Кӕсджыты фарстатӕ

Йесойы ныхӕстӕ, «афтӕ ӕнхъӕл ма ут, ӕмӕ ӕз зӕхмӕ фарн ӕрхӕссынмӕ ӕрцыдтӕн», зӕгъгӕ, куыд ӕмбаргӕ сты?

Йесо адӕмы ахуыр кодта, цӕмӕй кӕрӕдзиимӕ фӕрнӕй ӕмӕ хӕларӕй цардаиккой. Фӕлӕ иухатт йӕ апостолтӕн загъта: «Афтӕ ӕнхъӕл ма ут, ӕмӕ ӕз зӕхмӕ фарн ӕрхӕссынмӕ ӕрцыдтӕн. Фарн ӕрхӕссынмӕ не ’рцыдтӕн, фӕлӕ хъама. Ӕз ӕрцыдтӕн, цӕмӕй фырты скӕнон йӕ фыды ныхмӕ, чызджы йӕ мады ныхмӕ, ӕмӕ чындзы та йе ’фсины ныхмӕ» (Матф. 10:34, 35). Ацы ныхӕстӕй Йесойы цы зӕгъын фӕндыд?

Йесойы нӕ фӕндыд бинонты кӕрӕдзи ныхмӕ скӕнын. Фӕлӕ йӕ зыдта, адӕймаг ын йӕ ахуырӕдтыл куы баууӕнда, уӕд, гӕнӕн ис, ӕмӕ йӕ бинонтӕ йӕ ныхмӕ цӕуын райдайой. Уымӕ гӕсгӕ, кӕд адӕймаджы фӕнды, цӕмӕй Чырыстийы ахуыргӕнинаг суа ӕмӕ донаргъуыд райса, уӕд ӕй хъуамӕ ӕмбара, уый тыххӕй цавӕрдӕр зындзинӕдтыл кӕй ӕмбӕлдзӕн. Гӕнӕн ис, ӕмӕ йе ’нӕуырнӕг цардӕмбал кӕнӕ йӕ бинонтӕй ӕндӕр исчи йӕ ныхмӕ цӕуын райдайа ӕмӕ йӕ хъыгдара Чырыстийы ахуырӕдтӕм гӕсгӕ цӕрын.

Библийы фыст ис, чырыстӕттӕ «алкӕимӕ дӕр хӕларӕй» кӕй хъуамӕ цӕрой (Ром. 12:18). Фӕлӕ иуӕй-иу бинонты ’хсӕн Чырыстийы ахуырӕдтӕ свӕййынц «хъамайы» хуызӕн. Афтӕ рауайы, бинонтӕй исчи Чырыстийы ахуырӕдтыл куы баууӕнды, иннӕтӕ та куы нӕ баууӕндынц кӕнӕ йӕ ныхмӕ цӕуын куы райдайынц, уӕд. Ӕмӕ уӕд, Библи чи ахуыр кӕны, уымӕн йӕхи бинонтӕ «йе знӕгтӕ» свӕййынц (Матф. 10:36).

Йӕ бинонтӕ Йегъовӕйӕн кӕмӕн нӕ лӕггад кӕнынц, ахӕм чырыстонӕн хатгай йӕ уырнындзинад фӕлвӕрд фӕцӕуы, ӕмӕ йӕ фӕхъӕуы равдисын, Йегъовӕ ӕмӕ Йесойыл иузӕрдион у ӕви нӕ. Зӕгъӕм, йе ’нӕуырнӕг хиуӕттӕ йын, гӕнӕн ис, дзурой, цӕмӕй семӕ дины бӕрӕгбон сбӕрӕг кӕна. Ахӕм уавӕры чырыстон кӕй зӕрдӕ барухс кӕндзӕн? Йесо загъта: «Йӕ фыды кӕнӕ йӕ мады мӕнӕй фылдӕр чи уарзы, уый мӕн аккаг нӕу» (Матф. 10:37). Кӕй зӕгъын ӕй хъӕуы, Йесойы уый зӕгъын нӕ фӕндыд, ӕмӕ цӕмӕй йӕ ахуыргӕнинӕгтӕ йӕ аккаг уой, уый тыххӕй сӕ ныййарджыты хъуамӕ афтӕ тынг мауал уарзой. Уӕдӕ цӕй кой кодта? Царды нын ахсджиагдӕр цы хъуамӕ уа, уый кой. Кӕд нӕ не ’нӕуырнӕг бинонтӕ Йегъовӕйӕн лӕггад кӕнын фӕхъыгдарынц, уӕддӕр сӕ уарзӕм. Фӕлӕ йӕ ӕмбарӕм: Йегъовӕйӕ фылдӕр хъуамӕ макӕй уарзӕм.

Нӕ уырнындзинады тыххӕй нӕ бинонтӕ нӕ ныхмӕ куы фӕцӕуынц, уӕд нын уый тынг зын вӕййы. Фӕлӕ хъуамӕ Йесойы ныхӕстӕ ма рох кӕнӕм: «Йӕ хъизӕмӕртты хъӕд чи нӕ райса ӕмӕ мӕ фӕдыл чи нӕ цӕуа, уый мӕн аккаг нӕу» (Матф. 10:38). Ӕндӕр ныхӕстӕй, Йесойы фӕдылдзӕуджытӕ хъуамӕ цӕттӕ уой хъизӕмӕрттӕ ’взарынмӕ. Ӕмӕ, сӕ бинонтӕ сӕ ныхмӕ кӕй цӕудзысты, уый дӕр уымӕ хауы. Фӕлӕ сӕ уӕддӕр ныфс ис, сӕ хорз хъуыддӕгты фӕрцы сӕ бинонты зӕрдӕтӕ кӕй ӕрфӕлмӕн уыдзысты ӕмӕ сӕ кӕй бафӕнддзӕн, Библийы цы фыст ис, уый базонын (1 Пет. 3:1, 2).