Ma gä umbäbihu̱ nꞌa rä hogä ꞌñehe yä imbitado

Pa rä 23 de rä märso ha näꞌä Fenäte de rä du rä Hesu, di to̱ꞌmihu̱ dä ntini kongekhu̱ 12 yä miyon yä jäꞌi. Näꞌä ku ma dä uni rä discurso, ma dä mää por hanja Jeoba bi uni rä tꞌu̱ ngu nꞌa rä njutꞌi ꞌne te mä jäpi dä za gä hänihu̱ pa xudi ndämäni (Isa 11:6-9; 35:5, 6; 65:21-23; Jn 3:16). Pe hingä ho̱nse̱ näꞌä rä ku ma dä uni rä discurso ma dä ꞌñeꞌspäbi rä nsu Jeoba, nuju̱ ꞌnehe ma gä pe̱ꞌtsihu̱ rä oportunida de gä umbäbihu̱ nꞌa rä hogä ꞌñehe gatꞌho nuꞌu̱ yä zi jäꞌi ma dä ntini kongekhu̱ (Ro 15:7). Ma gä handihu̱ hanja dä za gä jahu̱.

• En lugar de ho̱nse̱ gi hñudi ꞌne gi to̱ꞌmi dä mu̱di rä programä, gi ma guä umbäbi nꞌa rä hogä ꞌñehe nuꞌu̱ yä imbitado. Mu̱ ma dä ntini nuꞌu̱ yä ku xä ꞌuege de rä mhuntsꞌi, ze̱njua ꞌnehe ko ndunthi rä johya ꞌne rä mhäte.

• Mientra gi atiende nuꞌu̱ ri imbitado, hyandi ꞌnehe nuꞌu̱ yä zi jäꞌi xä ntinise̱ pa gi ze̱njua ꞌne gi umbäbi nꞌa rä hogä ꞌñehe. Mu̱ dä za, hñudi kongeꞌu̱ pa dä za gi ꞌñuti rä Mäkä Tꞌofo ꞌne rä mfistꞌofo de gä jähñä.

• Xti uadi rä Fenäte, hyandi mu̱ dä za gi thädi nuꞌu̱ yä ntꞌani pe̱ꞌtsi nuꞌu̱ yä zi jäꞌi. Pe mu̱ otho rä tiempo ngeꞌä mähyoni gi po̱nihu̱ nguntꞌä de rä Ngu de gä Mhuntsꞌi, nuꞌmu̱ kohi ko nuꞌu̱ yä zi jäꞌi pa gi ma guä tso̱ni nguntꞌä ꞌne gi thädi nuꞌu̱ yä ntꞌani pe̱ꞌtsi. Mu̱ hingi pädi habu̱ bi ꞌmu̱i o hanja dä za gi nzofo, dä za gi ꞌñembäbi: «Gä hohmä gä pädi te gi mbeni de nunä Fenäte dä pe̱ꞌtsihu̱, ¿dä za gä tso̱ñꞌäꞌi o gä nzoꞌi mä nꞌa rä pa?».