ФӔСИВӔДЫ ФАРСТАТӔ
Ӕмбӕлттӕ мын цӕуылнӕ ис?
Интернеты кӕсыс къамтӕм, ӕмӕ дзы федтай, де ’мбӕлттӕ кӕмдӕр куыд бадынц. Иууылдӕр уым сты, ӕмӕ бӕрӕг у, сӕ рӕстӕг хъӕлдзӕгӕй кӕй арвыстой. Фӕлӕ дзы цыдӕр нӕ фаг кӕны. Ӕмӕ цыдӕр дӕр нӕ, фӕлӕ чидӕр – ды!
Ӕмӕ хъуыдытӕ кӕныс: «Цымӕ мӕн цӕуылнӕ фӕхуыдтой?»
Кӕд сӕм фыццаг цымыдисӕй кастӕ, уӕд сӕм ныр та мӕсты кӕныс. Афтӕ дӕм кӕсы, ӕмӕ сӕ нал хъӕуыс! Де ’мбӕлттӕй иу дӕр демӕ нал ис, раст сӕ цыма дымгӕ ахаста. Дӕхимӕ иунӕг кӕсыс ӕмӕ дӕхицӕн дзурыс: «Ӕмбӕлттӕ мын цӕуылнӕ ис?»
Тест
Ӕцӕг у ӕви нӕ
Бирӕ ӕмбӕлттӕ дын куы уа, уӕд дӕхимӕ иунӕг никуы кӕсдзынӕ.
Социалон сетьты дын бирӕ ӕмбӕлттӕ куы уа, уӕд дӕхимӕ иунӕг никуы кӕсдзынӕ.
Дӕ зонгӕтӕм бирӕ СМС-тӕ куы ’рвитай, уӕд дӕхимӕ иунӕг никуы кӕсдзынӕ.
Ӕдзух иннӕтӕн куы ’ххуыс кӕнай, уӕд дӕхимӕ иунӕг никуы кӕсдзынӕ.
Ацы хъуыдытӕй иу дӕр раст нӕу.
Цӕуылнӕ?
Хабар ӕцӕгӕй куыд у
Бирӕ ӕмбӕлттӕ дын уа, уый ӕнӕмӕнг ууыл дзурӕг нӕу, ӕмӕ дӕхимӕ иунӕг никуы кӕсдзынӕ.
«Ӕз ме ’мбӕлттӕн хорз дӕн, фӕлӕ мӕм хатгай афтӕ фӕкӕсы, ӕмӕ сӕм ӕз та нымады дӕр нӕ дӕн. Уымӕй фыддӕр ницы ис, ӕмӕ дын ӕмбӕлттӕ куы уа, фӕлӕ дӕм уӕддӕр афтӕ куы кӕса, ӕмӕ сӕ нӕ хъӕуыс» (Аннӕ).
Социалон сетьты дын бирӕ ӕмбӕлттӕ уа, уый ӕнӕмӕнг ууыл дзурӕг нӕу, ӕмӕ дӕхимӕ иунӕг никуы кӕсдзынӕ.
«Иуӕй-иутӕ сӕхицӕн ӕмбӕлттӕ фембырд кӕнынц, цавӕрдӕр статуэткӕтӕ куыд ӕмбырд кӕнай, афтӕ. Фӕлӕ адӕймагмӕ стыр коллекци дӕр куы уа, уӕддӕр уыдон ӕмбӕлттӕ схонӕн нӕй. Уӕдӕ дын интернеты цы ӕмбӕлттӕ ис, уыдон дӕр ахӕм статуэткӕтӕй уӕлдай не сты – кӕд уыдонӕй исты пайда ис, уӕд ахӕм ӕмбӕлттӕй дӕр» (Элейн).
Дӕ зонгӕтӕм бирӕ СМС-тӕ ӕрвитай, уый ӕнӕмӕнг ууыл дзурӕг нӕу, ӕмӕ дӕхимӕ иунӕг никуы кӕсдзынӕ.
«Хатгай, иунӕг куы вӕййын, уӕд мӕ телефонмӕ ӕркӕс-ӕркӕс фӕкӕнын, мыййаг мӕм СМС ничи ӕрбарвыста, зӕгъгӕ. Ӕмӕ мӕм ахӕм рӕстӕг куы ничи фӕфыссы, уӕд мын ноджы зындӕр вӕййы!» (Серенӕ).
Ӕдзух иннӕтӕн хорздзинад аразай, уый ӕнӕмӕнг ууыл дзурӕг нӕу, ӕмӕ дӕхимӕ иунӕг никуы кӕсдзынӕ.
«Ме ’мбӕлттӕн „нӕ“ никуы ницӕмӕй дзырдтон, фӕлӕ мӕм уыдон та бынтон ӕндӕр зӕрдӕ дардтой. Хорздзинад сын кӕй арӕзтон, ууыл нӕ фӕсмон кӕнын. Фӕлӕ мӕнӕн хорзӕй куыд никуы ницы сарӕзтой, уый диссаг у!» (Ричард).
Уӕдӕ цы ис зӕгъӕн. Йӕхимӕ иунӕг чи кӕсы, ахӕм адӕймаджы фыццаджыдӕр хъӕуы йӕ зондахаст фӕивын. Иу ӕрыгон чызг, Джанетт, загъта: «Адӕймагмӕ ахӕм ӕнкъарӕнтӕ кӕй вӕййы, уый фыццаджыдӕр йӕхи аххос вӕййы, иннӕты аххос нӕ, фӕлӕ».
Кӕд дӕхимӕ иунӕг кӕсыс кӕнӕ дӕм афтӕ кӕсы, ӕмӕ дын ӕмбӕлттӕ нӕй, уӕд дӕ бон цы у саразын?
Цы дын баххуыс кӕндзӕн
Дӕхицӕн аргъ кӕнын зон.
«Афтӕ куы хъуыды кӕнай, ӕмӕ никӕй хъӕуыс, уӕд дӕхимӕ иунӕг кӕсын райдайдзынӕ. Дӕхи уый аккагыл куы нӕ нымайай, ӕмӕ дӕ иннӕтӕ се ’мбал хоной, уӕд дын ӕмбӕлттӕ ссарын зын уыдзӕн» (Джанетт).
Библийы фыст ис: «Иннӕты уарз, дӕхи куыд уарзыс, афтӕ» (Галатӕгтӕм 5:14). Цӕмӕй дын хорз ӕмбӕлттӕ уа, уый тыххӕй хъуамӕ дӕхицӕн аргъ кӕнын зонай. Фӕлӕ хиуарзон ма су (Галатӕгтӕм 6:3, 4).
Дӕхицӕн-иу тӕригъӕд кӕнынмӕ ма фӕу.
«Дӕхимӕ иунӕг кӕсай, уый, аныгъуылӕн кӕм ис, ахӕм змисы лӕууынӕй уӕлдай нӕу. Цас фылдӕр дзы лӕууай, уыйас дзы арфдӕр ныгъуылдзынӕ. Дӕ хъуыдытӕ иууылдӕр ууыл куы уой, ӕмӕ никӕй хъӕуыс, уӕд дӕхицӕн тӕригъӕд кӕнын райдайдзынӕ, ӕмӕ никӕй фӕнддзӕн, цӕмӕй де ’мбал уа» (Эрин).
Библийы фыст ис: «Уарзондзинад... йӕхицӕн куыд хуыздӕр уа, ууыл нӕ хъуыды кӕны» (1 Коринфӕгтӕм 13:4, 5). Адӕймаг йӕхиуыл куы свӕййы, уӕд иннӕтыл нал фӕхъуыды кӕны, ӕмӕ ахӕм ӕмбал та никӕй хъӕуы (2 Коринфӕгтӕм 12:15). Рох дӕ ма уӕд: иннӕтӕм куы ’нхъӕлмӕ кӕсай, исчи мемӕ балымӕн уӕд, зӕгъгӕ, уӕд афтӕмӕй ӕмбӕлттӕ тагъд не ссардзынӕ! Ӕмӕ афтӕтӕ куы дзурай, «дзургӕ дӕр мӕм ничи кӕны» кӕнӕ «ничи мӕ никуыдӕм хоны», уӕд афтӕ рауайдзӕн, ӕмӕ, амондджын уыдзынӕ ӕви нӕ, уый иннӕтӕй кӕнгӕ у. Фӕлӕ цымӕ уый раст уыдзӕн?
Ӕмбӕлттӕ ӕвзаргӕйӕ зондджын у.
«Йӕхимӕ иунӕг чи кӕсы, уыдоны фӕфӕнды, цӕмӕй исчи семӕ йӕ рӕстӕг ӕрвита, ӕмӕ иуӕй-иутӕн уӕлдай нал вӕййы, ӕмбалӕн кӕй равзарой, уый. Ӕрмӕстдӕр сӕ уый фӕфӕнды, ӕмӕ сӕ иннӕтӕ се ’мбалыл нымайой. Фӕлӕ чидӕртӕ, чи зоны, сӕхи афтӕ дарой, цыма сӕ хъӕугӕ кӕныс, ӕцӕгӕй та сӕхи пайдайӕн балымӕн сты демӕ. Ӕмӕ уӕд та дӕ уавӕр ноджы фыддӕр фӕуыдзӕн» (Брианн).
Библийы фыст ис: «Зондджынтимӕ чи цӕуы, уый суыдзӕн зондджын, ӕнӕзӕндтимӕ чи лымӕн кӕны, уый та фыдбылызы бахаудзӕн» (Ӕмбисӕндтӕ 13:20). Тынг ӕххормаг адӕймаг, цы бахӕра, уый равзар-бавзар нӕ фӕкӕны. Ӕмӕ ӕмбал кӕмӕн нӕй, уыдонӕй кӕмӕндӕрты дӕр сӕ хабар раст афтӕ рауайы – ӕмбӕлттӕ ӕвзаргӕ нал фӕкӕнынц, цавӕрфӕнды ӕмбалыл дӕр разы вӕййынц. Ӕмӕ чидӕртӕ семӕ сӕхи пайдайӕн куы балымӕн вӕййынц, уӕддӕр сӕм уый ӕвзӕр нӕ фӕкӕсы, уӕдӕ ма ӕмбал ӕндӕр куыд вӕййы, зӕгъгӕ.
Цавӕр хатдзӕг ис скӕнӕн. Рӕстӕгӕй-рӕстӕгмӕ алчидӕр йӕхимӕ иунӕг фӕкӕсы. Ӕмӕ чидӕр ууыл фылдӕр фӕмӕт кӕны, чидӕр та – къаддӕр. Ӕмӕ дӕм кӕд ахӕм ӕнкъарӕнтӕ фӕзыны, уӕддӕр ӕнкъарӕнтӕ йеддӕмӕ ницы сты. Ӕнкъарӕнтӕ фӕзынынц хъуыдытӕй, ӕмӕ адӕймагӕн та йӕ хъуыдытыл йӕ бар цӕуы.
Стӕй иннӕтӕм ӕгӕр бирӕ цӕмӕдӕрты ма ӕнхъӕлмӕ кӕс. «Алкӕмӕ хъуамӕ уымӕ ма ӕнхъӕлмӕ кӕсай, ӕмӕ ӕнустӕм де ’мбал уыдзӕн,– загъта, гыццыл раздӕр кӕй кой кодтам, уыцы чызг, Джанетт,– фӕлӕ дӕ царды уӕддӕр уыдзӕн, дӕ хорзыл чи тыхсдзӕн, ахӕм адӕймӕгтӕ. Ӕмӕ ма уымӕй хуыздӕр цы хъуамӕ уа! Уӕд дӕм афтӕ никуы кӕсдзӕн, ӕмӕ иунӕг дӕ».
Фылдӕр ӕххуыс дӕ хъӕуы? Бакӕс рамкӕ «Иуӕй-иутӕ цӕмӕй фӕтӕрсынц». Ноджыдӕр ма рафысс кусӕн схемӕ «Цы ис саразӕн, дӕхимӕ иунӕг куы кӕсай» PDF форматы.