Мӕ бон цы у саразын, цӕмӕй ӕгӕр ма мӕт кӕнон?

Цӕуыл фӕмӕт кӕныс?

Дӕлдӕр ӕрхастам ӕрыгӕтты ныхӕстӕ. Мыййаг, дӕумӕ дӕр ахӕм хъуыдытӕ фӕзыны?

«Ӕдзух фӕхъуыды кӕнын: „Уӕдта ма..? Уӕдта ма аварийы бахаудыстӕм? Уӕдта ма нӕ самолет ӕрхауди?“ Ахӕм цӕуылдӕрты фӕмӕт кӕнын, ӕмӕ мӕ бынаты ӕндӕр адӕймаг куы уыдаид, уӕд ӕм уыдӕттӕ нымады дӕр нӕ уыдаиккой» (Чарлз).

«Ӕдзухдӕр цӕуылдӕр фӕтыхсын, афтӕ вӕййын, цыма мӕ фӕстейӕ исчи суры. Фыркатайӕ мӕ уд мӕ хъуырмӕ свӕййы, фӕлӕ ма дзы пайда дӕр исты куы уыдаид» (Аннӕ).

«Исчи мын куы фӕзӕгъы, цы тынг дын у, скъолайы ма кӕй ахуыр кӕныс, зӕгъгӕ, уӕд мӕхинымӕр ахъуыды кӕнын: „Куы йӕ зонис, уый куыд зын у“» (Дэниел).

«Афтӕ тыхст вӕййын, цыма мыл мӕ сывӕллӕттӕ алырдыгӕй кӕуынц. Ӕдзух фӕмӕт кӕнын, дарддӕр цы ’рцӕудзӕн кӕнӕ мӕ дарддӕр цы хъӕуы саразын, ууыл» (Лорӕ).

Хабар ӕцӕгӕй куыд у. Библи куыд зӕгъы, афтӕмӕй мах цӕрӕм «тынг уӕззау рӕстӕг» (2 Тимофеймӕ 3:1). Уымӕ гӕсгӕ мӕт ӕмӕ сагъӕстӕй хызт не сты ӕрыгӕттӕ дӕр ӕмӕ, хистӕр кары чи ис, уыдон дӕр.

Мӕт кӕнын алкӕд ӕвзӕр вӕййы?

Кӕй зӕгъын ӕй хъӕуы, нӕ. Библийы фыст ис, зӕгъгӕ, адӕймаг хъуамӕ мӕт кӕна, зынаргъ ын чи у, уыдоны зӕрдӕ барухс кӕныныл (1 Коринфӕгтӕм 7:32–34; 2 Коринфӕгтӕм 11:28).

Зӕгъын ма хъӕуы уый дӕр, ӕмӕ куы тыхсай, уӕд дӕ уый иу ран бадын нӕ уадздзӕн. Зӕгъӕм, иннӕ къуыри дӕ скъолайы хъӕуы фӕлварӕн раттын. Ӕмӕ йыл кӕй мӕт кӕныс, уый тыххӕй ацы къуыри дӕхи цӕттӕ кӕндзынӕ, ӕмӕ ма уый фӕрцы хуыздӕр бӕрӕггӕнӕн дӕр райсдзынӕ!

Бынтон ӕнӕмӕт куы нӕ уай, уӕд куыдфӕндыйы цӕстӕй нӕ кӕсдзынӕ, тӕссаг дын цӕмӕй у, уымӕ. Иу ӕрыгон чызг Серенӕ, зӕгъгӕ, афтӕ загъта: «Чи зоны, мӕт кӕныс, уымӕн ӕмӕ йӕ ӕмбарыс, цыдӕр раст кӕй нӕ аразыс ӕмӕ цӕмӕй дӕ цӕсгом сыгъдӕг уа, уый тыххӕй дӕ цыдӕр фӕивын кӕй хъӕуы». (Абар Иаковы 5:14.)

Хабар ӕцӕгӕй куыд у. Мӕт кӕй кӕныс, уый ма дын, чи зоны, пайда дӕр фӕуа – раст куыд у, афтӕ бакӕнынмӕ дӕ баразӕнгард кӕна.

Фӕлӕ дӕ мӕт ӕмӕ сагъӕстӕ сӕ быны куы скӕной, ӕмӕ тыхст хъуыдытӕй куыд фервӕзай, уый куы нал зонай, уӕд та?

Цӕвиттон. «Тыхст уавӕры куы бахауын ӕмӕ хъуыддаг цӕуыл ахицӕн уыдзӕн, ууыл куы фӕхъуыды кӕнын, уӕд мӕхицӕн ӕнцой нал фӕарын,– загъта 19-аздзыд Ричард.– Уыцы иу хъуыды мӕ сӕры уыйбӕрц фездухын, ӕмӕ мӕм цӕрын дӕр нал фӕцӕуы».

Библийы фыст ис, зӕгъгӕ, «сабыр зӕрдӕ буарӕн у цард» (Ӕмбисӕндтӕ 14:30). Фӕлӕ адӕймаг сагъӕстыл куы свӕййы, уӕд уый та йе ’нӕниздзинадыл ӕвзӕрырдӕм фӕзыны, зӕгъӕм, йӕ сӕр кӕнӕ рисгӕ фӕкӕны кӕнӕ зилгӕ, йӕ ахсӕн дзӕбӕх нал фӕкусы ӕмӕ йӕ зӕрдӕ ӕгӕр тагъд фӕгуыпп-гуыпп кӕны.

Уӕдӕ кӕй мӕт кӕныс, уый дын пайда нӕ, фӕлӕ зиан куы хӕсса, уӕд цы ис саразӕн?

Дӕ бон цы у аразын

• Ахъуыды кӕн, куы мӕт кӕнай, уӕд дзы исты рамбулдзынӕ. «Дӕ хӕстӕ ӕххӕст кӕныныл тыхсай, уый иу хъуыддаг у, фӕлӕ сыл ӕгӕр мӕт кӕнай, уый та – ӕндӕр. Мӕ зӕрдыл ӕрбалӕууыди иу цӕвиттон: мӕт ӕмӕ сагъӕстӕ абарӕн ис хъеллаугӕнӕн къӕлӕтджынимӕ. Афтӕ дӕм кӕсы, цыма цыдӕр аразыс, фӕлӕ ӕцӕгӕй та иу ран лӕууыс» (Кэтрин).

  Библийы фыст ис: «Куы мӕт кӕнат, уӕд уӕ уымӕй йӕ цардыл иу гыццыл дӕр исчи бафтаудзӕн?» (Матфейы 6:27).

  Ацы ныхӕстӕ цӕуыл дзурӕг сты. Мӕтӕй дӕ уавӕр фыддӕр цы фӕуа, ӕндӕр дын хуыздӕр нӕ фӕуыдзӕн.

• Райсом цы уыдзӕн, ууыл ма мӕт кӕн. «Ахъуыды кӕн: ныртӕккӕ цӕуыл мӕт кӕныс, уый ма дӕм афтӕ ахсджиаг кӕсдзӕн, зӕгъӕм, райсом, иу мӕйы фӕстӕ, иу азы фӕстӕ кӕнӕ фондз азы фӕстӕ?» (Энтони).

  Библийы фыст ис: «Райсом цы уыдзӕн, ууыл макуы катай кӕнут, уымӕн ӕмӕ райсомы бонӕн уыдзӕн йӕхи катӕйттӕ. Алы бонӕн дӕр йӕхи зындзинӕдтӕ фаг сты» (Матфейы 6:34).

  Ацы ныхӕстӕ цӕуыл дзурӕг сты. Райсом цы уыдзӕн, ууыл мӕт кӕнынӕй пайда ницы ис, уымӕн ӕмӕ, цӕуыл мӕт кӕныс, уыдӕттӕй цыдӕртӕ, чи зоны, уӕвгӕ дӕр макуы ӕрцӕуой.

• Сахуыр у, дӕ бон фӕивын цы нӕу, уымӕн быхсын. «Алы уавӕрмӕ дӕр дӕ бон куыд у, афтӕ дӕхи бацӕттӕ кӕн. Фӕлӕ дӕ рох ма уӕд, кӕй ис ахӕм уавӕртӕ дӕр, ӕмӕ сыл дӕ бар нӕ цӕуы» (Роберт).

  Библийы фыст ис: «Цӕрдӕг чи у, уыдон нӕ рамбулынц дугъы... ӕмӕ зонындзинӕдтӕ кӕмӕ ис, аргъ уыдонӕн нӕ фӕкӕнынц, уымӕн ӕмӕ, кӕд кӕуыл цы ’рцӕудзӕн, уымӕн ничи ницы зоны» (Екклесиаст 9:11).

  Ацы ныхӕстӕ цӕуыл дзурӕг сты. Царды иуӕй-иу уавӕртӕ дӕ бон фӕивын нӕу, фӕлӕ фӕивӕн ис, цы цӕстӕй сӕм кӕсыс, уый.

• Дӕ уавӕрмӕ ӕндӕр цӕстӕй ракӕс. «Уый бамбӕрстон, ӕмӕ лыстӕг хабӕрттыл ӕгӕр фӕмӕт кӕнын. Фӕхъӕуы мӕ, ахсджиагдӕр цы у, уый сбӕрӕг кӕнын ӕмӕ стӕй мӕ хъарутӕ уымӕ саразын» (Алексис).

  Библийы фыст ис: «Ахсджиагдӕр цы у, уый сбӕлвырд кӕнут» (Филиппӕгтӕм 1:10).

  Ацы ныхӕстӕ цӕуыл дзурӕг сты. Йӕ уавӕрмӕ йӕ бон ӕндӕр цӕстӕй ракӕсын кӕмӕн у, уыдонӕн сӕ сагъӕстимӕ тох кӕнын ӕнцондӕр вӕййы.

• Искӕимӕ аныхас кӕн. «Фӕндзӕм къласы куы уыдтӕн, уӕд-иу скъолайӕ афтӕ тыхстӕй ӕрбацыдтӕн, ӕмӕ-иу хъуыды кодтон, зӕгъын мӕ райсом уырдӕм цӕуын куы нал хъӕуид. Цӕуыл тыхстӕн, уый-иу мӕ мад ӕмӕ мӕ фыдӕн радзырдтон, ӕмӕ-иу мӕм уыдон та лӕмбынӕг хъуыстой. Мӕ фарсмӕ кӕй уыдысты, уый мын тынг баххуыс кодта. Ӕууӕндыдтӕн сыл ӕмӕ сын алцыдӕр мӕ бон уыди сӕрибарӕй дзурын. Ӕмӕ та-иу уый фӕрцы мӕ бон уыди дыккаг бон дӕр скъоламӕ ацӕуын» (Мэрилин).

  Библийы фыст ис: «Сагъӕстӕй адӕймаджы зӕрдӕ ныууӕззау вӕййы, хорз ныхас та зӕрдӕйыл базыртӕ басадзы» (Ӕмбисӕндтӕ 12:25).

  Ацы ныхӕстӕ цӕуыл дзурӕг сты. Дӕ ныййарӕг кӕнӕ дын де ’мбал хорз уынаффӕтӕ ратдзӕн, ӕмӕ уый фӕрцы афтӕ тынг нал мӕт кӕндзынӕ.

• Хуыцаумӕ кув. «Хуыцаумӕ кӕй фӕкувын, уый мын тынг ӕххуыс кӕны, уӕлдайдӕр та хъӕрӕй куы фӕкувын ӕмӕ мӕхӕдӕг мӕхи куы фӕхъусын, уӕд. Уый фӕрцы мӕ сӕр тыхст хъуыдытӕй суӕгъд вӕййы. Стӕй уый дӕр бамбарын, ӕмӕ Йегъовӕ мӕ сагъӕстӕй стырдӕр кӕй у» (Лаурӕ).

  Библийы фыст ис: «Уе ’ппӕт сагъӕстӕ дӕр Хуыцауы бар бакӕнут, уымӕн ӕмӕ уый тыхсы сымахыл» (1 Петры 5:7).

  Ацы ныхӕстӕ цӕуыл дзурӕг сты. Куывдӕн йӕ нысан уый нӕу, цӕмӕй дӕ зӕрдӕйы цы ис, уый кӕй радзырдтай, уый фӕрцы дын фенцондӕр уа. Афтӕмӕй ӕцӕгдӕр фӕныхас кӕныс Йегъовӕ Хуыцауимӕ. Йегъовӕ йӕхӕдӕг загъта: «Тарст ракӕс-бакӕс ма кӕн, уымӕн ӕмӕ ӕз дӕ Хуыцау дӕн. Ӕз дӕ сфидар кӕндзынӕн. Ӕз дын баххуыс кӕндзынӕн» (Исай 41:10).