Хӕларзӕрдӕдзинады «закъонмӕ» гӕсгӕ архай

«ЙЕГЪОВӔЙЫ ӔВДИСӔНТИМӔ куы базонгӕ дӕн, уӕд мӕ зӕрдӕмӕ ӕппӕты тынгдӕр фӕцыд, хӕларзӕрдӕ кӕй уыдысты, уый»,– загъта Лайзӕa. Аннӕ дӕр загъта: «Библи ахуыр кӕнын куы райдыдтон, уӕд мын ӕппӕты тынгдӕр мӕ зӕрдӕ бацагайдта, Библийы цы фыст ис, уый нӕ, фӕлӕ хотӕ ӕмӕ ’фсымӕрты хӕларзӕрдӕдзинад». Ныр ацы дыууӕ хойы тынг уарзынц Библи кӕсын ӕмӕ йӕ иртасын. Фӕлӕ сӕ рӕстдзинад базонын фыццаджыдӕр бафӕндыд, хӕларзӕрдӕ сӕм кӕй уыдысты, уый тыххӕй.

Иннӕтӕм хӕларзӕрдӕ кӕй стӕм, уый бӕрӕг вӕййы нӕ ныхӕстӕй ӕмӕ нӕ хъуыддӕгтӕй, ӕмӕ ныртӕккӕ ууыл аныхас кӕндзыстӕм. Стӕй та аныхас кӕндзыстӕм, кӕмӕ хъуамӕ уӕм хӕларзӕрдӕ, ууыл.

ДЕ ’ВЗАГЫЛ УӔД «ӔНУВЫД УАРЗТЫ ЗАКЪОН»

Хорз усы тыххӕй Ӕмбисӕндты 31:26 стихы фыст ис, «йе ’взагыл ис ӕнувыд уарзты закъон», зӕгъгӕ. Ома у хӕларзӕрдӕ ӕмӕ уый бӕрӕг у, цы дзуры ӕмӕ куыд дзуры, уымӕй. Кӕй зӕгъын ӕй хъӕуы, уыцы «закъон» хъуамӕ уа фыды ӕвзагыл дӕр. Ныййарджытӕй бирӕтӕ зонынц, сывӕллонимӕ тызмӕгӕй куы ныхас кӕнай, уӕд ыл уый ӕвзӕрырдӕм кӕй фӕзыны. Стӕй сӕм уый тыххӕй, гӕнӕн ис, хъусгӕ дӕр ма кӕна. Сывӕллӕттӕн ӕнцондӕр вӕййы сӕ ныййарджытӕм хъусын, семӕ фӕлмӕнӕй куы фӕныхас кӕнынц, уӕд.

Не ’ппӕтӕн дӕр нӕ ныхас хъуамӕ уа фӕлмӕн. Уымӕн нын цы баххуыс кӕндзӕн? Ӕмбисӕндты 31:26 стихы фыццаг хайы фыст ис: «Йӕ дзыхӕй цӕуы зондджын ныхас». Уӕдӕ хъуамӕ хъуыды кӕнӕм, цы ныхӕстӕ дзурӕм ӕмӕ сӕ цы хъӕлӕсы уагӕй дзурӕм, ууыл. Вӕййы ахъуыды кӕнӕн ахӕм фарстайыл: «Гъеныр ахӕм ныхӕстӕ куы зӕгъон, уӕд адӕймаг тынгдӕр смӕсты уыдзӕн, ӕви йӕ маст ссӕудзӕн?» (Ӕмб. 15:1).

Ӕмбисӕндты чиныджы ма фыст ис: «Ӕнӕрхъуыды адӕймагӕн йӕ ныхӕстӕ сты карды цӕфау» (Ӕмб. 12:18). Цы зӕгъинаг стӕм ӕмӕ йӕ куыд зӕгъинаг стӕм, уый адӕймагыл куыд фӕзындзӕн, ууыл-иу куы ахъуыды кӕнӕм, уӕд нӕ бон уыдзӕн не ’взаджы рохтыл хӕцын. «Ӕнувыд уарзты закъонмӕ» гӕсгӕ куы архайӕм, уӕд иннӕтӕн ӕфхӕрӕн ныхӕстӕ нӕ кӕндзыстӕм. Стӕй-иу сын сӕ зӕрдӕ цӕмӕй фӕриссын кӕндзыстӕм, ахӕмӕй дӕр ницы зӕгъдзыстӕм (Еф. 4:31, 32). Нӕ дзыхыныхас уыдзӕн фӕлмӕн ӕмӕ дзурдзыстӕм, иннӕты чи бафидар кӕндзӕн, ахӕм ныхӕстӕ. Уымӕй нын фӕзминаг у Йегъовӕ. Ӕрхъуыды-ма кӕнӕм, Илийайы тас куы бацыд, уӕд ӕй куыд бафидар кодта. Зӕгъӕм, Йегъовӕйы зӕд йемӕ ныхас кодта «фӕлмӕн, сабыр хъӕлӕсӕй» (1 Пад. 19:12). Фӕлӕ адӕймаг хӕларзӕрдӕ кӕй у, уый бӕрӕг вӕййы ӕрмӕст йӕ дзыхыныхасӕй нӕ, фӕлӕ йӕ хъуыддӕгтӕй дӕр.

ХОРЗ ХЪУЫДДӔГТӔН ИС СТЫР ТЫХ

Йегъовӕйы куы фӕзмӕм ӕмӕ хӕларзӕрдӕ куы уӕм, уӕд иннӕтӕн араздзыстӕм хорздзинад (Еф. 4:32; 5:1, 2). Лайзӕ, Йегъовӕйы Ӕвдисӕнтӕ сӕм цы хӕларзӕрдӕдзинад равдыстой, уый тыххӕй загъта: «Ӕнӕнхъӕлӕджы нӕ нӕ хӕдзарӕй ӕндӕр ранмӕ цӕрынмӕ ацӕуын куы бахъуыд, уӕд ӕмбырдӕй дыууӕ къайы куыстӕй сӕхи ракуырдтой, цӕмӕй нын нӕ дзаумӕттӕ сӕмбырд кӕнынӕн баххуыс кодтаиккой. Афтӕмӕй та уӕд ӕз Библи дӕр нӕма ахуыр кодтон!» Ахӕм хорздзинад сын кӕй сарӕзтой, уый фӕрцы Лайзӕйы бафӕндыд рӕстдзинады тыххӕй фылдӕр базонын.

Аннӕйӕн дӕр йӕ зӕрдӕ бацагайдта, Йегъовӕйы Ӕвдисӕнтӕ йӕм цы хӕларзӕрдӕдзинад равдыстой, уый. Аннӕ загъта: «Ацы дунейы адӕм-иу мӕ кӕй фӕфыдӕнхъӕл кодтой, уымӕ гӕсгӕ никӕуылуал ӕууӕндыдтӕн. Ӕмӕ, Йегъовӕйы Ӕвдисӕнтимӕ куы базонгӕ дӕн, уӕд уыдоныл дӕр не ’ууӕндыдтӕн. Хъуыды-иу кодтон: „Цымӕ сӕ ӕцӕгдӕр хъӕуын?“ Фӕлӕ, мемӕ Библи чи ахуыр кодта, уыцы хо уыди тынг зӕрдӕхӕлар, ӕмӕ бамбӕрстон, ӕууӕндӕн ыл кӕй ис. Ӕмӕ уый фӕстӕ, Библи ахуыр кӕнгӕйӕ-иу цы базыдтон, ууыл лӕмбынӕгдӕр хъуыды кӕнын райдыдтон».

Лайзӕ ӕмӕ Аннӕйӕн сӕ зӕрдӕтӕ бацагайдта, хотӕ ӕмӕ ’фсымӕртӕ сын хорздзинад кӕй сарӕзтой, уый. Ӕмӕ сын уый баххуыс кодта рӕстдзинад базонынӕн дӕр. Стӕй ма уый фӕрцы бамбӕрстой, сӕ бон кӕй у Йегъовӕйыл ӕмӕ йӕ адӕмыл ӕууӕндын.

ХУЫЦАУЫ ХУЫЗӔН ХӔЛАРЗӔРДӔ У

Иуӕй-иутӕ фӕлмӕн ныхас фӕкӕнынц ӕмӕ ӕдзух сӕ мидбылты фӕхудынц, сӕ хъӕд ахӕм кӕй у кӕнӕ та, кӕм схъомыл сты ӕмӕ кӕм цӕрынц, уым адӕм ахӕм кӕй сты, уый тыххӕй. Искӕмӕ бахудай ӕмӕ йын исты хорз ныхас зӕгъай, уый хорз у. Фӕлӕ нӕ Хуыцау цы хӕларзӕрдӕдзинадыл ахуыр кӕны, уымӕ фылдӕр цыдӕртӕ хауы. (Абар Хъуыддӕгтӕ 28:2.)

Ӕцӕг хӕларзӕрдӕдзинад у, Хуыцауы сыгъдӕг тыхы дыргъмӕ цы миниуджытӕ хауы, уыдонӕй сӕ иу (Гал. 5:22, 23). Ӕмӕ нӕм цӕмӕй ацы миниуӕг фӕзына, уый тыххӕй нӕ хъӕуы Хуыцауы сыгъдӕг тых. Хӕларзӕрдӕ куы уӕм, уӕд афтӕмӕй фӕзмдзыстӕм Йегъовӕйы ӕмӕ Йесойы. Ӕмӕ уымӕй равдисдзыстӕм, Йегъовӕйы кӕй уарзӕм. Стӕй ма нӕ фӕнды Йесойау иннӕтыл зӕрдиагӕй тыхсын. Кӕд иннӕтӕн хорздзинад, Йегъовӕйы ӕмӕ адӕмы кӕй уарзӕм, уый тыххӕй аразӕм, уӕд уый у ӕцӕг хӕларзӕрдӕдзинад. Ӕмӕ уый Йегъовӕйы зӕрдӕмӕ дӕр цӕуы.

ХӔЛАРЗӔРДӔ КӔМӔ ХЪУАМӔ УӔМ?

Арӕх хӕларзӕрдӕ вӕййӕм, нӕхицӕн нын хорздзинад чи саразы кӕнӕ кӕй фӕзонӕм, уыдонмӕ (2 Сам. 2:6). Ӕмӕ уый равдисӕм, зӕгъӕм, бузныг сын кӕй фӕзӕгъӕм, уымӕй (Кол. 3:15). Фӕлӕ нӕм афтӕ куы кӕса, ӕмӕ адӕймаг уый аккаг нӕу, цӕмӕй йӕм хӕларзӕрдӕ уӕм, уӕд та?

Йегъовӕйы хуызӕн хӕларзӕрдӕ ничи у. Уый хӕларзӕрдӕдзинад ӕвдисы адӕммӕ се ’ппӕтмӕ дӕр, уый аккаг сты ӕви нӕ, уӕддӕр. Ӕмӕ йӕ Ныхасӕй базонӕн ис, уыцы миниуӕг куыд ӕвдисы, уый. Чырыстон Грекъаг Фыстыты арӕх ис Йегъовӕйы «стыр хорзӕхы» кой. Ацы дзырдбаст амоны, Хуыцау рӕдау кӕй у, уымӕ, йе стыр хорзӕхӕй кӕмӕн хай кӕны, уыцы адӕймаг уый аккаг кӕй у, уымӕ нӕ, фӕлӕ. Хуыцау нӕм хӕларзӕрдӕдзинад куыд ӕвдисы?

Йегъовӕ миллиардгай адӕммӕ ӕвдисы хӕларзӕрдӕдзинад, цӕрынӕн сӕ ӕнӕмӕнг цы хъӕуы, уыдӕттӕ сын кӕй дӕтты, уымӕй (Матф. 5:45). Йегъовӕйы куы нӕма зыдтам, уӕдмӕ дӕр нӕм ӕвдыста хӕларзӕрдӕдзинад ӕмӕ нын хай кодта йе стыр хорзӕхӕй (Еф. 2:4, 5, 8). Зӕгъӕм, ӕппӕт адӕмы тыххӕй дӕр радта, зынаргъдӕр ын цы уыд, уый – йӕ иунӕг Фырты! Апостол Павел ныффыста, Йегъовӕ йӕ Фырты нывондӕн кӕй ӕрхаста, «йе стыр хорзӕх ӕгӕрон кӕй у, уымӕ гӕсгӕ» (Еф. 1:7). Уымӕй уӕлдай ма, кӕд фӕрӕдийӕм ӕмӕ йӕ фӕфыдӕнхъӕл кӕнӕм, уӕддӕр нын разамынд дӕтты ӕмӕ нӕ ахуыр кӕны. Йӕ зондамындтӕ ӕмӕ йӕ ныхӕстӕ сты «фӕлмӕн къӕвдаты» хуызӕн (Дык. з. 32:2). Йегъовӕйы хорздзинӕдтӕ никуы бафиддзыстӕм. Ӕмӕ нын йе стыр хорзӕхӕй куы нӕ бахай кодтаид, уӕд нӕ фидӕнӕй дӕр ныфс нӕ уыдаид. (Абар 1 Петры 1:13.)

Йегъовӕ ахӕм хӕларзӕрдӕ кӕй у, уый нын ӕхсызгон у, ӕмӕ нӕхи дӕр бафӕнды иннӕтӕн хорздзинад аразын. Хъуамӕ ма равзар-бавзар кӕнӕм, зӕгъгӕ, амӕн хорздзинад ракӕндзынӕн, амӕн та – нӕ. Фӕлӕ хъуамӕ Йегъовӕйы фӕзмӕм ӕмӕ хӕларзӕрдӕ уӕм алкӕддӕр ӕмӕ алкӕмӕ дӕр (1 Фес. 5:15). Уӕд нӕ зӕрдӕйы хъармӕй тавдзыстӕм нӕ бинонты, нӕ чырыстон хотӕ ӕмӕ ’фсымӕрты, не ’мкусджыты, нӕ къласӕгты ӕмӕ нӕ сыхӕгты. Ӕмӕ уазал бон арты раз куыд хъарм ӕмӕ хорз вӕййы, мах раз дӕр афтӕ уыдзӕн.

Ахъуыды кӕн, дӕ бон кӕй уаид ныхасӕй барӕвдауын кӕнӕ дӕ бон кӕмӕн уаид истӕмӕй баххуыс кӕнын. Чи зоны, дӕ бинонтӕй искӕй ӕххуыс хъӕуы кӕнӕ та де ’мбырдӕй искӕмӕ хъӕуы хӕдзары истӕмӕй фӕкӕсын, баххуыс ын кӕнын цӕхӕрадоны куыстытӕ бакӕнынӕн йе та йын дуканийӕ исты ӕрбахӕссын. Гӕнӕн ис, уацамынды дӕр фембӕлӕм, ӕххуыс кӕй хъӕуы, ахӕм адӕймагыл, ӕмӕ уымӕ дӕр нӕ бон у истӕмӕй фӕкӕсын.

Цӕй уӕдӕ Йегъовӕйы фӕзмӕм ӕмӕ нӕ ныхӕстӕй ӕмӕ нӕ хъуыддӕгтӕй алкӕддӕр бӕрӕг уӕд, ӕнувыд уарзты, кӕнӕ хӕларзӕрдӕдзинады, «закъонмӕ» гӕсгӕ кӕй архайӕм!