Бафснай йӕ
Цы цӕстӕй кӕсын туджы фракцитӕм ӕмӕ хи тугӕй хос кӕныны мадзӕлттӕм?
Библи чырыстӕтты фӕдзӕхсы, цӕмӕй «сӕхи хизой... тугӕй» (Ап. хъ. 15:20). Уымӕ гӕсгӕ Йегъовӕйы Ӕвдисӕнтӕ нӕдӕр туг уадзынц, нӕдӕр йӕ цыппар сӕйраг хайӕ искӕцы: эритроциттӕ, лейкоциттӕ, тромбоциттӕ ӕмӕ плазмӕ. Стӕй сӕ туг никӕмӕн фӕдӕттынц кӕнӕ йӕ нӕ нывӕрын кӕнынц, цӕмӕй йӕ уый фӕстӕ сӕхицӕн, бахъуаджы рӕстӕг, бауадзой (Лев. 17:13, 14; Ап. хъ. 15:28, 29).
Цы сты туджы фракцитӕ (туджы сӕйраг хӕйттӕй кӕй рахицӕн кӕнынц, ахӕм гыццыл хӕйттӕ) ӕмӕ уыцы фракцитӕй чырыстӕттӕй исчи йӕхицӕн хос кӕндзӕн ӕви нӕ, уый алчидӕр йӕхӕдӕг цӕмӕн хъуамӕ скъуыддзаг кӕна?
Туджы фракцитӕ сты, фракционированийы фӕрцы тугӕй кӕй рахицӕн кӕнынц, ахӕм хӕйттӕ. Дзырдӕн, плазмӕ у тугӕн йӕ сӕйрагдӕр хӕйттӕй иу ӕмӕ йӕ адих кӕнӕн ис цалдӕр хайыл: дон (91 проценты бӕрц); протеинтӕ, зӕгъӕм, альбумин, глобулин ӕмӕ фибриноген (7 проценты бӕрц); иннӕ хӕйттӕ – нутриенттӕ, гормонтӕ, газтӕ, витаминтӕ, чи нал хъӕуы, ахӕм буаргъӕдтӕ ӕмӕ электролиттӕ (1,5 проценты бӕрц).
Библи афтӕ кӕй зӕгъы, уӕхи тугӕй хизут, зӕгъгӕ, уый туджы фракцитӕм дӕр хауы? Уый бӕлвырдӕй зӕгъӕн нӕй. Библи туджы фракциты тыххӕй ницы дзуры. Кӕй зӕгъын ӕй хъӕуы, дохтыртӕ пайда кӕнынц, тугӕй цы бирӕ фракцитӕ рахицӕн кӕнынц, уыдонӕй. Чырыстӕттӕй алчидӕр хъуамӕ йӕхӕдӕг скъуыддзаг кӕна, йӕхи уыцы фракцитӕй дзӕбӕх кӕндзӕн ӕви нӕ.
Уынаффӕ рахӕссыны размӕ хъӕуы ахъуыды кӕнын: «Ӕмбарын ӕй, туджы фракцитӕй хос кӕныныл иуыл дӕр куы нӕ сразы уон, уӕд уый ууыл дзурӕг уыдзӕн, ӕмӕ иуӕй-иу хостӕй мӕхи кӕй нӕ дзӕбӕх кӕндзынӕн? Зӕгъӕм, хӕцгӕ низты ӕмӕ ӕндӕр низты ныхмӕ чи у, туг цӕй фӕрцы бацахсы ӕмӕ йӕ цыдӕй цӕй фӕрцы ӕрлӕууы, ахӕм хостӕй? Мӕ бон уыдзӕн дохтырӕн бамбарын кӕнын, цӕмӕн дӕн разы ӕви нӕ, туджы фракцитӕй кӕцыдӕртӕй дзӕбӕх кӕныныл?»
Тугӕй хос кӕныны мадзӕлттыл, уыимӕ хи тугимӕ баст чи у, уыдоныл дӕр разы кӕнӕм ӕви нӕ, уый нӕхӕдӕг цӕмӕн хъуамӕ скъуыддзаг кӕнӕм?
Кӕд чырыстӕттӕ туг нӕ дӕттынц кӕнӕ йӕ бахъуаджы рӕстӕгмӕ нӕ нывӕрын кӕнынц, уӕддӕр хи тугӕй хос кӕныны мадзӕлттӕй кӕнӕ анализтӕй иуӕй-иутӕ комкоммӕ Библийы уагӕвӕрдтӕ нӕ халынц. Уымӕ гӕсгӕ, алчидӕр хъуамӕ йӕхӕдӕг ахъуыды кӕна, хи тугӕй хос кӕныны мадзӕлттӕй искӕцыйыл разы кӕндзӕн ӕви нӕ.
Ахӕм уынаффӕтӕ хӕсгӕйӕ хъуамӕ дӕхи бафӕрсай: «Зӕгъӕм, мӕ туг мын аппараты уылты мӕ буармӕ уадзынц ӕмӕ йын суанг йӕ цыд дӕр рӕстӕгмӕ ӕрлӕууын кодтой, уӕд ма афтӕ хъуыды кӕндзынӕн, зӕгъгӕ йӕ „зӕхмӕ калын“ нӕ хъӕуы, уыцы туг нырма мӕ буары хай у? (Дык. з 12:23, 24). Библи туджы тыххӕй цы дзуры, уый зонгӕйӕ мӕ цӕсгом сыгъдӕг уыдзӕн, туг мӕ куы сисой, цыдӕр дзы куы фӕивой ӕмӕ мын ӕй фӕстӕмӕ мӕ буары куы бауадзой, уӕд? Ӕмбарын ӕй, мӕ тугимӕ баст хос кӕныны мадзӕлттӕй иуыл дӕр куы нӕ сразы уон, уӕд уый ууыл дзурӕг кӕй уыдзӕн, ӕмӕ гемодиализыл кӕнӕ аппараты фӕрцы туг буары зилдух кӕна, ууыл дӕр кӕй нӕ разы кӕнын? Ахӕм хъуыддӕгты уынаффӕ рахӕссыны размӕ Хуыцаумӕ фӕкувын?»
Мӕхӕдӕг цавӕр уынаффӕ рахӕсдзынӕн?
Дӕлдӕр ис дыууӕ таблицӕйы. Фыццаг таблицӕйӕ базондзынӕ туджы фракцитӕй иуӕй-иутӕ, ӕмӕ дзы дохтыртӕ куыд хос кӕнынц, уый. Таблицӕйы фӕнысан кӕн, уыцы фракцитӕй кӕцыйыл разы кӕныс, кӕцыйыл та нӕ. Дыггаг таблицӕйӕ базондзынӕ дӕхи тугӕй хос кӕныны мадзӕлттӕй иуӕй-иутӕ. Таблицӕйы фӕнысан кӕн, уыцы мадзӕлттыл кӕцыйыл разы кӕныс, кӕцыйыл та нӕ. Ацы таблицӕтӕн закъонмӕ гӕсгӕ тых нӕй, фӕлӕ дын баххуыс кӕндзысты «Фӕндамынд» («Дохтыртӕн мӕ фӕндамынд ӕмӕ ӕууӕнчы гӕххӕтт») куы дзаг кӕнай, уӕд.
Ацы фарстаты фӕдыл хъуамӕ дӕ бӕсты уынаффӕ мачи хӕсса. Стӕй иннӕтӕн дӕр сӕ хъуыдыйы тыххӕй уайдзӕф кӕнын нӕ хъӕуы. Ацы хъуыддаджы «алчидӕр йӕхи тыххӕй ратдзӕн дзуапп» (Гал. 6:4, 5).
[Фиппаинӕгтӕ]