Ази ӕмӕ Ӕввахс Скӕсӕн

«Мемӕ ма кӕйдӕрты ӕрбакӕнон?»

Индонезийы иу ӕфсымӕр, Ӕрымысӕн изӕрмӕ ма дыууӕ боны куы хъуыд, уӕд иу нӕлгоймагӕн хуынды гӕххӕтт радта. Уыцы нӕлгоймаг пысылмон уыд ӕмӕ куыста машинӕты лӕууӕндоны. Иу хуынды гӕххӕтт йеддӕмӕ йын кӕй нӕ радта, уымӕ гӕсгӕ йӕ бафарста: «Мемӕ ма кӕйдӕрты ӕрбакӕнон?» Ӕфсымӕр ын загъта, уыдонӕн дӕр сӕ бон кӕй у ӕрбацӕуын. Нӕлгоймаг загъта, стыр бинонтӕ йын кӕй ис, ӕмӕ ма дзы ноджыдӕр хуынды гӕххӕттытӕ ракуырдта. Ӕфсымӕр ын 20 хуынды гӕххӕтты радта ӕмӕ йын бамбарын кодта, кӕдӕм ӕй хоны, уым Чырыстийы мӕлӕт Ӕрымысӕн изӕр кӕй бӕрӕг кӕндзысты ӕмӕ чырыстӕттӕн дӕр ӕмӕ пысылмӕттӕн дӕр сӕ бон кӕй у ӕрбацӕуын. Нӕлгоймаг загъта, йемӕ 60–70 адӕймаджы бӕрц кӕй ӕрбакӕндзӕн.

Ӕрымысӕн изӕр бӕрӕг кодтой иу уазӕгдзӕрӕны, ӕмӕ уырдӕм ӕрбацыд 248 адӕймаджы. Раныхас куы райдыдта, уӕд уыцы нӕлгоймаг ӕрбацыд иу-100 адӕймагимӕ. Се ’хсӕн уыд нӕлгоймӕгтӕ, сылгоймӕгтӕ ӕмӕ сывӕллӕттӕ, стӕй дзы уыди ацӕргӕтӕ дӕр ӕмӕ ма, йӕхи бар чи нӕ уыд, иу ахӕм сылгоймаг дӕр. Уыдон цалдӕр машинӕйы баххуырстой, цӕмӕй Ӕрымысӕн изӕрмӕ ӕрбацыдаиккой. Уазӕгдзӕрӕны хъахъхъӕнджытӕ уыйбӕрц адӕмы куы федтой, уӕд сӕ фыццаг нӕ уагътой, зӕгъгӕ, дам, уыйбӕрц пысылмон адӕм чырыстӕтты бӕрӕгбонмӕ цӕмӕн ӕрбацыд. Фӕлӕ сын хуынды гӕххӕттытӕ куы равдыстой, уӕд сӕ залмӕ ахизын кодтой. Залы къух бакӕнӕн кӕй нӕ уыд, уымӕ гӕсгӕ дзы бынӕттӕ разынд ӕрмӕстдӕр иу-60 адӕймагӕн.

Цалдӕр боны фӕстӕ хистӕр нӕлгоймӕгтӕй иу уыцы нӕлгоймаджы бабӕрӕг кодта ӕмӕ йӕ бафарста, кӕимӕ ӕрбацыдтӕ, уыдонӕн программӕ сӕ зӕрдӕмӕ фӕцыд, зӕгъгӕ. Нӕлгоймаг ын загъта, ӕрбацӕуын ӕфсӕрмы кӕй кодтой, фӕлӕ, дам, сыл адӕм афтӕ кӕй бацин кодтой ӕмӕ сын сӕ къухтӕ кӕй истой, уый, дам, сӕ дисы бафтыдта. Стӕй йӕ ӕфсымӕр иннӕ хуыцаубонмӕ сӕрмагонд раныхасмӕ фӕхуыдта. Ацы хатт ӕрбацыд йӕ бинонтимӕ ӕмӕ йӕ сыхӕгтимӕ, уыдысты иу-40 адӕймагӕй. Фембӕлды кӕронмӕ ӕрбацыдысты, ӕмӕ уӕд хистӕр нӕлгоймӕгтӕ бауынаффӕ кодтой, цӕмӕй ма раныхас ноджыдӕр иу хатт радзырдтаиккой. Программӕйы сӕрдариуӕггӕнӕг ногӕй раныхасы ном загъта ӕмӕ цыбыртӕй бамбарын кодта, фембӕлд куыд фӕцӕуы, уый, ӕмӕ загъта, уый фӕстӕ заргӕ ӕмӕ кувгӕ кӕй акӕнынц. Уазджытӕ иууылдӕр пысылмӕттӕ кӕй уыдысты, уымӕ гӕсгӕ ӕфсымӕр йӕ раныхасы пайда кодта, уыдон кӕй зыдтой, ахӕм ныхӕстӕй. Зӕгъӕм, «Библийы» бӕсты дзырдта «Сыгъдӕг Фыстад», «Йесойы» бӕсты та – «пехуымпар Иса».

Цасдӕры фӕстӕ хистӕр нӕлгоймаг уыцы нӕлгоймагмӕ йӕ хӕдзармӕ бацыд, ӕмӕ йемӕ Библийыл ныхас кӕнын райдыдта, «Хуыцаумӕ хъус» чи хуыйны, уыцы брошюрӕйы фӕрцы. Ӕмӕ ма сӕм ноджыдӕр 12 адӕймаджы ӕрбаиу, уыимӕ цалдӕр сылгоймаджы ӕмӕ сывӕллоны.

Литературӕ автобусты кӕсынӕн

Монголийы горӕт Улан-Баторӕй бӕстӕйы алы рӕттӕм автобустӕ дыууӕрдӕм кӕнынц, ӕмӕ кӕцыдӕр рӕттӕм фӕхъӕуы 2 боны цӕуын. Кӕд монгойлӕгтӕ кӕсын бирӕ уарзынц, уӕддӕр автобусты кӕсинаг ницы вӕййы. Ӕмӕ дзы чи рудзынгӕй фӕкӕсы, чи та фынӕй фӕкӕны. Уымӕ гӕсгӕ Сонгинохайрханы ӕмбырдӕй цалдӕр ӕфсымӕры автобусты шофыртӕм бацыд ӕмӕ сын загътой: «Фӕнды нӕ, цӕмӕй уын иу хорз чиныг балӕвар кӕнӕм. Хӕдтӕхджыты бадӕнты фӕстейӕ дзыппыты алы хатт дӕр исты вӕййы бакӕсинаг. Кӕд разы стут, уӕд уын мах дӕр уӕ автобусты бадӕнты литературӕ сӕвӕрдзыстӕм, цӕмӕй, искӕй исты бакӕсын куы фӕнда, уӕд, цы кӕсой, уый сын уа». Шофыртӕй аст адӕймаджы сразы сты. Ӕмӕ ӕфсымӕртӕ автобусты ныууагътой 299 журналы ӕмӕ 144 брошюрӕйы. Стӕй семӕ баныхас кодтой, ног журналтӕ-иу куы рацӕуа, уӕд-иу сын сӕ кӕй ӕрбахӕсдзысты.

Дуканитӕ сын фӕхӕццӕ сты

Азийы бӕстӕтӕй иуы дыууӕ хистӕр нӕлгоймагӕн бахӕс кодтой, цӕмӕй, аст азы ӕмбырдтӕм чи нӕ цыд, иу ахӕм хойы бабӕрӕг кодтаиккой. Йемӕ зонгӕ кӕй нӕ уыдысты, уымӕ гӕсгӕ йӕм телефонӕй бадзырдтой ӕмӕ баныхас кодтой, куыстмӕ йӕм кӕй бацӕудзысты. Кусгӕ та кодта, стыр базары цы хицӕн дуканитӕ уыд, уыдонӕй иуы. Йӕ дукани йын бирӕ фӕцагуырдтой, ӕмӕ йӕ уӕд кӕддӕр ссардтой, цы адрис сӕм фыст уыд, уымӕ гӕсгӕ. Мидӕмӕ куы бацыдысты, уӕд дзы цы сылгоймаг уыд, уый сын салам радта. Йе стъолыл уыди гыццыл Библи. Йӕ мыггаг кӕмӕй у, кӕцы горӕтӕй у ӕмӕ йӕ дыууӕ сывӕллоныл цал азы цӕуы, уый куы сбӕлвырд кодтой, уӕд фенхъӕлдтой, уыцы хо кӕй у. «Мах де ’фсымӕртӕ стӕм, Йегъовӕйы Ӕвдисӕнтӕ»,– загътой йын уыдон.

«Ӕз чырыстон дӕн»,– дисхуызӕй сын загъта уый. Ӕфсымӕртӕм йӕ ныхӕстӕ диссаг фӕкастысты. Фӕлӕ йын уӕддӕр нӕ публикацитӕй цыдӕртӕ радтой, ӕмӕ сӕ тынг фӕбузныг. Фӕлӕ куы рацыдысты, уӕд бамбӕрстой, дуканитӕ сын кӕй фӕхӕццӕ сты! Цы дуканимӕ хъуамӕ бацыдаиккой, уымӕн йӕ номыр уыд 2202, ацы дуканийӕн та – 2200. Ӕфсымӕртӕй иу загъта: «Куы ахъуыды кодтон, уыцы дуканимӕ нӕ, чи зоны, зӕдтӕ бакодтой, уӕд мӕ хъуын арц слӕууыд. Уыцы сылгоймагӕн ӕмӕ нӕ хойӕн уыд иухуызон мыггаг, сӕ дыууӕ дӕр уыдысты иу горӕтӕй ӕмӕ сӕ дыууӕйӕн дӕр сӕ сывӕллӕттӕ иу кары уыдысты! Ӕндӕр мыггаг ын куы уыдаид ӕмӕ ӕндӕр горӕтӕй куы уыдаид, уӕд ӕй уайтагъд бамбӕрстаиккам, нӕ хо кӕй нӕу». Ӕппынфӕстаг ӕфсымӕртӕ нӕ хойы дукани ссардтой. Хо сӕм тынг ӕнхъӕлмӕ каст.

Ӕфсымӕртӕн дуканитӕ кӕй фӕхӕццӕ сты, уый фӕрцы фыццаг сылгоймаг Библи ахуыр кӕнын ӕмӕ ӕмбырдтӕм цӕуын райдыдта. Нӕ хо дӕр ногӕй ӕмбырдтӕм цӕуын ӕмӕ хъусын кӕнын райдыдта. Уый загъта: «Кӕд ӕмбырдтӕм рагӕй нал цыдтӕн, уӕддӕр мӕ Йегъовӕ нӕ ферох кодта, ӕмӕ мын уый мӕ зӕрдӕ тынг бацагайдта».

Ӕвзӕр боныхъӕд куы вӕййы, уӕд СМС-тӕ фӕфыссынц

Грег ӕмӕ Алмӕ ацыдысты Катандуанесы сакъадахмӕ (Филиппинтӕ), цӕмӕй, хъусынгӕнджытӕ кӕм нӕ фаг кодта, уым лӕггад кодтаиккой. Сакъадахӕн йӕ кӕцыдӕр хай хӕхтӕ кӕй ахсынц, уый тыххӕй сӕ иуӕй-иу рӕттӕм фистӕгӕй цӕуын бахъӕуы 19 километры. Хатт та иннӕ сакъадӕхтӕм хъусын кӕнынмӕ бӕлӕгъыл ацӕуынц, ӕмӕ фӕндагыл 2 сахаты бахъӕуынц. Къӕвдаджын рӕстӕг куы ралӕууы, уӕд уырдӕм цӕуын тынг зын вӕййы. Фӕлӕ хӕдзары ӕнӕуи бадой ӕмӕ хорз хабар макӕмӕн дзурой, уый сӕ нӕ фӕнды. Ӕмӕ уымӕ гӕсгӕ сӕ телефоны ахӕм тариф скодтой, цӕмӕй сӕ бон уа хӕрзгыццыл аргъӕй цасфӕнды СМС-тӕ дӕр ӕрвитын.

Грег СМС-тӕ ӕрвитгӕйӕ фыццаг йӕ ном ныффыссы, уый фӕстӕ та ахӕм ныхӕстӕ: «Фӕнды мӕ, цӕмӕй дын Библийӕ иу хъуыдымӕ дӕ хъус ӕрдарон». Арӕхдӕр спайда кӕны Иоанны 17:3 стихӕй, уымӕн ӕмӕ, дам, уый фӕрцы ныхас хуыздӕр рауайы. Стӕй сӕм дыууӕ фарстайы ратты: «Ӕцӕг Хуыцау чи у? Йесо Чырысти та?» Уый фӕстӕ ныффыссы, цӕмӕй йын дзуапп ӕрбарвитой. Адӕймаг дзуапп куы ӕрбарвиты, уӕд ма йын Грег ноджыдӕр исты стих арвиты, зӕгъӕм, Псалом 83:18. Ӕмӕ ма йӕм кӕд исты ныффыссы, уӕд ӕй бафӕрсы, зӕгъгӕ, дам, дӕ нӕ фӕнды, цӕмӕй телефонӕй аныхас кӕнӕм. Грег ӕмӕ Алмӕ куыд зӕгъынц, афтӕмӕй бирӕты бафӕнды аныхас кӕнын.

СМС-тӕ кӕмӕ фыстой, иу ахӕм сылгоймагмӕ Библийы тыххӕй уыд цалдӕр фарстайы, ӕмӕ кӕрӕдзимӕ бирӕ СМС-тӕ фервыстой. Цасдӕры фӕстӕ йемӕ Библи ахуыр кӕнын райдыдтой. Сылгоймаг цы базыдта, уый йе ’фсымӕры лӕппуйӕн ӕмӕ йе ’мкусӕгӕн радзырдта. Ӕппынфӕстаг ӕртӕйӕ дӕр донаргъуыд райстой.