Po ränge rä Zi Dada Jeoba ꞌne rä Hesu ma gä ꞌmu̱ihu̱ libre

¿Te mä xuñha gi ñhandui hyaxtho? ¿Go grä ñäxu de ri familia ꞌne gi o̱tꞌe ntsꞌe̱di po gi kumpli ko nuꞌu̱ ri obligasio gi pe̱ꞌtsi? ¿Grä dada o grä nänä ꞌne gi mäntenese̱ ri familia? ¿Grä yꞌoskuela ꞌne gi thogi yä burla? ¿Gi ñhandui yä ñheni o ya grä zi däta jäꞌi? Gatꞌho di ñhanduihu̱ yä xuñha. Ndunthi yä zi ku hingä ho̱nse̱ di ñhandui nꞌaa, sino ndunthi yä xuñha. Pe mänꞌitꞌho ma gä ꞌmu̱ihu̱ libre de gatꞌho nuya yä dumu̱i ꞌne yä xuñha (2Co 4:16-18).

Mientra di to̱ꞌmihu̱ näꞌä rä pa, di pädihu̱ ge rä Zi Dada Jeoba di ntiende xä ñho näꞌä di thogihu̱. ꞌNehe di numäñhogihu̱ ora handi ge di sigi di ze̱tihu̱, ꞌne promete dä jäpigihu̱ (Jer 29:11, 12). Rä Hesu ꞌnehe turämu̱i po gekhu̱. Näꞌä bi ꞌñenä: «Di ꞌmu̱i kongeꞌähu̱ gatꞌho yä pa» (Mt 28:20). Hää, rä Hesu di prometegihu̱ dä mꞌu̱i kongekhu̱ hyaxtho mientra di kumplihu̱ rä bolunta rä Zi Dada Jeoba. Mähyoni gä ꞌuekehu̱ rä tiempo pa gä hudi gä ntso̱ꞌmihu̱ ꞌne gä e̱ntꞌä ha mä mfenihu̱ ge rä Tsꞌu̱tꞌhui Äjuä, ma dä hñäki gatꞌho nuꞌu̱ yä xuñha ꞌne yä dumu̱i di thogihu̱. Mu̱ gä jahu̱bu̱ ma dä te mä komfiansahu̱ po rä Zi Dada Jeoba ꞌne geꞌä ma dä rꞌakägihu̱ rä tsꞌe̱di pa gä ze̱tihu̱ yä xuñha (Ro 8:19-21).

HYANDIHU̱ RÄ BIDEO XTI ꞌÑEPU̱ RÄ DÄTA TRIBULACIÓN, ¡MA GÄ HU̱XÄ MÄ DAHU̱ HA RÄ HESU!—NUꞌU̱ YÄ JÄPI MA DÄ HÄ RÄ TSꞌU̱TꞌHUI ÄJUÄ. MꞌE̱FA THÄDIHU̱ NUYA YÄ NTꞌANI:

• ¿Por hanja yä jäꞌi xä ꞌuege de rä Zi Dada Jeoba ꞌne hängu yä xuñha xpä hä?

• ¿Te to̱ꞌmpäbi gatꞌho nuꞌu̱ yꞌo ha rä ꞌñuu rä Zi Dada Jeoba?

• ¿Por hanja ma dä za gä pe̱ꞌtsihu̱ nꞌa rä mꞌu̱i temäꞌentho?

• ¿Te mä jäpi ya gi ne gi hyandi ha rä rꞌayꞌo xiꞌmhai?