¿Fatsꞌi yä testigo rä Jeoba yä mikꞌei nuꞌmu̱ pe̱ꞌtsi yä tsꞌo thogi?

Hää, yä testigo rä Jeoba di umbäbihe rä mfatsꞌi nuꞌu̱ toꞌo pe̱ꞌtsi yä tsꞌo thogi. Nuje di fatsꞌihe nuꞌu̱ yä Testigo ꞌne märꞌa yä zi jäꞌi, di pe̱fihe näꞌä udi Gálatas 6:10 nuꞌmu̱ enä: «Hänge nubye̱ ja mä tsꞌe̱dihu̱, gatꞌho yä jäꞌi gä o̱tꞌuäbihu̱ rä ñho, mänꞌa nuꞌu̱ yä gamfri». ꞌNehe di hoꞌtihe ꞌne di nupäbihe yä mfeni ko rä Mäkä Tꞌofo nuꞌu̱ yä zi jäꞌi nuꞌmu̱ pe̱ꞌtsi yä tsꞌo thogi (2 Corintios 1:3, 4).

¿Hanja xä organisa pa uni rä mfatsꞌi?

Mꞌe̱fa de dä nja nꞌa rä tsꞌo thogi, nuꞌu̱ yä ansiano de näꞌä rä lugaꞌä di nzofo gatꞌho nuꞌu̱ yä ku de ha rä mhuntsꞌi pa njabu̱ dä bädi ha ꞌmu̱i xä ñho ꞌne te di japäbi mꞌe̱di. ꞌNepu̱, nuꞌu̱ yä ansiano pe̱hni nꞌa rä informe ha näꞌä rä däta ngu de gä ꞌme̱fi de yä testigo rä Jeoba, habu̱ mää te bi thogi ꞌne te mä mfatsꞌi ya bi tꞌumbäbi nuꞌu̱ yä Testigo de näꞌä lugaꞌä.

Mu̱ nuꞌu̱ yä mhuntsꞌi de näꞌä lugaꞌä hindä za dä matsꞌi gatꞌho nuꞌu̱ toꞌo bi me̱ꞌtsi rä tsꞌo thogi, nuꞌmu̱ rä Cuerpo Gobernante de yä testigo rä Jeoba honi hanja dä me̱hni näꞌä rä mfatsꞌi di ja mꞌe̱di. Geꞌä bi me̱fi ꞌnehe nuꞌu̱ yä kristianu de mäyaꞌmu̱ nuꞌmu̱ bi nja nꞌa rä dängä thuhu (1 Corintios 16:1-4). Näꞌä rä däta ngu de gä ꞌme̱fi de yä testigo rä Jeoba hutsꞌi nꞌa rä comité de socorro pa di uni rä mfatsꞌi, ꞌne yä Testigo de märꞌa yä luga uni de yä tiempo ꞌne näꞌä pe̱ꞌtsi pa faxte (Proverbios 17:17).

¿Habu̱ bi hä rä bojä?

Nꞌa hängu de nuꞌu̱ yä donäsio di ꞌme̱hni pa ha yä däta ngu de gä ꞌme̱fi de yä testigo rä Jeoba di usa pa di tꞌumbäbi rä mfatsꞌi nuꞌu̱ toꞌo pe̱ꞌtsi yä tsꞌo thogi (Hechos 11:27-30; 2 Corintios 8:13-15). Ngeꞌä nuꞌu̱ toꞌo faxte nuꞌmu̱ ja yä tsꞌo thogi hingi häni nꞌa rä njutꞌi, hänge gatꞌho näꞌä rä mfatsꞌi tso̱ni mäxo̱ge. Njabu̱ dä za gä hanthu̱ ge di nsu xä ñho nuꞌu̱ yä donäsio tꞌuni (2 Corintios 8:20).