Зӕххыл дзӕнӕт кӕй уыдзӕн, уый куы базыдтон, уӕд мӕ цард аивта!

МӔ РАЗДӔРЫ ЦАРД.

Ӕз райгуырдтӕн Латвийы сӕйраг горӕт Ригӕйы. Нӕ хоимӕ нӕ хъомыл кодта нӕ мад. Кӕд нӕ мад католик уыд, уӕддӕр аргъуанмӕ цыдыстӕм ӕрмӕстдӕр бӕрӕгбӕтты. Кӕмдӕр цыдӕр кӕй ис, уый мӕ алкӕддӕр уырныдта, фӕлӕ ӕрыгон кӕй уыдтӕн, уымӕ гӕсгӕ мӕ ӕндӕр хъуыддӕгтӕй ууыл хъуыды кӕнынмӕ не ’вдӕлд.

Гыццылӕй-иу хӕдзары мигӕнӕнтӕй цӕуыл фӕхӕст дӕн, уый-иу райхӕлдтон ӕмӕ-иу ӕй стӕй фӕстӕмӕ сӕмбырд кодтон. Уый тыххӕй мӕ мӕ мад хӕдзары иунӕгӕй уадзын нал уӕндыд, уымӕн ӕмӕ нӕм, райхалӕн кӕй уыд, ахӕм дзауматӕ бирӕ уыди. Ӕмӕ мын уӕд балхӕдта ӕфсӕйнаг конструктор. Ӕз-иу ӕй сӕмбырд кодтон ӕмӕ та-иу ӕй ногӕй райхӕлдтон. Тынг ма уарзтон мотоциклтӕ дӕр. Уымӕ гӕсгӕ мӕ мӕ мад акодта, цы ерыстӕ-иу нӕм цыд, «Зельта Мопедс» (Сызгъӕрин мопед), зӕгъгӕ, уым архайынмӕ. Райдианты-иу ерысты бадтӕн мопедыл, фӕстӕдӕр та – мотоциклыл.

Курдиатджын кӕй уыдтӕн, уымӕ гӕсгӕ мын уыцы тӕссаг спорты цыбыр рӕстӕгмӕ бирӕ бантыст. Ӕртӕ хатты рамбылдтон мотоциклистты ерысты Латвийы чемпионаты, дыууӕ хатты та Балтикӕйы бӕстӕты чемпионаты.

БИБЛИЙЫ ФӔРЦЫ МӔ ЦАРД ФӔИВТА.

Спорты уӕлдӕр къӕпхӕнтӕм куы схызтӕн, раст уыцы рӕстӕг мӕ уарзон чызг Эвийӕ (фӕстӕдӕр нӕ цард баиу кодтам) Йегъовӕйы Ӕвдисӕнтимӕ базонгӕ. Уый рауад афтӕ, ӕмӕ йӕ къухмӕ ӕрбахауд сӕ публикацитӕй иу. Уыди дзы купон, Библи ахуыр кӕнын кӕй фӕнды, уыдонӕн. Эвийӕ купон байдзаг кодта ӕмӕ йӕ арвыста. Фӕстӕдӕр ӕм Йегъовӕйы Ӕвдисӕнтӕ ӕрбацыдысты ӕмӕ семӕ Библи ахуыр кӕнын райдыдта. Ӕз ныхмӕ нӕ уыдтӕн, фӕлӕ мӕн уыцы рӕстӕг дин не ’ндӕвта.

Иухатт, Йегъовӕйы Ӕвдисӕнтӕ Эвийӕимӕ Библи куы ахуыр кодтой, уӕд мын сӕ иу загъта, цӕмӕй ӕз дӕр семӕ абадтаин. Ӕз сразы дӕн. Цы фехъуыстон, уый мӕм хорз фӕкаст. Уӕлдай тынгдӕр та мӕ зӕрдӕмӕ фӕцыд, Библийы афтӕ фыст кӕй ис, зӕххыл дзӕнӕт уыдзӕн, зӕгъгӕ. Равдыстой мын Псалом 37:10, 11. Уым фыст ис: «Иу гыццыл ма, ӕмӕ фыдгӕнӕг нал уыдзӕн, кӕм уыди, уырдӕм бакастӕ, ӕмӕ нал ис. Сабыр адӕм та зӕхх бынӕн райсдзысты ӕмӕ фарнӕй бафсӕддзысты». Уыцы ныхӕстӕ мын мӕ зӕрдӕ бацагайдтой.

Уӕдӕй фӕстӕмӕ диныл арӕхдӕр хъуыды кодтон. Динты ахуырӕдтӕй бирӕтӕ мӕнг кӕй сты, уый ӕмбарын райдыдтон. Уыдонӕй уӕлдай Библийы ахуырӕдтӕ уыдысты бӕлвырд ӕмӕ ӕнцонӕмбарӕн.

Библи куы ахуыр кодтон, уӕд базыдтон, Йегъовӕ цардӕн куыд тынг аргъ кӕны, йӕ цӕсты куыд тынг зынаргъ у (Псалом 36:9). Уый фӕзынд, ерыстӕм цы цӕстӕй кастӕн, ууыл – нал мӕ фӕндыд мӕхи мӕлӕты дзыхмӕ ’ппарын. Уый бӕсты мӕ бафӕндыд мӕ цард Йегъовӕйы кадджын кӕнынӕн снывонд кӕнын. Кадмӕ нал бӕллыдтӕн, стӕй мын ерыстӕ цы циндзинад хастой, уый дӕр мӕм ницыуал каст.

1996 азы ацыдтӕн, Йегъовӕйы Ӕвдисӕнтӕн Таллины (Эстони) цы ӕхсӕнадӕмон конгресс уыд, уырдӕм. Конгресс уыд, арӕх-иу нын ерыстӕ кӕм уыди, уыцы стадионмӕ хӕстӕг. Конгрессы уыдысты адӕм алы бӕстӕтӕй, фӕлӕ кӕрӕдзийыл куыд цин кодтой ӕмӕ се ’хсӕн цы фарн уыд, уый фенын хъуыд! Зӕгъӕм, иу сылгоймагӕн дзы йӕ сумкӕ фесӕфт, ӕмӕ мӕхинымӕр загътон, нал ӕй ссардзӕн, зӕгъгӕ. Фӕлӕ йын ӕй уалынмӕ иу сылгоймаг куы ӕрбахӕссид, ӕппындӕр дзы ницы фесӕфт, афтӕмӕй. Ахӕм диссаг никуы федтон! Уӕд ӕй бамбӕрстон, Йегъовӕйы Ӕвдисӕнтӕ ӕцӕгдӕр Библийы уагӕвӕрдтӕм гӕсгӕ кӕй цӕрынц. Эвийӕимӕ дарддӕр дӕр Библи ахуыр кодтам ӕмӕ 1997 азы донаргъуыд райстам.

АБОН МӔ ЦАРДӔЙ РАЙГОНД ДӔН.

Ме ’мбӕлттӕй цалдӕр амард, сӕ цардӕн кӕй нӕ аргъ кодтой ӕмӕ-иу мотоциклтыл ӕрра скъӕрд кӕй кодтой, уый тыххӕй. Библи кӕй ахуыр кодтон, уый фӕрцы бамбӕрстон, Йегъовӕйы, цард мын чи радта, уый раз мӕ дзуапп дӕттын кӕй хъӕуы.

Цыппар азы Эвийӕимӕ фӕлӕггад кодтам Йегъовӕйы Ӕвдисӕнтӕ филиалы Ригӕйы. Ныр та хъомыл кӕнӕм нӕ гыццыл чызг Алисӕйы, ахуыр ӕй кӕнӕм Йегъовӕйы уарзын. Къуыри иу бон вӕййын тӕлмацгӕнджыты офисы, фӕцалцӕг кӕнын машинӕтӕ ӕмӕ ӕндӕр саст дзауматӕ. Стыр циндзинад мын хӕссы, гыццылӕй фӕстӕмӕ мӕм цы курдиат ис, уымӕй мӕ бон кӕй у пайда кӕнын, цӕмӕй иннӕтӕн ӕххуыс кӕнон. Абон дӕр ма цыдӕртӕ райхалын ӕмӕ та сӕ ногӕй сӕмбырд кӕнын.

Мӕхицӕн стыр кадыл нымайын, Библийӕ цы базыдтон, уый фӕрцы мӕ бинонтимӕ иннӕтӕн дӕр ӕцӕг Хуыцау Йегъовӕйы тыххӕй мӕ бон дзурын кӕй у, уый. Зӕххыл дзӕнӕт кӕй уыдзӕн, уый куы базыдтон, уӕд мӕ цард аивта!