Рӕстдзинад базонын дӕ фӕнды?

ЦАВӔР рӕстдзинад? Адӕммӕ цы ахсджиаг фарстатӕ ис, уыдонӕн дзуапп. Чи зоны, ды дӕр хъуыды кодтай ахӕм фарстатыл:

• Хуыцау ныл ӕцӕгдӕр тыхсы?

• Хӕстытӕ ӕмӕ хъизӕмӕрттӕн искуы кӕрон уыдзӕн?

• Адӕймагӕн ӕнӕмӕлгӕ уд ис?

• Чи амард, уыдон ма цӕрдзысты?

• Хуыцаумӕ куыд хъӕуы кувын ӕмӕ мын, цымӕ, мӕ куывдтытӕ хъусы?

• Амондджын цӕй фӕрцы уыдзынӕн?

Ацы фарстатӕн дзуапп кӕм ссарӕн ис? Зӕгъӕм, цал адӕймаджы бафӕрсай, уал дзуаппы фехъусдзынӕ. Библиотекӕты ӕмӕ дуканиты дӕр ацы фарстаты фӕдыл тынг бирӕ чингуытӕ ис. Фӕлӕ уым дӕр иухуызон дзуаппытӕ нӕй. Уыцы чингуытӕй иутӕ растыл нымад фӕцӕуынц, фӕлӕ бирӕ нӕ рацӕуы, ӕмӕ сӕм бахъӕуы ивддзинӕдтӕ хӕссын кӕнӕ та ногтӕ рауадзын.

Фӕлӕ ис, фидарӕй ӕууӕндӕн кӕуыл ис, ахӕм чиныг. Иу мӕнг ныхас дӕр дзы нӕй. Йесо Чырысти Хуыцаумӕ кувгӕйӕ загъта: «Дӕ ныхас у рӕстдзинад» (Иоанны 17:17). Хуыцауы Ныхас у Библи. Иннӕ фӕрстыл фенӕн ис, уыцы фарстатӕн Библи бӕлвырд ӕмӕ раст дзуаппытӕ кӕй дӕтты.

Хуыцау ныл ӕцӕгдӕр тыхсы?

ЦӔМӔН ФӔЗЫНЫ АХӔМ ФАРСТА: Мах цӕрӕм ӕгъатыр ӕмӕ мӕнгард дунейы. Бирӕ динтӕ амонынц, зӕгъгӕ, нӕ зындзинӕдтӕ Хуыцауӕй цӕуынц.

БИБЛИ ЦЫ ДЗУРЫ: Адӕмыл цы фыдбылызтӕ цӕуы, уыдон Хуыцауӕй не сты. «Уый гӕнӕн нӕй, ӕмӕ ӕцӕг Хуыцау фыдхъуыддаг сараза, Ӕппӕтхъомысджын Хуыцау хӕрам хъуыддаг бакӕна!» – фыст ис Иовы 34:10. Хуыцаумӕ адӕмы тыххӕй хорз фӕндтӕ ис. Уымӕ гӕсгӕ Чырысти адӕмы ахуыр кодта, цӕмӕй куывтаиккой афтӕ: «Нӕ уӕларвон Фыд... Ӕрцӕуӕд дӕ паддзахад. Дӕ фӕндон уӕлӕрвты куыд ис, афтӕ уӕд зӕххыл дӕр» (Матфейы 6:9, 10). Хуыцау ныл афтӕ тынг тыхсы, ӕмӕ йӕ фӕндон сӕххӕст кӕныны тыххӕй нывондӕн ӕрхаста, ӕппӕты зынаргъдӕр ӕм цы уыдис, уый (Иоанны 3:16).

Кӕс ма Райдиан 1:26–28; Иаковы 1:13 ӕмӕ 1 Петры 5:6, 7.

Хӕстытӕ ӕмӕ хъизӕмӕрттӕн искуы кӕрон уыдзӕн?

ЦӔМӔН ФӔЗЫНЫ АХӔМ ФАРСТА: Абон дӕр хӕстыты тынг бирӕ адӕм мӕлы. Зындзинӕдтӕй нӕ иу дӕр хызт нӕу.

БИБЛИ ЦЫ ДЗУРЫ: Хуыцау раджы загъта, йӕ рӕстӕджы зӕххыл сабыр цард кӕй сараздзӕн. Йӕ уӕларвон Паддзахад бартӕ йӕ къухмӕ куы райса, уӕд адӕм «хӕцын... нал ахуыр кӕндзысты». Уымӕй уӕлдай ма «сӕ хъаматӕй сараздзысты гутӕттӕ» (Исай 2:4). Хуыцау кӕрон скӕндзӕн, цыдӕриддӕр ӕнӕраст хъуыддӕгтӕ ӕмӕ хъизӕмӕрттӕ ис, уыдонӕн. Библи зӕрдӕ ӕвӕры: «[Хуыцау] сын ныссӕрфдзӕн сӕ цӕссыгтӕ, ӕмӕ нал уыдзӕн нӕдӕр мӕлӕт, нӕдӕр маст, нӕдӕр хъарӕг, нӕдӕр рыст. Раздӕр цы уыд [хъизӕмӕрттӕ ӕмӕ фыддзинӕдтӕ], уый аивгъуыдта» (Раргомад 21:3, 4).

Кӕс ма Псалом 37:10, 11; 46:9 ӕмӕ Михейы 4:1–4.

Адӕймагӕн ӕнӕмӕлгӕ уд ис?

ЦӔМӔН ФӔЗЫНЫ АХӔМ ФАРСТА: Динтӕн сӕ фылдӕр ахуыр кӕнынц, зӕгъгӕ, адӕймаг куы амӕлы, уӕд ма йӕ уд фӕцӕры. Иуӕй-иутӕ ӕууӕндынц, мардӕн йӕ бон кӕй у удӕгӕстӕн исты фыдбылыз ракӕнын кӕнӕ, Хуыцау фыдгӕнджытӕн кӕй стӕрхон кӕны ӕмӕ ӕнустӕм зындоны арты кӕй фӕхъизӕмар кӕнынц.

БИБЛИ ЦЫ ДЗУРЫ: Адӕймаг куы амӕлы, уӕд ууыл йӕ цард фӕвӕййы. «Мӕрдтӕ... ӕппындӕр ницы зонынц»,– фыст ис Екклесиасты 9:5. Мард кӕй ницы зоны ӕмӕ кӕй ницы ’мбары, уымӕ гӕсгӕ йӕ бон нӕу удӕгӕстӕн нӕдӕр ӕвзӕр аразын, нӕдӕр хорз (Псалом 146:3, 4).

Кӕс ма Райдиан 3:19 ӕмӕ Екклесиаст 9:6, 10.

Чи амард, уыдон ма цӕрдзысты?

ЦӔМӔН ФӔЗЫНЫ АХӔМ ФАРСТА: Мах фӕнды цӕрын ӕмӕ кӕй уарзӕм, уыдонимӕ цардыл цин кӕнын. Уӕдӕ диссаг нӕу, чи амард, уыдоны фенынмӕ кӕй бӕллӕм, уый.

БИБЛИ ЦЫ ДЗУРЫ: Чи амард, уыцы адӕмӕн сӕ фылдӕр райгас уыдзысты. Чырысти загъта: «Ингӕнты чидӕриддӕр ис, уыдон... райгас уыдзысты цӕрынӕн» (Иоанны 5:28, 29). Чи райгас уа, уыдон цӕрдзысты дзӕнӕты зӕххыл, Хуыцау ӕппӕты райдианы куыд фӕнд кодта, афтӕ (Лукайы 23:43). Уыцы ныхӕстӕ ма ууыл дзурӕг сты, ӕмӕ Хуыцаумӕ чи хъуса, уыцы адӕм рынчын кӕй нал кӕндзысты ӕмӕ ӕнустӕм кӕй цӕрдзысты. Библийы фыст ис: «Рӕстгӕнджытӕ зӕхх бынӕн райсдзысты ӕмӕ йыл цӕрдзысты ӕнустӕм» (Псалом 37:29).

Кӕс ма Иовы 14:14, 15; Лукайы 7:11–17 ӕмӕ Хъуыддӕгтӕ 24:15.

Хуыцаумӕ куыд кувын хъӕуы ӕмӕ мын, цымӕ, мӕ куывдтытӕ хъусы?

ЦӔМӔН ФӔЗЫНЫ АХӔМ ФАРСТА: Хуыцаумӕ кувынц алы динтыл хӕст адӕм дӕр, фӕлӕ бирӕтӕм афтӕ кӕсы, ӕмӕ сӕ Хуыцау нӕ хъусы.

БИБЛИ ЦЫ ДЗУРЫ: Йесо Чырысти ахуыр кодта: «Куы кувай, уӕд-иу... уыцы иу ныхӕстӕ ногӕй ӕмӕ ногӕй ма дзур» (Матфейы 6:7). Кӕд нӕ фӕнды, цӕмӕй нын Хуыцау нӕ куывдтытӕ хъуса, уӕд ӕм хъуамӕ кувӕм, Хуыцауы куыд фӕнды, афтӕ. Уый тыххӕй базонын хъӕуы Хуыцауы фӕндон ӕмӕ йӕм уымӕ гӕсгӕ кувын. 1 Иоанны 5:14 фыст ис: «Хуыцауӕй йӕ фӕндонмӕ гӕсгӕ цыфӕнды ма ракурӕм,– хъусы нӕ».

Кӕс ма Псалом 65:2; Иоанны 14:6, 14 ӕмӕ 1 Иоанны 3:22.

Амондджын цӕй фӕрцы уыдзынӕн?

ЦӔМӔН ФӔЗЫНЫ АХӔМ ФАРСТА: Адӕмӕй бирӕты уырны, ӕцӕг амонд ӕхцайӕ, кадӕй кӕнӕ рӕсугъддзинадӕй кӕнгӕ кӕй у. Бӕлгӕ дӕр сӕм уый тыххӕй кӕнынц, фӕлӕ амондджын не свӕййынц.

БИБЛИ ЦЫ ДЗУРЫ: Амонд цӕмӕй кӕнгӕ у, уый тыххӕй Чырысти загъта: «Амондджын сты, ӕнӕ Хуыцауӕй цӕрӕн кӕй нӕй, уый чи ӕмбары, уыдон» (Матфейы 5:3). Ӕцӕг амондджын уыдзыстӕм, царды ахсджиагдӕр цы у, уымӕ, ома Хуыцауы тыххӕй ӕмӕ йӕ фӕндты тыххӕй базонынмӕ куы бӕллӕм, уӕд. Уыдӕттӕ базонӕн ис Библийӕ. Уӕд бамбардзыстӕм, царды ӕппӕты ахсджиагдӕр цы у ӕмӕ цы нӕу, уый. Библийы цы фыст ис, уымӕ гӕсгӕ куы аразӕм нӕ цард, уӕд уыдзыстӕм бирӕ амондджындӕр (Лукайы 11:28).

Кӕс ма Ӕмбисӕндтӕ 3:5, 6, 13–18 ӕмӕ 1 Тимофеймӕ 6:9, 10.

Адон сты Библийӕ цыбыр дзуаппытӕ ӕрмӕст ӕхсӕз фарстайӕн. Фӕнды дӕ ноджы фылдӕр базонын? Кӕд ды дӕр ӕмбарыс, «ӕнӕ Хуыцауӕй цӕрӕн кӕй нӕй, уый», уӕд бацархайдзынӕ, цӕмӕй фылдӕр базонай. Чи зоны дӕ фӕнды ӕндӕр фарстатӕн дӕр дзуапп базонын. Зӕгъӕм, кӕд нӕ Хуыцау уарзы, уӕд ӕвзӕрдзинад ӕмӕ хъизӕмӕрттӕн кӕрон цӕуылнӕ скӕны? Мӕ бон цы у саразын, цӕмӕй мӕ бинонтӕ амондджындӕр уой? Ахӕм фарстатӕн Библийы ис бӕлвырд ӕмӕ, зӕрдӕ кӕмӕй барухс уыдзӕн, ахӕм дзуаппытӕ.

Фӕлӕ абон бирӕтӕ сӕ ныфс нӕ хӕссынц Библи кӕсынмӕ, зӕгъгӕ, стыр чиныг у, стӕй хатт зын ӕмбарӕн вӕййы. Фӕнды дӕ, цӕмӕй дын Библи бамбарынӕн баххуыс кӕной? Йегъовӕйы Ӕвдисӕнтӕ дын баххуыс кӕндзысты.

Иу мадзал у ахӕм: Йегъовӕйы Ӕвдисӕнтӕй исчи демӕ Библи лӕвар ахуыр кӕндзӕн хӕдзары кӕнӕ дӕу кӕм фӕнды, уым. Уый тыххӕй-иу дӕ алы къуыри дӕр иугыццыл рӕстӕг йеддӕмӕ рахицӕн кӕнын нӕ бахъӕудзӕн. Ӕгас дунейы дӕр милуантӕ афтӕ ахуыр кӕнынц. Ӕмӕ дзы бирӕтӕ ӕрцыдысты ахӕм хъуыдымӕ: «Ӕз ссардтон рӕстдзинад!»

Уымӕй хуыздӕр ницы ис. Библийы рӕстдзинады фӕрцы адӕймаг ссӕрибар вӕййы мӕнг уырнындзинӕдтӕй, йӕ фарстатӕн бӕлвырд дзуапп базоны ӕмӕ йын йӕ уӕнг чи мары, уыцы тасӕй фервӕзы. Библийы рӕстдзинады фӕрцы нын фӕзыны ныфс, царды нысан ӕмӕ циндзинад. Йесо Чырысти загъта: «Базондзыстут рӕстдзинад, ӕмӕ уӕ рӕстдзинад ссӕрибар кӕндзӕн» (Иоанны 8:32).