Hanja dä za gä pädihu̱ toꞌo rä Zi Dada

Dä za gä pädihu̱ toꞌo rä Zi Dada Jeoba mu̱ gä heꞌtihu̱ rä Mäkä Tꞌofo. Mäyaꞌmu̱, rä Zi Dada bi huahni rꞌa yä jäꞌi pa bi yꞌopäbi nuꞌu̱ yä mfeni. Nuꞌu̱ yä tꞌofo tꞌembäbi rä Mäkä Tꞌofo. Mäpaya dä za gä pädihu̱ rä Zi Dada mu̱ gä heꞌtihu̱ rä Mäkä Tꞌofo. Ha nunä mfistꞌofo hutsꞌi yä noya Jeoba, hänge njabu̱ tꞌembi ꞌnehe rä Noya Äjuä. Dä za gä kamfrihu̱ näꞌä mää rä Mäkä Tꞌofo «ngeꞌä Äjuä hingi tsa dä ñhate» (Hebreos 6:18). Hänge njabu̱, rä Noya Äjuä hutsꞌi näꞌä mäjuäni (Juan 17:17).

Rä Mäkä Tꞌofo ja ndunthi rä muui, gehnä mä nꞌa rä hogä ntꞌuni xä rꞌakägihu̱ rä Zi Dada. ꞌÑenä nꞌa rä he̱ꞌmi ofo nꞌa rä hogä dada pa dä me̱ntuäbi yä bätsi. Xikägihu̱ hanja rä Zi Dada ma dä hyoki mähotho rä Xiꞌmhai, nꞌa rä uädri habu̱ ma gä mꞌu̱ihu̱. Xikägihu̱ näꞌä bi me̱fi rä Zi Dada mäyaꞌmu̱, näꞌä pe̱fi mäpaya ꞌne näꞌä ma dä me̱fi mꞌe̱fa pa nuꞌu̱ yä bätsi yä yꞌo̱de. ꞌNehe utkägihu̱ te mähyoni gä pe̱fihu̱ ꞌmu̱ di pe̱ꞌtsihu̱ yä xuñha ꞌne xikägihu̱ hanja gä tinihu̱ nꞌa rä mꞌu̱i ko rä johya (2 Timoteo 3:16, 17).

Yä testigo rä Jeoba di ntsitsꞌi ko rä Zi Dada; ma dä maxꞌi gi pädi te udi rä Mäkä Tꞌofo. Se̱he̱ xipäbi ge gi ne gi pädi de rä Mäkä Tꞌofo. Hinte mä bojä ma gi jutꞌi (Mateo 10:8). ꞌNehe dä za gi ntini kongeꞌu̱ ha yä mhuntsꞌi. Nuya di tꞌo̱tꞌe habu̱ tꞌembäbi rä Ngu de gä Mhuntsꞌi. Mu̱ gi ntini ha nuya yä mhuntsꞌi mänꞌa ma gi dämä pädi de rä Zi Dada.

Dä za gä pädihu̱ rä Zi Dada mu̱ gä benihu̱ näꞌä gatꞌho xä hyoki. ¿Te xä hyoki? Rä Mäkä Tꞌofo mää ge «Äjuä [...] bi hyoki mähetsꞌi ꞌne rä xiꞌmhai» (Hechos 14:15). Mi hyoki Jeoba «mähetsꞌi», ꞌnehe bi hyoki rä Hyadi. Kongehnä, ¿te utkägihu̱? Jeoba udi ge pe̱ꞌtsi gatꞌho rä tsꞌe̱di. Se̱he̱ꞌä bi za bi hyoki nꞌa rä tꞌo̱tꞌe näꞌä xa ja rä tsꞌe̱di ngu rä Hyadi. ꞌNehe udi ge Jeoba rä bämhñä, hänge bi hyoki rä Hyadi näꞌä di rꞌakägihu̱ rä pa ꞌne rä ñotꞌi ꞌne hindi huetꞌi.

Ko näꞌä xä hyoki Jeoba udi ge di mäkägihu̱. Beni nuꞌu̱ gatꞌho yä fruta ja ha rä Xiꞌmhai. Mu̱ xä ne Jeoba xä rꞌakägihu̱ se̱he̱ nꞌatho o ninꞌa rä fruta. Pe näꞌä bi rꞌakägihu̱ ndunthi yä fruta nuꞌu̱ hingä mähye̱gi yä ku̱hi, yä kolo, ha nixi yä ndängi. Kongehnä udi ge Jeoba di mäkägihu̱, rꞌakägihu̱ gatꞌho näꞌä di honihu̱, o̱tꞌä ngue̱ndagihu̱ ꞌne rä hojäꞌi kongekhu̱ (2 Corintios 9:10, 11).