Куыд ис райдайӕн Библи ахуыр кӕнын чиныг «Библи цы дзуры»-йы руаджы

Бирӕтӕ нӕ ӕхсызгонӕй ахуыр кӕниккой искӕимӕ Библи, нӕ къухы куы бафтид уыцы ахуыр райдайын, уӕд. Уымӕн та нын баххуыс кӕндзӕн ног чиныг, «Библи бӕлвырдӕй цы дзуры», зӕгъгӕ. Чиныджы 3–7 фӕрстыл цы разныхас ис, уый афтӕ арӕзт у, цӕмӕй уымӕ гӕсгӕ хӕдзары хицауимӕ ныхас райдайӕм. Фӕлтӕрдджын хъусынгӕнӕг чи нӕу, уыдонӕн дӕр ӕнцон уыдзӕн уый руаджы искӕимӕ Библи ахуыр кӕнын райдайын.

◼ Дӕ бон у ныхас райдайын 3-аг фарсмӕ гӕсгӕ:

Ног хабӕрттӕй адӕмы тынгдӕр цы бацагайдта, йе та сӕ мӕты цы ӕфтауы, уый кой скӕн, стӕй хӕдзары хицауы ӕргом раздах, чиныджы 3-аг фарсыл ставдфыстӕй цы фарстытӕ ис, уыдонмӕ ӕмӕ йӕ йӕ хъуыдыйӕ бафӕрс. Стӕй рафӕлдах 4, 5 фӕрстӕ.

◼ Кӕнӕ та дӕ бон у, 4 ӕмӕ 5 фӕрстыл цы фыст ис, уымӕ гӕсгӕ райдайын ныхас:

Дӕ бон у зӕгъын: «Хорз нӕ уаид, ацы хабӕрттӕ куы ’рцӕуиккой?» Йе та бафӕрс: «Нывы цы уыныс, уыдӕттӕй дӕ цы фӕндид фенын?» Стӕй йӕм лӕмбынӕг байхъус.

Уыцы фӕрстыл Библийӕ цы стихтӕ ис, уыдонӕй хӕдзары хицауы искӕцы куы бацымыдис кӕна, уӕд ын, уыцы фарстайы фӕдыл Библи цы дзуры, уый тыххӕй фылдӕр радзур,– аныхас кӕн, уыцы стих чиныджы кӕцы абзацты ӕвзӕрст цӕуы, уыдоныл. (Кӕс фӕлгӕт ацы фарсыл.) Абзацтӕ равзар, Библийы ахуыры рӕстӕг куыд вӕййы, афтӕ. Уый саразӕн ис 5–10 минуты дӕргъы, адӕймагмӕ фыццаг хатт куы бацӕуай, уӕд, тӕккӕ къӕсӕргӕрон дӕр.

◼ Адӕймагимӕ ма ныхас райдайӕн ис 6 фарсмӕ гӕсгӕ:

Хӕдзары хицауӕн равдис, 6 фарсыл бынӕй цы фарстытӕ ис, уыдон ӕмӕ йӕ бафӕрс: «Искуы ацы фарстытӕй искӕцыйыл хъуыды кодтай?» Кӕд дзы кӕцыдӕр фарстмӕ бацамона, уӕд рахиз, чиныджы уыцы фарстӕн дзуапп кӕцы абзацты ис, уыдонмӕ. (Кӕс фӕлгӕт ацы фарсыл.) Уыцы ӕрмӕг иумӕ куы равзарат, уӕд зӕгъӕн уыдзӕн, ӕмӕ ауагътай Библийы ахуыр.

◼ 7 фарсмӕ гӕсгӕ ис равдисӕн, Библи ахуыр кӕнӕн куыд ис, уый:

Бакӕс фыццаг ӕртӕ хъуыдыйады ацы фарсыл, стӕй рафӕлдах 3 сӕр ӕмӕ 1–3 абзацтӕм гӕсгӕ равдис, Библи куыд фӕахуыр кӕнӕм, уый. Йемӕ баныхас кӕн, иннӕ хатт та, 3-аг абзацы цы фарстытӕ ис, уыдонӕн дзуапп кӕй ссардзыстут.

◼ Куыд ис дыккаг хатт фембӕлыныл баныхас кӕнӕн.

Фыццаг ахуыр куы фӕуай, уӕд баныхас кӕн, иннӕ хатт кӕд фембӕлдзыстут, ууыл. Дӕ бон у зӕгъын: «Кӕс ма, цалдӕр минутмӕ базыдтам, цы дзуры Библи ацы ахсджиаг фарсты фӕдыл. Иннӕ хатт та нӕ бон у аныхас кӕнын [зӕгъ, цы фарстыл цӕудзӕн дзырд], ууыл. Иннӕ къуыри та дӕм ацафон ӕрбацӕуон?»

Иегъовӕйы бон куыд хӕстӕг кӕны, афтӕ нӕ нӕ Хуыцау ифтонг кӕны, нӕ хӕслӕвӕрд ӕххӕст кӕнынӕн нӕ цы хъӕуы, уымӕй (Матф. 28:19, 20; 2 Тим. 3:17). Цӕй уӕдӕ ацы диссаджы ног чиныг нӕ къухы хорз кусӕнгарз разынӕд, цӕмӕй-иу адӕмимӕ Библи ахуыр кӕнын райдайӕм.

Куыд ис дӕттӕн чиныг «Библи цы дзуры»

Ацы сыфы ис алыхуызон уынаффӕтӕ, чиныг «Библи цы дзуры» куыд дӕттӕн ис, уый фӕдыл. Хуыздӕр уыдзӕн, дӕхи ныхӕстӕй куы дзурай. Кӕд хъӕуа, уӕд-иу цӕвиттонтӕ гыццыл фӕив, стӕй чиныгӕй амынд абзацтӕ дӕр рагацау бакӕс. Уӕ уавӕртӕм гӕсгӕ ныхас ӕндӕрхуызон дӕр ис райдайӕн (кӕс 2005 азы январы «Нӕ хъусын кӕныны хъуыддаг», 8 ф.).

Армагеддон

◼ «Бирӕтӕ дзырд Армагеддон куы фехъусынц, уӕд сӕ цӕстытыл ауайы, ӕппӕт адӕм дӕр куыд сӕфынц, уый. Диссаг дӕм нӕ фӕкӕсдзӕн, куы базонай, Армагеддон, ӕхсызгонӕй ӕнхъӕлмӕ кӕсын кӕмӕ хъӕуы, ахӕм хабар кӕй у? [Бауадз ӕй йӕ хъуыды зӕгъын. Стӕй бакӕс Раргомад 16:14, 16.] Ӕркӕс-ма, Армагеддоны фӕстӕ цавӕр цард уыдзӕн, уый тыххӕй ам цы фыст ис, уымӕ». Рафӕлдах 82–84 фӕрстӕ ӕмӕ бакӕс 21 абзац.

Библи

◼ «Бирӕтӕ Библи нымайынц Хуыцауы Ныхасыл. Никуы ахъуыды кодтай, адӕм цы чиныг ныффыстой, уый Хуыцауы Ныхас куыд хъуамӕ уа? [Бауадз ӕй йӕ хъуыды зӕгъын. Стӕй бакӕс 2 Петры 1:21 ӕмӕ 19, 20 фӕрстыл 5 абзац.] Ацы чиныг Библийы руаджы дзуапп дӕтты ахӕм фарстытӕн». Равдис ын 6 фарсыл фыст фарстытӕ.

◼ «Абон адӕмӕн цас цыдӕртӕ у сӕ бон базонын, афтӕ никуы. Фӕлӕ дӕм куыд кӕсы, кӕм ис ссарӕн ахӕм зондджын уынаффӕтӕ, цӕмӕй нын царды фӕахъаз уой ӕмӕ амондджын уӕм? [Бауадз ӕй йӕ хъуыды зӕгъын. Стӕй бакӕс 2 Тимофеймӕ 3:16, 17 ӕмӕ 23 фарсыл 12 абзац.] Ацы чиныгӕй базонӕн ис, куыд цӕрын хъӕуы, цӕмӕй нӕ Хуыцауы зӕрдӕ дӕр рухс кӕна ӕмӕ мах дӕр амондджын уӕм». Равдис ын фӕлгӕт ӕмӕ ныв 122, 123 фӕрстыл.

Мӕлӕт/Райгасдзинад

◼ «Бирӕтӕ хъуыды кӕнынц, адӕймаг куы амӕлы, уӕд цы фӕвӕййы, зӕгъгӕ. Куыд дӕм кӕсы, уымӕн, уӕвгӕ, базонӕн ис? [Бауадз ӕй йӕ хъуыды зӕгъын. Стӕй бакӕс Екклесиаст 9:5 ӕмӕ 58, 59 фӕрстыл 5, 6 абзацтӕ.] Ацы чиныг ма ӕмбарын кӕны, Библи зӕрдӕ цӕмӕй ӕвӕры,– мӕрдтӕ райгас уыдзысты, зӕгъгӕ,– уый куыд сӕххӕст уыдзӕн». Равдис ын, 75 фарсыл цы ныв ис, уый.

◼ «Исчи нын куы амӕлы, уӕд нӕ, кӕй зӕгъын ӕй хъӕуы, фӕфӕнды, искуы ма йӕ куы фениккам, афтӕ нӕу? [Бауадз ӕй йӕ хъуыды зӕгъын.] Бирӕтӕн сӕ зӕрдӕтӕм рухс бакаст, Библи райгасы тыххӕй цы ныфс ӕвӕры, уый куы базыдтой, уӕд. [Бакӕс Иоанны 5:28, 29 ӕмӕ 72 фарсыл 16, 17 абзацтӕ.] Ацы сӕры ма ссардзынӕ дзуапп мӕнӕ ацы фарстытӕн дӕр». Равдис ын, 66 фарсыл райдианы цы фарстытӕ ис, уыдон.

Ӕнусон цард

◼ «Адӕмӕн сӕ фылдӕры фӕнды бирӕ азтӕ ӕмӕ ӕнӕнизӕй фӕцӕрын. Уымӕн гӕнӕн куы уаид, уӕд дӕ нӕ фӕндид ӕнустӕм цӕрын? [Бауадз ӕй йӕ хъуыды зӕгъын. Стӕй бакӕс Раргомад 21:3, 4 ӕмӕ 53 фарсыл 17 абзац.] Ацы чиныджы дзырд цӕуы, нӕ бон куыд у ӕнустӕм цӕрын ӕмӕ уыцы ныхӕстӕ куы сӕххӕст уой, уӕд цавӕр цард уыдзӕн, уый тыххӕй».

Бинонтӕ

◼ «Алкӕйдӕр нӕ фӕнды, нӕ бинонтимӕ амондджынӕй куы цӕриккам, афтӕ нӕу? [Бауадз ӕй йӕ хъуыды зӕгъын.] Библи дзуры иу хъуыддаджы тыххӕй, ӕмӕ уый фӕрцы бинонтӕй алкӕмӕндӕр у йӕ бон бинонты амондджын цардӕн ахъаз кӕнын – Хуыцауы уарзондзинад фӕзмын». Бакӕс Ефесӕгтӕм 5:1, 2 ӕмӕ 135 фарсыл 4 абзац.

Хӕдзар

◼ «Бирӕ рӕтты адӕмӕн фӕзын и, сӕ къух цас амоны, уыцы аргъыл хорз хӕдзар ссарын. Куыд хъуыды кӕныс, искуы ахӕм рӕстӕг ӕрцӕудзӕн, ӕмӕ алкӕмӕндӕр хорз хӕдзар уа? [Бауадз ӕй йӕ хъуыды зӕгъын. Стӕй бакӕс Исай 65:21, 22 ӕмӕ 34 фарсыл 20 абзац.] Ацы чиныг ӕмбарын кӕны, Хуыцау уыцы зӕрдӕвӕрд куыд сӕххӕст кӕндзӕн».

Иегъовӕ Хуыцау

◼ «Хуыцауыл чи ӕууӕнды, уыдонӕй бирӕты фӕнды, ӕмӕ йӕм баввахс уой. Зоныс, Библи нын йӕхӕдӕг кӕй дзуры, цӕмӕй йӕм баввахс уӕм? [Бауадз ӕй дзуапп раттын. Стӕй бакӕс Иаковы 4:8а ӕмӕ 16 фарсыл 20 абзац.] Ацы чиныг уый тыххӕй рацыд мыхуыры, цӕмӕй адӕймагӕн баххуыс кӕна йӕхи Библийы руаджы Хуыцауы хуыздӕр базонын». Равдис ын, 8 фарсыл райдианы цы фарстытӕ ис, уыдон.

◼ «Бирӕтӕ кувынц Хуыцаумӕ, срухс уӕд дӕ ном, зӕгъгӕ. Никуы хъуыды кодтай, уый цавӕр ном у, ууыл? [Бауадз ӕй йӕ хъуыды зӕгъын. Стӕй бакӕс Псалом 82:19 ӕмӕ 195 фарсыл 1–3 абзацтӕ.] Ацы чиныгӕй базонӕн ис, Иегъовӕ Хуыцау чи у ӕмӕ йӕм адӕмы тыххӕй цы фӕнд ис, уый фӕдыл Библи бӕлвырдӕй цы дзуры, уый».

Йесо Чырысти

◼ «Ӕгас дунейы дӕр фехъуыстой Йесо Чырыстийы тыххӕй. Иутӕ дзурынц, зӕгъгӕ, уый ӕрмӕстдӕр номдзыд адӕймаг уыд. Иннӕтӕ та йӕ нымайынц Дунедарӕг Хуыцауыл ӕмӕ йын кувынц. Куыд хъуыды кӕныс, исты уӕлдай у, Йесо Чырыстийы кӕуыл нымайӕм?» [Бауадз ӕй йӕ хъуыды зӕгъын. Стӕй бакӕс Иоанны 17:3 ӕмӕ 37, 38 фӕрстыл 3 абзац.] Йӕ хъус ын ӕрдар, уыцы сӕры райдианы цы фарстытӕ ис, уыдонмӕ.

Куывд

◼ «Искуы дӕ фӕндыд базонын, кӕд Хуыцау адӕймаджы куывдтытӕ фехъусы, уӕд ын куыд баххуыс кӕны? [Бауадз ӕй йӕ хъуыды зӕгъын. Стӕй бакӕс 1 Иоанны 5:14, 15 ӕмӕ 170–172 фӕрстыл 16–18 абзацтӕ.] Ацы сӕрӕй ма базонӕн ис, Хуыцаумӕ цӕмӕн хъуамӕ кувӕм, ӕмӕ цы хъӕуы аразын, цӕмӕй-иу нӕ фехъуса».

Дин

◼ «Бирӕтӕ ахӕм хъуыдымӕ ӕрцӕуынц, зӕгъгӕ, динтӕ адӕмы хорз цардӕн кӕй нӕ ахъаз кӕнынц, фӕлӕ сын сӕ зындзинӕдты аххоссаг кӕй сты. Куыд хъуыды кӕныс, динтӕ адӕмы раст фӕндагыл кӕнынц? [Бауадз ӕй йӕ хъуыды зӕгъын. Стӕй бакӕс Матфейы 7:13, 14 ӕмӕ 145 фарсыл 5 абзац.] Ацы сӕры ныхас цӕуы, Хуыцау растыл цы дин нымайы, уый цавӕр ӕхсӕз хъуыддагӕй ис базонӕн». Равдис ын, 147 фарсыл цы фыст ис, уый.

Бӕллӕхтӕ/Хъизӕмӕрттӕ

◼ «Исты бӕллӕх куы ӕрцӕуы, уӕд бирӕтӕ дызӕрдыг кӕнын райдайынц, зӕгъгӕ, Хуыцау ӕцӕгдӕр адӕмыл тыхсы ӕмӕ сын сӕ хъизӕмӕрттӕ уыны? Ды ууыл искуы хъуыды кодтай? [Бауадз ӕй йӕ хъуыды зӕгъын. Стӕй бакӕс 1 Петры 5:7 ӕмӕ 11 фарсыл 11 абзац.] Ацы чиныгӕй базонӕн ис, Хуыцау адӕмы хъизӕмӕрттӕн кӕрон куыд скӕндзӕн». Равдис ын, 106 фарсыл райдианы цы фарстытӕ ис, уыдон.

Хӕст/Сабырдзинад

◼ «Ӕгас дунейы адӕм дӕр бӕллынц сабырдзинадмӕ. Куыд дӕм кӕсы, зӕххыл сабырдзинад уа, уый ӕрмӕст бӕллиц у? [Бауадз ӕй йӕ хъуыды зӕгъын. Стӕй бакӕс Псалом 45:9, 10.] Ацы чиныджы дзырд цӕуы, Хуыцау йӕ фӕнд куыд сӕххӕст кӕндзӕн ӕмӕ ӕгас зӕххыл дӕр сабырдзинад куыд ӕрӕвӕрдзӕн, ууыл». Равдис ын, 35 фарсыл цы ныв ис, уый, ӕмӕ равзар 34 фарсыл 17–21 абзацтӕ.

[Рамкӕ 5 фарсыл]

Куыд ис зӕгъӕн мысайнӕгты тыххӕй

«Кӕд дӕ нӕ ӕппӕтдунеон куыстӕн мысайнаг раттын фӕнды, уӕд ӕй ӕхсызгонӕй райсдзынӕн, цасфӕнды ма уа, уӕддӕр».

«Нӕ литературӕ уӕй нӕ кӕнӕм, фӕлӕ исӕм мысайнӕгтӕ, цӕмӕй ӕппӕт дунейы нӕ куыст размӕ цӕуа».

«Чи зоны, ӕмӕ дис кӕныс, ацы куыст цӕй фӕрцы ӕххӕст кӕнӕм. Ӕппӕт дунейы дӕр адӕм барвӕндон мысайнӕгтӕ кӕй дӕттынц, уый фӕрцы. Кӕд дӕу дӕр фӕнды мысайнаг раттын, уӕд ӕй ӕхсызгонӕй райсдзынӕн, цасфӕнды ма уӕд».

1) Фарст, 2) стих ӕмӕ 3) сӕр

Чиныг «Библи бӕлвырдӕй цы дзуры» дӕттынӕн ис хуымӕтӕг мадзал: 1) адӕймаджы бафӕрс, куыд хъуыды кӕныс, зӕгъгӕ; 2) фарстмӕ гӕсгӕ Библийӕ стих бакӕс; 3) чиныджы бакӕн, фарст кӕм ӕвзӕрст цӕуы, уыцы сӕр ӕмӕ, сӕры райдианы цы фарстытӕ ис, уыдон бакӕс. Кӕд адӕймаджы фылдӕр базонын бафӕнда, уӕд ын уыцы сӕры фыццаг абзацты руаджы дӕ бон у равдисын, Библи куыд ахуыр кӕнӕм, уый. Афтӕмӕй Библи ахуыр кӕнын райдайӕн ис, адӕймагимӕ фыццаг хатт куы ныхас кӕнай, кӕнӕ йӕм дыккаг хатт куы бацӕуай, уӕд.

◼ «Куыд дӕм кӕсы, уый гӕнӕн ис, ӕмӕ адӕймаг ӕппӕтхъомысджын Сфӕлдисӕджы базона, ам Библийы куыд кӕсӕм, уымӕ гӕсгӕ?» Бакӕс Куыстытӕ 17:26, 27 ӕмӕ йӕ бауадз йӕ хъуыды зӕгъын. Стӕй ӕрныхас кӕн 1 сӕрыл.

◼ «Куыд хъуыды кӕныс, абоны уӕззау царды ма, ацы ран цы рӕвдыд ӕмӕ ныфсы кой цӕуы, уыдон ссарӕн ис?» Бакӕс Ромӕгтӕм 15:4 ӕмӕ йӕ бауадз йӕ хъуыды зӕгъын. Стӕй ӕрныхас кӕн 2 сӕрыл.

◼ «Дӕ бон куы уаид, уӕд мӕнӕ ахӕм цард нӕ саразис?» Бакӕс Раргомад 21:4 ӕмӕ йӕ бауадз йӕ хъуыды зӕгъын. Стӕй ӕрныхас кӕн 3 сӕрыл.

◼ «Куыд хъуыды кӕныс, нӕ сывӕллӕттӕн ахӕм уавӕрты цӕрыны фадат уыдзӕн?» Бакӕс Псалом 36:10, 11 ӕмӕ йӕ бауадз йӕ хъуыды зӕгъын. Стӕй ӕрныхас кӕн 3 сӕрыл.

◼ «Куыд хъуыды кӕныс, искуы ацы ныхӕстӕ сӕххӕст уыдзысты?» Бакӕс Исай 33:24 ӕмӕ йӕ бауадз йӕ хъуыды зӕгъын. Стӕй ӕрныхас кӕн 3 сӕрыл.

◼ «Никуы хъуыды кодтай, удӕгӕсты хабӕрттӕн мард исты зоны?» Бакӕс Екклесиаст 9:5 ӕмӕ йӕ бауадз йӕ хъуыды зӕгъын. Стӕй ӕрныхас кӕн 6 сӕрыл.

◼ «Куыд хъуыды кӕныс, бирӕ кӕй уарзтам ӕмӕ немӕ чи нал ис, уыдоны ма искуы фендзыстӕм, мӕнӕ Йесо Чырысти куыд загъта, уымӕ гӕсгӕ?» Бакӕс Иоанны 5:28, 29 ӕмӕ йӕ бауадз йӕ хъуыды зӕгъын. Стӕй ӕрныхас кӕн 7 сӕрыл.

◼ «Куыд дӕм кӕсы, Хуыцауы фӕндон уӕлӕрвты куыд ӕххӕст кӕны, афтӕ зӕххыл та цӕй фӕрцы ӕххӕст кӕндзӕни, ацы зындгонд куывды куыд дзырдӕуы, уымӕ гӕсгӕ?» Бакӕс Матфейы 6:9, 10 ӕмӕ йӕ бауадз йӕ хъуыды зӕгъын. Стӕй ӕрныхас кӕн 8 сӕрыл.

◼ «Куыд хъуыды кӕныс, ам цы рӕстӕгыл цӕуы дзырд, уыцы рӕстӕджы нӕ цӕрӕм мах?» Бакӕс 2 Тимофеймӕ 3:1–4 ӕмӕ йӕ бауадз йӕ хъуыды зӕгъын. Стӕй ӕрныхас кӕн 9 сӕрыл.

◼ «Бирӕтӕ сагъӕс кӕнынц, адӕмы цард бонвыддӕр цӕмӕн кӕны, ууыл. Никуы ахъуыды кодтай, уый мӕнӕ ацы хъуыддаджы тыххӕй кӕй уыдзӕнис афтӕ?» Бакӕс Раргомад 12:9 ӕмӕ йӕ бауадз йӕ хъуыды зӕгъын. Стӕй ӕрныхас кӕн 10 сӕрыл.

◼ «Никуы дӕ фӕндыд мӕнӕ ацы фарстайӕн дзуапп базонын?» Бакӕс Иов 21:7 ӕмӕ йӕ бауадз йӕ хъуыды зӕгъын. Стӕй ӕрныхас кӕн 11 сӕрыл.

◼ «Куыд дӕм кӕсы, адӕм Библийӕ мӕнӕ ацы уынаффӕмӕ куы хъусиккой, уӕд сӕ бинонты цард хуыздӕр нӕ уаид?» Бакӕс Ефесӕгтӕм 5:33 ӕмӕ йӕ бауадз йӕ хъуыды зӕгъын. Стӕй ӕрныхас кӕн 14 сӕрыл.

Библийы ахуыр уацамынды хыгъды фыссӕн ис, кӕд адӕймаджы фӕнды дарддӕр ахуыр кӕнын ӕмӕ кӕд, ахуыр куыд фӕцӕуы, уый равдисыны фӕстӕ дыууӕ ахуыры ауагътай, уӕд.

Ӕххуыс кӕм хъӕуы, уым лӕггад кӕнынмӕ цӕттӕ дӕ?

¹ Искуы хъуыды кодтай, цӕмӕй, хъусынгӕнджытӕ кӕм нӕ фаг кӕны, уырдӕм цӕрынмӕ ацӕуай? Ӕххуысмӕ дӕм куы фӕсидиккой, мӕнӕ уырдӕм ацӕуын хъӕуы, зӕгъгӕ, уӕд Павелау сразы уаис? Бирӕ ӕмбырдты хӕрзгыццыл ис фӕлтӕрдджын чырыстон бинонтӕ, уацамынды сӕ хъӕуы пионерты ӕххуыс, афтӕ ма сӕ хъӕуы хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕртӕ дӕр. Мах территорийы ахӕм ӕххуыс хъӕуы стыр горӕтты дӕр. Иуӕй-иу ӕмбырдты территоримӕ хауынц, кӕрӕдзийӕ тынг дард гыццыл хъӕутӕ. Паддзахады зал сӕм, гӕнӕн ис, ӕмӕ тынг дард уа. Куыст – зын ссарӕн. Боныхъӕд дӕр дзы алкӕд хорз нӕ вӕййы. Дӕ бон уаид ахӕм ранмӕ ацӕуын? Цымӕ афтӕ куы бакӕнай, уӕд дын Хуыцау рӕдауӕй раарфӕ кӕндзӕн?

² Хъӕуы Хуыцауыл зӕрдӕ дарын. Хуыцауы ныхасмӕ гӕсгӕ Аврам ныууагъта йӕ райгуырӕн сахар Ур ӕмӕ йӕ ус, йе ’фсымӕры фырт ӕмӕ йӕ зӕронд фыдимӕ, Фаррӕимӕ, араст Харранмӕ, Урӕй 1 000 километры дарддӕр (Уӕв. 11:31, 32; Неем. 9:7). Фаррӕйы мӕлӕты фӕстӕ Иегъовӕ 75-аздзыд Аврамӕн загъта, цӕмӕй йӕ хиуӕтты Харраны ныууадза ӕмӕ йын цы зӕхмӕ бацамона, уырдӕм ацӕуа. Аврам, Сарӕ ӕмӕ Лот сразы сты ӕмӕ ацыдысты (Уӕв. 12:1, 4, 5). Кӕй зӕгъын ӕй хъӕуы, Аврам ӕндӕр ранмӕ цӕрынмӕ уымӕн нӕ алыгъд, ӕмӕ дзы йе ’ххуыс хъуыд. Фӕлӕ хъуыдыйаг у, цы баххуыс кодта Аврамӕн ахӕм удуӕлдай хъуыддаг бакӕнын?

³ Аврам ахӕм ныфсхаст уымӕн разынд, ӕмӕ йӕ зӕрдӕ ӕгасӕй дӕр Иегъовӕйыл дардта. Цӕттӕ уыд йӕ зондахаст ӕмӕ йӕ цардыуаг фӕивынмӕ дӕр. Йӕ райгуырӕн сахары йӕ йӕ хиуӕттӕй цы ныфс уыд, уымӕй йӕ ныр ныфс нал уыдис. Фӕлӕ нӕ дызӕрдыг кодта, Иегъовӕ йын йӕхиуыл дӕр ӕмӕ йӕ бинонтыл дӕр кӕй тыхсдзӕн. Абон дӕр бирӕ хотӕ ӕмӕ ӕфсымӕртӕ раст афтӕ сӕ зӕрдӕ дарынц Иегъовӕйыл.

⁴ Цыбыр рӕстӕгмӕ ацӕуын ӕндӕр ранмӕ хъусын кӕнынмӕ. Иу ӕмбырдмӕ дӕр чи нӕ хауы, ахӕм ран искуы хъусын кодтай ӕмӕ уыцы хъуыддаг куыд арфӕйаг у, уый дӕхиуыл банкъардтай? Фарон ахӕм рӕттӕм хъусын кӕнынмӕ цыдысты иу-600 къорды. Афӕдзы дӕргъы ахӕм рӕтты ӕдӕппӕтӕй хъусын кодтой 4 177 хъусынгӕнӕджы. Уыцы хӕс сӕххӕст кӕныны тыххӕй сӕ иуӕй-иуты бахъуыди дард фӕндагыл цӕуын. Ӕмӕ сӕ фыдӕбон уый аргъ уыди?

⁵ Бирӕ фыстӕджытӕ райстам, ацы лӕггадӕн стыр аргъ чи скодта, уыцы хъусынгӕнджытӕй. Мӕнӕ цы ныффыстой иуӕй-иутӕ: «Мах райстам 250 хӕдзары бӕрц. Уый бирӕ нӕу, фӕлӕ сыл уый фӕрцы бӕстон ӕрзылдыстӕм... Фӕстӕмӕ куы здӕхтыстӕм, уӕд нӕ адӕм раст сӕ хӕлӕрттау фӕндараст кодтой, дзырдтой нын, цӕмӕй та-иу сӕм ӕрцӕуӕм. Чидӕртӕ сӕ кӕугӕ дӕр кодтой. Кӕм цардыстӕм, уыцы уынджы цӕрджытӕ, стӕмтӕй фӕстӕмӕ, иууылдӕр рацыдысты махӕн хӕрзбон зӕгъынмӕ. Иудзырдӕй, стыр цин банкъардтам ӕмӕ тынг фӕфидар стӕм, бирӕ ног хӕлӕрттӕ ссардтам». «Куы хъусын кодтам, уӕд бирӕтӕ разы кодтой фыстӕджыты руаджы ахуыр кӕныныл. Ныр афтӕмӕй мах ахуыр кӕнӕм 77 адӕймагимӕ... Мӕхицӕй куы зӕгъон, уӕд мын уыцы рӕстӕг дыууӕ къуыри нӕ уыд, фӕлӕ уымӕй бирӕ фылдӕр рӕстӕг. Уыцы рӕстӕгӕн аргъ дӕр нӕй, уымӕн ӕмӕ сахуыр дӕн Иегъовӕйыл фылдӕр мӕ ныфс дарын, йӕ разамынд ын уынын, мӕ куывдтытӕ мын кӕй хъусы, уый ӕнкъарын». Ӕфсымӕртӕн сӕ фылдӕр зӕгъынц, зӕгъгӕ, хъусынгӕнджытӕ кӕм нӕ фаг кӕны, ахӕм ранмӕ цыбыр рӕстӕгмӕ кӕй ацыдыстӕм, уый фӕрцы уацамындӕн тынгдӕр аргъ кӕнын райдыдтам. Кӕд искӕй зоныс, ахӕм ран чи лӕггад кодта, уӕд сӕ афӕрс, ӕмӕ дын радзурдзысты, куыд тынг фӕфидар сӕ уырнындзинад ӕмӕ ма сын фадат куы фӕуа, уӕд та, чи зоны, ногӕй ацӕуой дард ранмӕ хъусын кӕнынмӕ.

⁶ Хъусынгӕнджытӕ кӕм нӕ фаг кӕны, уырдӕм цыбыр рӕстӕгмӕ ацӕуын ма фӕахъаз уыдзӕн ӕндӕр хъуыддагӕн дӕр – афтӕмӕй дӕ бон бауыдзӕн ӕндӕр ранмӕ цӕрынмӕ алидзынӕн дӕ «хӕрдзтӕ банымайын» (Лук. 14:28, НТ).

⁷ Иегъовӕйы фӕндмӕ гӕсгӕ, цалынмӕ кӕрон не ’рцӕуа, уӕдмӕ хорз хабар хъуыстгонд уыдзӕн «ӕппӕт дунейыл» дӕр (Матф. 24:14). Уӕдӕ дын кӕд фадат ис, уӕд цӕттӕ дӕ дӕ цӕрӕнбынат фӕивынмӕ ӕмӕ ӕххуыс кӕм хъӕуы, уырдӕм ацӕуынмӕ? Ӕмӕ ӕххуыс та бирӕ рӕтты хъӕуы.

⁸ Ӕххуыс кӕм хъӕуы, уырдӕм цӕрынмӕ алидзын. Ӕмбырды комитет райста, иу Ӕвдисӕнмӕ 700 адӕймаджы, йе та фылдӕр кӕм хауы, ахӕм горӕттӕ ӕмӕ хъӕуты номхыгъд. Кӕд дӕ ӕцӕгдӕр фӕнды ахӕм ранмӕ ацӕуын, уӕд ӕфсымӕрты бафӕрс, цавӕр горӕтты хъӕуы ӕххуыс, уымӕй. Дӕ бон у, ӕххуыс кӕм хъӕуы, уырдӕм цӕрынмӕ алидзын? Пенсийы дӕ? Искӕцӕй дӕм иудадзыг ӕхца ӕфты? Дӕ бон у сӕрӕлвынӕгӕй, дзабырхуыйӕгӕй, уынгтӕ мӕрзӕгӕй, ӕфснайӕгӕй йе та компьютерыл кусын? Мыййаг, ныридӕгӕн хъуыды кодтай ӕгас бинонтӕй ӕндӕр ранмӕ алидзыныл? Ӕмӕ кӕд дӕхицӕн нӕй уый фадат, уӕд дӕ бон нӕ уаид дӕ бинонтӕй искӕмӕн ӕндӕр ран лӕггад кӕнынӕн ӕххуыс кӕнын?

⁹ Кӕд Иегъовӕмӕ скуывтай, хъуыддагыл лӕмбынӕг ахъуыды кодтай ӕмӕ ахӕм хатдзӕгмӕ ӕрцыдтӕ, ӕндӕр ранмӕ ацӕуын дӕ бон кӕй у, уӕд ууыл аныхас кӕн дӕ бинонтимӕ ӕмӕ де ’мбырды хистӕр нӕлгоймӕгтимӕ. Стӕй ныффысс фыстӕг ӕмӕ йӕ ратт хистӕр нӕлгоймӕгтӕм, цӕмӕй уыдон дӕр уый фӕдыл сӕ ныхас ныффыссой ӕмӕ йӕ дӕ фыстӕгимӕ иумӕ филиалмӕ арвитой (od-U, 111, 112 фф.; km 9/00, 4 ф.).

¹⁰ Цы хъӕуы фыстӕджы ныффыссын? Цал азы дыл цӕуы, донаргъуыд кӕд райстай, ӕмбырды дын цы хӕстӕ ис ӕмӕ дын бинонтӕ ис ӕви нӕ. Стӕй ма ныффысс, ӕнахъом сывӕллӕттӕ дын ис ӕви нӕ, уый дӕр. Зӕгъ, дӕ уавӕртӕм гӕсгӕ дӕ кӕм фӕндид лӕггад кӕнын. Зӕгъӕм, боныхъӕд ӕвзӕр кӕм вӕййы, уым цӕрын дӕ бон уаид? Уазал зымӕгӕн фӕразыс? Горӕтаг царды зындзинӕдтӕ быхсдзынӕ? Уырыссагӕй дарддӕр ма ӕндӕр ӕвзӕгтыл дзурыс? Ӕмбырдмӕ цы горӕтты номхыгъд ӕрӕрвыстой, уыдонӕй кӕд искӕцы равзарай, уӕд филиал бацархайдзӕн, цӕмӕй дын, уыцы горӕтмӕ йӕ хъус чи дары, уыцы ӕмбырдӕй ӕфсымӕрты адристӕ ӕрӕрвита.

¹¹ Дӕ удӕй арт цӕгъдыс? Ӕххуыс кӕм хъӕуы, уым лӕггад кӕнынӕн дын фадат ис? Уӕд архай, ӕмӕ фендзынӕ, Иегъовӕ кӕлгӕуӕлдайӕ куыд арфӕ кӕны, йӕ ныфс ыл чи дары ӕмӕ йын удуӕлдайӕ чи лӕггад кӕны, уыдонӕн! (Пс. 33:9; Мал. 3:10).