¿Te rä me̱ꞌä rä Watch Tower Bible and Tract Society?
Rä Watch Tower Bible and Tract Society of Pennsylvania, geꞌä nꞌa rä corporación bi mu̱di ha näꞌä rä je̱ya 1884, pe hingä pa dä dähä rä bojä ja ngu mi adi yä ley de rä hnini de Pennsylvania (Estados Unidos). Gehnä corporación di usa yä testigo rä Jeoba pa njabu̱, dä za dä sigi dä ja yä ꞌme̱fi de dä ꞌñuti yä jäꞌi de rä Mäkä Tꞌofo. ꞌNehe, pa di imprimi yä Mäkä Tꞌofo ꞌne märꞌa yä he̱ꞌmi nuꞌu̱ udi de rä Noya Äjuä.
Ja ngu bi mhää, rä Watch Tower , nunä nꞌa rä corporación de gä «relijion, de gä ntꞌudi ꞌne de gä mfats’i». Pe nä’ä rä ꞌme̱fi mänꞌa xa mähyoni pa nunä corporación, ge dä «t’ungä ntꞌo̱de ꞌne dä t’udi de rä Tsꞌu̱tꞌhui Äjuä habu̱ di mända Ñhesukristo». Ho̱nse̱ nuꞌu̱ tꞌumbi rä imbitasio, dä za dä yu̱tꞌi ha nunä corporación ꞌne hingä po näꞌä rä ndunthi rä bojä xä uni. Gatꞌho nuꞌu̱ ꞌmu̱i ha nunä corporación umbäbi rä mfatsꞌi rä Cuerpo Gobernante de yä testigo rä Jeoba.
Ja märꞌa yä corporación o entidades legales
Pe yä testigo rä Jeoba hingä ho̱nse̱ di usa rä Watch Tower Bible and Tract Society of Pennsylvania, ꞌnehe pe̱ꞌtsi märꞌa yä corporación o entidades legales ha märꞌa yä dähni. Rꞌa de gehya usa nuya yä noya ha yä thuhu: «Watch Tower», «Watchtower» o di tradusi näꞌä ri bo̱ni nuya yä noya.
Dende nuꞌmu̱ bi thutsꞌi nuya yä corporación o entidades legales, xä za xtä pe̱fihe ndunthi yä tꞌo̱tꞌe pa dä za gä kumplihe rꞌa yä ꞌme̱fi ngu nuya:
Di ofohe ꞌne di hokihe yä he̱ꞌmi. Xtä hokihe ngu 220 yä miyon yä Mäkä Tꞌofo ꞌne ngu 40 mꞌo yä miyon yä he̱ꞌmi nuꞌu̱ udi de rä Mäkä Tꞌofo ha thogi de 900 yä idioma. Rä pagina jw.org xä mfaxte ndunthi pa njabu̱, yä jäꞌi dä za dä hñeti rä Mäkä Tꞌofo ha Internet ha thogi de 160 yä idioma nsinke te dä gutꞌi po geꞌä. ꞌNehe, ha nunä luga xä dimbäbi yä mpengi nuꞌu̱ yä ntꞌani pe̱ꞌtsi de rä Mäkä Tꞌofo ngu nunä: «¿Te me̱ꞌä rä Tsꞌu̱tꞌhui Äjuä?».
Di pe̱ꞌtsihe yä Ngunsadi. Di pe̱ꞌtsihe ndunthi yä Ngunsadi habu̱ tꞌudi de rä Mäkä Tꞌofo. Dende rä je̱ya 1943, thogi de 9.000 yä testigo rä Jeoba xä hñäni ndunthi de näꞌä rä mfädi tꞌuni ha rä Ngunsadi de rä Mäkä Tꞌofo de Galaad de rä Watchtower. Njabu̱, toꞌo pa ha nunä Ngunsadi dä za dä mpe̱fi de gä misionero ꞌne dä za dä mfaxte mä ndunthi ha näꞌä ꞌme̱fi de dä tꞌungä ntꞌo̱de ha ndunthi yä luga de gatꞌho rä Xiꞌmhai. Gatꞌho yä semänä, yä miyontho yä jäꞌi ꞌne yä Testigo di hänihe yä ntꞌudi de rä Mäkä Tꞌofo, nuꞌu̱ di tꞌuni ha kada nꞌa de nuꞌu̱ mä mhuntsꞌihe. ꞌNehe, xtä hokihe nꞌa rä mfistꞌofo näꞌä ja ha 120 yä idioma pa njabu̱, dä za gä fatsꞌihe ꞌne gä utuäbihe yä jäꞌi dä bädi dä hñeti rä he̱ꞌmi ꞌne dä ñꞌofo.
Di mfatsꞌihe. Di unihe yä tꞌo̱tꞌe nuꞌu̱ di ja mꞌe̱di nuꞌmu̱ ja yä tsꞌo thogi bi ehe de yä jäꞌi, de yä däyꞌe o yä mbiꞌmhai. Ja ngu näꞌä rä mfatsꞌi dä uñhe ha näꞌä rä tsꞌo thogi bi nja ha rä dähni Ruanda näꞌä rä je̱ya 1994 o ja ngu nuꞌmu̱ bi thogi näꞌä rä däta mbiꞌmhai ha rä dähni Haití näꞌä rä je̱ya 2010.
Mäske xtä pe̱fihe ndunthi yä tꞌo̱tꞌe jamädi po nuya yä corporación o entidades legales, hingä ho̱nse̱ po gehyu̱ di jahe mä ꞌme̱fihe. Kada nꞌa rä kristianu, pe̱ꞌtsi te dä hyoni hanja dä kumpli rä mhända de dä ungä ntꞌo̱de ꞌne dä ꞌñudi yä rꞌayꞌo hogä noya de rä Tsꞌu̱tꞌhui Äjuä (Mateo 24:14; 28:19, 20). Di pädihe xä ñho ge Äjuä, go geꞌä di rꞌakägihe rä mfatsꞌi ha nunä ꞌme̱fi ꞌne näꞌä go ma dä sigi dä japi dä te (1 Corintios 3:6, 7).