Циндзинад дын цы хӕссы?
1. Алы мӕйы кӕрон дӕр нын цины хос цы вӕййы?
1 Мӕйы кӕрон куы ’рцӕуы, уӕд нӕ фӕразӕнгард кӕнынц, цӕмӕй нӕ уацамынды хыгъд раттӕм. Уый дӕуӕн цины хос вӕййы? (Гал. 6:4). Сӕрмагонд пионертӕ хъусын кӕнынц 130 сахаты, иуӕй-иу хъусынгӕнджытӕн та сӕ бон у сӕ хыгъды 15 минуты дӕр фыссын. Фӕлӕ не ’ппӕты бон дӕр у цин кӕнын, Йегъовӕйӕн ӕппӕт удӕй кӕй лӕггад кӕнӕм, ууыл (Пс. 100:2).
2. Йегъовӕйӕн хуыздӕр лӕггад кӕныныл цӕмӕн хъуамӕ архайӕм?
2 Дунедарӕг Стыр Хуыцау Йегъовӕ уый аккаг у, цӕмӕй йын дӕттӕм, хуыздӕрӕй нӕм цы ис, уый (Мал. 1:6). Йегъовӕйы кӕй уарзӕм, уый тыххӕй йын нӕ цард снывонд кодтам, цӕмӕй йын йӕ фӕндон ӕххӕст кӕнӕм. Боны фӕуды кӕнӕ мӕйы фӕуды нӕ бон фидарӕй зӕгъын куы уа, нӕ рӕстӕджы, нӕ хъаруты, ӕмӕ нӕ курдиӕтты «фыццаг тыллӕг» Йегъовӕйӕн кӕй радтам, уӕд нын уый уыдзӕн цины хос (Ӕмб. 3:9). Фӕлӕ нӕм не ’фсарм куы дзура, нӕ бон хуыздӕр лӕггад кӕнын кӕй у, уӕд хъуамӕ ахъуыды кӕнӕм, нӕ бон цы у фӕивын, ууыл (Ром. 2:15).
3. Нӕхи иннӕтимӕ цӕуылнӕ хъуамӕ барӕм?
3 «Нӕхи иннӕтимӕ нӕ бардзыстӕм». Раст нӕ уыдзӕн, нӕхи иннӕтимӕ куы барӕм кӕнӕ, раздӕр нӕ бон цас уыд, ууыл куы хъуыды кӕнӕм. Цард бонӕй-бонмӕ ивы. Нӕ гӕнӕнтӕ дӕр ивынц. Нӕхи иннӕтимӕ куы барӕм, уӕд гӕнӕн ис, быцӕу кӕнын райдайӕм кӕнӕ та нӕхимӕ ницӕйаг кӕсӕм (Гал. 5:26; 6:4). Йесо адӕмы кӕрӕдзийыл никуы барста. Адӕймагӕй-иу раппӕлыд, йӕ бон цы уыд, уый кӕй арӕзта, уый тыххӕй (Мар. 14:6–9).
4. Йесо талантты тыххӕй цы фӕсномыг ныхас радзырдта, уымӕй цӕуыл ахуыр кӕнӕм?
4 Йесо талантты тыххӕй цы фӕсномыг ныхас радзырдта, уым хицау йӕ кусджытӕн таланттӕ радта, «йӕ бон сӕ кӕмӕн цас уыди, уымӕ гӕсгӕ» (Матф. 25:15). Хицау куы ӕрыздӕхт ӕмӕ сӕ сӕ хъуыддӕгты тыххӕй дзуапп куы ӕрдомдта, уӕд йӕ курдиттӕ ӕмӕ йӕ уавӕртӕм гӕсгӕ зӕрдиагӕй чи куыста, уыдонӕй раппӕлыд ӕмӕ сӕ хицауимӕ цин кодтой (Матф. 25:21, 23). Мах дӕр Хуыцауы Паддзахады тыххӕй зӕрдиагӕй куы хъусын кӕнӕм, уӕд нӕ фидар ныфс уыдзӕн, Хуыцауы хорзӕх кӕй ссардзыстӕм, ӕмӕ нын уый цины хос уыдзӕн!