Rꞌa yä idea pa gi nxadi rä Mäkä Tꞌofo

Mepye̱ rꞌa yä jähñä

Nꞌa rä zi nju rä mengu Estados Unidos rä thuhu Lorraine enä: «Ora xa di tumämu̱i ꞌne hinte ja mä ganä, rä Zi Dada Jeoba di animägi ko nuꞌu̱ yä thuhu po̱ni ha JW Broadcasting^®».

Yä kristianu nzäntho xä nsunda rä Zi Dada Jeoba ko yä jähñä (Col. 3:16). Mu̱ gi mepye̱ rꞌa jähñä ma dä maxꞌäꞌi ndunthi pa ora hingi hñä nꞌa rä mfistꞌofo de gä jähñä o nꞌa rä telefono o tablet. Jaua rꞌa yä konseho nuꞌu̱ dä za dä maxꞌäꞌi pa gi mepye̱ yä jähñä.

• ꞌUeke rä tiempo pa gi hñeti ꞌne gi ntiende te ne dä mää nuꞌu̱ yä jähñä. Mu̱ gä ntiendehu̱ näꞌä ne dä mää nuꞌu̱ yä jähñä, mänꞌa hingä ma dä jakägihu̱ xä ñhei gä mepye̱hu̱. Ha jw.org dä za gi hyandi ge xä ntꞌofo gatꞌho nuꞌu̱ yä jähñä di pe̱ꞌtsihu̱. ꞌNehe ja ma gi tiniua nuꞌu̱ yä thuhu po̱ni ha JW Broadcasting ꞌne nuꞌu̱ yä thuhu pa yä bätsi. Pa gi tini, ku̱tꞌi habu̱ enä «Rä Biblioteca» ꞌne su̱ꞌti habu̱ enä «Yä ꞌmida».

• Kopia näꞌä rä jähñä ha nꞌa rä he̱ꞌmi. Gi nuhmä ge mu̱ gi yꞌofo, mänꞌa ma dä maxꞌäꞌi pa gi mepye̱ (Deut. 17:18).

• Ntuhu ntsꞌe̱di. Hñeti ꞌne tuti näꞌä rä jähñä ndunthi yä mꞌiki.

• Hyandi mu̱ hää gä mepye̱. Trata gi tuti näꞌä jähñä nsinke gi hyandi näꞌä xä ntꞌofo ꞌne mꞌe̱fa hyandi mu̱ hää gä mängä xä ñho.