¿Te mä mꞌu̱i ne Äjuä gä pe̱ꞌtsihu̱?

NUꞌMU̱ di hetihu̱ rä periodiko, di handihu̱ rä telebision o di o̱xu̱ rä radio, ¡ho̱nse̱ di handihu̱ ꞌne di o̱dehu̱ ndunthi yä du, yä gerra ꞌne yä terrorismo! Pe hingä ho̱nse̱ꞌä, rꞌabu̱ nuꞌi ꞌnehe gi thogi yä xuñha, yä ñheni o yä dumu̱i nuꞌmu̱ tu nꞌa ri amigo o nꞌa rä jäꞌi näꞌä xa gi mädi.

Nꞌa rä familia o̱de yä notisia ha rä radio

Zäi ge nuꞌi gi ñꞌanise̱:

¿Gehnä rä mꞌu̱i mi ne Äjuä pa geki ꞌne pa mä familia?
¿Habu̱ dä za gä tini rä mfatsꞌi pa gä ze̱ti nuya yä xuñha di thogi?
¿Ma dä zo̱ho̱ rä pa dä nja nꞌa rä hogä mꞌu̱i ha gatꞌho rä Xiꞌmhai?

Rä Biblia thädi nuya yä ntꞌani.

RÄ BIBLIA UDI GE ÄJUÄ MA HÄ NꞌA RÄ HOGÄ MꞌU̱I

«Ya hindä nja rä du, ni yä tsꞌoni, ni yä dumu̱i, nixi yä u̱gi» (Apocalipsis 21:4).
«Nuꞌu̱ yä doua ma dä nsagi ngu rä fantho̱» (Isaías 35:6).
«Yä da yä goda ma dä xogi» (Isaías 35:5).
Ma dä nangi nuꞌu̱ yä jäꞌi xä du (Juan 5:28, 29, TNM).
«Ninꞌa rä jäꞌi ma dä ꞌñenä: “Di hñeni”» (Isaías 33:24).
Xa «ma dä nja ndunthi yä ꞌmotꞌi ha rä xiꞌmhai» (Salmo 72:16).

RÄ BIBLIA DÄ ZA DÄ MAXꞌÄꞌI

Nꞌa rä Testigo uti de rä Biblia nꞌa rä ñꞌo̱ho̱

Rꞌabu̱ dä za gi mbeni ge hingä mäjuäni o ge nꞌa rä tꞌitho näꞌä gä hyandi ha nuꞌu̱ yä nxii bi thogi. Pe Äjuä xä promete ge ma dä hä nuꞌu̱ yä jäpiꞌu̱, ꞌne rä Biblia mää hanja ma dä kumpli.

Rä Biblia ꞌnehe xikägihu̱ hanja dä za gä mꞌu̱ihu̱ ko rä johya dende mäpaya, mäske rꞌabu̱ di thogihu̱ po yä xuñha ꞌne yä dumu̱i. ¿Hingä mäjuäni ge gatꞌho di thogihu̱ yä ñꞌäbojä, yä xuñha ha mä familiahu̱, yä ñheni, o yä dumu̱i ora tu nꞌa mä jäꞌihu̱ näꞌä xa ndi mädihu̱? Nde, ¡rä Biblia dä za dä maxꞌäꞌi gi ñhandui nuꞌu̱ yä xuñhaꞌu̱! ꞌNehe ma dä nupꞌäꞌi ri mfeni ora gi hyandi hanja rä Biblia thädi nuya yä ntꞌani:

¿Por hanja di sufrihu̱?
¿Hanja dä za gä ñhanduihu̱ nuꞌu̱ yä dumu̱i di thogihu̱?
¿Te mähyoni gä pe̱fihu̱ pa dä nja rä johya ha mä familiahu̱?
¿Te thogi kongekhu̱ nuꞌmu̱ di tuhu̱?
¿Ma dä zo̱ho̱ nꞌa rä pa gä handihu̱ mänꞌaki nuꞌu̱ mä jäꞌihu̱ xä du?
¿Hanja dä za gä mꞌu̱ihu̱ seguro ge Äjuä ma dä kumpli näꞌä xä promete?

Nubye̱ gi heti nunä mfistꞌofo, udi ge gi ne gi pädi te udi rä Biblia. Nunä mfistꞌofo ma dä maxꞌäꞌi. Ja rꞌa yä ntꞌani pa kada nꞌa rä parrafo nuꞌu̱ ma dä maxꞌäꞌi gi ntiende mänꞌa xä ñho te udi rä Biblia. Yä miyontho yä jäꞌi di ho dä nxadi rä Biblia ko yä testigo rä Jeoba. ¡Rä Zi Dada Jeoba ꞌnehe ma dä maxꞌäꞌi pa gi pädi te udi rä Biblia!

PÄDI HANJA GI TINI YÄ TESTO HA RI BIBLIA

RÄ Biblia pe̱ꞌtsi 66 yä mfistꞌofo. Nuya yä mfistꞌofo di hege po yä capítulo ꞌne yä versículo ꞌne njabu̱ hingi hei toꞌo dä dini yä testo. Ha nunä mfistꞌofo ma gi tini ndunthi yä testo de rä Biblia. Mꞌe̱tꞌo, ma gi hyandi rä thuhu näꞌä mfistꞌofo o karta. ꞌNepu̱, hutsꞌi näꞌä capítulo, ꞌne mꞌe̱fa näꞌä versículo. Por ejemplo, nunä testo «2 Timoteo 3:16», di signifika ge ma gä honihu̱ rä mfistꞌofo 2 Timoteo, rä capítulo 3, ꞌne rä versículo 16.

Mu̱ gi hyoni nuꞌu̱ yä testo hutsꞌi ha nunä mfistꞌofo, nguntꞌä ma gi pädi gi usa rä Biblia. ꞌNehe, dä za gi fu̱di gi hñeti hyaxtho rä Biblia. Mu̱ hyaxtho gi hñeti hñuu o ku̱tꞌa yä capítulo, gi nuhmä ge dentro de nꞌa nje̱ya ma gi huati gi hñeti gatꞌho rä Biblia.