Хъусын хорз цӕмӕн у?

ЗӔГЪ-МА, афтӕ никуы ахъуыды кодтай: цы хорз уаид, мӕхи цы фӕнды, уый куы аразин? Куы ничи мын дзурид: афтӕ ма кӕн, афтӕ бакӕн. Ӕргом-ма зӕгъ, уый дӕ никуы фӕндыд? ~

Фӕлӕ дын хуыздӕр та цы у? Дӕхи цы фӕнды, уый куы аразай, ӕви дын дӕ фыд ӕмӕ дӕ мад цы дзурынц, уый? ~ Хуыцау дзуры, цӕмӕй дӕ фыд ӕмӕ дӕ мадмӕ хъусай. Ӕмӕ афтӕ, ӕвӕццӕгӕн, дзӕгъӕлы нӕ зӕгъы. Цӕмӕн? Цӕй ӕмӕ йӕ базонӕм.

Цал азы дыл цӕуы? ~ Дӕ фыдыл та? ~ Дӕ мад, дӕ бабу ӕмӕ дӕ дедуйыл та? ~ Уыдон дӕуӕй бирӕ фылдӕр фӕцардысты. Ӕмӕ адӕймаг цас фылдӕр фӕцӕры, уыйас ын фылдӕр вӕййы рӕстӕг истытӕ базонынӕн. Фылдӕр цыдӕртӕ фехъусы, фылдӕр цыдӕртӕ фены ӕмӕ фылдӕр цыдӕртӕ саразы. Ӕмӕ сывӕллӕттӕн сӕ бон у хистӕртӕй бирӕ цыдӕртӕ базонын.

Дӕхицӕй кӕстӕр чи у, ахӕм искӕй зоныс? ~ Фылдӕр уӕ чи зоны: ды ӕви уый? ~ Ӕмӕ ды фылдӕр цӕмӕн зоныс? ~ Уымӕн ӕмӕ ды уымӕй фылдӕр фӕцардтӕ. Дӕуӕн фылдӕр рӕстӕг уыди, цӕмӕй истытӕ базыдтаис ӕмӕ истӕуыл сахуыр уыдаис.

Зоныс ӕй, мӕнӕй дӕр, дӕуӕй дӕр ӕмӕ иннӕтӕй дӕр фылдӕр чи фӕцард? ~ Йегъовӕ Хуыцау. Уый дӕуӕй дӕр ӕмӕ мӕнӕй дӕр бирӕ фылдӕр зоны. Ӕмӕ нын исты куы дзура, уӕд ӕм хъуамӕ байхъусӕм, зын нӕм куы кӕса, уӕд дӕр. Зыдтай йӕ, иухатт ӕппӕты хуыздӕр Ахуыргӕнӕгӕн дӕр зын кӕй уыди, Хуыцау ын цы загъта, уый саразын? ~

Хуыцау Йесойӕн загъта, цӕмӕй бакодтаид иу зын хъуыддаг. Ӕмӕ Йесо уый тыххӕй куывта Хуыцаумӕ. Мӕнӕ йӕ ам нывы уынӕм. Уый куывта: «Мӕ Фыд, кӕд дӕ фӕндон у, уӕд мын ацы зын хъуыддаг ма бакӕнын кӕн». Ацы ныхӕстӕ ууыл дзурӕг сты, ӕмӕ Хуыцауы фӕндон ӕххӕст кӕнын алы хатт ӕнцон нӕ вӕййы. Фӕлӕ Йесо кувгӕйӕ фӕстагмӕ цы загъта, уый зоныс? ~

Йесо фӕстагмӕ загъта: «Мӕн куыд фӕнды, афтӕ нӕ, фӕлӕ дӕу куыд фӕнды, афтӕ уӕд» (Лукайы 22:41, 42). Йесойы фӕндыд, цӕмӕй йӕхи фӕндон нӕ, фӕлӕ Хуыцауы фӕндон сӕххӕст уыдаид. Ӕмӕ, йӕхимӕ хуыздӕр куыд каст, афтӕ нӕ бакодта, фӕлӕ Хуыцауы куыд фӕндыд, афтӕ.

Ацы хабарӕй цы ис базонӕн? ~ Алкӕддӕр хуыздӕр вӕййы Хуыцаумӕ байхъусын, кӕд нын ӕнцон нӕ вӕййы, уӕддӕр. Фӕлӕ ма дзы базонӕн ис ноджыдӕр иу цыдӕр. Зоныс, цы? ~ Адӕм дзурынц, Хуыцау ӕмӕ Йесо иу кӕй сты. Фӕлӕ уый афтӕ нӕу. Йегъовӕ Хуыцау йӕ Фырт Йесойӕ бирӕ хистӕр у ӕмӕ уымӕй бирӕ фылдӕр зоны.

Хуыцаумӕ куы хъусӕм, уӕд уымӕй ӕвдисдзыстӕм, бирӕ йӕ кӕй уарзӕм. Библийы фыст ис: «Хуыцауы кӕй уарзӕм, уый уымӕй бӕрӕг уыдзӕн, ӕмӕ йын йӕ фӕдзӕхстытӕ куы ӕххӕст кӕнӕм» (1 Иоанны 5:3). Уӕдӕ хъуамӕ не ’ппӕт дӕр Хуыцаумӕ хъусӕм. Дӕу дӕр, ӕвӕццӕгӕн, фӕнды Хуыцаумӕ хъусын, афтӕ нӕу? ~

Байгом-ма кӕнӕм Библи ӕмӕ ӕркӕсӕм, Хуыцау сывӕллӕттӕн цы дзуры, уымӕ. Бакӕсдзыстӕм Ефесӕгтӕм 6-ӕм сӕр, 1-аг, 2-аг ӕмӕ 3-аг стихтӕ. Уым фыст ис: «Сывӕллӕттӕ, нӕ Хицауы хатырӕй уӕ ныййарджытӕм хъусут, уымӕн ӕмӕ афтӕ раст у. „Нымай дӕ фыд ӕмӕ дӕ мады“ – уый у, зӕрдӕвӕрдимӕ лӕвӕрд чи ’рцыд, фыццаг ахӕм фӕдзӕхст. Зӕрдӕвӕрд та у ахӕм: „Цӕмӕй дын уа хорз ӕмӕ зӕххыл бирӕ фӕцӕрай“».

Кӕсыс, Йегъовӕ Хуыцау дын йӕхӕдӕг дзуры, цӕмӕй дӕ фыд ӕмӕ дӕ мадмӕ хъусай. Куыд ис бамбарӕн ацы ныхӕстӕ та: «Нымай дӕ фыд ӕмӕ дӕ мады»? Хъуамӕ сын аргъ кӕнай ӕмӕ сӕ коммӕ кӕсай. Ӕмӕ дын Хуыцау зӕгъы: дӕ ныййарджытӕм куы хъусай, уӕд «дын уыдзӕн хорз».

Хъуамӕ дын иу хабар радзурон. Уыцы хабар ӕрцыди тынг раджы, стыр горӕт Иерусалимы цы адӕм цард, уыдоныл. Уыцы адӕмӕй иутӕ, цы сын загътой, уымӕ байхъуыстой ӕмӕ удӕгасӕй баззадысты. Фӕлӕ сӕ фылдӕр Хуыцаумӕ нӕ хъуыстой. Ӕмӕ сын Йесо загъта, Хуыцау сын сӕ горӕт кӕй ныппырх кӕндзӕн. Йесо ма бамбарын кодта, хорздзинад чи аразы, уыдон цӕмӕй аирвӕзой, уый тыххӕй сӕ цы бакӕнын хъӕуы. Уый загъта: «Иерусалимы алыварс ӕфсӕдтӕ куы фенат, уӕд-иу ӕй зонут, йе сӕфт кӕй ӕрхӕстӕг. Уӕд-иу, Иерусалимы чи уа, уыдон хӕхтӕм алидзӕнт» (Лукайы 21:20–22).

Йесойы ныхӕстӕ сӕххӕст сты: ромаг ӕфсӕдтӕ ӕрбацыдысты ӕмӕ Иерусалимы алыварс ӕрлӕууыдысты. Фӕлӕ фӕстӕдӕр цӕйдӕр тыххӕй фӕстӕмӕ аздӕхтысты. Адӕмӕй бирӕтӕ хъуыды кодтой, тӕссаг сын кӕй ницӕмӕйуал у, ӕмӕ горӕты баззадысты. Фӕлӕ сын Йесо цы загъта? Куыд хъуамӕ бакодтаиккой? ~ Ды дӕр Иерусалимы куы цардаис, уӕд куыд бакодтаис? ~ Йесойы ныхӕстыл чи баууӕндыд, уыдон сӕ хӕдзӕрттӕ ныууагътой ӕмӕ алыгъдысты Иерусалимӕй дард – хӕхтӕм.

Рацыд иу аз, ӕмӕ Иерусалимыл ницы ’рцыд. Рацыд дыккаг аз, ӕмӕ та ницы. Рацыд ӕртыккаг дӕр, ӕмӕ уӕддӕр ницы. Иуӕй-иутӕ, ӕвӕццӕгӕн, райдыдтой хъуыды кӕнын, зӕгъгӕ, горӕтӕй чи алыгъд, уыдон ӕнӕзонд ми бакодтой. Фӕлӕ цыппӕрӕм аз ромаг ӕфсӕдтӕ фӕстӕмӕ ӕрбацыдысты. Ӕмӕ та Иерусалимы алыварс ӕрлӕууыдысты. Ныр горӕтӕй рацӕуӕн нал уыди, байрӕджы. Ацы хатт ӕфсӕдтӕ горӕт ныппырх кодтой. Горӕты чи уыд, уыдонӕн сӕ фылдӕр амардысты, иннӕты та ромӕгтӕ ӕрцахстой ӕмӕ сӕ семӕ акодтой.

Йесомӕ чи байхъуыста, уыдон та цы баисты? ~ Уыдон удӕгасӕй баззадысты. Иерусалимӕй уыдысты тынг дард ӕмӕ сыл ницы ’рцыд. Кӕй байхъуыстой, уый фӕрцы аирвӕзтысты.

Ды дӕр куы хъусай, уӕд дӕхицӕн хуыздӕр нӕ уыдзӕн? ~ Зӕгъӕм, дӕ фыд ӕмӕ дӕ дӕ мад нӕ уадзынц фӕндагыл хъазын. Цымӕ цӕуылнӕ? ~ Уымӕн ӕмӕ дӕ машинӕ скъуырдзӕн. Фӕлӕ фӕндагыл машинӕтӕ куы нӕ уа, уӕд, чи зоны, ахъуыды кӕнай: «Ницы мыл ӕрцӕудзӕн. Иннӕ сывӕллӕттӕ фӕндагыл куы фӕхъазынц, ӕмӕ сыл куы ницы ’рцӕуы».

Иерусалимы дӕр адӕмӕй бирӕтӕ афтӕ хъуыды кодтой. Ромаг ӕфсӕдтӕ куы ацыдысты, уӕд адӕм загътой, ӕмӕ сын ныр тӕссаг ницӕмӕйуал у. Бирӕтӕ горӕтӕй нӕ ацыдысты, ӕмӕ уыдонмӕ гӕсгӕ иннӕтӕ дӕр баззадысты. Йесо сӕ бӕргӕ фӕдзӕхста, фӕлӕ йӕм нӕ байхъуыстой. Ӕмӕ уый тыххӕй амардысты.

Ныр та аныхас кӕнӕм ӕндӕр хъуыддагыл. Искуы спичкӕтӕй хъазыдтӕ? ~ Ӕвӕццӕгӕн, бирӕ уарзыс, спичкӕ куыд судзы, уымӕ кӕсын. Фӕлӕ спичкӕтӕй хъазӕн нӕй. Гӕнӕн ис, ӕмӕ уӕ хӕдзар дӕр ссудза, ӕмӕ дӕхӕдӕг дӕр амӕлай!

Ма рох кӕн: ӕрмӕст иуӕй-иу хатт куы хъусай, уӕд уый фаг нӕу. Хъуамӕ алкӕддӕр хъусай, ӕмӕ уӕд дӕхи алцӕмӕй дӕр бахъахъхъӕндзынӕ. Хъуыды ма йӕ кӕныс, афтӕ чи зӕгъы: «Сывӕллӕттӕ, уӕ ныййарджытӕм хъусут»? ~ Уый у Хуыцау. Афтӕ та уымӕн зӕгъы, ӕмӕ дӕ бирӕ уарзы.