Rä dängä Hyokäte bi umbi nꞌa rä uädri rä mexiꞌmhai

NDUNTHI yä mꞌiki stä o̱dehu̱ nuya yä mu̱di noya mängä rä Mäkä Tꞌofo: «Ha rä mu̱di, Äjuä bi hyoki mähetsꞌi ꞌne rä xiꞌmhai» (Génesis 1:1). Ko nuya yä noya mähotho xikägihu̱ toꞌo ñä rä thuhu ha mäxo̱ge rä Mäkä Tꞌofo: Jeoba näꞌä rä Zi Dada pe̱ꞌtsi gatꞌho rä tsꞌe̱di ꞌne näꞌä rä Hyokäte de gatꞌho rä xiꞌmhai. ꞌNepu̱ rä Mäkä Tꞌofo sigi mää ge Äjuä bi hyoki rä Xiꞌmhai ꞌne gatꞌho nuꞌu̱ yä tꞌo̱tꞌe tsꞌangänza di handihu̱. Bi zitsꞌi ndunthi yä je̱ya pa bi hyoki gatꞌho, pe Äjuä bi ꞌñembi ꞌñenä go mi nꞌa hängutho yä pa.

Jeoba bi ꞌñenä ge de gatꞌho näꞌä xki hyoki, rä mexiꞌmhai ge geꞌä mänꞌa xmä ñho. Näꞌä rä mu̱di rä ñꞌo̱ho̱ bi thoki ko rä fonthai mi ja ha rä xiꞌmhai. Bi thoki pa dä me̱ꞌtsi rä mfädi, dä uni rä mhäte ꞌne dä ꞌñudi rä mꞌu̱i Äjuä. Jeoba bi ꞌñembi Adan näꞌä rä ñꞌo̱ho̱ ꞌne bi ꞌñegi ha nꞌa rä uädri mrä thuhu rä Eden. Äjuä xki hyokise̱ nunä rä uädri ꞌne xki yꞌu̱tꞌi ndunthi yä xaza nuꞌu̱ mi uni yä fruta xmä ku̱hi.

Äjuä bi hyandi ge rä ñꞌo̱ho̱ mi ꞌme̱päbi nꞌa rä mfatsꞌi. Hänge nubye̱, bi hñämpäbi nꞌa rä ꞌmo̱tsꞌe rä Adan pa bi hyoki rä Eba. Gehnä rä mu̱di rä ꞌme̱hñä bi hyoki Äjuä pa dä nthätui rä Adan. Ko rä johya, nunä rä ñꞌo̱ho̱ bi hyokä nꞌa rä thuhu mi enä: «Nubye̱ hää nunä rä ꞌme̱hñä gehnä rä ndoyꞌo de mä ndoyꞌo ꞌne rä ngo̱ de mä ngo̱». Äjuä bi ꞌñenä: «Rä ñꞌo̱ho̱ ma dä ꞌuege de rä dada ꞌne de rä nänä pa go dä mꞌu̱hui rä ꞌme̱hñä, ꞌne dä zo̱ho̱ dä nja nuꞌu̱ di yoho ngu nꞌadä rä ngo̱» (Génesis 2:22-24; 3:20).

Äjuä bi umbi yoho yä mhända rä Adan ꞌne rä Eba. Näꞌä rä mu̱di mhända Äjuä bi ꞌñembäbi ge dä su ꞌne dä motꞌi rä Xiꞌmhai ꞌne dä me̱ꞌtsi ndunthi yä bätsi. Rä yoho rä mhända, Äjuä bi ꞌñenä ge de gatꞌho nuꞌu̱ yä xaza xki yꞌu̱tꞌi, mi ja nꞌa näꞌä bi tꞌembi ge hindä zipäbi rä fruta: mrä thuhu rä «xaza de rä mfädi de näꞌä xä ñho ꞌne de näꞌä xä ntsꞌo» (Génesis 2:17). ¿Te ma xä thogi mu̱ hinxä yꞌo̱de? Bi tꞌembi ge dä du. Ko nuyu̱ yä mhända, rä Adan ꞌne rä Eba ma xä za xä ꞌñudi ge hää mi nepäbi rä tsꞌu̱tꞌhui Äjuä, mi pe̱ꞌtsuäbi rä mhäte ꞌne rä jamädi. Nunä medinthäti hinte mi ꞌme̱päbi, himi pe̱ꞌtsi rä tsꞌoki, mi pe̱ꞌtsi gatꞌho pa xä yꞌo̱tehmähä näꞌä Toꞌo xki hyoki ko rä mhäte. Rä Mäkä Tꞌofo mää de geꞌu̱: «Äjuä bi hyandi gatꞌho näꞌä xki hyoki ꞌne, ¡hyandi!, gatꞌho xi xmä ñho» (Génesis 1:31).

(Ehe ha rä Génesis ha yä ntheke 1 ꞌne 2.)