Алкӕддӕр зынгзӕрдӕ уӕм
1 Аполлос куыд ӕнувыдӕй лӕггад кодта, уый нын нӕ зӕрдыл лӕууын кӕны, абон хъусын кӕныны хъуыддаджы уӕлдай ӕнувыд чи у, уыцы чырыстӕтты (Ап. к. 18:24–28). Фӕлӕ не ’ппӕты дӕр Библи фӕдзӕхсы: «Кӕддӕриддӕр ут ӕнувыд, цӕхӕр калӕнт уӕ зӕрдӕтӕ» (Ром. 12:11, НТ). Цы нын баххуыс кӕндзӕн, цӕмӕй зынгзӕрдӕ хъусынгӕнджытӕ суӕм ӕмӕ уыцы зынг мынӕг кӕнын ма бауадзӕм?
2 Фидар кӕнӕм зонындзинӕдты руаджы. Йесо йӕ ахуыргӕнинӕгтӕй дыууӕмӕ куы фӕзынд ӕмӕ куы «бамбарын кодта уыдонӕн, Уый тыххӕй загъд цы уыд ӕппӕт Фысты», уӕд загътой: «Нӕ сыгъдис нӕ зӕрдӕ нӕ хуылфы, куы нын дзырдта Уый фӕндагыл?» (Лук. 24:27, 32). Уӕдӕ махӕн дӕр нӕ зӕрдӕтӕ хъуамӕ ма судзой ӕмӕ ма цин кӕнӕм, Хуыцауы Ныхас хуыздӕр куы бамбарӕм, уӕд? О, уырнындзинад зонындзинӕдты руаджы фидар кӕны. Ромӕгтӕм 10:17 фыст ис: «Уырнындзинад у фехъусынӕй». Иегъовӕйы зӕрдӕвӕрдтыл фидарӕй куы ӕууӕндӕм, уӕд нӕ бон уӕвгӕ дӕр нӕ бауыдзӕн, ӕмӕ, цы базыдтам, уыдӕтты тыххӕй ма дзурӕм! (Пс. 144:7; Ап. к. 4:20).
3 Библийӕ нырмӕ цы базыдтам, уый фаг нӕу, цӕмӕй нӕ уарзондзинад Хуыцаумӕ фидар уа ӕмӕ йын алкӕддӕр зынгзӕрдӕйӕ лӕггад кӕнӕм. Хъуамӕ дарддӕр дӕр архайӕм, ӕцӕгад хуыздӕр куыд ӕмбарӕм ӕмӕ Иегъовӕйы тынгдӕр куыд уарзӕм, ууыл. Кӕннод, гӕнӕн ис, ӕмӕ нӕ лӕггадмӕ сабыргай куыдфӕндыйы цӕстӕй кӕсын райдайӕм (Рарг. 2:4). Библи нӕм сиды, «Хуыцау чи у, уый хуыздӕрӕй-хуыздӕр зонынмӕ» (Кол. 1:9, 10, НД).
4 Куыд фӕахуыр кӕнӕм. Уӕдӕ хорз уаид ахъуыды кӕнын, куыд фӕахуыр кӕнӕм, ууыл. Зӕгъӕм, нӕ бон у «Хъахъхъӕнӕн мӕсыг»-ы ахуыргӕнӕн статьяйы дзуаппытӕ бахахх кӕнын ӕмӕ ӕмбырды раст дзуаппытӕ дӕттын. Фӕлӕ цымӕ амынд стихтӕ бакӕсӕм ӕмӕ ахъуыды кӕнӕм, ӕрмӕгӕй нӕ царды куыд спайда кӕнӕм? Библи ӕрвылкъуыри куы фӕкӕсӕм, уӕд, гӕнӕн уӕвгӕйӕ, уыцы сӕртӕм уӕлӕмхасӕн ӕрмӕг бацагурӕм ӕмӕ ахъуыды кӕнӕм, нӕхицӕн дзы зондӕн цы райсӕм, ууыл? (Пс. 76:12, 13; Ӕмб. 2:1–5). Куыд арфӕйаг хъуыддаг у ӕдзух Хуыцауы Ныхасыл хъуыды кӕнын! (1 Тим. 4:15, 16). Афтӕ лӕмбынӕг куы ахуыр кӕнӕм, уӕд нын уый ӕххуыс кӕндзӕн ӕмӕ нын хъару дӕтдзӕн, цӕмӕй уӕм «ӕнувыд хорз хъуыддӕгтӕм» (Тит. 2:14).