Зындон ӕцӕгдӕр ис? Библимӕ гӕсгӕ зындон цы у?

Дзуапп Библийӕ

Библийы иуӕй-иу тӕлмацты, зӕгъӕм, «Ног Фӕдзӕхст ӕмӕ Псалтир»-ы (1994 аз) кӕцыдӕр стихты ӕмбӕлы дзырд «зындон» (Псалом 15:10 [16:10, «Ног дунейы тӕлмац»]; Хъуыддӕгтӕ 2:27). Бирӕты уырны, зындон кӕй у, йӕ арт кӕмӕн нӕ хуыссы ӕмӕ фыдгӕнджытӕ кӕм хъизӕмар кӕнынц, ахӕм бынат, ӕмӕ уый бӕрӕг у ацы статьяйы нывӕй дӕр. Фӕлӕ цымӕ Библи та цы зӕгъы?

Ацы статьяйы аныхас кӕндзыстӕм:

Зындон, адӕм сӕ мӕлӕты фӕстӕ ӕнустӕм кӕм фӕхъизӕмар кӕнынц, ахӕм бынат у?

Нӕ. Библийы иуӕй-иу тӕлмацты дзырд «зындон»-ӕй цы дзырд ратӕлмац кодтой (дзуттаг дзырд «шеол» ӕмӕ грекъаг дзырд «гадес»), уый нысан кӕны ингӕн, ома сыджыт кӕнӕ зӕхх, мӕрдтӕ кӕм сты, уый. Библийӕ бӕрӕг у, ингӕны чи ис, уыцы адӕм кӕй нал сты, ома кӕй нал цӕрынц.

Мӕрдтӕ ницы ӕмбарынц, ӕмӕ уымӕ гӕсгӕ рыст дӕр не ’мбарынц. «Ингӕны... нӕдӕр куыст ис, нӕдӕр фӕндтӕ, нӕдӕр зонындзинӕдтӕ, нӕдӕр зонд» (Екклесиаст 9:10). Ингӕны фыррыстӕй ничи хъӕр кӕны. Библийы фыст ис: «Фӕхудинаг уӕнт фыдгӕнджытӕ, ингӕны [«зындоны», «Ног Фӕдзӕхст ӕмӕ Псалтир», 1994 аз] ӕмырӕй лӕууӕнт» (Псалом 31:17 [30:18]; Псалом 115:17).
Хуыцау загъта, адӕймаг йӕ тӕригъӕды тыххӕй мӕлгӕ кӕй акӕндзӕн, зындоны арты нӕ хъизӕмар кӕндзӕн, фӕлӕ. Хуыцау фыццаг нӕлгоймагӕн, Адамӕн, загъта, йӕ закъоны сӕрты йын куы ахиза, уӕд кӕй амӕлдзӕн (Райдиан 2:17). Афтӕ йын нӕ загъта, ӕнустӕм зындоны кӕй хъизӕмар кӕндзӕн. Фӕстӕдӕр, Адам тӕригъӕд куы сарӕзта, уӕд ын Хуыцау загъта, цавӕр тӕрхон ӕм ӕнхъӕлмӕ кӕсы, уый: «Сыджыт дӕ, ӕмӕ фӕстӕмӕ сыджытмӕ аздӕхдзынӕ» (Райдиан 3:19). Адам хъуамӕ мауал уыдаид. Хуыцау ын ахӕм тӕрхон куы рахастаид, цӕмӕй йӕ тӕригъӕды тыххӕй зындоны сыгъдаид, уӕд ын ӕй загътаид. Адӕймагмӕ Хуыцауы закъон фехалыны тыххӕй цы тӕрхон ӕнхъӕлмӕ кӕсы, уый нӕ фӕивта. Адам тӕригъӕд куы ракодта, уымӕй бирӕ фӕстӕдӕр Хуыцау Библийы ныффыссын кодта: «Тӕригъӕд фиды мӕлӕтӕй» (Ромӕгтӕм 6:23). Тӕригъӕдджынтӕн ӕндӕр тӕрхон нӕй. Уый бӕрӕг у ацы ныхӕстӕй: «Чи амард, уый йӕ тӕригъӕды хӕсӕй ссӕрибар» (Ромӕгтӕм 6:7).
Адӕймаг ӕнустӕм хъизӕмар кӕна, ӕрмӕст уыцы хъуыды дӕр Хуыцауӕн ӕнад у (Йереми 32:35). Уыцы хъуыды Библимӕ гӕсгӕ раст нӕу, уымӕн ӕмӕ Библи зӕгъы, зӕгъгӕ, «Хуыцау у уарзондзинад» (1 Иоанны 4:8). Хуыцауы фӕнды, цӕмӕй йын лӕггад кӕнӕм, кӕй йӕ уарзӕм, уый тыххӕй, ӕнустӕм кӕй хъизӕмар кӕндзыстӕм, уымӕй кӕй тӕрсӕм, уый тыххӕй нӕ, фӕлӕ (Матфейы 22:36–38).
Хорз адӕм ацыдысты зындонмӕ. Дзырд «зындон» цы тӕлмацты ӕмбӕлы, уым Хуыцауыл иузӕрдион нӕлгоймӕгтӕ, зӕгъӕм, Иаков ӕмӕ Иов, дзырдтой, зындонмӕ кӕй ацӕудзысты (Райдиан 37:35; Иов 14:13). Суанг дзы Йесо Чырыстийы тыххӕй дӕр фыст ис, куы амард, уӕд цалынмӕ нӕ райгас, уӕдмӕ зындоны кӕй уыд (Хъуыддӕгтӕ 2:31, 32). Бӕрӕг у, уыцы тӕлмацты дзырд «зындон» кӕй амоны ингӕнмӕa.

Йесойы фӕсномыг ныхас хъӕздыг лӕг ӕмӕ Лазӕры тыххӕй куыд ӕмбаргӕ у?

Ацы фӕсномыг ныхас радзырдта Йесо ӕмӕ фыст ис Лукайы 16:19–31. Фӕсномыг ныхӕстӕй нӕ бон вӕййы цыдӕр зондӕн райсын кӕнӕ, Хуыцау цӕмӕдӕр цы цӕстӕй кӕсы, уый бамбарын. Хъӕздыг лӕг ӕмӕ Лазӕры тыххӕй фӕсномыг ныхас, царды чи ӕрцыд, ахӕм хабар нӕу (Матфейы 13:34). Ацы фӕсномыг ныхасы тыххӕй фылдӕр базонӕн ис статьяйӕ «Хъӕздыг лӕг ӕмӕ Лазӕр чи уыдысты?».

Зындон уый нысан кӕны, ӕмӕ мӕрдтӕ ӕмбарынц, Хуыцауӕй дард кӕй сты, уый?

Нӕ. Ацы ахуырад Библимӕ гӕсгӕ раст нӕу, уымӕн ӕмӕ Библи ӕргом зӕгъы, мӕрдтӕ кӕй ницы ӕмбарынц (Псалом 146:3, 4; Екклесиаст 9:5).

Искуы исчи зындонӕй раздӕхт?

О. Библийы фыст ис, ингӕнӕй (Библийы иуӕй-иу тӕлмацты ацы дзырд ратӕлмац кодтой дзырдӕй «зындон») чи раздӕхт, ома чи райгас, фараст ахӕм адӕймаджы тыххӕйb. Уыдон зындоны куы уыдаиккой ӕмӕ уым исты куы федтаиккой, уӕд, куы райгас сты, уӕд ӕй радзырдтаиккой. Фӕлӕ сӕ иу дӕр афтӕ нӕ загъта, ӕмӕ хъизӕмар кодта. Уӕвгӕ, исты ӕмбӕрстой, уый кой дӕр не скодтой. Цӕуылнӕ? Библийы куыд фыст ис, афтӕмӕй ницы ӕмбӕрстой, цыма тарффынӕй кодтой, афтӕ уыдысты (Иоанны 11:11–14; 1 Коринфӕгтӕм 15:3–6).

a Кӕс рамкӕ «Библийы дзырдтӕ, райдианы фыст кӕуыл ӕрцыд, уыцы ӕвзӕгтыл».

b Кӕс 1 Паддзӕхты 17:17–24; 2 Паддзӕхты 4:32–37; 13:20, 21; Матфейы 28:5, 6; Лукайы 7:11–17; 8:40–56; Иоанны 11:38–44; Хъуыддӕгтӕ 9:36–42; Хъуыддӕгтӕ 20:7–12).

Библийы стихтӕ зындоны, кӕнӕ ингӕны, тыххӕй

Иов 14:13 стих: «Тӕхуды, ингӕны мӕ куы бамбӕхсис... Ӕмгъуыд мын куы снысан кӕнис ӕмӕ мӕ куы ’рхъуыды кӕнис!»

Йӕ хъуыды. Хуыцауыл иузӕрдион нӕлгоймаг Иов зыдта, ингӕны йӕ рыстытӕй кӕй фервӕздзӕн ӕмӕ йӕ Хуыцау фӕстӕмӕ цардмӕ кӕй раздахдзӕн.

Псалом 145:20 стих: «Йегъовӕ хъахъхъӕны, чи йӕ уарзы, уыдоны, фыдгӕнджыты та се ’ппӕты дӕр фесафдзӕн».

Йӕ хъуыды. Хуыцау фыдгӕнджыты ӕнустӕм фесафдзӕн. Цӕмӕй сӕ хъизӕмарӕй мара, уый тыххӕй сӕ зындоны удӕгасӕй нӕ дардзӕн.

Екклесиаст 9:10 стих: «Ингӕны – кӕдӕм ацӕудзынӕ, уым, нӕдӕр куыст ис, нӕдӕр фӕндтӕ, нӕдӕр зонындзинӕдтӕ, нӕдӕр зонд».

Йӕ хъуыды. Ингӕны, кӕнӕ зындоны, чи ис, уыдон ницы ӕмбарынц ӕмӕ хъизӕмар дӕр нӕ кӕнынц. Ацы стихы цы фыст ис, уый ӕрмӕст фыдгӕнджытӕм нӕ хауы, фӕлӕ хорз адӕммӕ дӕр.

Хъуыддӕгтӕ 2:31 стих: «Давид бирӕ раздӕр зыдта, Чырысти кӕй райгас уыдзӕн, ӕмӕ уый кой кодта, зӕгъгӕ йӕ Хуыцау ингӕны нӕ ныууадздзӕн».

Йӕ хъуыды. Йесо Чырысти куы амард, уӕд ацыд ингӕнмӕ.

Ромӕгтӕм 6:23 стих: «Тӕригъӕд фиды мӕлӕтӕй».

Йӕ хъуыды. Адӕймаг йе ’ппӕт тӕригъӕдты тыххӕй дӕр бафиды мӕлӕтӕй, зындоны кӕй фӕхъизӕмар кӕны, уымӕй нӕ, фӕлӕ.

Раргомад 20:13 стих: «Мӕлӕт ӕмӕ ингӕн дӕр радтой, чи дзы уыд, уыцы мӕрдты».

Йӕ хъуыды. Ингӕны чи ис, уыдон сты мард. Хуыцау сӕ ногӕй цардмӕ раздахдзӕн, ома сӕ райгас кӕндзӕн.

Раргомад 20:14 стих: «Мӕлӕт ӕмӕ ингӕн... ӕппӕрст ӕрцыдысты судзгӕ цады».

Йӕ хъуыды. Ингӕны чи ис, уыдон иууылдӕр куы райгас уой, ӕмӕ дзы куы ничиуал баззайа, уӕд ингӕн йӕхӕдӕг дӕр сӕфт ӕрцӕудзӕн, цыма арты басудздзӕн, уыйау. Адӕм мӕлынц, Адам тӕригъӕд кӕй ракодта, уый тыххӕй. Фӕлӕ уӕд мӕлӕт нал уыдзӕн (Ромӕгтӕм 5:12).

Библийы дзырдтӕ, райдианы фыст кӕуыл ӕрцыд, уыцы ӕвзӕгтыл

Библи тӕлмацгӕнджытӕ цалдӕр алыхуызон дзырды ратӕлмац кодтой дзырдӕй «зындон» ӕмӕ афтӕмӕй кӕсджыты рӕдыд хъуыдытыл бафтыдтой. Цавӕр дзырдтӕ сты, уыдон фенӕн ис дӕлдӕр. Иуӕй-иу тӕлмацтӕ кӕсгӕйӕ ахъуыды кӕнӕн ис, ӕмӕ тӕлмацгӕнджыты фӕндыд, цӕмӕй адӕмы уырна, фыдгӕнджытӕ ӕнустӕм кӕй фӕхъизӕмар кӕнынц, кӕй никуыуал вӕййынц нӕ, фӕлӕ.

Шеол (дзуттаг дзырд שְׁאוֹל), гадес (грекъаг дзырд ᾅδης)

Йӕ хъуыды: чи амард, уыдон кӕм сты, уыцы ингӕн, ома зӕхх, сыджыт (Псалом 16:10 [15:10]; Хъуыддӕгтӕ 2:31).

Цавӕр дзырдтӕй йӕ ратӕлмац кодтой: ингӕн, зындон («Ног Фӕдзӕхст ӕмӕ Псалтир», 1994 аз), мӕрдтыбӕстӕ («Ног Фӕдзӕхст», 2004 аз).
Гееннӕ (грекъаг дзырд γέεννα)

Йӕ хъуыды: ӕнустӕм фесӕфын (Матфейы 5:30).

Цавӕр дзырдтӕй йӕ ратӕлмац кодтой: гееннӕ; зындон («Ног Фӕдзӕхст ӕмӕ Псалтир», 1994 аз; «Ног Фӕдзӕхст», 2004 аз).
Тартар (грекъаг дзырд ταρταρόω)

Йӕ хъуыды: дӕлимонты, ома фыдгӕнӕг тыхты, ӕгады уавӕр (2 Петры 2:4).

Цавӕр дзырдтӕй йӕ ратӕлмац кодтой: тартар, зындон («Ног Фӕдзӕхст ӕмӕ Псалтир», 1994 аз; «Ног Фӕдзӕхст», 2004 аз).
Аполеиа (грекъаг дзырд ἀπώλεια)

Йӕ хъуыды: сӕфт (Матфейы 7:13).

Цавӕр дзырдӕй йӕ ратӕлмац кодтой: сӕфт.
Пур (грекъаг дзырд πῦρ)

Йӕ хъуыды: арт (ӕцӕг арт кӕнӕ ахӕсгӕ хуызы) (Лукайы 17:29; Иудӕйы 23).

Цавӕр дзырдтӕй йӕ ратӕлмац кодтой: зынг, арт, цӕхӕр («Ног Фӕдзӕхст ӕмӕ Псалтир», 1994 аз).

Зындоны тыххӕй ахуырад кӕцӕй равзӕрд

Равзӕрд, ӕцӕг Хуыцауӕн чи нӕ куывта, уыцы адӕмы ӕгъдӕуттӕй. Рагон египетӕгты уырныдта, зындоны арт кӕй ис, уый. Иу чиныджы мӕрдты тыххӕй, Амдуат, зӕгъгӕ (историкты хъуыдымӕ гӕсгӕ, фыст ӕрцыд нӕ эрӕйы размӕ 16 ӕнусы), фыст ис, арт кӕм судзы, ахӕм дзыхъхъыты кӕй ныппардзысты ӕмӕ уырдыгӕй чи нал фервӕздзӕн, ахӕм адӕмы тыххӕй (The Egyptian Heaven and Hell).

Фыццаг чырыстӕттӕ зындоны кой никуы кодтой. «Н[ог] Ф[ӕдзӕхсты] никуы ис фыст, зӕгъгӕ, фыццаг чырыстӕттӕ куы хъусын кодтой, уӕд-иу зындоны кой кодтой» (A Dictionary of Christian Theology).

Грекъаг философи дины ахуырӕдтыл бандӕвта. «Нӕ эрӕйы 2-аг ӕнусы ӕмбисӕй фӕстӕмӕ, грекъаг философиимӕ зонгӕ чи уыд, уыцы чырыстӕттӕ философи сӕ динимӕ хӕццӕ кӕнын райдыдтой... Философитӕй ӕппӕты тынгдӕр сӕ зӕрдӕмӕ цыд платонизм [Платоны ахуырӕдтӕ]» (Encyclopedia Britannica). Уыцы философимӕ гӕсгӕ, адӕймаг йӕ мӕлӕты фӕстӕ зындоны арты фӕхъизӕмар кӕны. «Адӕм зындоны тыххӕй цы хъуыды кӕнынц, ууыл грекъаг философтӕй се ’ппӕтӕй тынгдӕр бандӕвта Платон» (The History of Hell).

Зындоны тыххӕй ахуырад уыд ӕфсон адӕмы хъизӕмарӕй марынӕн. Иу чиныджы фыст ис, испайнаг инквизицийы заман, аргъуаны ахуырӕдты ныхмӕ чи уыд ӕмӕ-иу хъӕдыл кӕй басыгътой, уыдонӕй кӕй дзырдтой, зӕгъгӕ, дам, сын афтӕмӕй фадат дӕттӕм, «зындоны арт цы у, уый бамбарынӕн», цӕмӕй сӕ бон уа сӕ мӕлӕты размӕ ӕрфӕсмон кӕнын («The Spanish Inquisition», Джин Плейди). Ӕндӕр чиныджы куыд фыст ис, афтӕмӕй Английы ус-паддзах Мария Фыццаг дӕр басыгъта иу-300 протестанты. Куыд зӕгъынц, афтӕмӕй Мария Фыццаг дзырдта: «Аргъуаны знӕгты удтӕ мӕрдтыбӕсты ӕнустӕм зындоны арты судздзысты. Уымӕ гӕсгӕ мӕм уымӕй растдӕр ницы кӕсы, цӕмӕй сӕ уӕлӕуыл басудзон, ӕмӕ сыл афтӕмӕй мӕ фыдӕх ныккалон, Хуыцау сыл ӕй куыд ныккалдзӕн, афтӕ» («Universal History», Александр Тайтлер).

Зындоны тыххӕй ахуырад нӕ рӕстӕджы куыд фӕивта. Иуӕй-иу динты зындоны ахуырады цыдӕртӕ фӕивтой. Ӕмӕ ныр зындоны тыххӕй цы дзурынц, уымӕй адӕм афтӕ тынг нал тӕрсынц. Фӕлӕ дзы цыдӕртӕ фӕивтой, мӕнг ахуырадыл ӕй кӕй нымайынц, уый тыххӕй нӕ, фӕлӕ сӕм чи цӕуы, уыдоны зӕрдӕтӕ балхӕныны тыххӕй (2 Тимофеймӕ 4:3). «Адӕмы хъӕуы фӕлмӕн, хӕларзӕрдӕ Хуыцау... Абон никӕй зӕрдӕмӕ цӕуы тӕригъӕд ӕмӕ аххосы кой куы фӕкӕнынц, уый» (Джексон Кэролл, профессор).