ФӔСИВӔДЫ ФАРСТАТӔ
Мӕ ахуыргӕнӕгимӕ иумӕйаг ӕвзаг куыд ссарон?
Афтӕ дӕм куы кӕса, ӕмӕ дӕ дӕ ахуыргӕнӕг нӕ уарзы
Ӕвӕццӕгӕн, алкӕмӕн дӕр вӕййы ахӕм ахуыргӕнӕг, ӕмӕ дзы фӕхъуыды кӕны, зӕгъгӕ, алкӕмӕ иухуызон зӕрдӕ нӕ дары, кӕйдӕрты хъулон кӕны, ӕгӕр бирӕ домы кӕнӕ та йӕ зӕрдӕмӕ никуы ницы фӕцӕуы.
Луис, цӕуы йыл 21 азы, загъта: «Иу ахуыргӕнӕг нын уыди, ӕмӕ-иу нын ӕдзух ӕфхӕрӕн ныхӕстӕ кодта, стӕй нӕ ницӕмӕ дардта. Тагъд хъуамӕ йӕ куыст ныууагътаид, ӕмӕ йын уӕлдай нал уыд».
Меланийыл цӕуы 25 азы. Скъолайы куы ахуыр кодта, уӕд ӕм йӕ ахуыргӕнӕг ӕвзӕр цӕстӕй каст. Мелани зӕгъы: «Йӕхи уымӕй рӕстытӕ кодта, ӕмӕ, дам, ды ӕндӕр диныл хӕст дӕ. Йӕ ныхӕстӕм гӕсгӕ, хъуамӕ сахуыр уыдаин, скъолайы фӕстӕ дӕр мӕм адӕм ахӕм цӕстӕй кӕй кӕсдзысты, ууыл».
Кӕд дӕуӕн дӕр ахӕм ахуыргӕнӕг ис, уӕддӕр цыдӕр ис саразӕн, цӕмӕй дын дӕ ахуыр ма сӕнад уа. Чи зоны дын ацы цалдӕр уынаффӕйы баххуыс кӕной.
Цавӕр уынаффӕтӕ дын баххуыс кӕндзысты
Дӕ ахуыргӕнджытӕ дӕ цы фӕдомынц, уый-иу араз. Алы ахуыргӕнӕгӕн дӕр йӕхи домӕнтӕ ис. Бацархай, дӕ ахуыргӕнӕг дӕ цы домы, уый бамбарыныл ӕмӕ, дӕ бон цы у, уый араз.
Библийы уагӕвӕрд: «Зондджын адӕймаг байхъусдзӕн ӕмӕ ноджы фылдӕр базондзӕн» (Ӕмбисӕндтӕ 1:5).
«Бамбӕрстон ӕй, мӕ ахуыргӕнӕг мӕ цы домы, уый аразын мӕ кӕй хъӕуы. Гъемӕ-иу мӕ хӕдзармӕ куыст, уый куыд фӕндыд, афтӕ скодтон. Уый фӕрцы кӕрӕдзи хуыздӕр ӕмбарын райдыдтам» (Кристофер).
Дӕ ахуыргӕнджыты нымай. Семӕ-иу уӕзданӕй ныхас кӕн, фӕстӕмӕ-иу сӕм ма дзур, суанг дӕм афтӕ куы кӕса, ӕмӕ сын афтӕ хъӕуы, уӕд дӕр. Дӕ зӕрдыл дар, сӕ цӕсты ахуыргӕнинаг кӕй дӕ, се ’мгар нӕ, фӕлӕ.
Библийы уагӕвӕрд: «Уӕ дзыхыныхас алкӕддӕр уӕд фӕлмӕн ӕмӕ зӕрдӕмӕдзӕугӕ, цӕмӕй зонат, кӕмӕн цавӕр дзуапп раттын хъӕуы, уый» (Колоссӕгтӕм 4:6).
«Сывӕллӕттӕ хъуамӕ сӕ ахуыргӕнджыты нымайой. Фӕлӕ, хъыгагӕн, алкӕд афтӕ нӕ вӕййы. Уӕдӕ дӕ ахуыргӕнджыты куы нымайай, уӕд дӕм хуыздӕр цӕстӕй кӕсдзысты» (Сиарӕ).
Дӕ ахуыргӕнджыты ӕмбар. Ахуыргӕнджытӕ дӕр адӕм сты. Уыдон дӕр иннӕтау зындзинӕдтыл ӕмбӕлынц ӕмӕ цӕуылдӕрты фӕтыхсынц. Уӕдӕ-иу уайтагъд ахӕм хатдзӕг ма скӕн: «Мӕ ахуыргӕнӕгӕн йӕ зӕрдӕмӕ никуы ницы фӕцӕуы» кӕнӕ «Мӕ ахуыргӕнӕг мӕ йе сӕфт уыны».
Библийы уагӕвӕрд: «Мах не ’ппӕт дӕр арӕх рӕдийӕм» (Иаковы 3:2).
«Ахуыргӕнджытӕн сӕ куыст тынг зын у. Нӕ йӕ ӕмбарын, афтӕ сын куыд фӕуайы, цӕмӕй утӕппӕт сывӕллӕтты фыдуаг кӕнын ма уадзой ӕмӕ ма сӕ ахуыр дӕр кӕной. Афтӕ-иу мӕм каст, ӕмӕ цӕмӕй ахуыргӕнджытӕн ӕнцондӕр уа, уый тыххӕй ӕз уӕддӕр хъуамӕ кӕсон сӕ коммӕ» (Алексис).
Дӕ ныййарджытимӕ аныхас кӕн. Дӕ ныййарджытӕй хуыздӕр дын ничи баххуыс кӕндзӕн. Уыдоны фӕнды, цӕмӕй скъолайы хорз ахуыр кӕнай. Дӕ ахуыргӕнӕг дӕ ӕгӕр бирӕ куы дома кӕнӕ дӕм хорз цӕстӕй куы нӕ кӕса, уӕд дын, гӕнӕн ис, сӕ уынаффӕ баххуыс кӕна.
Библийы уагӕвӕрд: «Ӕргом ныхас кӕм нӕ уа, уым фӕндтӕ фехӕлдзысты» (Ӕмбисӕндтӕ 15:22).
«Ныййарджытӕ зын фарстатӕ скъуыддзаг кӕнын сывӕллӕттӕй бирӕ хуыздӕр зонынц. Уӕдӕ дын цы дзурынц, уымӕ хъус. Уый дын тынг баххуыс кӕндзӕн» (Оливия).
Дӕ ахуыргӕнӕгимӕ дӕ бон куыд у аныхас кӕнын
Дӕ ахуыргӕнӕгимӕ кӕрӕдзи куы не ’мбарат, уӕд дӕ, чи зоны, бахъӕуа йемӕ аныхас кӕнын. Иуӕй-иутӕ фӕтӕрсынц, сӕ ахуыргӕнӕгимӕ сӕ быцӕу кӕнын кӕй хъӕудзӕн. Фӕлӕ аныхас кӕнын быцӕу кӕнын нӕу. Йемӕ куы аныхас кӕнай, уӕд, чи зоны, бадис кӕнай, уый, ды куыд ӕнхъӕл уыдтӕ, уымӕй бирӕ ӕнцондӕр кӕй уыд, стӕй, чи зоны, уавӕр дӕр фӕхуыздӕр уа.
Библийы уагӕвӕрд: «Цӕй уӕдӕ тырнӕм, фарн цы хӕссы... уымӕ» (Ромӕгтӕм 14:19).
«Кӕд дӕм афтӕ кӕсы, ӕмӕ дӕ ахуыргӕнӕг фаутӕ ӕрмӕстдӕр дӕумӕ хӕссы, уӕд ӕй бафӕрс, мыййаг дӕм истӕуыл мӕсты у. Йӕ дзуаппӕй бӕрӕг уыдзӕн, цы саразын дӕ хъӕуы, цӕмӕй дӕм хуыздӕр цӕстӕй кӕсын райдайа» (Джулианӕ).
«Афтӕ дӕм куы кӕса, ӕмӕ дӕ дӕ ахуыргӕнӕг не ’мбары, уӕд хуыздӕр уыдзӕн, йемӕ сабырӕй куы аныхас кӕнай, куыд ничи уӕ бахъыгдара, афтӕ, зӕгъӕм, урокты размӕ кӕнӕ урокты фӕстӕ. Ӕвӕццӕгӕн ӕмӕ дӕ бамбардзӕн ӕмӕ, йемӕ кӕй аныхас кодтай, уый йӕ зӕрдӕмӕ фӕцӕудзӕн» (Бенджамин).
ӔЦӔГ ХАБАР
«Ӕвзӕр бӕрӕггӕнӕнтӕ истон, ӕмӕ мын мӕ ахуыргӕнӕг ӕппындӕр ницӕмӕй ӕххуыс кодта. Мӕ цард мын афтӕ сӕнад кодта, ӕмӕ загътон, скъола ныууадздзынӕн.
Ӕндӕр ахуыргӕнӕгмӕ бацыдтӕн ӕмӕ йӕ бафарстон, куыд бакӕнон, зӕгъгӕ. Уый мын загъта: „Цавӕр адӕймаг дӕ, уый хорз нӕ зоны, ды та уый нӕ зоныс. Йемӕ аныхас кӕн. Чи зоны ма иннӕтӕй дӕр исчи йемӕ аныхас кӕнын нӕ уӕнды, ӕмӕ уӕд уыдонӕн дӕр баххуыс кӕндзынӕ“.
Цыфӕнды дӕр бакодтаин, ӕрмӕст уый нӕ. Фӕлӕ йын йӕ ныхӕстыл ахъуыды кодтон, ӕмӕ бамбӕрстон, раст мын кӕй загъта. Кӕд мӕ фӕндыд, цӕмӕй исты фӕивтаид, уӕд хъуамӕ ӕнцад ма бадтаин.
Гъемӕ дыккаг бон мӕ ахуыргӕнӕгмӕ бацыдтӕн, ӕмӕ йын уӕзданӕй бамбарын кодтон, йӕ предмет мӕ зӕрдӕмӕ тынг кӕй цӕуы ӕмӕ мӕ кӕй фӕнды, цӕмӕй йӕ зонон. Загътон ын, зӕгъын, архайын, фӕлӕ мын уӕддӕр ницы уайы ӕмӕ, цы кӕнон, уый нӕ зонын. Цавӕрдӕр уынаффӕтӕ мын радта. Стӕй ма мын афтӕ дӕр загъта, кӕй-иу мын аххуыс кӕндзӕн урокты фӕстӕ кӕнӕ электронон почтӕйы уылты.
Уый ӕнхъӕл нӕ уыдтӕн! Йемӕ кӕй аныхас кодтон, уый фӕрцы, не ’хсӕн цы ӕнӕуынгӕ къул уыд, уый фӕцыдӕр. Уый фӕстӕ мын бирӕ фенцондӕр» (Мария).
Уынаффӕ. Кӕд дын дӕ ахуыргӕнӕгимӕ зын у, уӕд уый афтӕ нымай, цыма дӕхи дарддӕры цардмӕ цӕттӕ кӕныс. 22-аздзыд Кети зӕгъы: «Скъола куы фӕуай, уӕддӕр-иу, гӕнӕн ис, ӕмӕ сӕмбӕлай, хорз цӕстӕй дӕм чи нӕ кӕсдзӕн, ахӕм хицӕуттыл. Зын дын кӕимӕ у, уыцы ахуыргӕнӕгимӕ фидауын куы сахуыр уай, уӕд дын фидӕны ӕнцондӕр уыдзӕн, зын-иу дын кӕимӕ уа, уыдонимӕ фидауын».