¿Te dä za gi pe̱fi nuꞌmu̱ gi pe̱ꞌtsi nꞌa rä däta nthogi?

Mäske gi o̱tꞌe ntsꞌe̱di pa dä nja rä johya ha ri medinthäti ꞌne ha ri familia, hingä nzäntho ma dä njabu̱, ngeꞌä rꞌabu̱ dä za dä zo̱ꞌähu̱ rꞌa yä tsꞌo thogi nuꞌu̱ hingä ngi to̱ꞌmihu̱ (Eclesiastés 9:11). Pe Äjuä di rꞌakägihu̱ ndunthi yä mfatsꞌi pa gä ze̱tihu̱ yä xuñha. Mu̱ gi pe̱fi nuꞌu̱ yä tsꞌofo ma gä handihu̱ de rä Mäkä Tꞌofo, nuꞌi ꞌne ri familia ma dä za gi ze̱tihu̱ asta nuꞌu̱ yä däta tsꞌo thogi.

1 KAMFRIBI RÄ ZI DADA JEOBA

NÄꞌÄ UDI RÄ MÄKÄ TꞌOFO: «Gatꞌho ri dumu̱ihu̱ go dä tsokuähu̱ Äjuä, ngeꞌä go geꞌä di suꞌähu̱ ꞌne hupꞌä ri mu̱ihu̱» (1 Pedro 5:7). Beni ge hingä go rä tsꞌoki Äjuä gi thogi yä xuñha (Santiago 1:13). Mu̱ gi kuatꞌi ko Äjuä, näꞌä ma dä za dä maxꞌäꞌi ngeꞌä mänꞌa pädi xä ñho näꞌä gi thogi (Isaías 41:10). Rä Mäkä Tꞌofo xikägihu̱ ge gä “xokuäbihu̱ mä korasohu̱ Jeoba” (Salmo 62:8).

ꞌNehe, mu̱ hyaxtho gi nxadi rä Mäkä Tꞌofo geꞌä ma dä nupä ri mfeni. Njabu̱ ma gi hyandi ge Jeoba «hubgä mä mu̱ihu̱ ora di thohu̱ yä tsꞌo thogi» (2 Corintios 1:3, 4; Romanos 15:4). Rä Zi Dada Jeoba di promete “dä rꞌaꞌähu̱ nꞌa rä humu̱i näꞌä xi rä dängi [...], pa dä su ri korasohu̱ ꞌne ri mfenihu̱” (Filipenses 4:6, 7, 13).

NÄꞌÄ DÄ ZA GI PE̱FI:

• Yꞌapäbi rä Zi Dada Jeoba ge dä maxꞌäꞌi pa njabu̱ hingä xa gi turimu̱i ꞌne dä za gi mbeni xä ñho te gi pe̱fi

• Hyandi gatꞌho nuꞌu̱ yä ꞌñuu ja, pa dä za gi huahni näꞌä mänꞌa xä ñho

2 SU RI FAMILIA ꞌNE NSUSE̱

NÄꞌÄ UDI RÄ MÄKÄ TꞌOFO: «Näꞌä jäꞌi ja rä mfeni honi dä hñäni rä mfädi, ꞌne di jamäsu näꞌä o̱de pa dä mbämhñä» (Proverbios 18:15). ¿Te di japäbi mꞌe̱di kada nꞌa de nuꞌu̱ ꞌmu̱i ha ri familia? Pa gi pädi, mähyoni gi ñäui ꞌne gi yꞌo̱de xä ñho näꞌä dä xiꞌi (Proverbios 20:5).

¿Te dä za gi pe̱fi mu̱ toꞌo dä du de ri familia? Ogi pe̱ꞌtsi ri tsa gi ꞌñudi ge xa gi turimu̱i, beni ge asta «rä Hesu bi nzoni» ꞌnehe nuꞌmu̱ bi du nꞌa rä ntsitsꞌi (Juan 11:35; Eclesiastés 3:4). ꞌNehe, mähyoni gi tsaya ꞌne gi ähä xä ñho (Eclesiastés 4:6). Njabu̱ ma dä nja ri tsꞌe̱di pa dä za gi ze̱ti yä xuñha.

NÄꞌÄ DÄ ZA GI PE̱FI:

• Nzäi gi ñäui nzäntho ri familia hingä ho̱nse̱ nuꞌmu̱ gi pe̱ꞌtsihu̱ nꞌa rä nthogi. Njabu̱ ora xki pe̱ꞌtsihu̱ yä xuñha hindä jaꞌäꞌihu̱ xä ñhei gi ñähu̱ de geꞌä

• Yꞌambäbi te xä me̱fi nuꞌu̱ yä jäꞌi xä thogi po nuꞌu̱ yä xuñha gi thogi

3 HYONI NÄꞌÄ RÄ MFATSꞌI DI JAꞌÄ MꞌE̱DI

NÄꞌÄ UDI RÄ MÄKÄ TꞌOFO: «Nꞌa rä hogä amigo nzäntho ma dä mäꞌi, ꞌne ja ngu nꞌa rä ku näꞌä xä mꞌu̱i pa nuꞌmu̱ ja yä xuñha» (Proverbios 17:17). Nuꞌu̱ ri amigohu̱ ne dä maxꞌäꞌihu̱, pe rꞌabu̱ zäi ge hingi pädi hanja dä rꞌaꞌäꞌihu̱ rä mfatsꞌi. Hänge dä hogi gi xipäbihu̱ te di jaꞌäꞌihu̱ mꞌe̱di (Proverbios 12:25). ꞌNehe, yꞌapäbihu̱ rä mfatsꞌi nuꞌu̱ toꞌo ja yä mfädi de rä Mäkä Tꞌofo. Njabu̱, ko nuꞌu̱ yä tsꞌofo dä rꞌaꞌäꞌihu̱ de rä Mäkä Tꞌofo dä za gi ze̱tihu̱ nuꞌu̱ yä xuñha (Santiago 5:14, TNM).

ꞌNehe dä za gi tini näꞌä rä mfatsꞌi di jaꞌi mꞌe̱di ko nuꞌu̱ yä jäꞌi xa mäjuäni di kamfribi Äjuä ꞌne nuꞌu̱ yä promesa, pe pa geꞌä mähyoni gi nzäi gi ntsitsꞌi kongeꞌu̱. Mu̱ gi fatsꞌi nuꞌu̱ toꞌo thogi yä dumu̱i ma dä za dä nupä ri mfeni. Xipäbi de nuꞌu̱ yä promesa Jeoba ꞌne de näꞌä ri jamfri gi pe̱ꞌtsi po geꞌä. Hyoni nzäntho hanja dä za gi fatsꞌi nuꞌu̱ märꞌaa, ꞌne ogi ꞌuege de nuꞌu̱ yä jäꞌi di mäꞌi ꞌne tuyämu̱i po geꞌi (Proverbios 18:1; 1 Corintios 15:58).

NÄꞌÄ DÄ ZA GI PE̱FI:

• Ñäui nꞌa ri hogä amigo ꞌne hyopi dä maxꞌäꞌi

• Xa gi mää te me̱ꞌä näꞌä gi thogi ꞌne ote gi ägi ora gi adi näꞌä rä mfatsꞌi di jaꞌi mꞌe̱di