Давид ӕмӕ Голиаф. Уый ӕцӕг хабар уыд?

1 | Цымӕ уый гӕнӕн ис, ӕмӕ адӕймаджы бӕрзӕнд 2,9 метры бӕрц уа?

Библийы фыст ис, зӕгъгӕ, Голиафӕн «йӕ бӕрзӕнд уыд ӕхсӕз ӕлмӕрины ӕмӕ уылынг» (1 Самуилы 17:4). Ам цы ӕлмӕрины кой ис, уый у 44,5 сантиметры, уылынг та у 22,2 сантиметры. Ӕмӕ дзы афтӕмӕй уайы 2,9 метры бӕрц. Иуӕй-иутӕ зӕгъынц, зӕгъгӕ, дам, Голиаф ахӕм бӕрзонд нӕ уыд. Фӕлӕ-ма ахъуыды кӕнӕм: нӕ рӕстӕджы ӕппӕты бӕрзонддӕр адӕймаг уыди 2,7 метры. Уӕдӕ цымӕ ӕцӕгдӕр уый гӕнӕн нӕ уыд, ӕмӕ Голиаф уымӕй 15 сантиметры бӕрзонддӕр уыдаид? Голиаф уыди рефаимты байзӕддаг. Уыдоны иууылдӕр зыдтой, ӕнахуыр стыр кӕй уыдысты, уымӕй. Нӕ эрӕйы размӕ 13 ӕнусы фыст египетаг документты фыст ис, Ханааны зӕххыл, сӕ бӕрзӕнд 2,4 метры кӕмӕн уыд, ахӕм стыр хӕстонтӕ кӕй уыди. Уӕдӕ уый гӕнӕн уыд, цӕмӕй Голиаф ахӕм бӕрзонд уыдаид.

2 | Давид ӕцӕгдӕр цард?

Иу рӕстӕг ахуыргӕндтӕ дзырдтой, зӕгъгӕ, паддзах Давид ӕцӕгӕй никуы цард, уый аргъау уыд. Фӕлӕ уыцы хъуыды сбӕлвырд кӕнын сӕ бон нӕ уыд. Археологтӕ цы рагон фыстытӕ ссардтой, уыдонӕй иуы «Давиды хӕдзары» кой дӕр уыди. Уымӕй уӕлдай ма Йесо Чырысти дӕр дзырдта, Давид ӕцӕгдӕр кӕй цард, уый тыххӕй (Матфейы 12:3; 22:43–45). Йесо Мессийӕ кӕй уыд, уый бӕлвырд кодта дыууӕ номхыгъдӕй. Ӕмӕ уыцы мыггӕгты номхыгъдӕй бӕрӕг у, Йесо паддзах Давиды байзӕддаг кӕй у, уый (Матфейы 1:6–16; Лукайы 3:23–31). Уӕдӕ куыд уынӕм, афтӕмӕй Давид ӕцӕгдӕр цард.

3 | Уыцы хабары цы бынаты кой цӕуы, уый ӕцӕгдӕр уыди?

Библийы фыст ис, уыцы тох Илӕйы дӕлвӕзы кӕй уыди. Фӕлӕ йӕм ноджы бӕстондӕр куы ’ркӕсӕм, уӕд фендзыстӕм, филистимӕгты ’фсад дыууӕ горӕты, Сохо ӕмӕ Азекӕйы, астӕу къуыбырыл кӕй ӕрбынат кодта. Израилӕгтӕ та сӕ ныхмӕ къуыбырыл ӕрбынат кодтой. Цымӕ уыцы бынат ӕцӕгдӕр уыди?

Байхъусӕм-ма, ӕрӕджы уыцы ран чи уыд, ахӕм адӕймаджы ныхӕстӕм. Уыцы лӕг загъта: «Экскурси нын чи кодта (уырнӕг адӕймаг нӕ уыд), уый нӕ акодта Илӕйы дӕлвӕзмӕ. Ахӕм фӕндагыл нӕ акодта, цӕмӕй къуыбыры былмӕ бацыдаиккам. Уырдыгӕй дӕлвӕзмӕ куы кастыстӕм, уӕд нын экскурсовод бакасти 1 Самуилы 17:1–3 стихтӕ. Уый фӕстӕ, дӕлвӕзмӕ цы фӕндаг цыди, уымӕ ацамыдта ӕмӕ загъта: „Галиуырдыгӕй уынут Сохойы хӕлддзӕгтӕ“. Стӕй иннӕрдӕм разылд ӕмӕ загъта: „Рахизырдыгӕй та – Азекӕйы хӕлддзӕгтӕ. Филистимӕгты ’фсад ӕрбынат кодта уыцы дыууӕ горӕты астӕу, кӕмӕ кӕсут, уыцы къуыбырыл кӕмдӕр. Мах та, ӕвӕццӕгӕн, лӕууӕм, израилӕгты ӕфсад кӕм ӕрбынат кодта, уыцы ран“. Ӕз ахъуыды кодтон, зӕгъын, Саул ӕмӕ Давид лӕууыдысты, растдӕр ӕз кӕм лӕууын, уым. Уый фӕстӕ уырдыгӕй ӕрхызтыстӕм ӕмӕ ацыдыстӕм цӕугӕдоны дӕлвӕзы, фылдӕр рӕтты сур уыди ӕмӕ дуртӕй йедзаг. Мӕнӕн мӕ цӕстытыл ауад, Давид куыд ӕргуыбыр кодта ӕмӕ ацы ран фондз лӕгъз дуры куыд систа, уый. Уыцы дуртӕй сӕ иуӕй Голиафы амардта». Уыцы нӕлгоймагау ма бирӕтӕ дис кодтой, Библийы ныхӕстӕ чи бӕлвырд кодта, уыцы хабӕрттыл.

Уӕдӕ Давид ӕмӕ Голиафы хабар ӕцӕг кӕй уыд, ууыл фидарӕй ӕууӕндӕн ис. Уыцы адӕймӕгтӕ ’цӕгдӕр цардысты ӕмӕ уыцы бынат дӕр ӕцӕгдӕр уыди. Уымӕй сӕйрагдӕр та уый у, ӕмӕ уыцы хабар йӕ Ныхасы ныффыссын кодта рӕстдзинады Хуыцау, «йӕ бон сайын кӕмӕн нӕу», уыцы Хуыцау (Титмӕ 1:2; 2 Тимофеймӕ 3:16).