Зыдтай йӕ?

Иерусалимы кувӕндоны фос ӕмӕ бӕлӕттӕ чи уӕй кодта, уыцы уӕйгӕнджыты «абырджытӕ» схонӕн цӕмӕн уыд?

МАТФЕЙЫ Евангелийы фыст ис: «Йесо бацыд кувӕндонмӕ ӕмӕ дзы уӕйгӕнӕгӕй, ӕлхӕнӕгӕй чидӕриддӕр уыди, уыдоны се ’ппӕты дӕр ратардта, ӕхцаивджытӕн афӕлдӕхта се стъӕлттӕ, бӕлӕттӕ чи уӕй кодта, уыдонӕн та – сӕ бандӕттӕ. Ӕмӕ сын загъта: „Афтӕ фыст у: „Мӕ хӕдзар мын хондзысты кувӕн хӕдзар“, сымах та дзы абырджыты лӕгӕт аразут“» (Матф. 21:12, 13).

Историйӕ куыд зыны, афтӕмӕй-иу уӕйгӕнджытӕ алцыдӕр тынг зынаргъӕй уӕй кодтой ӕмӕ-иу афтӕмӕй, кувӕндонмӕ-иу чи ’рбацыд, уыдоны стыгътой. Зӕгъӕм, бӕлӕттӕ тынг аслам кӕй уыдысты, уымӕ гӕсгӕ-иу сӕ мӕгуыр адӕймагӕн йӕ бон уыд балхӕнын ӕмӕ сӕ нывондӕн ӕрхӕссын. Фӕлӕ дзуттаг раввинты фыстыты дзырд цӕуы, 1 ӕнусы иу афон ахӕм рӕстӕг кӕй скодта, ӕмӕ иу сызгъӕрин динарӕй балхӕнӕн уыд ӕрмӕстдӕр дыууӕ бӕлоны. Уыйбӕрц ӕхца бакусынӕн та хъуыди 25 боны. Бӕлӕттӕ ахӕм зынаргъ систы, ӕмӕ сӕ мӕгуыр адӕймагӕн йӕ бон нал уыд балхӕнын (Лев. 1:14; 5:7; 12:6–8). Хъуыддаг афтӕ кӕй уыд, уый тыххӕй раввин Симеон, Гамалиилы фырт, тынг мӕсты кодта, ӕмӕ, ӕнӕмӕнг кӕй хъуыди хӕссын, уыцы нывӕндтӕ фӕкъаддӕр кодта. Ӕмӕ уӕд дыууӕ бӕлоны аргъ дӕр уайтагъд сӕдӕ хатты ӕрхауд.

Уӕдӕ бӕрӕг у, кувӕндоны цы уӕйгӕнджытӕ уыд, уыдон зыдгӕнаг кӕй уыдысты ӕмӕ ӕлхӕнджыты кӕй стыгътой. Ӕмӕ сӕ Йесо дӕр «абырджытӕ» дзӕгъӕлы не схуыдта.