куы райдыдта, уӕд йӕ ныхас уыд фӕлмӕн ӕмӕ бӕрӕг уыд, кӕй йӕ нымайы (Иов 32:2; 33:1–7). Уӕдӕ Елиуйӕ цӕуыл ахуыр кӕнӕм? Уынаффӕ дӕттын ӕппӕты хуыздӕр уыдзӕн, куы-иу ӕрсабыр уӕм, уӕд. Стӕй-иу хъуамӕ бӕрӕг уа, адӕймаджы кӕй уарзӕм ӕмӕ йӕ кӕй нымайӕм (Еккл. 3:1, 7).

ЦӔТТӔ УӔМ УЫНАФФӔТӔ ДӔТТЫНМӔ ӔМӔ УЫНАФФӔТӔМ ХЪУСЫНМӔ

16. Псалом 32:8 стихӕй нӕ бон цы у нӕхицӕн зондӕн райсын?

¹⁶ Ацы статьяйы сӕйраг стихы фыст ис, Йегъовӕ нын уынаффӕ кӕй ратдзӕн ӕмӕ нӕм йӕ цӕст кӕй дардзӕн. (Бакӕс Псалом 32:8.) Уымӕй бӕрӕг у, алкӕддӕр нын кӕй ӕххуыс кӕндзӕн. Йегъовӕ нын уынаффӕ куы ратты, уӕд ма нын ӕххуыс дӕр бакӕны, цӕмӕй уыцы уынаффӕмӕ гӕсгӕ архайӕм. Ӕмӕ йӕ махӕн дӕр нӕ бон у фӕзмын. Искӕмӕн нӕ уынаффӕ раттын куы бахъӕуа, уӕд-иу ын цӕй ӕмӕ йӕ ныфсыл ныфс ӕфтауӕм ӕмӕ йын ӕххуыс кӕнӕм раст уынаффӕтӕ хӕссынӕн.

17. Хистӕр нӕлгоймӕгтӕ нын Библимӕ гӕсгӕ бӕлвырд уынаффӕтӕ кӕй фӕдӕттынц, уымӕ гӕсгӕ сӕ цӕимӕ ис абарӕн? (Исай 32:1, 2).

¹⁷ Уынаффӕтӕ дӕттын ӕмӕ нӕ уынаффӕтӕм хъусын абон куыд тынг хъӕуы, афтӕ никуыма (2 Тим. 3:1). Библимӕ гӕсгӕ нын бӕлвырд уынаффӕтӕ чи дӕтты, уыцы хистӕр нӕлгоймӕгтӕ сты, «ӕнӕдон бӕстӕйы цӕугӕдӕттӕ куыд уой... уый хуызӕн». (Бакӕс Исайы 32:1, 2.) Мах тынг бузныг стӕм, цы саразын нӕ хъӕуы, уый нын ӕргом чи фӕзӕгъы, уыцы хотӕ ӕмӕ ӕфсымӕртӕй. «Сызгъӕрин фӕткъуытӕ ӕвзист нывӕфтыд къусты мидӕг куыд фидауынц, афтӕ фидауынц» уыдоны ныхӕстӕ дӕр (Ӕмб. 25:11). Цӕй уӕдӕ не ’ппӕт дӕр ахуыр кӕнӕм хорз уынаффӕтӕ дӕттын ӕмӕ уынаффӕтӕм хъусын.