¡Yä rꞌayꞌo jähñä pa gä xo̱kämbenihu̱ Äjuä!
1 Näꞌä 4 de rä oktubre de rä je̱ya 2014, ha näꞌä rä mhuntsꞌi de rä Watch Tower Bible and Tract Society of Pennsylvania, bi mhää ge xki thandi mähyoni dä ꞌmati rꞌa yä noya ha mä mfistꞌofohu̱ de gä jähñä. Mi tꞌo̱de nuꞌu̱ yä noya, ¡xa bi nja ndunthi rä johya! Bi fembäbi gatꞌho nuꞌu̱ xki ntini ge xa mähyoni yä jähñä nuꞌmu̱ di xo̱kämbenihu̱ Äjuä (Sal. 96:2).
2 Pe, ¿por hanja mähyoni dä ꞌmati rꞌa yä noya ha mä mfistꞌofohu̱ de gä jähñä? Nꞌaa, ngeꞌä ngu thogi yä pa, di sigi di pädihu̱ mänꞌa xä ñho te ri bo̱ni rꞌa yä testo de rä Mäkä Tꞌofo, hänge po geꞌä, rꞌabu̱ di ja mꞌe̱di dä ꞌmati rꞌa yä noya ha yä jähñä (Prov. 4:18). Yoho, ha ndunthi yä idioma, ya di nrebisa ꞌne di ꞌmati rꞌa yä noya ha rä Mäkä Tꞌofo de rä Traducción del Nuevo Mundo, nubye̱ ꞌnehe mähyoni dä tꞌe̱ntꞌi nuꞌu̱ yä noyaꞌu̱ ha mä mfistꞌofohu̱ de gä jähñä. Pe pa geꞌä, ma dä zitsꞌi xi ndunthi yä pa, hänge po mientra bi thoki nꞌa hängu yä rꞌayꞌo jähñä.
3 ¿Pe̱ꞌtsi te gä to̱ꞌmihu̱ asta dä bo̱ni näꞌä rꞌayꞌo mfistꞌofo de gä jähñä, pa dä za gä usahu̱ nuꞌu̱ yä rꞌayꞌo jähñä? Hinä, di rꞌakägihe ndunthi rä johya gä xiꞌäꞌihe ge pa nuꞌu̱ yä zänä xä ꞌñepu̱, ma dä ꞌmo̱ꞌtse ha jw.org/es rꞌa de nuꞌu̱ yä rꞌayꞌo jähñä. Kada dä bo̱ni nꞌaa, ma dä thutsꞌi ha Mä Mäkä ꞌMe̱fihu̱, ha nꞌa de nuꞌu̱ yä semänä ha rä programä de Rä Mhuntsꞌi pa Hanja gä Pe̱phu̱ Äjuä, ꞌne ma gi hyandi di enä «Rä rꞌayꞌo jähñä» ꞌne ma dä ehe rä thuhu.
4 Hanja gä mepye̱hu̱ nuꞌu̱ yä rꞌayꞌo jähñä. Rꞌabu̱ xä ñhei gä mepye̱hu̱ nꞌa rꞌayꞌo thuhu. Mäske njabu̱, nuju̱ di ne gä njahu̱ ngu rä rey Dabid nuꞌmu̱ bi ꞌñenä: «Nuga di ne gä tutäꞌi yä jähñä ꞌne hingä ma gä tsaya de gä nsundaꞌi» (Sal. 30:12). Pa gi mepye̱ nꞌa rä rꞌayꞌo jähñä, te̱ni nuya yä tsꞌofo hinxä ñhei:
Yꞌo̱de ndunthi yä mꞌiki näꞌä ꞌmida de gä piano xä thoki pa näꞌä rä rꞌayꞌo jähñä. Ha jw.org/es ja gehni ma dä ꞌmo̱ꞌtse nuꞌu̱ yä rꞌayꞌo ꞌmida. Entremas gi yꞌo̱de, nguntꞌä ma gi mepye̱.
Nxadi nuꞌu̱ yä noya hutsꞌi ha näꞌä jähñä ꞌne yꞌo̱tꞌe ntsꞌe̱di po gi mepye̱.
Tuti näꞌä rä rꞌayꞌo jähñä ko rä ꞌmida ndunthi yä mꞌiki asta gi mepye̱ xä ñho.
Kada gi pe̱ꞌtsihu̱ ri Mhuntsꞌi de gä Familia, nsayahu̱ nꞌa tu̱i näꞌä jähñä asta nuꞌmu̱ gi tsahu̱ ge ya gä mepye̱hu̱.
5 Xti zo̱ho̱ rä ora pa gä ntuhuhu̱ nꞌa rꞌayꞌo jähñä ha Rä Mhuntsꞌi pa Hanja gä Pe̱phu̱ Äjuä, mꞌe̱tꞌo ma dä tꞌe̱ntsꞌi näꞌä ꞌmida de gä piano pa gatꞌho dä yꞌo̱de. Mꞌe̱fa dä thutsꞌi mänꞌaki, pe nubye̱ gatꞌho nuꞌu̱ xä ntini, ma dä ntuhu mähye̱gi ko rä ꞌmida. Njabu̱ ma dä tꞌo̱tꞌe ko gatꞌho nuꞌu̱ yä rꞌayꞌo jähñä.
6 Nꞌa rä däta nsu pa nuju̱ gä tutihu̱ yä jähñä ha rä mhuntsꞌi. Njabu̱, mähye̱gi ko yä ku, di nsundahu̱ rä Zi Dada Jeoba. Po rängeꞌä, ora toka gä tutihu̱ yä jähñä ha yä mhuntsꞌi, hinxä ñho gä pe̱fihu̱ märꞌa yä tꞌo̱tꞌe nuꞌu̱ hingä mähyoni.
7 ¿Habu̱ mä nꞌa di ja mꞌe̱di gä udihu̱ ge di handihu̱ ko ndunthi rä muui yä jähñä? Ha yä däta mhuntsꞌi, änte de dä mu̱di rä programä, di tꞌe̱ntsꞌi nꞌa rä mäkä ꞌmida. ¿Gi pädi hanja xä thoki nuꞌu̱ yä ꞌmidaꞌu̱? Yo mꞌiki tatꞌä je̱ya, yä ku ꞌne yä nju de gatꞌho rä Xiꞌmhai, jutꞌäse̱ yä pasaje ꞌne pa ha Patterson (Nueva York), pa bi graba nuꞌu̱ yä mäkä ꞌmida di usahu̱ pa di xo̱kämbenihu̱ rä Zi Dada Jeoba. Hänge, ha yä däta mhuntsꞌi nuꞌmu̱ rä ku xikägihu̱ ge ya bi zo̱ho̱ rä ora de gä hudihu̱ pa gä o̱dehu̱ näꞌä rä mäkä ꞌmida di tꞌe̱ntsꞌi, mähyoni ge nguntꞌä gä jamäsuhu̱. Njabu̱ ma dä maxkägihu̱ pa gä hoki mä korasohu̱, pa gä o̱dehu̱ nuꞌu̱ yä ntꞌudi ma dä tꞌakägihu̱ (Esd. 7:10).
8 Xti uadi nunä rä mhuntsꞌi ma gä tutihu̱ nꞌa de nuya yä rꞌayꞌo jähñä rä thuhu «¡Que venga el Reino establecido por Dios!». Nunä rä jähñä bi bo̱ni rä 4 de rä oktubre ha näꞌä rä mhuntsꞌi de rä Watch Tower Bible and Tract Society of Pennsylvania. Gehnä bi thoki pa gä benihu̱ ge ya bi uadi nꞌa thebe yä je̱ya, dende nuꞌmu̱ rä Hesu bä häni rä tsꞌe̱di ngu nꞌa rä rey ha mähetsꞌi.
9 Nuꞌu̱ yä rꞌayꞌo jähñä, ꞌnehe go geꞌu̱ rꞌa de nuꞌu̱ yä «hogä noya» bä ꞌñehe de rä Zi Dada Jeoba (Mat. 12:25a). Ma gä o̱tꞌehu̱ ntsꞌe̱di pa gä mepye̱hu̱, ꞌne gä tutihu̱ nuꞌu̱ yä rꞌayꞌo jähñä dende ha mä korasohu̱. Mu̱ gä pe̱fihu̱ njabu̱, ma gä xo̱kämbenihu̱ ꞌne ma gä nsundahu̱ rä Zi Dada Jeoba ngu ri ꞌñepi (Sal. 147:1).