Rä director general de rä Salud Pública de rä hnini Estados Unidos mää de nuꞌu̱ yä peligro ja ha yä redes sociales pa nuꞌu̱ yä bäsjäꞌi | ¿Te udi rä Biblia?

Rä 23 de rä mäyo de rä 2023, rä autorida de rä salud pública de rä hnini Estados Unidos bi mää hanja yä redes sociales xä tsꞌombäbi yä mꞌu̱i ndunthi yä bäsjäꞌi.

• Surgeon General’s Advisory [Las redes sociales y la salud mental de los jóvenes: Informe del director general de Salud Pública de Estados Unidos], 2023).

Nꞌa rä imforme udi por hanja debe gä tumämu̱ihu̱ de nuꞌu̱ yä peligro ja ha yä redes sociales:

• Nuꞌu̱ yä bäsjäꞌi pe̱ꞌtsi entre 12 ꞌne 15 yä je̱ya «ꞌne di usa hyaxtho thogi de hñuu ora yä redes sociales mänꞌa ꞌmu̱i en peligro de dä tsꞌombäbi yä mfeni, ꞌne asta dä za dä zu̱di rä depresión ꞌne rä ansiedad».

• Nuꞌu̱ yä bäsjäꞌi pe̱ꞌtsi 14 yä je̱ya, «bi nheki ge yä redes sociales hingi hopäbi dä ñꞌähä xä ñho, di ñhandui yä peligro de toꞌo dä bepäbi yä dato, di deskuida yä mꞌai, di ꞌme̱di näꞌä rä mhäte debe dä me̱ꞌtsi po geꞌu̱se̱, ꞌne mänꞌa xi tsu̱di rä depresión, mänꞌa nuꞌu̱ yä nxutsi».

¿Te dä za dä me̱fi yä dada pa dä su yä bätsi de nuya yä peligro? Hyandi te mä konseho uni rä Mäkä Tꞌofo.

Näꞌä dä za dä me̱fi yä dada

Ogi deskuida ri bätsi. Ntso̱ꞌmi te mä peligro dä za dä ñhandui ri bätsi ha yä redes sociales ꞌne hyandi mu̱ ma gi umbäbi nse̱ki dä usa o hinä.

• Näꞌä udi rä Mäkä Tꞌofo: «ꞌÑuti rä bätsi te mä ꞌñuu dä gu̱u̱» (Proverbios 22:6).

• Mu̱ gi ne gi pädi mä nꞌa tu̱i, hñeti rä artikulo: «¿Deberían mis hijos usar redes sociales?»

Mu̱ ma gi umbäbi nse̱ki ri bätsi dä usa yä redes sociales, ogi deskuida ꞌne jamäsu näꞌä pe̱fi ha Internet. ¿Te dä za gi pe̱fi?

Su ri bätsi de nuꞌu̱ yä tꞌo̱tꞌe dä za dä tsꞌombäbi rä mfeni. ꞌÑuti te mä peligro dä za dä nthe̱ui ha Internet ꞌne hanja dä nsu de geꞌu̱.

• Näꞌä udi rä Mäkä Tꞌofo: «Nsuhu̱ de nuꞌu̱ yä ꞌñätsa jäꞌi o̱tꞌe yä pekado ko yä ndoyꞌo, ꞌne de nuꞌu̱ tsu̱di yä tsꞌo nkꞌatꞌi [...]. Ogi mäñhu̱ yä ñhädondo, nixi yä tsꞌone, nixi nuꞌu̱ yä noya u̱ni o di ofende märꞌaa» (Efesios 5:3, 4).

• ꞌNehe dä za gi tini rꞌa yä hogä tsꞌofo ha rä artikulo «Enséñele a su hijo adolescente a usar con seguridad las redes sociales».

Hñutsꞌi yä limite. Por ejemplo, xipäbi ri bätsi hämꞌu̱ dä za dä usa yä redes sociales ꞌne por hängu rä tiempo.

• Näꞌä udi rä Mäkä Tꞌofo: «Hänge sigi gi suhu̱ hanja gi ꞌmu̱ihu̱ ꞌne ogyä ꞌme̱mfenihu̱, ꞌñudihu̱ ge ja ri mfädihu̱, ꞌne usahu̱ xä ñho ri tiempohu̱» (Efesios 5:15, 16).

• Hyandi ko ri bätsi rä bideo de «Rä pizarra animada» «Usa ri mfädi ora gi usa yä redes sociales» pa gi fatsꞌi dä bädi dä kontrola hanja dä usa yä redes sociales.