MÄ MꞌU̱IHU̱ NGU YÄ KRISTIANU
Hanja dä za gä uñhu̱ ntꞌo̱de mänꞌa xä ñho—Ma gä usahu̱ yä bideo pa gä udihu̱
POR HANJA XA MÄHYONI:
Yä bideo faxkägihu̱ pa gä tso̱mbäbihu̱ ha yä mfeni ꞌne ha yä koraso yä jäꞌi. Yä bideo japäbi yä jäꞌi dä jamäsu näꞌä imformasion handi ꞌne o̱de, ꞌne geꞌä fatsꞌi pa dä beni po mä ndunthi rä tiempo. Rä Zi Dada Jeoba xä zogägihu̱ nꞌa rä hogä ejemplo, ngetꞌho pa bi umbäbi rꞌa yä ntꞌudi nuꞌu̱ yä ꞌme̱go, rꞌabu̱ bi usa nuꞌu̱ yä tꞌo̱tꞌe mi tsa dä hyandiꞌu̱ (Hch 10:9-16; Ap 1:1).
Nuꞌu̱ yä bideo ¿Te rä thuhu Äjuä?, ¿De toꞌo bi ehe rä Mäkä Tꞌofo? ꞌne ¿Por hanja dä za gä kamfrihu̱ ge mäjuäni näꞌä hutsꞌi ha rä Mäkä Tꞌofo?, uni mä nꞌa tu̱i rä imformasion pa gä ntiendehu̱ mänꞌa xä ñho yä ntheke 2 ꞌne 3 de rä foyeto Yä hogä noya. ꞌNe nuꞌu̱ yä bideo ¿Por hanja mähyoni gä nxadihu̱ rä Mäkä Tꞌofo?, ¿Hanja di tꞌo̱tꞌe nꞌa rä ntꞌudi de rä Mäkä Tꞌofo? ꞌne ¿Te di tꞌo̱tꞌe ha rä Ngu de gä Mhuntsꞌi?, nupäbi rä mfeni yä jäꞌi pa dä hñäni nꞌa rä estudio o pa dä ntini ha yä mhuntsꞌi. ꞌNehe, ja märꞌa yä bideo ꞌne yä pelikula nuꞌu̱ dä za gä usahu̱ nuꞌmu̱ di unihu̱ yä estudio (km-S 5/13 rä nxii 3).
TE DÄ ZA GÄ PE̱FIHU̱:
Descarga dende änte näꞌä rä bideo gi ne gi ꞌñuti yä jäꞌi.
Hyoki nꞌaa o yoho yä ntꞌani pa gi thädihu̱ xki hyanthu̱ näꞌä bideo.
Hyanthu̱ mähye̱gi näꞌä bideo.
Mäñhu̱ te gä pädihu̱ de näꞌä bideo.
TRATA GI PE̱FI NJAUA:
Usa näꞌä gäxä nxii pe̱ꞌtsi yä tratado pa gi ꞌñuti yä jäꞌi hanja dä usa näꞌä rä código QR pa dä hyandi rä bideo ¿Por hanja mähyoni gä nxadihu̱ rä Mäkä Tꞌofo?
ꞌÑuti yä jäꞌi rä bideo ¿Por hanja dä za gä kamfrihu̱ ge mäjuäni näꞌä hutsꞌi ha rä Mäkä Tꞌofo? Mꞌe̱fa, umbäbi rä foyeto Yä hogä noya ꞌne nxadihu̱ rä ntheke 3.