Ахуыргӕнинӕгтӕ цӕттӕ кӕнын – иумӕйаг хъуыддаг
1 Исчи Хуыцауы фӕндагыл куы слӕууы, уӕд уый иу адӕймаджы хъаруйы фӕрцы нӕ вӕййы. Йегъовӕйы бон у йе ’ппӕт лӕггадгӕнджыты уылты дӕр ӕххуыс кӕнын, Библи кӕимӕ ахуыр кӕнынц, уымӕн (1 Кор. 3:6–9). Не ’ххуыс ӕрмӕст уый нӕу, ӕмӕ ӕмбырдты зӕрдӕбынӕй дзуаппытӕ дӕттӕм, фӕлӕ ма нӕхи хорз кӕй дарӕм, уый дӕр. Уӕд бӕрӕг уыдзӕн, нӕ царды Хуыцауы сыгъдӕг уд кӕй архайы (Иоан. 13:35; Гал. 5:22, 23; Еф. 4:22, 23). Ноджыдӕр ма нӕ бон куыд у ног ӕрбацӕуджытӕн ӕххуыс кӕнын?
2 Ӕмбырды ӕххуыс. Ӕмбырдтӕм ӕрӕджы цӕуын чи райдыдта, уыдоныл не ’ппӕты бон дӕр у бацин кӕнын. Нӕхӕдӕг-иу фӕраздӕр уӕм ӕмӕ-иу сын зӕрдиаг салам радтӕм, ӕмбырды размӕ ӕмӕ уый фӕстӕ дӕр-иу семӕ аныхас кӕнӕм. Иу лӕг радзырдта, фыццаг хатт ӕмбырдмӕ куы ’рбацыд, уый тыххӕй: «Цӕрӕнбонты цы аргъуанмӕ фӕцыдтӕн, уым никуы федтон, ам иу бонмӕ цас хорз, зӕрдиаг адӕм федтон, уыйбӕрц. Диссаг та уый, ӕмӕ мын ӕнӕзонгӕ адӕм уыдысты. Уайтагъддӕр ӕй бамбӕрстон, ӕцӕгдзинад кӕй ссардтон». Ӕмбырдмӕ йӕ фыццаг ӕрбацыдӕй авд мӕйы куы рацыд, афтӕ уыцы нӕлгоймӕг райста донаргъуыд.
3 Библи чи ахуыр кӕны, уымӕй-иу зӕрдиагӕй раппӕл. Мыййаг, йӕ ныхмӕ цӕуынц, фӕлӕ уӕддӕр Библи ахуыр кӕны? Ӕмбырдтӕ нӕ цух кӕны? Кӕд ӕфсӕрмы кӕны, уӕддӕр ӕмбырды дзуаппытӕ фӕдӕтты? Йӕхи Хъусынгӕнджыты скъоламӕ ныффыста кӕнӕ уацамынды цӕуын райдыдта? Раппӕл-иу дзы, кӕд ацы хъуыддӕгтӕй йӕ къухы исты бафтыд, уӕд. Уый йын тынг ӕхсызгон уыдзӕн ӕмӕ дзы ныфс бауадздзӕн (Ӕмб. 25:11).
4 Адӕймагимӕ Библи чи ахуыр кӕны, уый йын куыд ӕххуыс кӕны. Иуӕй-иутӕ тынг баххуыс кодтой, кӕимӕ ахуыр кӕнынц, уыдонӕн, ахуырмӕ-иу иннӕ хъусынгӕнджыты кӕй фӕхуыдтой, уымӕй. Адӕймаджы ӕмбырдмӕ фӕхон фыццаг ахуыры фӕстӕ. Ӕмбырдтӕм цӕуын куы райдайа, уӕд ӕй иннӕтимӕ зонгӕ кӕн. Мыййаг, исты ӕвзӕр миниуӕгимӕ тох кӕны, зӕгъӕм, архайы йӕ тамако ныууадзыныл? Кӕнӕ, Библи кӕй ахуыр кӕны, уый йӕ бинонтӕй искӕй зӕрдӕмӕ нӕ цӕуы? Ахӕм зындзинӕдты чи уыд ӕмӕ сыл чи фӕуӕлахиз, уыцы хотӕ ӕмӕ ’фсымӕртимӕ куы аныхас кӕна, уӕд фӕфидар уыдзӕн (1 Пет. 5:9).
5 Ног ӕрбацӕуджыты тынг хъӕуы ӕмбырды ’ххуыс, цӕмӕй сӕ уырнындзинад фидар кӕна. Уыцы хъуыддаджы се ’ппӕты бон дӕр у баххуыс кӕнын – ӕцӕг хӕлӕрттау сӕ фарсмӕ балӕууӕм.