¿Di perjudikabi ri bätsi yä redes sociales? | Hyandi hanja rä Biblia dä za dä matsꞌi yä dada

«Nuꞌu̱ yä xuñha pe̱ꞌtsi yä bäsjäꞌi ha yä mfeni xa nꞌa rä däta peligro, ꞌne yä redes sociales geꞌä di japi dä te nuꞌu̱ yä xuñha» (Vivek Murthy, rä director general de Salud Pública de Estados Unidos. New York Times, 17 de rä junio de rä 2024).

¿Hanja yä dada za dä su yä zi bätsi de nuꞌu̱ yä peligro ja ha yä redes sociales? Hyandi hanja za dä maxꞌäꞌi nuꞌu̱ yä hogä tsꞌofo uni rä Biblia.

Näꞌä za dä me̱fi yä dada

Hyandi nuya yä mfatsꞌi uni rä Biblia.

«Toꞌo ja rä mfeni mꞌe̱tꞌo handi xä ñho te ma dä me̱fi» (Proverbios 14:15).

Hingi ꞌmu̱i obligado gi hyopi nuꞌu̱ ri bätsi dä usa yä redes sociales. Beni ge nuꞌu̱ yä redes sociales xi nꞌa rä peligro pa ri bätsi. Po rängeꞌä, änte gi umbä nse̱ki nuꞌu̱ ri bätsi dä usa yä redes sociales, mꞌe̱tꞌo hyandi mu̱ näꞌä ri bätsi di respeta näꞌä rä tiempo xkä umbäbi nse̱ki, mu̱ pädi dä huahni xä ñho nuꞌu̱ yä amigo ꞌne mu̱ hindä ma dä hyandi nuꞌu̱ yä tꞌo̱tꞌe hinxä ñho.

• Mu̱ gi ne gi pädi mä nꞌa tu̱i, hñeti nuya yä artículo «¿Deberían mis hijos usar redes sociales?» ꞌne «Enséñele a su hijo adolescente a usar con seguridad las redes sociales».

«Usahu̱ xä ñho ri tiempohu̱» (Efesios 5:16).

Mu̱ gi hyopi ri bätsi dä usa yä redes sociales, xipäbi habu̱ ꞌne hängu tiempo dä za dä usa, ꞌne esplikabi ge mu̱ dä jamäsu näꞌä rä akuerdo gä jahu̱, ma dä mabi xä ñho. Hyandi nuꞌu̱ yä mpadi di ja ha yä ꞌmu̱i pa gi dä ngue̱nda mu̱ ja mꞌe̱di gi umbäbi menu rä tiempo o mu̱ tobe ma gi umbäbi nse̱ki dä usa yä redes sociales.

• Hyandi rä bideo Usa ri mfädi ora gi usa yä redes sociales de rä serie «La pizarra animada» pa gi fatsꞌi nuꞌu̱ ri bätsi dä ntiende ge mähyoni dä huahni te ma dä hyandi ꞌne hanja dä usa yä redes sociales.

Pa gi pädi mä nꞌa tu̱i

Rä Biblia enä ge «ma dä ꞌñepu̱ yä tsꞌo tꞌo̱tꞌe nuꞌu̱ xä ñhei toꞌo dä ze̱ti» (2 Timoteo 3:1-5). ꞌNehe rꞌakägihu̱ yä hogä tsꞌofo nuꞌu̱ nzäntho fatsꞌi yä dada ꞌne yä bäsjäꞌi pa dä ñhandui nuꞌu̱ yä xuñha tso̱ho̱ mäpaya. Ha nunä artículo «Mänꞌa yꞌo ri xu nuꞌu̱ yä xuñha di ñhandui yä bäsjäꞌi», ma gi ntini nꞌa rä lista de nuꞌu̱ yä bideo ꞌne yä artículo dä za dä matsꞌi tanto yä dada ꞌne yä bätsi.