26 УРОК
Ӕвзӕр хабӕрттӕ цӕмӕн цӕуы ӕмӕ адӕм зындзинӕдтӕ цӕмӕн ӕвзарынц?
Исты ӕвзӕр хабар куы ’рцӕуы, уӕд адӕймаг ахъуыды кӕны: «Ахӕм бӕллӕх цӕмӕн ӕрцыд?» Фӕлӕ хорз у, ӕмӕ ацы фарстайӕн Библийы дзуапп ис!
1. Ӕвзӕр хабӕрттӕ цӕуын кӕй райдыдта, уый Хӕйрӕджы аххос цӕмӕн у?
Сайтан Хӕйрӕг Хуыцауы ныхмӕ рацыд. Хӕйрӕджы фӕндыд, цӕмӕй иннӕтӕн хицау уыдаид. Уымӕ гӕсгӕ фыццаг адӕмы, Адам ӕмӕ Евӕйы, йӕ зондыл акодта, ӕмӕ уыдон дӕр Хуыцауы ныхмӕ рацыдысты. Уый йӕ къухы бафтыд, Евӕйы кӕй асайдта, уый фӕрцы (Райдиан 3:1–5). Баууӕндын ӕй кодта, Йегъовӕ сӕ хорз цыдӕр кӕй сусӕг кӕны. Йӕ ныхӕстӕй афтӕ уад, ӕмӕ адӕм Хуыцауы коммӕ куы нӕ кӕсой, уӕд амондджындӕр уыдзысты. Хӕйрӕг Евӕйӕн афтӕ кӕй загъта, нӕ амӕлдзынӕ, зӕгъгӕ, уый уыди фыццаг мӕнг ныхас. Уымӕ гӕсгӕ Библи Хӕйрӕджы хоны «мӕнгдзурӕг ӕмӕ мӕнгдзинады фыд» (Иоанны 8:44).
2. Адам ӕмӕ Евӕ куыд бакодтой?
Йегъовӕ Адам ӕмӕ Евӕйӕн алцыдӕр фагӕй фылдӕр радта. Загъта сын, Едемы цӕхӕрадоны сӕ бон алы бӕласӕй дӕр кӕй у хӕрын. Ӕрмӕст сын иу бӕласӕй загъта, ма дзы бахӕрут, зӕгъгӕ (Райдиан 2:15–17). Фӕлӕ дзы уыдон уӕддӕр бахордтой. Библийы фыст ис, зӕгъгӕ, Евӕ бӕласы дыргътӕй «ӕртыдта ӕмӕ дзы бахордта». Фӕстӕдӕр дзы «бахордта» Адам дӕр (Райдиан 3:6). Афтӕмӕй сӕ дыууӕ дӕр Хуыцауы ныхасы сӕрты ахызтысты. Адам ӕмӕ Евӕ ӕххӕст кӕй уыдысты, уымӕ гӕсгӕ сын зын нӕ уыд, раст цы у, уый аразын. Фӕлӕ зонгӕ-зонын Хуыцауы коммӕ кӕй нӕ бакастысты, уымӕй тӕригъӕд ракодтой ӕмӕ равдыстой, сӕ Хицауыл ӕй кӕй нал нымайынц. Афтӕ кӕй бакодтой, уый сӕ стыр бӕллӕхмӕ ’ркодта (Райдиан 3:16–19).
3. Адам ӕмӕ Евӕ цы сарӕзтой, уый махыл куыд фӕзынд?
Адам ӕмӕ Евӕ тӕригъӕд куы сарӕзтой, уӕд систы ӕнӕххӕст. Ӕмӕ сӕ байзӕддӕгтӕ дӕр сӕ туджы тӕригъӕд рахастой. Библийы Адамы тыххӕй фыст ис: «Иу адӕймаджы аххосӕй дунемӕ ӕрцыд тӕригъӕд, тӕригъӕды уылты та – мӕлӕт, ӕмӕ афтӕмӕй мӕлӕт ахӕлиу ӕппӕт адӕмыл дӕр» (Ромӕгтӕм 5:12).
Зындзинӕдтӕ кӕй ӕвзарӕм, уымӕн ис алыхуызон аххосӕгтӕ. Иуӕй-иу хатт зындзинӕдтӕ февзарӕм, ӕвзӕр уынаффӕтӕ кӕй рахӕссӕм, уый аххосӕй. Хатт та иннӕты ӕвзӕр уынаффӕты тыххӕй. Йе та, ӕнӕнхъӕлӕджы цавӕрдӕр бӕллӕх кӕй ӕрцӕуы, уый тыххӕй. (Бакӕс Екклесиаст 9:11.)
ФЫЛДӔР БАЗОН
Базон, ӕвзӕр хабӕртты ӕмӕ адӕмы зындзинӕдты Хуыцау аххосджын цӕуылнӕ у. Стӕй ма базон, Хуыцау нын нӕ зындзинӕдтӕм цы цӕстӕй кӕсы.
4. Нӕ зындзинӕдты чи у аххосджын?
Бирӕтӕ афтӕ хъуыды кӕнынц, ӕмӕ дуне ис Хуыцауы къухы. Фӕлӕ цымӕ уый афтӕ у? Бакӕсут ВИДЕОРОЛИКМӔ.
Бакӕсут Иаковы 1:13 ӕмӕ 1 Иоанны 5:19 ӕмӕ стӕй аныхас кӕнут ацы фарстайыл:
Зындзинӕдтӕ кӕй ӕвзарӕм ӕмӕ ӕвзӕр хабӕрттӕ кӕй цӕуы, уый Хуыцауы аххос у?
5. Дунейы хицау Хӕйрӕг кӕй у, уый цӕмӕ ’ркодта?
Бакӕсут Райдиан 3:1–6 ӕмӕ стӕй аныхас кӕнут ацы фарстатыл:
Хӕйрӕг цавӕр мӕнг ныхас загъта? (4 ӕмӕ 5 стихтӕ)
Хӕйрӕг Евӕйы ахӕм хъуыдыйыл куыд бафтыдта, ӕмӕ Йегъовӕ адӕмӕй цыдӕр хорздзинад сусӕг кӕны?
Хӕйрӕджы ныхӕстӕм гӕсгӕ, цӕмӕй адӕм амондджын уой, уый тыххӕй хъуамӕ сӕ Хицау Йегъовӕ уа?
Бакӕсут Екклесиаст 8:9 ӕмӕ стӕй аныхас кӕнут ацы фарстайыл:
Абон дунейы хицау Йегъовӕ кӕй нӕу, уый тыххӕй дунейы цытӕ цӕуы?
1) Адам ӕмӕ Евӕ уыдысты ӕххӕст ӕмӕ цардысты дзӕнӕты. Фӕлӕ Хӕйрӕгмӕ байхъуыстой ӕмӕ Йегъовӕйы ныхмӕ рацыдысты
2) Адам ӕмӕ Евӕ Хуыцауы ныхмӕ куы рацыдысты, уӕдӕй фӕстӕмӕ адӕм тӕригъӕдджын хъуыддӕгтӕ аразынц, зындзинӕдтӕ ӕвзарынц ӕмӕ мӕлынц
3) Йегъовӕ кӕрон скӕндзӕн тӕригъӕдӕн, зындзинӕдтӕн ӕмӕ мӕлӕтӕн. Адӕм та уыдзысты ӕххӕст ӕмӕ дзӕнӕты цӕрдзысты
6. Йегъовӕ нын нӕ зындзинӕдтӕм куыдфӕндыйы цӕстӕй нӕ кӕсы
Цымӕ нын Хуыцау нӕ зындзинӕдтӕм куыдфӕндыйы цӕстӕй кӕсы? Ӕркӕс-ма, паддзах Давид ӕмӕ апостол Петр цы ныффыстой, уымӕ. Бакӕсут Псалом 31:7 ӕмӕ 1 Петры 5:7 ӕмӕ стӕй аныхас кӕнут ацы фарстайыл:
Йегъовӕ нын нӕ зындзинӕдтӕ кӕй уыны ӕмӕ ныл кӕй тыхсы, уый тыххӕй цы хъуыды кӕныс?
7. Хуыцау адӕмы зындзинӕдтӕн кӕрон скӕндзӕн
Бакӕсут Исайы 65:17 ӕмӕ Раргомад 21:3, 4 ӕмӕ стӕй аныхас кӕнут ацы фарстайыл:
Йегъовӕ адӕмы зындзинӕдтӕй фӕд дӕр нал ныууадздзӕн. Уый дын удӕнцой цӕмӕн хӕссы?
Зыдтай йӕ?
Хӕйрӕг фыццаг мӕнг ныхас куы загъта, уӕд Йегъовӕйы номыл цъыф бакалдта. Ома адӕм йӕ мӕнг ныхӕсты тыххӕй афтӕ хъуыды кӕнын райдыдтой, ӕмӕ Йегъовӕ рӕстаг Хуыцау нӕу ӕмӕ адӕмы нӕ уарзы. Тагъд Йегъовӕ адӕмы зындзинӕдтӕн кӕрон скӕндзӕн ӕмӕ йӕ ном срухс кӕндзӕн. Ӕндӕр ныхасӕй, ӕппӕты хуыздӕр Хицау кӕй у, уый сбӕлвырд кӕндзӕн. Йегъовӕйы ном кӕй хъуамӕ срухс уа, уый у Дун-дунейы ӕппӕты ахсджиагдӕр хъуыддӕгтӕй сӕ иу (Матфейы 6:9, 10).
ИУӔЙ-ИУТӔ ФӔЗӔГЪЫНЦ: «Зындзинӕдтӕ дӕр Хуыцауӕй сты».
Ахӕм адӕймагӕн цы зӕгъис?
ЦЫ БАЗЫДТАЙ
Зӕххыл ӕвзӕр хабӕрттӕ кӕй цӕуы, уый сӕйраджыдӕр Хӕйрӕджы ӕмӕ фыццаг дыууӕ адӕймаджы аххос у. Йегъовӕ нӕ зындзинӕдтӕм куыдфӕндыйы цӕстӕй нӕ кӕсы ӕмӕ сын тагъд кӕрон скӕндзӕн.
Дӕ зӕрдыл ӕрлӕууын кӕн
Сайтан Хӕйрӕг Евӕйы куыд асайдта?
Адам ӕмӕ Евӕ Хуыцауы ныхмӕ кӕй рацыдысты, уый махыл куыд фӕзынд?
Кӕцӕй йӕ зонӕм, Йегъовӕ нӕ зындзинӕдтӕм куыдфӕндыйы цӕстӕй кӕй нӕ кӕсы?
ФЫЛДӔР ӔРМӔГ
Базон, Библимӕ гӕсгӕ тӕригъӕд цы у, уый.
Фылдӕр базон, Хӕйрӕг Едемы цӕхӕрадоны цы сдзырддаг кодта, уый тыххӕй.
«Хуыцау нын нӕ хъизӕмӕрттӕм ӕнцад цӕмӕн кӕсы?» (2014 азы 1 январы «Хъахъхъӕнӕн мӕсыг»)
Базон, ацы фарстайӕн Библийы цавӕр дзуапп ис, уый.
«Хуыцау цӕмӕн бауагъта, цӕмӕй Дыккаг дунеон хӕсты рӕстӕджы дзуттӕгты цагътаиккой?» (интернет-статья)
Фен, иу нӕлгоймаг куыд базыдта, цард ахӕм уӕззау цӕмӕн у, уый.