Библи куыд фӕиртасыс, уыцы хъуыддаджы цы ис фӕхуыздӕр кӕнӕн?

1. Иуӕй-иуты Библи иртасын цӕуылнӕ фӕфӕнды?

АБОН цардамӕлттӕ кӕнын ӕнцон нӕу. Нӕ хотӕй ӕмӕ не ’фсымӕртӕй бирӕты фӕхъӕуы ӕнӕхъӕн бон кусын, цӕмӕй-иу къӕбӕры фаг бакусой. Иннӕтӕ та алы бон дӕр куыстмӕ ӕмӕ фӕстӕмӕ цӕугӕйӕ фӕндагыл бахъӕуынц цалдӕр сахаты. Бирӕтӕ сӕ уӕззау фыдӕбон кӕнынц, цӕмӕй сӕ бинонты фӕдарой. Ӕмӕ изӕрӕй ахӕм фӕлладӕй ӕрбацӕуынц, ӕмӕ сӕ ницыуал фӕфӕнды, суанг Библи иртасын дӕр.

2. Библи кӕд фӕиртасыс?

² Фӕлӕ ӕнӕмӕнг у, цӕмӕй-иу рӕстӕг ссарӕм Библи ӕмӕ нӕ публикацитӕ иртасынӕн. Уымӕй кӕнгӕ у, Йегъовӕимӕ ӕнгом уыдзыстӕм ӕви нӕ, уый, стӕй ууыл баст у не ’нусон цард дӕр (1 Тим. 4:15). Иуӕй-иутӕ Библи фӕиртасынц райсомӕй раджы, уымӕн ӕмӕ уӕд хуыздӕр фӕхъуыды кӕнынц, стӕй сӕ уыцы рӕстӕг ничи фӕхъыгдары. Иннӕтӕ та изӕрӕй цалдӕр минуты рахицӕн кӕнынц ӕмӕ сабыр ран Библи ӕмӕ нӕ публикацитӕ фӕиртасынц.

3, 4. Разамонӕг совет цавӕр уынаффӕ рахаста ӕмӕ цӕмӕн?

³ Алчидӕр нӕ ӕмбары, Библи ӕмӕ нӕ публикацитӕ иртасынӕн рӕстӕг хицӕн кӕнын ахсджиаг кӕй у. Фӕлӕ цымӕ бӕлвырдӕй та цы ис иртасӕн? Чи зоны, исчи зӕгъа: «Уыйбӕрц публикацитӕ нӕм ис, ӕмӕ сӕ иууылдӕр чи бакӕсдзӕн?» Кӕмӕндӕрты бантысы нӕ публикацитӕй алкӕцы дӕр бакӕсын, стӕй сын нӕ видеороликтӕй алкӕцымӕ дӕр бакӕсын рауайы. Фӕлӕ бирӕтӕн та уымӕн рӕстӕг ссарын зын вӕййы. Ӕмӕ Разамонӕг совет дӕр уый ӕмбары, ӕмӕ уымӕ гӕсгӕ цасдӕры размӕ ахӕм уынаффӕ рахаста, цӕмӕй нӕ организаци мыхуыргонд ӕмӕ электронон публикацитӕ къаддӕр уадза.

⁴ Зӕгъӕм, мыхуыры нал цӕуы «Йегъовӕйы Ӕвдисӕнты ӕрвылазон чиныг», уымӕн ӕмӕ ныр бирӕ ныфсфидаргӕнӕн хабӕрттӕ ссарӕн вӕййы сайты jw.org^® кӕнӕ та сӕм бакӕсӕн вӕййы нӕ интернет-телеуынынады (JW Broadcasting^®) ӕрвылмӕйон программӕты. Парахат кӕнынӕн чи у, уыцы «Хъахъхъӕнӕн мӕсыг» ӕмӕ «Райхъал ут!» та ныр афӕдзы дӕргъы ӕрмӕстдӕр ӕртӕ хатты рацӕуынц. Нӕ организаци ахӕм ивындзинӕдтӕ уый тыххӕй не скодта, цӕмӕй ӕндӕр хъуыддӕгтыл фылдӕр рӕстӕг хардз кӕнӕм, фӕлӕ цӕмӕй не ’ргом фылдӕр здахӕм, «ахсджиагдӕр цы у», уымӕ (Фил. 1:10). Уӕдӕ аныхас кӕнӕм, нӕ бон куыд у, ахсджиагдӕр цы у, уый сбӕлвырд кӕнын ӕмӕ нын цы баххуыс кӕндзӕн, цӕмӕй нын Библи иртасын фылдӕр пайда хӕсса.

АХСДЖИАГДӔР ЦЫ У, УЫЙ СБӔЛВЫРД КӔН

5, 6. Цы хъуамӕ иртасӕм?

⁵ Сӕйраджыдӕр цы хъуамӕ иртасӕм? Хъуамӕ-иу алы бон дӕр рӕстӕг рахицӕн кӕнӕм Хуыцауы Ныхас иртасынӕн. Алы къуыри дӕр нӕ ӕмбырдмӕ цӕттӕ кӕнгӕйӕ Библийӕ цы сӕртӕ фӕхъӕуы бакӕсын, уыдон фӕкъаддӕр кодтой, цӕмӕй нын фылдӕр рӕстӕг уа, цы бакӕсӕм, ууыл ахъуыды кӕнынӕн ӕмӕ нӕ публикациты фылдӕр ӕрмӕг бацагурынӕн. Нӕ нысан уый нӕу, цӕмӕй-иу Библийы сӕртӕ ӕнӕуи бакӕсӕм. Хъуамӕ-иу, цы бакӕсӕм, уый нӕ зӕрдӕмӕ айсӕм, цӕмӕй Йегъовӕмӕ баввахсдӕр уӕм (Пс. 19:14).

⁶ Ноджыдӕр ма цы хъуамӕ иртасӕм? Хъуамӕ-иу нӕхи хорз бацӕттӕ кӕнӕм «Хъахъхъӕнӕн мӕсыджы» ахуырмӕ, стӕй, къуырийы астӕу цы фембӕлд вӕййы, уымӕ. Ахсджиаг ма у, цӕмӕй-иу «Хъахъхъӕнӕн мӕсыджы» ӕмӕ «Райхъал ут!»-ы алы номыр дӕр бакӕсӕм.

7. Кӕд нын фадат нӕй, нӕ сайты цыдӕриддӕр ӕрмӕг ис, уый кӕсынӕн, стӕй нӕ видеороликтӕй алкӕцымӕ дӕр кӕсынӕн, уӕддӕр тыхсын цӕуылнӕ хъӕуы?

⁷ Чи зоны, зӕгъай: «Разы дӕн, уыцы публикацитӕ иртасын ахсджиаг у. Фӕлӕ сайты jw.org цы статьятӕ вӕййы ӕмӕ нӕ интернет-телеуынынады цы видеороликтӕ вӕййы, уыдоныл се ’ппӕтыл адӕймаг куыд хъуамӕ аххӕсса?» Зӕгъӕм, рестораны менюйы вӕййы бирӕ алыхуызон хӕринӕгтӕ. Фӕлӕ адӕймаг, менюйы цыдӕриддӕр вӕййы, уый не ’рбахӕссын кӕны, ӕрмӕстдӕр иуӕй-иу хӕринӕгтӕй фены. Уӕдӕ дын кӕд фадат нӕй, нӕ сайты цыдӕриддӕр ӕрмӕг ис, уый кӕсынӕн, стӕй нӕ видеороликтӕй алкӕцымӕ дӕр бакӕсынӕн, уӕд ма тыхс. Цас дын уайа, уыйбӕрц-иу кӕс ӕмӕ-иу видеороликтӕй дӕр иуӕй-иутӕм бакӕс. Ныр та аныхас кӕнӕм, иртасынмӕ цы хауы ӕмӕ нӕ бон цы у аразын, цӕмӕй нын уыцы хъуыддаг пайда хӕсса.

БИБЛИ ИРТАСАЙ, УЫЙ У ФЫДӔБОН!

8. Дӕ бон куыд у «Хъахъхъӕнӕн мӕсыджы» ахуырмӕ дӕхи цӕттӕ кӕнын? Уый дын цы пайда ӕрхӕсдзӕн?

⁸ Иртасын уый у, ӕмӕ адӕймаг цавӕрдӕр ӕрмӕг лӕмбынӕг куы фӕкӕсы, цӕмӕй исты базона кӕнӕ цыдӕр хуыздӕр бамбара. Цавӕрдӕр ӕрмӕг тагъд бакӕсай ӕмӕ фарстатӕн дзуаппытӕ фӕнысан кӕнай, уый фаг нӕу. Зӕгъӕм, дӕхи «Хъахъхъӕнӕн мӕсыджы» ахуырмӕ куы фӕцӕттӕ кӕныс, уӕд-иу фыццаг бакӕс, статьяйы дзырд цӕуыл цӕуы, уый тыххӕй статьяйы райдианы цы фыст ис, уый. Уый фӕстӕ-иу дӕ цӕст ахӕсс статьяйы номыл, дӕлсӕргӕндтыл ӕмӕ кӕронбӕттӕны цы фарстатӕ ис, уыдоныл. Стӕй-иу статья лӕмбынӕг бакӕс, кӕсгӕ-кӕсын-иу тагъд ма кӕн, афтӕмӕй. Дӕ хъус-иу ӕрдар абзацы сӕйраг хъуыдыйадмӕ, арӕхдӕр уый вӕййы фыццаг хъуыдыйад. Уыцы хъуыдыйадӕй бӕрӕг вӕййы, абзацы цӕй кой цӕуы, уый. Статья кӕсгӕйӕ-иу ахъуыды кӕн, абзацтӕ дӕлсӕргӕндтимӕ ӕмӕ сӕйраг темӕимӕ куыд баст сты, ууыл. Ӕнӕзонгӕ дзырдтӕ-иу рафысс, цӕмӕй-иу, цы нысан кӕнынц, уый базонай, стӕй-иу ног хъуыдытӕ рафысс, цӕмӕй-иу сӕ стӕй раиртасай.

9. а) Нӕхи «Хъахъхъӕнӕн мӕсыджы» ахуырмӕ куы фӕцӕттӕ кӕнӕм, уӕд нӕ хъус Библийы стихтӕм цӕмӕн хъуамӕ дарӕм ӕмӕ уый куыд ис аразӕн? б) 119-ӕм псаломы 27-ӕм стихмӕ гӕсгӕ, Библи кӕсынӕй уӕлдай ма ноджыдӕр цы хъӕуы?

⁹ Ӕмбырды «Хъахъхъӕнӕн мӕсыджы» статья куы фӕахуыр кӕнӕм, уӕд уый фӕрцы Библи хуыздӕр бамбарӕм. Уымӕ гӕсгӕ-иу дӕ хъус дар Библийы стихтӕм, уӕлдайдӕр та, ӕмбырды рӕстӕг кӕй кӕсдзыстӕм, уыдонмӕ. Ахъуыды-иу кӕн, стихты сӕйраг хъуыдытӕ абзацимӕ куыд баст сты, ууыл. Стӕй ма-иу ахъуыды кӕн, дӕ бон куыд у, статьяйы цы стихтӕ ис, уыдонмӕ гӕсгӕ архайын. (Бакӕс Псалом 119:27.)

10. Дзуттӕгтӕм 5:14 стихмӕ гӕсгӕ, ныййарджытӕ бинонты ахуыры рӕстӕг сӕ сывӕллӕттӕн цӕмӕн хъуамӕ амоной, Библи ӕмӕ нӕ публикацитӕ иртасын куыд хъӕуы, уый?

¹⁰ Чырыстон ныййарджыты фӕфӕнды, цӕмӕй-иу бинонты ахуыр сӕ сывӕллӕттӕн циндзинад ӕрхӕсса. Фӕхъӕуы сӕ рагацау ахъуыды кӕнын, сӕ бинонты ахуыр куыд ауадзой, ууыл. Сӕ бон у, зӕгъӕм, Библийы хабӕрттӕ драмӕйы хуызы бацӕттӕ кӕнын, нӕ интернет-телеуынынады ӕрвылмӕйон программӕмӕ бакӕсын кӕнӕ та къухӕй истытӕ саразын, зӕгъӕм, Ной цы нау сарӕзта, ахӕм гыццыл нау. Фӕлӕ ӕнӕмӕнг нӕу, ӕмӕ сӕ бинонты ахуыр алы къуыри дӕр афтӕ уадзой. Уыдӕттӕ аразын дӕр хорз у, фӕлӕ ма ахсджиаг у сывӕллӕттӕн, иртасын куыд хъӕуы, уый амонын. Зӕгъӕм, хъуамӕ зоной, ӕмбырдмӕ цӕттӕ кӕнын куыд хъӕуы, уый. Стӕй ма сӕ хъӕуы зонын, скъолайы сӕ, цӕуыл ӕууӕндынц, уый сӕрыл дзурын куы бахъӕуа, уӕд сӕ бон кӕм у ӕрмӕг ссарын. (Бакӕс Дзуттӕгтӕм 5:14.) Сывӕллӕттӕ-иу хӕдзары Библи иртасынӕн иу цасдӕр рӕстӕг куы рахицӕн кӕной, уӕд-иу сын ӕнцондӕр уыдзӕн, ӕмбырдты ӕмӕ конгрессты дзырд цӕуыл фӕцӕуы, уый ӕмбарын, уымӕн ӕмӕ уым алыхатт видеороликтӕ нӕ февдисынц. Ныййарджытӕ-иу бинонты ахуырӕн цас рӕстӕг хъуамӕ рахицӕн кӕной, уый кӕнгӕ у сӕ сывӕллӕтты карӕй ӕмӕ сӕ миниуджытӕй.

11. Библи кӕимӕ ахуыр кӕнӕм, уыдонӕн цӕмӕн хъӕуы амонын, нӕ публикацитӕ куыд ис иртасӕн, уый?

¹¹ Библи кӕимӕ ахуыр кӕнӕм, уыдоны дӕр хъӕуы зонын, Библи куыд ис иртасӕн, уый. Семӕ ахуыр кӕнын куы райдайӕм, уӕд нын ӕхсызгон вӕййы, Библийы ахуырмӕ кӕнӕ ӕмбырдтӕм цӕттӕ кӕнгӕйӕ фарстатӕн дзуаппытӕ кӕй фӕнысан кӕнынц, уый. Фӕлӕ ма сын хъуамӕ амонӕм, сӕхи бон куыд у Библи ӕмӕ нӕ публикацитӕ арф иртасын. Афтӕмӕй-иу, зын уавӕры куы бахауой, уӕд ӕххуыс ӕмбырды иннӕтӕй нӕ агурдзысты, фӕлӕ-иу сӕхӕдӕг нӕ публикациты уынаффӕтӕ ссарыныл бацархайдзысты.

БИБЛИ ИРТАСГӔЙӔ НӔ НЫСАН ЦЫ ВӔЙЙЫ?

12. Библи иртасгӕйӕ нӕ нысан цы вӕййы?

¹² Чи зоны, ахуыр кӕнын нӕ уарзыс, ӕмӕ дӕм афтӕ кӕсы, ӕмӕ Библи иртасын дӕр никуы бауарздзынӕ. Фӕлӕ дӕ бон у цыдӕр саразын. Фыццаг-иу гыццылгай иртас ӕмӕ фӕстӕдӕр уыцы хъуыддагӕн фылдӕр рӕстӕг хицӕн кӕнын райдай. Библи иртасгӕйӕ нӕ нысан цы вӕййы? Сӕйраджыдӕр цӕмӕй Йегъовӕмӕ ӕввахсдӕр кӕнӕм. Фӕлӕ ма нӕ бон у, цыбыр рӕстӕгмӕ нӕ къухы чи бафта, нӕ разы ахӕм нысан сӕвӕрын, зӕгъӕм, чидӕр нӕм цы фарста радта, уымӕн дзуапп бацагурын кӕнӕ та, зын уавӕры нӕ бон куыд у бакӕнын, уый фӕдыл уынаффӕтӕ ссарын.

13. а) Ӕрыгӕттӕн сӕ бон куыд у сӕхи бацӕттӕ кӕнын, цӕмӕй скъолайы, цӕуыл ӕууӕндынц, уый сӕрыл дзурой? б) Дӕ бон куыд у Колоссӕгтӕм 4:6 стихы фыст уынаффӕмӕ гӕсгӕ архайын?

¹³ Ӕрыгӕттӕ, мыййаг, уӕ къласӕгтӕ иууылдӕр эволюцийыл ӕууӕндынц? Кӕд о, уӕд уӕ, ӕвӕццӕгӕн, фӕнды, цӕмӕй сын Библийӕ бӕлвырдгӕнӕнтӕ ӕрхӕссат, Хуыцау нӕ кӕй сфӕлдыста, уымӕн. Фӕлӕ уӕм, чи зоны, афтӕ кӕсы, ӕмӕ уый уӕ бон нӕ бауыдзӕн. Уӕ бон цы у саразын? Уыцы фарста хорз раиртасут. Уӕ бон у уӕ разы дыууӕ нысаны сӕвӕрын: 1) алцыдӕр Хуыцау кӕй сфӕлдыста, ууыл ноджы фидардӕрӕй ӕууӕндын ӕмӕ 2) цӕуыл ӕууӕндут, уый иннӕтӕн ноджы хуыздӕр ӕмбарын кӕнын (Ром. 1:20; 1 Пет. 3:15). Фыццаг уал ахъуыды кӕнут: «Мӕ къласӕгтӕ эволюцийыл цӕмӕн ӕууӕндынц?» Стӕй уыцы фарста нӕ публикациты фӕрцы раиртасут. Чи зоны уӕм афтӕ кӕсы, ӕмӕ, цӕуыл ӕууӕндут, уый тыххӕй иннӕтӕн дзурын тынг зын у. Фӕлӕ арӕх уый афтӕ зын нӕ вӕййы. Адӕмӕн сӕ фылдӕр эволюцийыл уый тыххӕй феууӕндынц, ӕмӕ, сӕ цӕсты кад кӕмӕн ис, ахӕм чидӕр загъта, алцыдӕр эволюцийы руаджы кӕй фӕзынд. Рӕстдзинад базонын кӕй фӕнды, уымӕн, чи зоны, иу-дыууӕ бӕлвырдгӕнӕны дӕр фаг уой, цӕмӕй йын цы дзурат, ууыл баууӕнда. (Бакӕс Колоссӕгтӕм 4:6.)

БИБЛИ ЗӔРДИАГДӔРӔЙ ЦӔЙ ФӔРЦЫ ИРТАСДЗЫНӔ?

14–16. а) Кӕд Библийы чингуытӕй искӕцы хорз нӕ зоныс, уӕд дӕ бон цы у саразын? б) 16 абзацы кӕрон цы стихтӕ ис амынд, уыдоны фӕрцы куыд ис фылдӕр базонӕн, Амосы рӕстӕджы цы хабӕрттӕ цыд, уыдоны тыххӕй? (Ноджыдӕр кӕс рамкӕ «Библийы кӕй кой цӕуы, уыдоны тыххӕй фылдӕр базон!».)

¹⁴ Зӕгъӕм, графикмӕ гӕсгӕ нын ӕмбырды Библийӕ кӕсинаг уыдзӕн пехуымпарты чингуытӕй ӕппӕты къаддӕртӕй иу, ӕмӕ, чи зоны, уыцы чиныг чи ныффыста, уый тыххӕй бирӕ ницы зоныс. Цӕмӕй дӕ, уыцы пехуымпар цы ныффыста, уый базонын зӕрдиагӕй бафӕнда, уый тыххӕй дӕ бон цы у саразын?

¹⁵ Фыццаг уал ахъуыды кӕн: «Уыцы пехуымпары тыххӕй цы зонын? Чи уыд? Кӕм царди? Цы куыст кодта?» Йӕ царды тыххӕй фылдӕр цыдӕртӕ куы базонай, уӕд хуыздӕр бамбардзынӕ, йӕ чиныг фысгӕйӕ цавӕрдӕр ныхӕстӕй кӕнӕ цӕвиттонтӕй цӕмӕн пайда кодта, уый. Йӕ чиныг ын куы кӕсай, уӕд-иу дӕ хъус дар, цы дзырдбӕстытӕй спайда кодта, уымӕ, цӕмӕй, цавӕр адӕймаг уыд, уый бамбарай.

¹⁶ Хорз ма уаид, куы базонис, йӕ чиныг кӕд ныффыста, уый дӕр. Уый тыххӕй ӕркӕс, «Библи – Ног дунейы тӕлмац»-ы цы уӕлӕмхасӕн ис, «Библийы чингуытӕ», зӕгъгӕ, уымӕ (1951, 1952 фӕрстӕ). Уымӕй уӕлдай ма дӕ бон у ӕркӕсын брошюрӕйы «Ӕрмӕг Библи иртасынӕн» схемӕмӕ «Иудӕйы ӕмӕ Израилы пехуымпартӕ ӕмӕ паддзӕхтӕ». Пехуымпары чиныг кӕй у, уымӕ гӕсгӕ хорз уаид, куы йӕ фыста, уыцы рӕстӕджы адӕм куыд цардысты, уый куы базонис. Уыцы пехуымпар Хуыцауы адӕмы цавӕр ӕвзӕр хъуыддӕгтӕй фӕдзӕхста? Йӕ рӕстӕджы ма чи цард? Цӕмӕй уыцы хабӕрттӕ хуыздӕр бамбарай, уый тыххӕй дӕ, чи зоны, бахъӕуа Библийы иннӕ чингуытӕм дӕр ӕркӕсын. Зӕгъӕм, пехуымпар Амосы рӕстӕджы цы хабӕрттӕ цыд, уый базоныны тыххӕй ӕркӕс, Амосы 1:1 стихмӕ цы уӕлӕмхасӕн стихтӕ ис, уыдонмӕ – 2 Паддзӕхты ӕмӕ 2 Азфыстыты чингуытӕй кӕцыдӕр стихтӕм. Дӕ бон ма у ӕркӕсын ӕндӕр пехуымпары чиныгмӕ дӕр, зӕгъӕм, Осийы чиныгмӕ, уый дӕр, ӕвӕццӕгӕн, Амосы рӕстӕджы цард. Уыцы чингуыты фӕрцы, Амосы рӕстӕджы цы хабӕрттӕ цыд, уыдоны тыххӕй фылдӕр базондзынӕ (2 Пад. 14:25–28; 2 Аз. 26:1–15; Оси 1:1–11; Амос 1:1).

ДӔ ХЪУС ЛЫСТӔГ ХАБӔРТТӔМ ДАР

17, 18. Дӕ хъус лыстӕг хабӕрттӕм куы дарай, уӕд дын уый куыд баххуыс кӕндзӕн, цӕмӕй Библи ноджы зӕрдиагдӕрӕй ахуыр кӕнай? Ӕрхӕсс, абзацты цы цӕвиттонтӕ ис, уыдон кӕнӕ та дӕхи цӕвиттоны тыххӕй радзур.

¹⁷ Библи афтӕ иртас, цӕмӕй-иу дӕ цавӕрдӕр хабӕртты тыххӕй фылдӕр базонын бафӕнда. Зӕгъӕм, кӕсыс Захарийы чиныджы 12 сӕр. Уым фыст ис Мессийӕйы мӕлӕты тыххӕй пехуымпарад (Зах. 12:10). Уыцы сӕры 12-ӕм стихы бакастӕ, «Нафаны хӕдзарвӕндаг» Мессийӕйы мӕлӕтыл кӕй кӕудзӕн. Ацы ныхӕстӕ ӕнӕуи кӕсыны бӕсты хуыздӕр уаид, куы ’рлӕууис ӕмӕ куы ахъуыды кӕнис: «Цымӕ Нафаны хӕдзарвӕндаг Мессийӕимӕ куыд баст у? Уыцы фарстайы фӕдыл ӕрмӕг кӕм ссарон?» Уый тыххӕй дӕ хъӕуы гыццыл бафыдӕбон кӕнын. Уыцы стихмӕ ис уӕлӕмхасӕн стихтӕ. Сӕ иу у 2 Самуилы 5:14 стих, ӕмӕ уырдыгӕй базонӕн ис, Нафан кӕй уыд паддзах Давиды фырттӕй иу. Иннӕ та у Лукайы 3:31 стих, ӕмӕ уымӕй бӕрӕг у, Йесо кӕй уыд Нафаны байзӕддаг Марийӕйы хӕдзарвӕндаджы уылтыb. Ӕмӕ ацы стихтӕ кӕсгӕйӕ куыннӕ сцымыдис уыдзынӕ. Ды зоныс, пехуымпарадмӕ гӕсгӕ Йесо паддзах Давиды байзӕддаг кӕй хъуамӕ уыдаид (Матф. 22:42). Давидӕн уыд 20 фыртӕй фылдӕр. Фӕлӕ Захари йӕ пехуымпарады, Йесойы мӕлӕтыл чи кӕудзӕн, уыцы хӕдзарвӕндӕгты кой кӕнгӕйӕ Давиды иннӕ фырттӕй ӕрмӕстдӕр Нафаны хӕдзарвӕндаджы кой скодта. Уый дӕм диссаг нӕ кӕсы?

¹⁸ Ӕркӕсӕм-ма ноджыдӕр иу цӕвиттонмӕ. Лукайы фыццаг сӕры куыд фыст ис, афтӕмӕй зӕд Гавриил Марийӕмӕ фӕзынд ӕмӕ йын загъта, кӕй басывӕрджын уыдзӕн ӕмӕ йын фырт кӕй райгуырдзӕн. Гавриил ын загъта: «Уый уыдзӕн номдзыд адӕймаг ӕмӕ йӕ хондзысты Иунӕг Стыр Хуыцауы Фырт. Уымӕн Йегъовӕ Хуыцау ратдзӕн йӕ фыд Давиды паддзахбадӕн. Ӕмӕ Иаковы хӕдзарвӕндагӕн ӕнустӕм уыдзӕн паддзах, ӕмӕ йӕ паддзахадӕн кӕрон никуы ’рцӕудзӕн» (Лук. 1:32, 33). Чи зоны, ацы ныхӕстӕ кӕсгӕйӕ нӕ хъус ӕрдарӕм, Йесойы «Иунӕг Стыр Хуыцауы Фырт» кӕй хондзысты, уымӕ. Фӕлӕ ма Гавриил загъта, Йесо кӕй «уыдзӕн паддзах». Нӕ бон у ахъуыды кӕнын, Марийӕмӕ уыцы ныхӕстӕ фехъусгӕйӕ цавӕр хъуыдытӕ фӕзындаид, ууыл. Цымӕ афтӕ ахъуыды кодта, ӕмӕ Йесо Ироды кӕнӕ, йӕ фӕстӕ паддзах чи суыдзӕн, уый раивдзӕн? Гӕнӕн ис, ӕмӕ йӕхицӕн загътаид: «Йесо зӕххыл паддзах куы суа, уӕд ӕз уыдзынӕн паддзахы мад ӕмӕ мӕ бинонтимӕ иумӕ паддзахы галуаны цӕрдзынӕн». Фӕлӕ Библийы афтӕ никуы ис фыст, ӕмӕ Марийӕ Гавриилӕн уыдӕтты кой скодта. Стӕй дзы афтӕ дӕр нӕй фыст, ӕмӕ йӕхицӕн Паддзахады кадджын бынат куырдта, Иаков ӕмӕ Иоанн куыд куырдтой, афтӕ (Матф. 20:20–23). Уый фӕрцы ноджы хуыздӕр ӕмбарӕм, Марийӕ куыд сӕрныллӕг адӕймаг уыд, уый!

19, 20. Иаковы 1:22–25 стихты ӕмӕ 4:8 стихы фыст ныхӕстӕм гӕсгӕ, Библи иртасгӕйӕ нӕ нысан цы вӕййы?

¹⁹ Дӕ зӕрдыл дар, Библи ӕмӕ нӕ публикацитӕ иртасгӕйӕ нӕ нысан сӕйраджыдӕр кӕй у Йегъовӕмӕ ӕввахсдӕр кӕнын. Стӕй ма-иу хъуамӕ нӕ зӕрдӕмӕ ныккӕсӕм, цӕмӕй-иу фенӕм, цы нӕ хъӕуы фӕивын, цӕмӕй нӕ Хуыцау райгонд уа. (Бакӕс Иаковы 1:22–25; 4:8.) Библи иртасыны размӕ-иу хъуамӕ Йегъовӕйӕ йӕ сыгъдӕг тых ракурӕм. Хъуамӕ дзы ӕххуыс курӕм, цӕмӕй, цы ӕрмӕг иртасӕм, уый нын пайда ӕрхӕсса ӕмӕ бамбарӕм, нӕ удыхъӕды нӕ фӕивын цы хъӕуы, уый.

²⁰ Хуыцауы лӕггадгӕнӕг куыд фӕархайы ӕмӕ йын уый цы пайда ӕрхӕссы, уый тыххӕй псаломзарӕггӕнӕг ныффыста: «Уыцы адӕймагӕн циндзинад хӕссы Йегъовӕйы закъон, ӕмӕ йын йӕ закъон ӕхсӕвӕй-бонӕй кӕсы сабыр хъӕлӕсӕй. [...] Цыфӕнды ма араза – алцыдӕр ын бантысдзӕн» (Пс. 1:2, 3). Цӕй уӕдӕ Библи арф иртасыныл архайӕм, цӕмӕй махӕй дӕр ахӕм ныхӕстӕ зӕгъӕн уа!