ӔХХУЫС БИНОНТӔН | ЦАРДӔМБӔЛТТӔ
Куыстӕн хъуамӕ уа йӕхи бынат
Технологиты рӕстӕджы кӕй цӕрӕм, уымӕ гӕсгӕ дӕ куысты хицау, де ’мкусджытӕ кӕнӕ клиенттӕ, гӕнӕн ис, хъуыды кӕной, кӕдфӕнды дӕр дӕм кӕй ис бадзурӕн. Уый тыххӕй дӕ, гӕнӕн ис, иннӕ хъуыддӕгтӕм мауал ӕвдӕла, суанг дӕ цардӕмбалмӕ дӕр.
Цы хъуамӕ зонай
Дӕ цардӕмбалимӕ цы рӕстӕг хъуамӕ ӕрвитай, уый дӕр дын, гӕнӕн ис, технологиты тыххӕй куыстыл ацӕуа. Куысты фӕдыл дӕм куы ’рбадзурынц кӕнӕ куы ныффыссынц, уӕд дӕм, чи зоны, афтӕ фӕкӕсы, ӕмӕ дын цы загътой, уый уыцы тӕккӕ хъуамӕ саразай.
«Раздӕр-иу адӕймаг фӕскуыст хӕдзармӕ ӕрбацыд ӕмӕ-иу йӕ рӕстӕг йӕ бинонтимӕ ӕрвыста. Фӕлӕ ныр уый тынг зын у, уымӕн ӕмӕ адӕймагмӕ куыстӕй куы ’рбадзурынц кӕнӕ куы ныффыссынц, уӕд бинонтӕ рохуаты аззайынц» (Дженетт).
Цӕмӕй дын куыстӕн дӕр ӕмӕ бинонтӕн дӕр рӕстӕг уа, уый тыххӕй хъуамӕ исты аразай. Дӕ хъуыддӕгтӕ куы нӕ пълан кӕнай, уӕд дӕ рӕстӕг иууылдӕр дӕ куыстыл цӕудзӕн.
«Адӕймагӕн арӕхдӕр рӕстӕг йӕ цардӕмбалӕн нӕ фӕфаг кӕны, уымӕн ӕмӕ фӕхъуыды кӕны: „Цӕй, уый мӕ бамбардзӕн, ныххатыр мын кӕндзӕн. Уый фӕстӕ нӕ рӕстӕг иумӕ арвитдзыстӕм“» (Холли).
Уынаффӕтӕ, цӕмӕй куыстмӕ ӕмӕ иннӕ хъуыддӕгтӕм раст цӕстӕй кӕсай
Фыццаг бынаты дын дӕ цардӕмбал уӕд. Библийы фыст ис: «Хуыцау цы баиу кодта, уый адӕймаг ма ахицӕн кӕнӕд» (Матфейы 19:6). Кӕд адӕймагӕн уый бар нӕ ратдзынӕ, цӕмӕй дӕ дӕ цардӕмбалӕй «ахицӕн кӕна», уӕд куыстӕн уый бар цӕмӕн хъуамӕ дӕттай?
«Клиенттӕй иуӕй-иутӕм афтӕ фӕкӕсы, ӕмӕ дын иугӕр ӕхца фидынц, уӕд дӕм сӕ бон кӕдфӕнды дӕр у ӕрбадзурын. Фӕлӕ мын мӕ бинонтӕ хъуамӕ фыццаг бынаты уой. Ӕмӕ сын уымӕ гӕсгӕ фӕзӕгъын, куы нӕ фӕкусын, уӕд куысты хабӕрттӕ кӕй нӕ фӕкӕнын ӕмӕ сӕм фӕстӕдӕр мӕхӕдӕг кӕй бадзурдзынӕн» (Марк).
Ахъуыды кӕн: «Мӕ хъуыддӕгтӕй бӕрӕг у, мӕ цардӕмбал мын куыстӕй зынаргъдӕр кӕй у?»
«Нӕ» дзурын зон. Библийы фыст ис: «Зонд... ис бонзонгӕтӕм» (Ӕмбисӕндтӕ 11:2). Бонзонгӕ куы уай, уӕд ӕмбардзынӕ, хатт хуыздӕр кӕй вӕййы, цӕмӕй цавӕрдӕр куыстыл ма сразы уай кӕнӕ йӕ ӕндӕр искӕмӕн бахӕс кӕнай.
«Мӕ куыст у доны трубатӕм зилын. Ӕмӕ мӕм исчи куы ’рбадзуры, уӕд уый ууыл дзурӕг вӕййы, ӕмӕ тынг тыхст у ӕмӕ йӕ ӕххуыс ӕвӕстиатӕй хъӕуы. Ӕмӕ йын мӕхи бон уыцы рӕстӕг баххуыс кӕнын куы нӕ вӕййы, уӕд ын фӕзӕгъын, ахӕм куыст чи кӕны, уыдонӕй ма йӕ бон бадзурын кӕмӕ у» (Кристофер).
Ахъуыды кӕн: «Фӕскуыст бакус, зӕгъгӕ мын куы зӕгъой, уӕд цымӕ сразы уыдзынӕн, уый тыххӕй мӕ цардӕмбалмӕ афтӕ куы кӕса, ӕмӕ йӕ ницӕмӕ дарын, уӕд? Мӕ цардӕмбал та ацы фарстайӕн цавӕр дзуапп раттид?»
Уӕ рӕстӕг иумӕ кӕд арвитдзыстут, уый-иу спълан кӕнут. Библийы фыст ис: «Алцӕмӕн дӕр ис йӕхи афон» (Екклесиаст 3:1). Бирӕ куыст дын куы уа, уӕд уӕлдай ахсджиаг вӕййы, цӕмӕй-иу спълан кӕнай, дӕ цардӕмбалимӕ рӕстӕг кӕд арвитдзынӕ, уый.
«Тынг ӕнӕвдӕлон куы вӕййӕм, уӕд баныхас кӕнӕм, цӕмӕй иу гыццыл рӕстӕг иумӕ уӕддӕр арвитӕм. Зӕгъӕм, сихор иумӕ бахӕрӕм кӕнӕ доны был атезгъо кӕнӕм» (Деборӕ).
Ахъуыды кӕн: «Мӕ хъуыддӕгтӕ афтӕ спълан кӕнын, цӕмӕй-иу мын мӕ цардӕмбалӕн рӕстӕг баззайа? Мӕ цардӕмбал та ацы фарстайӕн цавӕр дзуапп раттид?»
Дӕ телефон-иу ахуыссын кӕн. Библийы фыст ис: «Ахсджиагдӕр цы у, уый сбӕлвырд кӕнут» (Филиппӕгтӕм 1:10). Дӕ бон вӕййы искуы иу хатт дӕ телефон ахуыссын кӕнын? Кӕннод дӕм, гӕнӕн ис, куыстӕй фӕдзурой ӕмӕ дӕ бахъыгдарой.
«Мӕ куыст-иу цафон фӕуыдзынӕн, уымӕн рӕстӕг снысан кодтон ӕмӕ уымӕй фӕстӕмӕ нал фӕкусын. Уый тыххӕй мӕ телефоны кӕцыдӕр функцитӕ ахуыссын кӕнын, цӕмӕй мӕм куы дзурой кӕнӕ куы фыссой, уӕд мӕ ма хъыгдарой» (Джереми).
Ахъуыды кӕн: «Мыййаг мӕм афтӕ кӕсы, ӕмӕ мын мӕ телефон хуыссын кӕныны бар нӕй, цӕмӕй-иу мӕм мӕ хицау кӕнӕ клиенттӕ кӕдфӕнды дӕр ӕрбадзурой? Мӕ цардӕмбал та ацы фарстайӕн цавӕр дзуапп раттид?»
Ӕмбаргӕ у. Библийы фыст ис: «Уе ’мбаргӕдзинадӕй уӕ зонӕд алчидӕр» (Филиппӕгтӕм 4:5). Хатт афтӕ рауайы, ӕмӕ уӕ уӕ куыст уӕ рӕстӕг иумӕ арвитын бахъыгдары. Зӕгъӕм, дӕ цардӕмбалӕн йӕ куыст ахӕм у, ӕмӕ йӕм куыстӕй цавӕрфӕнды афон ма ’рбадзурой, уӕддӕр-иу хъуамӕ дзуапп радта. Уӕдӕ ӕмбаргӕ у, ӕмӕ дзы ӕгӕр бирӕ ма дом.
«Мӕ цардӕмбалӕн ис гыццыл бизнес. Ӕмӕ арӕх йӕ куысты фӕзыны, аргъӕвӕн кӕй нӕй, ахӕм фарстатӕ. Гъемӕ йӕ уыцы фарстатӕ аскъуыддзаг кӕнын бахъӕуы фӕскуыст. Хатт мӕсты дӕр свӕййын. Фӕлӕ уый ницы кӕны, уымӕн ӕмӕ иумӕ ӕнӕуи дӕр бирӕ рӕстӕг фервитӕм» (Беверли).
Ахъуыды кӕн: «Ӕмбарын ӕй, мӕ цардӕмбал бирӕ кӕй кусы ӕмӕ дзы ӕгӕр бирӕ кӕй хъуамӕ ма домон? Мӕ цардӕмбал та ацы фарстайӕн цавӕр дзуапп раттид?»
Цавӕр фарстатыл ис иумӕ аныхас кӕнӕн
Ацы фарстатыл хицӕнтӕй ахъуыды кӕнут ӕмӕ сыл стӕй иумӕ аныхас кӕнут.
Искуы дӕ цардӕмбал хъуыр-хъуыр кодта, хӕдзары дӕр дӕ куысты хабӕрттӕ кӕй фӕкӕныс, ууыл? Кӕд о, уӕд йемӕ разы дӕ?
Цы дӕ хъӕуы фӕивын, цӕмӕй куыстмӕ ӕмӕ иннӕ хъуыддӕгтӕм раст цӕстӕй кӕсай?
Искуы дӕм афтӕ каст, ӕмӕ дӕ цардӕмбалы ферох вӕййы, куысты хабӕрттӕ куысты кӕнын кӕй хъӕуы, хӕдзары дӕр нӕ, фӕлӕ? Дӕ бон у ахӕм хабӕрттӕ ӕрхъуыды кӕнын?
Цӕмӕй дӕ цардӕмбал, куыстмӕ ӕмӕ иннӕ хъуыддӕгтӕм раст цӕстӕй кӕса, уый тыххӕй йӕ, дӕумӕ гӕсгӕ, цы фӕивын хъӕуы?