«Бирӕ дыргъ куы хӕссат..., уӕд уымӕй мӕ Фыд скадджын уыдзӕн» (ИОАН. 15:8).

1, 2. а) Цавӕр фадӕттӕ нын ис иннӕты ныфсыл ныфс ӕфтауынӕн? ӕ) Йегъовӕйӕн цӕй фӕрцы лӕггад кӕнӕм?

ӔРКӔСӔМ-МА дыууӕ цӕввиттонмӕ. Нӕ хотӕй иу бафиппайдта, иу ӕрыгон хо ӕнкъард кӕй у. Уыцы хо йӕм бацыд, ӕмӕ йӕ уацамындмӕ фӕхуыдта. Хӕдзарӕй-хӕдзармӕ куы хъусын кодтой, уӕд ын ӕрыгон хо радзырдта, цӕуыл тыхст, уый. Уацамынды фӕстӕ уыцы ӕрыгон хо Йегъовӕйӕн бузныг загъта, уыцы фӕлтӕрдджын хо йыл кӕй батыхсти, уый тыххӕй. Уыцы ӕрыгон хойы раст ахӕм ӕххуыс хъуыд. Иннӕ хабар та у ахӕм. Иу лӕг ӕмӕ ус уыдысты ӕндӕр бӕстӕйы хъусын кӕнынмӕ, ӕмӕ фӕстӕмӕ сӕхимӕ ӕрыздӕхтысты. Ӕмӕ иу ран бадты цингӕнгӕйӕ радзырдтой, кӕм хъусын кодтой, уым сыл цы хабӕрттӕ ӕрцыд, уыдон. Сӕ ныхӕстӕм сын лӕмбынӕг хъуыста иу ӕрыгон ӕфсымӕр. Цалдӕр азы рацыд, ӕмӕ уыцы ӕрыгон ӕфсымӕр йӕхи рӕвдз кодта ӕндӕр бӕстӕмӕ хъусын кӕнынмӕ ацӕуын, ӕмӕ йӕ зӕрдыл ӕрлӕууыдысты уыцы къай ӕмӕ сӕ ныхӕстӕ. Уыдоны ныхӕстӕм гӕсгӕ йӕ бафӕндыд миссионерӕй лӕггад кӕнын.

² Ацы цӕввитонтӕ кӕсгӕйӕ, ӕвӕццӕгӕн, дӕ зӕрдыл ӕрлӕууыд, дӕуӕн дӕр дӕ цард чи фӕивта кӕнӕ ды йӕ цард хуыздӕрырдӕм кӕмӕн фӕивтай, уыцы адӕймаг. Кӕй зӕгъын ӕй хъӕуы, адӕймагимӕ куы аныхӕстӕ кӕнай, уӕд ын уый йӕ цард нӕ аивдзӕн. Фӕлӕ нын уӕддӕр алы бон дӕр вӕййы фадӕттӕ, цӕмӕй иннӕты ныфсыл ныфс ӕфтауӕм ӕмӕ сӕ фидар кӕнӕм. Цымӕ цӕй фӕрцы у нӕ бон афтӕ кӕнын? Йегъовӕйы сыгъдӕг тыхы фӕрцы. Сыгъдӕг тыхы фӕрцы адӕймагмӕ фӕзыны бирӕ тыхтӕ ӕмӕ хорз миниуджытӕ, ӕмӕ йӕ бон вӕййы йе ’мчырыстӕттӕн фылдӕр ӕххуыс кӕнын ӕмӕ Хуыцауӕн фылдӕр лӕггад кӕнын (Лук. 11:13). Хуыцауы сыгъдӕг тыхы фӕрцы нӕ удыхъӕды ӕрфидар вӕййынц рӕсугъд миниуджытӕ, ӕмӕ бӕрӕг вӕййынц нӕ лӕггады алы хъуыддаджы дӕр. Ӕвӕдза, Хуыцау нын куыд тынг ӕххуыс кӕны! (Бакӕс Галатӕгтӕм 5:22, 23.)

3. а) «Сыгъдӕг тых цы дыргъ дӕтты, уый» нӕ удыхъӕды куы фидар кӕнӕм, уӕд Хуыцауы куыд кадджын кӕндзыстӕм? ӕ) Цавӕр фарстатӕн базондзыстӕм дзуапп?

³ Сыгъдӕг тыхы фӕрцы нӕ удыхъӕды цы миниуджытӕ фӕзыны, уыдон сты, чи нын сӕ дӕтты, уымӕ йӕхимӕ дӕр, Йегъовӕ Хуыцаумӕ дӕр (Кол. 3:9, 10). Чырыстӕттӕ Хуыцауы сӕйраджыдӕр цӕмӕн хъуамӕ фӕзмой, уый тыххӕй Йесо йӕ апостолтӕн афтӕ загъта: «Бирӕ дыргъ куы хӕссат..., уӕд уымӕй мӕ Фыд скадджын уыдзӕн»a (Иоан. 15:8). «Хуыцауы сыгъдӕг тых цы дыргъ дӕтты, уый» нӕ удыхъӕды куы фидар кӕнӕм, уӕд уый бӕрӕг уыдзӕн нӕ ныхӕстӕй ӕмӕ нӕ хъуыддӕгтӕй. Ӕмӕ уый та нӕ Хуыцауӕн хӕссы кад (Матф. 5:16). Сыгъдӕг тых цы дыргъ дӕтты, уый цӕмӕй хицӕн кӕны, ацы фыддунейы адӕммӕ цы миниуджытӕ ис, уыдонӕй? Сыгъдӕг тых цы дыргъ дӕтты, уый куыд ис нӕ удыхъӕды фидар кӕнӕн? Уыцы хъуыддаг ӕнцон цӕуылнӕ у? Цӕмӕй ацы фарстатӕн дзуапп раттӕм, уый тыххӕй нӕ хъӕуы, сыгъдӕг тыхы фӕрцы адӕймагмӕ цы миниуджытӕ фӕзыны, уыдонӕй фыццаг ӕртӕмӕ ӕркӕсын. Уыдон сты уарзондзинад, цин ӕмӕ фарн.

Уарзӕм, Хуыцау куыд уарзы, афтӕ

4. Йесо йӕ фӕдылдзӕуджыты цавӕр уарзондзинад ӕвдисынмӕ разӕнгард кодта?

⁴ Сыгъдӕг тыхы фӕрцы адӕймагмӕ цы уарзондзинад фӕзыны, уый тынг хицӕн кӕны, ацы дунейы уарзондзинадыл нымад цы у, уымӕй. Цӕмӕн ис афтӕ зӕгъӕн? Уымӕн ӕмӕ уыцы уарзт цӕуы Хуыцауӕй, ӕмӕ йын ӕмбал нӕй. Ӕмӕ уый бӕрӕг у, Йесо хохыл кӕй дзырдта, уыцы зындгонд ныхӕстӕй. (Бакӕс Матфейы 5:43–48.) Йесо загъта, тӕригъӕдджынтӕ дӕр кӕй зонынц хорздзинад хорздзинадӕй фидын. Фӕлӕ афтӕ кӕй кӕнынц, уый ууыл дзурӕг нӕу, ӕмӕ сӕхи иннӕты тыххӕй бирӕ цӕмӕйдӕрты фӕцух кӕнынц. Кӕд нӕ фӕнды, цӕмӕй «нӕ уӕларвон Фыды фырттӕ» уӕм, уый тыххӕй хъуамӕ уыдонӕй хицӕн кӕнӕм. Адӕм нын куыд сты, мах сын афтӕ нӕ уыдзыстӕм, фӕлӕ сӕм Йегъовӕ цы зӕрдӕ дары, мах дӕр сӕм ахӕм зӕрдӕ дардзыстӕм. Фӕлӕ цымӕ нӕ бон куыд у Йесойы фӕдзӕхстмӕ хъусын, уе знӕгты уарзут, зӕгъгӕ.

5. Чи нӕ ӕфхӕры, уыдонмӕ нӕ бон куыд у нӕ уарзондзинад ӕвдисын?

⁵ Ӕркӕсӕм-ма Библийӕ иу хабармӕ. Павел ӕмӕ Силӕ Филиппты куы хъусын кодтой, уӕд сӕ ӕрцахстой, тынг сӕ фӕнадтой, ахӕстоны сӕ баппӕрстой ӕмӕ сын сӕ къӕхтӕ хъӕдын хъадаманты бакодтой. Стӕй ма сӕ ахӕстонгӕс дӕр бафхӕрдта. Фӕлӕ зӕхх куы нынкъуысыд, ӕмӕ куы ссӕрибар сты, уӕд, мыййаг, бацин кодтой, ахӕстонгӕсӕй нӕ маст райсдзыстӕм, зӕгъгӕ? Нӕ, ахӕм хъуыды сӕм нӕ фӕзынд. Ахӕстонгӕсы хорз сӕ кӕй фӕндыд, сӕ зӕрдӕты удуӕлдай уарзт кӕй сыгъди, уый тыххӕй йын йӕхицӕн дӕр ӕмӕ йӕ бинонтӕн се ’ппӕтӕн дӕр ӕвӕстиатӕй баххуыс кодтой, цӕмӕй раст фӕндагыл ӕрлӕууыдаиккой (Хъуыд. 16:19–34). Абон дӕр бирӕ ӕфсымӕртӕ, «чи сӕ ’фхӕры, уыдонӕн арфӕ кӕнынц» (Ром. 12:14).

6. Не ’фсымӕрты удуӕлдай уарзтӕй кӕй уарзӕм, уый куыд ис равдисӕн? (Кӕс рамкӕ 21 фарсыл.)

⁶ Не ’мчырыстӕтты та хъуамӕ ноджы тынгдӕр уарзӕм. Мах «хӕсджын стӕм, цӕмӕй не ’фсымӕрты тыххӕй нӕ удтӕ дӕттӕм». (Бакӕс 1 Иоанны 3:16–18.) Кӕй зӕгъын ӕй хъӕуы, фылдӕр хатт нӕ уарзондзинад рабӕрӕг вӕййы гыццыл хъуыддӕгты. Зӕгъӕм, не ’фсымӕры ныхасӕй кӕнӕ хъуыддагӕй фӕхъыг кодтам. Уӕд нӕ уарзондзинад равдисдзыстӕм, куы фӕраздӕр уӕм ӕмӕ йемӕ куы бафидауӕм, уӕд (Матф. 5:23, 24). Фӕлӕ нын нӕхи исчи куы фӕхъыг кӕна, уӕд та? «Хатыр кӕнынмӕ» цӕттӕ вӕййӕм? Ӕви нӕ зӕрдӕйы маст фӕхӕссӕм? (Пс. 86:5). Сыгъдӕг тых адӕймаджы зӕрдӕйы цы удуӕлдай уарзт сӕвзӕрын кӕны, уый нын ӕххуыс кӕндзӕн иннӕты гыццыл рӕдыдтытӕ рох кӕнын ӕмӕ сын хатыр кӕнын, «Йегъовӕ сын зӕрдӕйӕ куыд ныххатыр кӕны», афтӕ (Кол. 3:13, 14; 1 Пет. 4:8).

7, 8. а) Хуыцауы уарзын ӕмӕ адӕмы уарзын кӕрӕдзийыл куыд баст сты? ӕ) Цӕмӕй Йегъовӕйы тынгдӕр уарзӕм, уый тыххӕй нӕ бон цы у аразын? (Кӕс нывы 19 фарсыл.)

⁷ Нӕ бон цы у аразын, цӕмӕй не ’фсымӕрты удуӕлдай уарзтӕй уарзӕм? Уый тыххӕй хъуамӕ Хуыцауы фылдӕр уарзӕм (Еф. 5:1, 2; 1 Иоан. 4:9–11, 20, 21). Библи куы кӕсӕм, куы йыл хъуыды кӕнӕм ӕмӕ Хуыцаумӕ куы кувӕм, уӕд нӕ зӕрдӕты нӕ уӕларвон Фыдӕн фӕзындӕн фылдӕр бынат ӕмӕ йӕ тынгдӕр уарздзыстӕм. Фӕлӕ нӕ уый тыххӕй нӕ рӕстӕгӕй хъӕуы, хуыздӕр куыддӕриддӕр у, афтӕ пайда кӕнын.

⁸ Ӕрхӕссӕм ахӕм цӕвиттон. Зӕгъӕм, алы бон дӕр нын ӕрмӕстдӕр уыцыиу рӕстӕг ис бар Библи кӕсынӕн, хъуыды йыл кӕнынӕн ӕмӕ Йегъовӕмӕ кувынӕн. Уӕд цымӕ ӕппӕт тыхтӕй нӕ архаиккам, цӕмӕй нӕ уыцы рӕстӕг мацы бахъыгдара ӕмӕ нын Йегъовӕйӕн цы рӕстӕг ис, уый ӕндӕр мацӕуыл ацӕуа? Кӕй зӕгъын нӕй хъӕуы, мах ахӕм уавӕры не стӕм. Махӕн кӕдфӕнды дӕр у нӕ бон Хуыцаумӕ кувын ӕмӕ Библи кӕсын. Фӕлӕ уӕддӕр хъуамӕ архайӕм, цӕмӕй, Хуыцауӕн цы рӕстӕг рахицӕн кӕнӕм, уый нын ӕндӕр хъуыддӕгтыл ма ацӕуа. Цӕмӕй Йегъовӕмӕ ӕввахсӕй-ӕввахсдӕр кӕнай, уый тыххӕй алы бон дӕр дӕ рӕстӕгӕй, хуыздӕр куыд у, афтӕ пайда кӕныс?

«Хуыцауы сыгъдӕг тых цы циндзинад дӕтты, уый»

9. Сыгъдӕг тых нын куыд ӕххуыс кӕны, цӕмӕй нӕ циндзинад ма бамынӕг уа?

⁹ Цин у, сыгъдӕг тых цы дыргъ дӕтты, уымӕй, ӕмӕ цыфӕнды зын уавӕрты дӕр нӕ бамынӕг вӕййы. Цин абарӕн ис, фыдуавӕрты чи зайы, ахӕм фидар зайӕгойимӕ. Ӕгас зӕххыл дӕр Хуыцауы лӕггадгӕнджытӕй бирӕтӕ, «кӕд сын бирӕ зындзинӕдтӕ уыди, уӕддӕр, Хуыцауы сыгъдӕг тых цы циндзинад дӕтты, уый фӕрцы Хуыцауы ныхасыл баууӕндыдысты» (1 Фес. 1:6). Иннӕтӕ та нырмӕ дӕр ӕмбӕлынц зындзинӕдтыл. Фӕлӕ сын Йегъовӕ йӕ сыгъдӕг тыхы уылты дӕтты хъарутӕ, «цӕмӕй цингӕнгӕйӕ ӕмӕ фӕразонӕй кӕронмӕ фидар фӕлӕууой» (Кол. 1:11). Фӕлӕ цымӕ уыцы цин кӕцӕй цӕуы?

10. Циндзинад нын цы хӕссы?

¹⁰ Хӕйрӕджы дунейы ссарӕн ис, «ӕууӕнк кӕуыл нӕй, уыцы хъӕздыгдзинад», махӕн та Йегъовӕ радта, ӕнустӕм чи уыдзӕн, ахӕм хорздзинӕдтӕ (1 Тим. 6:17; Матф. 6:19, 20). Йегъовӕ нын зӕрдӕ ӕвӕры ӕнӕкӕрон цардӕй, ӕмӕ нын уый у цины хос. Циндзинад ма нын хӕссы, ӕгас дунейы дӕр нын бирӕ хотӕ ӕмӕ ӕфсымӕртӕ кӕй ис, уый дӕр. Уӕлдай тынгдӕр та нын нӕ циныл цин ӕфтауы, Хуыцауимӕ ӕнгом кӕй стӕм, уый. Мах дӕр Давидау фӕнды Йегъовӕйы кадджын кӕнын. Давид кӕд йе знӕгтӕй рамбӕхс-бамбӕхс кодта, уӕд дӕр Йегъовӕйы зарӕджы скадджын кодта: «Де ’нувыд уарзт у цардӕй зынаргъдӕр, ӕмӕ дӕ уый тыххӕй ме ’взаг кадджын кӕндзӕн. Цалынмӕ цӕрон, уӕдмӕ дын арфӕ кӕндзынӕн» (Пс. 63:3, 4). Зындзинӕдты рӕстӕг дӕр Йегъовӕйы цингӕнгӕйӕ куы кадджын кӕнӕм, уӕд нӕ зӕрдӕтӕ уыдзысты сабыр.

11. Йегъовӕйӕн цингӕнгӕйӕ цӕмӕн хъуамӕ лӕггад кӕнӕм?

¹¹ Апостол Павел чырыстӕтты разӕнгард кодта: «Ӕдзухдӕр цин кӕнут. Ӕмӕ ма уын ноджыдӕр зӕгъын: цин кӕнут!» (Фил. 4:4). Чырыстӕттӕ Йегъовӕйӕн цингӕнгӕйӕ цӕмӕн хъуамӕ лӕггад кӕной? Уымӕн ӕмӕ уый баст у, Сайтан Йегъовӕйы хицаудзинад кӕй сдзырддаг кодта, уыимӕ. Сайтан зӕгъы, зӕгъгӕ, Хуыцауӕн зӕрдиагӕй ничи лӕггад кӕны (Иов 1:9–11). Йегъовӕйӕн ӕнӕзивӕгӕй куы лӕггад кӕнӕм, фӕлӕ нын уый циндзинад куы нӕ хӕсса, уӕд нӕ нывонд уыдзӕн сахъат. Уымӕ гӕсгӕ нӕ фӕнды псаломзарӕггӕнӕджы ныхӕстӕм гӕсгӕ архайын: «Йегъовӕйӕн лӕггад кӕнут цингӕнгӕйӕ. Фырцинӕй зарут ӕмӕ афтӕмӕй ӕрлӕуут йӕ разы» (Пс. 100:2). Хуыцауӕн цингӕнгӕйӕ ӕмӕ зӕрдиагӕй куы лӕггад кӕнӕм, уӕд ын уымӕй кад хӕсдзыстӕм.

12, 13. Нӕ бон куыд у тар хъуыдытимӕ тох кӕнын?

¹² Кӕй зӕгъын ӕй хъӕуы, Йегъовӕйы лӕггадгӕнджытӕн дӕр иуӕй-иу хатт сӕ ныфс асӕтты ӕмӕ тар хъуыдытимӕ фӕтох кӕнынц (Фил. 2:25–30). Ахӕм рӕстӕг нын цы баххуыс кӕндзӕн? Ефесӕгтӕм 5:18, 19 ис ахӕм уынаффӕ: «Ӕдзухдӕр Хуыцауы сыгъдӕг тыхӕй хайджын ут. Кӕрӕдзийӕн зарут псаломтӕ, кады зарджытӕ ӕмӕ дины зарджытӕ ӕмӕ Йегъовӕйы кадӕн зӕрдӕбынӕй зарут». Нӕ бон куыд у ацы уынаффӕмӕ гӕсгӕ архайын?

¹³ Тар хъуыдытӕ-иу нӕ сӕ быны куы скӕной, уӕд-иу Йегъовӕйӕ ӕххуыс курӕм ӕмӕ ӕппӕт тыхтӕй архайӕм, цӕмӕй, «раппӕлинаг» цы у, уыдӕттыл хъуыды кӕнӕм. (Бакӕс Филиппӕгтӕм 4:6–9.) Иуӕй-иутӕ фӕхъусынц нӕ Паддзахады зарджытӕм ӕмӕ сӕхӕдӕг дӕр фӕзарынц, ӕмӕ афтӕмӕй сӕ зӕрдӕ бахъӕлдзӕг кӕнынц ӕмӕ сӕ бон свӕййы сӕ хъуыдытӕ хорз цӕмӕдӕр саразын. Иу ӕфсымӕр тынг уӕззау уавӕры кӕй бахауд, уый тыххӕй-иу арӕх йӕхимӕ ныхъхъуыста, ӕмӕ афтӕ зӕгъы: «Хуыцаумӕ-иу зӕрдӕбынӕй арӕх куывтон. Стӕй ма сахуыр кодтон Паддзахады зарджытӕй цалдӕр. Уыцы рӕсугъд кады зарджытӕ-иу хъӕрӕй кӕнӕ мӕхинымӕр куы зарыдтӕн, уӕд-иу мӕ зӕрдӕ фарнӕй байдзаг. Уыцы рӕстӕг ма райстам чиныг „Баввахс у Иегъовӕмӕ“, ӕмӕ йӕ иу азмӕ дыууӕ хатты бакастӕн. Уыцы чиныг мӕ зӕрдӕйӕн уыди ӕвдадзы хосы хуызӕн. Зонын ӕй, афтӕ кӕй архайдтон, уый тыххӕй мын Йегъовӕ кӕй арфӕ кодта».

«Кӕрӕдзийыл баст уӕм фарны тӕгтӕй»

14. Сыгъдӕг тыхы фӕрцы цы фарн сӕвзӕры, уый диссаг цӕмӕй у?

¹⁴ Ӕхсӕнадӕмон конгресстӕм алыхуызон бӕстӕтӕй цы хотӕ ӕмӕ ӕфсымӕртӕ ӕрцӕуы, уыдон кӕрӕдзийыл тынг фӕцин кӕнынц. Уыцы конгрессты бӕрӕг вӕййы, Хуыцауы адӕмы ’хсӕн ӕгас зӕххыл дӕр фарн ӕмӕ иудзинад кӕй ис. Абон бирӕ адӕмыхӕттытӕ кӕрӕдзимӕ знаджы цӕстӕй кӕсынц, фӕлӕ уыцы адӕмыхӕттытӕй искӕй куы фенынц «зӕрдиагӕй архайгӕ, Хуыцауы сыгъдӕг тых кӕй дӕтты, уыцы иудзинады цӕрыныл», стӕй кӕрӕдзийыл «фарны тӕгтӕй» баст кӕй сты, уӕд бирӕтӕ дисы бафтынц (Еф. 4:3). Ӕмӕ уыцы иудзинад диссаг куыннӕ у, уымӕн ӕмӕ бирӕты бахъуыд сӕ царды стыр ивындзинӕдтӕ скӕнын.

15, 16. а) Петр раздӕр цавӕр зондыл хӕст уыд ӕмӕ йӕ уый куыд хъыгдардта? ӕ) Йегъовӕ Петрӕн йӕ зондахаст аивынӕн куыд баххуыс кодта?

¹⁵ Алыхуызон адӕмы баиу кӕнын ӕнцон нӕу. Хуыцауы адӕмы ’хсӕн иудзинад цӕй фӕрцы ис, уый бамбарыны тыххӕй ӕркӕсӕм, фыццаг ӕнусы чи цард, уыцы апостол Петры хабармӕ. Петр ӕнӕсунӕтгонд адӕмтӕм цы зӕрдӕ дардта, уый бӕрӕг у йӕ ныхӕстӕй: «Сымах хорз зонут, дзуттӕгтӕн ӕндӕр адӕмыхӕттытӕм хӕстӕг цӕуын кӕнӕ семӕ лымӕн кӕнын кӕй не ’мбӕлы. Фӕлӕ мын Хуыцау бамбарын кодта, ӕз иу адӕймаджы дӕр чъизи кӕнӕ ӕлгъагыл кӕй хъуамӕ ма нымайон» (Хъуыд. 10:24–29; 11:1–3). Уыцы рӕстӕг иууылдӕр ахӕм зондыл хӕст кӕй уыдысты, уый тыххӕй Петрмӕ, ӕвӕццӕгӕн, йӕ гыццылӕй фӕстӕмӕ афтӕ каст, ӕмӕ Закъонмӕ гӕсгӕ хъуамӕ ӕрмӕстдӕр дзуттӕгты уарзтаид. Стӕй, ӕвӕццӕгӕн, хъуыды кодта, ӕмӕ иннӕ адӕмтӕ йе знӕгтӕ сты ӕмӕ сӕ хъуамӕ йе сӕфт уынаb.

¹⁶ Ахъуыды-ма кӕн, Петр Корнилийы хӕдзармӕ куы бацыд, уӕд куыд фӕуыдаид, ууыл. Раздӕр ӕндӕр адӕмыхӕттытӕм ӕвзӕр цӕстӕй чи каст, уыцы адӕймагӕн цымӕ цы баххуыс кодта, цӕмӕй иннӕ адӕмыхӕттытимӕ «фарны тӕгтӕй» баст уыдаид, «буары уӕнгтӕ кӕрӕдзийыл» куыд баст сты, афтӕ? (Еф. 4:3, 16). Петр Корнилийы хӕдзармӕ куы бацыд, уымӕй йын цалдӕр боны размӕ Хуыцауы сыгъдӕг тых йӕ зӕрдӕ байгом кодта, ӕмӕ уый фӕрцы йӕ зондахаст аивта ӕмӕ ӕндӕр адӕмыхӕттытӕм ӕндӕр цӕстӕй кӕсын райдыдта. Йегъовӕ йын цӕстылуайӕны фӕрцы бамбарын кодта, чи цы адӕмыхаттӕй у, уымӕ кӕй нӕ кӕсы (Хъуыд. 10:10–15). Уымӕ гӕсгӕ Петр Корнилийӕн загъта: «Ныр ӕй ӕцӕг бамбӕрстон, Хуыцау кӕй никӕй хъулон кӕны, фӕлӕ алы адӕмӕй йӕ зӕрдӕйӕн адджын у, чи дзы тӕрсы ӕмӕ рӕстӕй чи цӕры, ахӕм адӕймаг» (Хъуыд. 10:34, 35). Петр йӕ зондахаст аивта ӕмӕ ӕфсымӕртимӕ се ’ппӕтимӕ дӕр иудзинады уыди (1 Пет. 2:17).

17. Хуыцауы адӕмы ’хсӕн цы иудзинад ис, уый диссаг цӕмӕй у?

¹⁷ Петры хабарӕй хорз зыны, абон Хуыцауы адӕмы ’хсӕн цы диссаджы ивындзинӕдтӕ цӕуы, уый. (Бакӕс Исай 2:3, 4.) Милуангай адӕймӕгтӕ «ӕппӕт адӕмтӕй, мыггӕгтӕй, адӕмыхӕттытӕй ӕмӕ ӕвзӕгтӕй» сӕ зондахаст аивтой, цӕмӕй, «цы у Хуыцауы фӕндон: цы йӕм кӕсы хорз, цы йын у ӕхсызгон ӕмӕ цы у йӕ цӕсты ӕххӕст», уымӕ гӕсгӕ архайой (Рарг. 7:9; Ром. 12:2). Бирӕтӕ дзы кӕддӕр цыдысты Хӕйрӕджы дунейы зондыл, ӕмӕ иннӕтӕм кастысты знаджы цӕстӕй, никӕй уарзтой ӕмӕ никӕимӕ фидыдтой. Фӕлӕ, Хуыцауы Ныхас кӕй ахуыр кодтой, уый фӕрцы ӕмӕ сыгъдӕг тыхы ӕххуысы фӕрцы базыдтой, «фарн цы хӕссы», уымӕ тырнын (Ром. 14:19). Ӕмӕ се ’хсӕн цы иудзинад ис, уый Хуыцауӕн хӕссы кад.

18, 19. а) Алкӕй бон дӕр нӕ цы у аразын, цӕмӕй не ’мбырды фарн ӕмӕ иудзинад уа? ӕ) Иннӕ статьяйӕ цавӕр фарстайӕн базондзыстӕм дзуапп?

¹⁸ Алкӕй бон дӕр нӕ цы у аразын, цӕмӕй Хуыцауы адӕмы ’хсӕн фарн ӕмӕ иудзинад уа? Бирӕ ӕмбырдты ис ӕндӕр бӕстӕтӕй ӕрцӕуӕг хотӕ ӕмӕ ӕфсымӕртӕ. Иуӕй-иутӕ дзы раздӕр хӕст уыдысты ӕндӕр ӕгъдӕуттыл. Чидӕр та дзы не ’взаг хорз нӕ зоны. Ӕмӕ цӕмӕй семӕ хуыздӕр базонгӕ уӕм, ууыл архайӕм? Хуыцауы Ныхас дӕр нӕ ууыл ахуыр кӕны. Рагон Ромы ӕмбырды цы дзуттӕгтӕ ӕмӕ ӕндӕр адӕмыхӕттытӕ уыди, уыдонмӕ Павел ныффыста: «Чырысти сымахыл куыд баузӕлыд, сымах дӕр уӕ кӕрӕдзийыл афтӕ узӕлут, цӕмӕй Хуыцау скадджын уа» (Ром. 15:7). Мыййаг, де ’мбырды ис, хорз кӕй нӕма зоныс, ахӕм адӕймаг?

¹⁹ Цыма у нӕ бон аразын, цӕмӕй ныл Хуыцауы сыгъдӕг тых ӕндава? Дзуапп ын базондзыстӕм иннӕ статьяйы, сыгъдӕг тыхы фӕрцы ма адӕймаджы удыхъӕды цавӕр миниуджытӕ фӕзыны, уыдон куы равзарӕм, уӕд.

«Дӕ тых у хорз. Фӕндагамонӕг мын уӕд рӕстзӕрдӕты зӕххыл» (ПС. 143:10).

1, 2. а) Йегъовӕ йӕ лӕггадгӕнджыты йӕ сыгъдӕг тыхӕй куыд хайджын кодта, уыдонӕн цӕвиттонтӕ ӕрхӕсс. ӕ) Хуыцауы сыгъдӕг тых адӕймагыл ӕрмӕстдӕр цавӕрдӕр бӕлвырд уавӕрты фендавы? Бамбарын ӕй кӕн.

ХУЫЦАУЫ сыгъдӕг тых куыд архайы, ууыл куы фӕхъуыды кӕныс, уӕд дӕ цӕстытыл цы ауайы? Мыййаг дӕ зӕрдыл Гедеоны ӕмӕ Самсоны домбай хъуыддӕгтӕ ӕрлӕууынц? (Тӕрх. 6:33, 34; 15:14, 15). Ӕви ахъуыды кӕныс, фыццаг ӕнусы чырыстӕттӕ куыд хъӕбатыр уыдысты кӕнӕ Стефан Сӕйраг тӕрхондоны раз лӕугӕйӕ куыд сабыр уыд, ууыл? (Хъуыд. 4:31; 6:15). Кӕнӕ та, чи зоны, дӕ зӕрдыл ӕрлӕууы, абон ӕхсӕнадӕмон конгрессты цы стыр циндзинад вӕййы, уый, афтӕ ма, не ’фсымӕртӕй нейтралитеты тыххӕй ахӕстоны чи бады, уыдон куыд иузӕрдион сты ӕмӕ хъусын кӕныны хъуыддаг куыд апарахат ис, уый? Ацы хабӕрттӕй се ’ппӕтӕй дӕр бӕрӕг у, Хуыцауы сыгъдӕг тых куыд архайы, уый.

² Цымӕ Хуыцауы сыгъдӕг тых адӕймагыл ӕрмӕстдӕр цавӕрдӕр бӕлвырд уавӕрты фендавы? Кӕй зӕгъын ӕй хъӕуы, нӕ. Хуыцауы Ныхас чырыстӕттӕй афтӕ зӕгъы, зӕгъгӕ, уыдон «Хуыцауы сыгъдӕг тыхы коммӕ кӕсынц», «Хуыцауы сыгъдӕг тых куыд амоны, афтӕ кӕнынц» ӕмӕ «Хуыцауы сыгъдӕг тыхы разамындмӕ гӕсгӕ цӕрынц» (Гал. 5:16, 18, 25). Ацы ныхӕстӕй бӕрӕг у, сыгъдӕг тых нӕ цардыл ӕдзух кӕй ӕндавы. Мах хъуамӕ Йегъовӕйӕн алы бон дӕр лӕгъстӕ кӕнӕм, цӕмӕй нын йӕ сыгъдӕг тыхы уылты ӕндава нӕ хъуыдытыл, нӕ дзыхыныхасыл ӕмӕ нӕ хъуыддӕгтыл. (Бакӕс Псалом 143:10.) Хуыцауы сыгъдӕг тыхӕн бар куы дӕттӕм, цӕмӕй ныл ӕндава, уӕд нӕм фӕзындзӕн, иннӕтӕн удӕнцой чи дӕтта ӕмӕ Хуыцауӕн кад чи хӕсса, ахӕм миниуджытӕ.

3. а) Хуыцауы сыгъдӕг тыхы разамындмӕ цӕмӕн хъуамӕ хъусӕм? ӕ) Цавӕр фарстатӕ равзардзыстӕм?

³ Хуыцауы сыгъдӕг тыхы разамындмӕ цӕмӕн хъуамӕ хъусӕм? Уымӕн ӕмӕ ныл ӕндӕр тых, Хуыцауы сыгъдӕг тыхы ныхмӕ чи цӕуы, уый тынг ӕндавы. Библи уыцы тых хоны «тӕригъӕдджын буар» – нӕ рагфыдӕл Адамӕй нӕ туджы кӕй рахастам, уыцы ӕнӕххӕстдзинад ӕмӕ тӕригъӕдджын фӕндтӕ. (Бакӕс Галатӕгтӕм 5:17.) Фӕлӕ цымӕ куыд ӕмбаргӕ у, Хуыцауы сыгъдӕг тыхы разамындмӕ хъусын, зӕгъгӕ? Нӕ бон куыд у нӕ тӕригъӕдджын буары фӕндты ныхмӕ тох кӕнын? Ацы фарстатӕн дзуапп базондзыстӕм, сыгъдӕг тыхы фӕрцы ма цы ӕхсӕз миниуӕджы фӕзыны, уыдон куы равзарӕм, уӕд. Уыцы миниуджытӕ сты «бирӕфӕразондзинад, хӕларзӕрдӕдзинад, хорздзинад, уырнындзинад, фӕлмӕн удыхъӕд» ӕмӕ «хиуыл хӕцын» (Гал. 5:22, 23).

Фӕлмӕн удыхъӕд ӕмӕ бирӕфӕразондзинады фӕрцы ӕмбырды вӕййы фарн

4. Фӕлмӕн удыхъӕд ӕмӕ бирӕфӕразондзинады фӕрцы ӕмбырды фарн куыд вӕййы?

⁴ Бакӕс Колоссӕгтӕм 3:12, 13. Ӕмбырды фарн вӕййы «фӕлмӕн удыхъӕды» ӕмӕ «бирӕфӕразондзинады» фӕрцы. Ацы миниуджытӕ нын ӕххуыс кӕнынц, цӕмӕй иннӕтӕм хорз зӕрдӕ дарӕм, цӕмӕй-иу ма мӕсты кӕнӕм ӕмӕ нӕ исчи ныхасӕй кӕнӕ хъуыддагӕй куы фӕхъыг кӕна, уӕд дзы нӕ маст ма исӕм. Кӕд, мыййаг, не ’мчырыстӕттӕй искӕимӕ кӕрӕдзи нӕ бамбӕрстам, уӕд нын бирӕфӕразондзинад баххуыс кӕндзӕн, цӕмӕй уыцы адӕймагӕй ма адард уӕм ӕмӕ йемӕ бафидауӕм. Уӕдӕ цымӕ ӕмбырды фӕлмӕн удыхъӕд ӕмӕ бирӕфӕразондзинад ӕнӕмӕнгдӕр хъӕуынц? О, уымӕн ӕмӕ иууылдӕр ӕнӕххӕст стӕм.

5. Павел ӕмӕ Варнавӕйы ’хсӕн цы рауад, ӕмӕ уыцы хабарӕй цы у бӕрӕг?

⁵ Ӕркӕсӕм-ма, Павел ӕмӕ Варнавӕйы хабармӕ. Уыдон хорз хабар парахат кӕнгӕйӕ иумӕ уӕхски-уӕхск бирӕ азты дӕргъы фӕлӕггад кодтой. Сӕ дыууӕмӕ дӕр уыди хорз миниуджытӕ. Фӕлӕ, иухатт, «афтӕ тынг фӕбыцӕу сты», ӕмӕ кӕрӕдзийӕ фӕхицӕн сты (Хъуыд. 15:36–39). Ацы хабарӕй бӕрӕг у, хатт суанг Хуыцауы иузӕрдион лӕггадгӕнджыты ’хсӕн дӕр ахӕм хабӕрттӕ кӕй рауайы. Не ’мчырыстӕттӕй искӕимӕ кӕрӕдзи куы нӕ бамбарӕм, уӕд куыд ис афтӕ аныхас кӕнӕн, цӕмӕй нӕ ныхас хылмӕ ма асайа ӕмӕ кӕрӕдзийӕ бынтон ма адард уӕм?

6, 7. а) Цӕмӕй нӕ ныхас не ’мчырыстӕттӕй искӕимӕ хылмӕ ма асайа, уый тыххӕй нын Библийӕ цавӕр уынаффӕ баххуыс кӕндзӕн? ӕ) Цы пайда у, адӕймаг байхъусынмӕ рӕвдз куы уа, дзурын ӕмӕ мӕсты кӕнынмӕ та тагъд куы нӕ кӕна, уӕд?

⁶ Библийы иуӕй-иу тӕлмацты куыд фыст у, афтӕмӕй Павел ӕмӕ Варнавӕ тынг кӕй фӕхыл сты, уый уыд ӕнӕнхъӕлӕджы. Не ’мчырыстӕттӕй искӕимӕ цыдӕр хъуыддагыл ныхас кӕнгӕйӕ мӕсты кӕнын куы райдайӕм, уӕд хорз уаид Иаковы уынаффӕмӕ байхъусын: «Алы адӕймаг дӕр хъуамӕ рӕвдз уа байхъусынмӕ, дзурын ӕмӕ мӕсты кӕнынмӕ та тагъд ма кӕна, уымӕн ӕмӕ адӕймагӕн мӕстыйӕ йӕ бон нӕу, Хуыцауы цӕсты раст цы у, уый аразын» (Иак. 1:19, 20). Кӕй зӕгъын ӕй хъӕуы, уавӕр куыд амона, уымӕ гӕсгӕ нӕ бон у ныхас ӕндӕрырдӕм аздахын кӕнӕ йӕ ӕндӕр рӕстӕгмӕ аргъӕвын йе та цалынмӕ ныхас хылмӕ нӕ асайдта, уӕдмӕ ацӕуын (Ӕмб. 12:16; 17:14; 29:11).

⁷ Цы пайда у ацы уынаффӕмӕ хъусын? Адӕймаджы фӕхъӕуы рӕстӕг, цӕмӕй йӕ маст ссӕуа, уыцы хъуыддаг Йегъовӕйӕн радзура ӕмӕ йӕхи куыд дардзӕн, ууыл ахъуыды кӕна. Афтӕмӕй Хуыцауы сыгъдӕг тыхӕн бар ратдзӕн, цӕмӕй йын разамынд дӕтта (Ӕмб. 15:1, 28). Адӕймаг сыгъдӕг тыхӕй хайджын куы вӕййы, уӕд вӕййы фӕлмӕн ӕмӕ бирӕфӕразон ӕмӕ, Ефесӕгтӕм 4:26, 29 цы уынаффӕ ис, уымӕ гӕсгӕ фӕархайы: «Куы смӕсты уат, уӕддӕр тӕригъӕд ма саразут... Уӕ дзыхӕй иу ӕмбыд ныхас дӕр ма схауӕд. Дзурут, хъӕугӕ сахат адӕймаджы чи бафидар кӕндзӕн, ӕрмӕстдӕр ахӕм хорз ныхӕстӕ, чи уӕм хъуса, уыдонӕн пайда куыд фӕуой». Ӕмӕ, ӕцӕгдӕр, фӕлмӕн ӕмӕ бирӕфӕразон куы уӕм, уӕд не ’мбырды уыдзӕн фарн ӕмӕ иудзинад.

Дӕ бинонты хӕларзӕрдӕдзинадӕй ӕмӕ хорздзинадӕй рӕвдау

8, 9. Хӕларзӕрдӕдзинад ӕмӕ хорздзинад цы сты, ӕмӕ бинонтыл куыд ӕндавынц?

⁸ Бакӕс Ефесӕгтӕм 4:31, 32; 5:8, 9. Адӕймагӕн тӕвд бон рог дымгӕ ӕмӕ уазал дон куыд ӕхсызгон вӕййынц, афтӕ йын хӕларзӕрдӕдзинад ӕмӕ хорздзинад дӕр тынг ӕхсызгон вӕййынц. Ахӕм миниуджытӕ бинонты кӕрӕдзийыл бӕттынц. Адӕймаг хӕларзӕрдӕ куы вӕййы, уӕд иннӕтыл фӕхъуыды кӕны, сӕ фарсмӕ балӕууы ӕмӕ сӕ ныхасӕй фӕрӕвдауы. Хорздзинад дӕр хӕларзӕрдӕдзинадау дзӕбӕх миниуӕг у, ӕмӕ рабӕрӕг вӕййы, иу адӕймаг иннӕмӕн куы фӕлӕггад кӕны, уымӕй. Ахӕм адӕймаг ма вӕййы рӕдау дӕр (Хъуыд. 9:36, 39; 16:14, 15). Фӕлӕ хорздзинадмӕ хауы ноджы фылдӕр хъуыддӕгтӕ.

⁹ Хорздзинад йӕ удыхъӕды кӕмӕн ахъары, уый вӕййы уӕздан ӕмӕ ӕгъдауджын. Адӕймагмӕ ахӕм миниуӕг кӕй ис, уый канд йӕ хъуыддӕгтӕй нӕ вӕййы бӕрӕг, фӕлӕ мидӕгӕй цавӕр адӕймаг у, уымӕй. Ӕрхӕссӕм ахӕм цӕвиттон, сылгоймаг йӕ бинонтӕн дыргътӕ ныхсадта. Уый фӕстӕ сӕ алыг кодта, ӕмӕ лӕмбынӕг кӕсы, дыргътӕ рӕгъӕд сты ӕви нӕ, стӕй кӕсы, цӕмӕй мидӕгӕй дӕр ӕмӕ ӕддейӕ ӕмбыд ма разыной. Раст афтӕ, сыгъдӕг тыхӕй цы хорздзинад цӕуы, уый хъуамӕ ӕндава нӕ цардыл ӕнӕхъӕнӕй дӕр.

10. Бинонтӕн цы баххуыс кӕндзӕн, цӕмӕй, сыгъдӕг тыхы фӕрцы цы миниуджытӕ фӕзыны, уыдон сӕ удыхъӕды фидар кӕной?

¹⁰ Чырыстон бинонтӕн цы баххуыс кӕндзӕн, цӕмӕй кӕрӕдзимӕ хӕларзӕрдӕ дарой ӕмӕ кӕрӕдзийӕн хорздзинад аразой? Уымӕн сын тынг баххуыс кӕндзӕн, Хуыцауы Ныхас лӕмбынӕг куы ахуыр кӕной (Кол. 3:9, 10). Хӕдзары хицӕуттӕй иуӕй-иутӕ сӕ бинонтимӕ бинонты ахуыры изӕр исты ӕрмӕг куы фӕахуыр кӕнынц, уӕд ма равзарынц, сыгъдӕг тыхы фӕрцы адӕймагмӕ цы миниуджытӕ фӕзыны, уыдонӕй кӕцыдӕртӕ. Ӕмӕ уыцы миниуджытӕ ӕвзарын зын нӕу. Дӕ бон у спайда кӕнын, уыцы миниуджыты тыххӕй де ’взагыл цы ӕрмӕг ис, уымӕй. Зӕгъӕм, ис спълан кӕнӕн, цӕмӕй-иу алы къуыри дӕр дыууӕ-ӕртӕ абзацмӕ ӕркӕсат, ӕмӕ афтӕ алы миниуӕг равзарынӕн дӕр цалдӕр къуырийы рахицӕн кӕнат. Цы ӕрмӕг ӕвзарат, уым цы стихтӕ уа, уыдон-иу бакӕсут ӕмӕ-иу сыл аныхас кӕнут. Ахъуыды-иу кӕнут, цы базонат, уымӕй куыд ис царды спайда кӕнӕн ӕмӕ-иу Йегъовӕмӕ скувут, цӕмӕй уын арфӕ кӕна (1 Тим. 4:15; 1 Иоан. 5:14, 15). Куыд хъуыды кӕныс, афтӕмӕй бинонтӕ ӕнгомдӕр ӕмӕ адджындӕр нӕ уыдзысты?

11, 12. Хӕларзӕрдӕдзинад цавӕр миниуӕг у, уый дыууӕ къайы кӕй равзӕрстой, уый сын куыд баххуыс кодта?

¹¹ Сӕ цард ӕрӕджы чи баиу кодта, иу ахӕм къайы фӕндыди, цӕмӕй ӕнгомдӕр уыдаиккой. Уый тыххӕй сфӕнд кодтой лӕмбынӕг равзарын, сыгъдӕг тыхы фӕрцы адӕймагмӕ цы миниуджытӕ фӕзыны, уыдон. Цымӕ сын уый исты пайда ӕрхаста? Ус афтӕ зӕгъы: «Ӕнувыддзинад ӕмӕ иузӕрдиондзинад хӕларзӕрдӕдзинадмӕ кӕй хауынц, уый куы базыдтам, уӕд кӕрӕдзимӕ бынтон ӕндӕр цӕстӕй кӕсын райдыдтам. Архайӕм, цӕмӕй кӕрӕдзийы ныхасӕн аргъ кӕнӕм ӕмӕ кӕрӕдзийӕн хатыр кӕнӕм. Стӕй ма сахуыр стӕм „бузныг“ ӕмӕ „бахатыр кӕн“дзурын дӕр».

¹² Ӕндӕр къайӕн та сӕ ныхас кӕрӕдзийыл нӕ бадт, ӕмӕ бамбӕрстой, хӕларзӕрдӕдзинад сын кӕй нӕ фаг кӕны. Уӕд сфӕнд кодтой иумӕ уыцы миниуӕг лӕмбынӕг равзарын. Цы сын бантыст? Лӕг дзуры: «Уыцы миниуӕг кӕй равзӕрстам, уый руаджы кӕрӕдзийы нал аххосджын кодтам, фӕлӕ кӕрӕдзийыл тынгдӕр ӕууӕндын райдыдтам, цы хорз миниуджытӕ нӕм ис, уыдонӕн аргъ кӕнын сахуыр стӕм. Нӕ хъус кӕрӕдзимӕ тынгдӕр райдыдтам дарын. Стӕй ма мӕ цардӕмбалӕн уый бар лӕвӕрдтон, цӕмӕй йӕ хъуыдытӕ сӕрибарӕй дзырдтаид, ӕмӕ-иу ын йӕ ныхӕстӕм нӕ мӕсты кодтон. Уый тыххӕй та мӕ хъуыд мӕ сӕрбӕрзонддзинад ферох кӕнын. Уыцы миниуӕгӕй нӕ царды пайда кӕнын куы райдыдтам, уӕд раздӕрау нӕхи нал рӕстытӕ кодтам. Ӕмӕ нын уый тынг баххуыс кодта». Цымӕ дӕуӕн дӕр дӕ бинонтӕн исты пайда уыдзӕн, Хуыцауы сыгъдӕг тых цы дыргъ дӕтты, уый куы равзарат, уӕд?

Иунӕгӕй куы вӕййӕм, уӕд дӕр нӕ уырнындзинады сӕрты нӕ хизӕм

13. Нӕ уырнындзинад цӕмӕй хъуамӕ хъахъхъӕнӕм?

¹³ Чырыстӕттӕ хъуамӕ Хуыцауы сыгъдӕг тыхӕн бар дӕттой, цӕмӕй сын разамынд дӕтта, адӕмы ’хсӕн дӕр ӕмӕ иунӕгӕй куы вӕййынц, уӕд дӕр. Хӕлд нывтӕ ӕмӕ ӕнӕгъдау ирхӕфсӕнтӕ Сайтаны дунейы абон куыд парахат сты, афтӕ никуы. Ӕмӕ уымӕй нӕ уырнындзинадӕн тынг тӕссаг у. Ахӕм уавӕры чырыстӕттӕн цы кӕнгӕ у? Хуыцауы Ныхас нӕ фӕдзӕхсы: «Ныууадзут, ӕлгъагӕй уӕм цыдӕриддӕр ис, уый, стӕй уыцы ӕнӕхъӕугӕ миниуӕг – ӕвзӕрдзинад, ӕмӕ, сымах фервӕзын кӕнынхъом чи у, уыцы дзырд сӕрныллӕгӕй уӕ зӕрдӕты тауын бауадзут» (Иак. 1:21). Уырнындзинад дӕр у, сыгъдӕг тых цы дыргъ дӕтты, уыцы миниуджытӕй сӕ иу. Цӕй уӕдӕ ӕркӕсӕм, уырнындзинад нын куыд ӕххуыс кӕны, цӕмӕй нын Йегъовӕйы раз сыгъдӕг цӕсгом уа.

14. Адӕймагмӕ фидар уырнындзинад куы нӕ уа, уӕд ӕвзӕр хъуыддӕгтыл ӕнцонтӕй куыд бафтдзӕн?

¹⁴ Нӕ уырнындзинад фидар куы уа, уӕд, Йегъовӕ удӕгас Хуыцау кӕй у, ууыл дызӕрдыг дӕр нӕ кӕндзыстӕм. Фӕлӕ афтӕ куы нӕ уа, уӕд ӕвзӕр хъуыддӕгтыл ӕнцонтӕй бафтдзыстӕм. Ӕркӕсӕм-ма, рагзаманты Хуыцауы адӕм цы митӕ кодтой, уымӕ. Йегъовӕ пехуымпар Йезекилӕн раргом кодта, адӕм сусӕгӕй цы ӕлгъаг митӕ кодтой, уый: «Адӕймаджы фырт, уыныс, Израилы адӕмы хистӕр лӕгтӕ талынджы, мидӕггаг уӕтты, алкӕмӕн дӕр йӕ гуымиры кӕм ис, уым цытӕ кӕнынц, уый? Уыдон дзурынц: „Йегъовӕ нӕ нӕ уыны. Йегъовӕ ацы зӕхх ныууагъта“» (Йез. 8:12). Ӕмбарыс, сӕ бӕллӕх цӕй мидӕг уыди, уый? Уыдоны нӕ уырныдта, Йегъовӕ сын сӕ митӕ кӕй уыны. Йегъовӕйы удӕгас Хуыцауыл нӕ нымадтой.

15. Йегъовӕ удӕгас Хуыцау кӕй у, ууыл куы ӕууӕндӕм, уӕд нӕ уый куыд хъахъхъӕндзӕн?

¹⁵ Ныр та ӕркӕсӕм ӕндӕр хабармӕ – Иосифы хабармӕ. Кӕд Иосиф йӕ бинонтӕй ӕмӕ йӕ адӕмӕй дард уыд, уӕддӕр Потифары усӕн нӕ бакуымдта ӕнӕгъдау ми саразыныл. Цӕуылнӕ? Иосиф афтӕ загъта: «Куыд хъуамӕ бакӕнон ахӕм фыддзинад ӕмӕ Хуыцауы раз тӕригъӕд куыд хъуамӕ саразон?» (Райд. 39:7–9). Иосиф Йегъовӕйы удӕгас Хуыцауыл нымадта. Кӕд мах дӕр афтӕ хъуыды кӕнӕм, уӕд ӕнӕгъдау ирхӕфсӕнтӕй нӕхи хиздзыстӕм кӕнӕ, Хуыцауы зӕрдӕмӕ цы нӕ цӕуы, уый сусӕгӕй нӕ араздзыстӕм. Ахӕм зондыл хӕст куы уӕм, уӕд фӕзмдзыстӕм псаломзарӕггӕнӕджы. Уый афтӕ загъта: «Ӕз цӕрдзынӕн рӕстзӕрдӕйӕ мӕ хӕдзары мидӕг. Ницӕйаг цы у, ахӕмӕй мӕ цӕстыты раз ницы ӕрӕвӕрдзынӕн» (Пс. 101:2, 3).

Дӕ зӕрдӕ хъахъхъӕн ӕмӕ хиуылхӕцгӕ у

16, 17. а) Ӕмбисӕндты куыд фыст ис, афтӕмӕй «ӕнӕзонд лӕппу» къӕппӕджы куыд бахауд? ӕ) 26 фарсыл цы ныв ис, уымӕ гӕсгӕ нӕ алкӕмӕндӕр тӕссаг цӕмӕй у?

¹⁶ Хиуыл хӕцын у, сыгъдӕг тыхӕй цы миниуджытӕ гуыры, уыдонӕй фӕстаг. Ацы миниуӕг нын ӕххуыс кӕны, цӕмӕй нӕхи хизӕм, Хуыцауы цӕсты ӕвзӕр цы хъуыддӕгтӕ сты, уыдонӕй. Стӕй ма нын ӕххуыс кӕны нӕ зӕрдӕ хъахъхъӕнынӕн дӕр (Ӕмб. 4:23). Ӕркӕсӕм-ма, хӕтаг сылгоймаджы фӕдыл чи ацыд, уыцы «ӕнӕзонд лӕппуйы» тыххӕй Ӕмбисӕндты 7:6–23 цы фыст ис, уымӕ. Уый «фӕцӕйцыд, сылгоймаг кӕм цард, уыцы уынджы рӕзты» ӕмӕ йӕ къӕппӕджы бахауд. Уырдӕм, ӕвӕццӕгӕн, йӕ фырцымыдисӕй бацыд. Ӕмӕ йӕ ӕмбаргӕ дӕр нӕ бакодта, «йӕ уд» цӕстыфӕныкъуылдмӕ фыдбылызы кӕй баппӕрста, уый.

¹⁷ Уыцы лӕппуйӕн йӕ бон куыд уыди йӕхи фыдбылызӕй бахизын? Мӕнӕ ацы фӕдзӕхстмӕ, «дӕ къах дӕ йӕ фӕндӕгтӕм ма бахӕссӕд», зӕгъгӕ, куы байхъуыстаид, уӕд (Ӕмб. 7:25). Уый махӕн дӕр зондзонӕн у. Кӕд нӕ фӕнды, цӕмӕй нын Хуыцауы сыгъдӕг тых разамынд дӕтта, уӕд хъуамӕ нӕхи хизӕм, фӕлварӕн нын цы суыдзӕн, уымӕй. Зӕгъӕм, адӕймаг, гӕнӕн ис, уыцы «ӕнӕзонд лӕппуйау» йӕхи фыдбылызы баппара, телевизоры каналтӕ куы ракъӕпп-бакъӕпп кӕна кӕнӕ Интернеты исты куы агура, уӕд. Афтӕ барӕй кӕна ӕви нӕ, уӕддӕр, гӕнӕн ис, ӕмӕ дзы хӕлд нывтӕ фена. Ӕмӕ афтӕмӕй, гӕнӕн ис, гыццылгай фӕцахуыр уа порнографимӕ кӕсыныл. Уӕд йе ’фсарм цъар сӕвӕрдзӕн ӕмӕ Йегъовӕйӕ адард уыдзӕн. Йӕ цард та кӕнгӕ у, Йегъовӕ йӕм цы цӕстӕй кӕсы, уымӕй. (Бакӕс Ромӕгтӕм 8:5–8.)

18. Цы у нӕ бон аразын, цӕмӕй нӕ зӕрдӕ хъахъхъӕнӕм, ӕмӕ уый тыххӕй хиуылхӕцындзинад цӕмӕн хъӕуы?

¹⁸ Исты ӕнӕгъдау нывтӕ куы фенӕм, уӕд нӕ бон у нӕ цӕстытӕ иннӕрдӕм азилын, ӕмӕ, уӕвгӕ, ӕнӕуи дӕр хъуамӕ афтӕ кӕнӕм. Уый та ууыл дзурӕг уыдзӕн, ӕмӕ нӕм хиуылхӕцындзинад ис. Уымӕй хуыздӕр та уаид, ахӕм хабӕрттӕй нӕхи бынтондӕр куы хизиккам! (Ӕмб. 22:3). Нӕхицӕн арӕнтӕ куы сӕвӕрӕм ӕмӕ сӕ сӕрты куы нӕ хизӕм, уӕд нӕм хиуылхӕцындзинад уыдзӕн. Зӕгъӕм, нӕ компьютер ахӕм ран куы уа, цӕмӕй йӕ иууылдӕр уыной, уӕд нӕхи бахъахъхъӕндзыстӕм. Иуӕй-иутӕ компьютерыл фӕкусынц кӕнӕ телевизормӕ фӕкӕсынц, сӕ фарсмӕ исчи куы вӕййы, ӕрмӕстдӕр уӕд. Иннӕтӕ та Интернетӕй ӕппындӕр нӕ пайда кӕнынц. (Бакӕс Матфейы 5:27–30.) Цӕй уӕдӕ алцыдӕр аразӕм, цӕмӕй нӕхи дӕр ӕмӕ нӕ бинонты дӕр хъахъхъӕнӕм, ӕмӕ нӕ бон уа Хуыцауӕн «сыгъдӕг зӕрдӕйӕ, сыгъдӕг цӕсгомӕй ӕмӕ ӕнӕхин уырнындзинадӕй» лӕггад кӕнын (1 Тим. 1:5).

19. Хуыцауы сыгъдӕг тыхӕн уый бар кӕй дӕттӕм, цӕмӕй нын разамынд дӕтта, уый нын цы пайда у?

¹⁹ Хуыцауы сыгъдӕг тыхы фӕрцы нӕм цы миниуджытӕ фӕзыны, уыдон нын стыр пайда хӕссынц. Фӕлмӕн удыхъӕд ӕмӕ бирӕфӕразондзинады фӕрцы ӕмбырды вӕййы фарн. Хӕларзӕрдӕдзинад ӕмӕ хорздзинад бинонты кӕнынц амондджындӕр. Уырнындзинад ӕмӕ нын хиуылхӕцындзинад та ӕххуыс кӕнынц, цӕмӕй Йегъовӕимӕ ӕнгом уӕм ӕмӕ нын йӕ разы сыгъдӕг цӕсгом уа. Уымӕй уӕлдай та, Галатӕгтӕм 6:8 цы ныхӕстӕ ис фыст, уыдон нӕ ныфс уадзынц: «Хуыцауы сыгъдӕг тыхы цы фӕнды, уый чи тауы, уый та сыгъдӕг тых ӕркӕндзӕн ӕнусон цардмӕ». Хуыцауы сыгъдӕг тыхӕн уый бар чи дӕтты, цӕмӕй йын разамынд дӕтта, уыдоны Йегъовӕ Чырыстийы нывонды фӕрцы ӕмӕ йӕ сыгъдӕг тыхы фӕрцы схайджын кӕндзӕн ӕнусон цардӕй.