Usa yä bideo pa gi ꞌñuti nuꞌu̱ yä jäꞌi gi umbäbi nꞌa rä curso de rä Mäkä Tꞌofo

Nuꞌu̱ yä tꞌo̱tꞌe tsa gä handihu̱ faxkägihu̱ pa gä benihu̱ ꞌne gä mepye̱hu̱ näꞌä tꞌutkägihu̱. Rä Zi Dada Jeoba, näꞌä rä Däta Xahnäte di usa nuꞌu̱ yä tꞌo̱tꞌe mi tsa dä hyandi yä ꞌme̱go pa njabu̱ nuꞌu̱ bi ntiende näꞌä mi ne dä ꞌñuti (Gé 15:5; Jer 18:1-6). Rä Hesu ꞌnehe bi usa nuya yä mfatsꞌi ora mi uti yä jäꞌi (Mt 18:2-6; 22:19-21). Mäpaya ꞌnehe rä hnini Äjuä di usa nuꞌu̱ yä tꞌo̱tꞌe tsa gä handihu̱ pa dä ꞌñutkägihu̱, por ejemplo: yä bideo. ¿Gi usa yä bideo ora gi uti nuꞌu̱ yä zi jäꞌi gi umbäbi nꞌa rä curso de rä Mäkä Tꞌofo?

Mäpaya di pe̱ꞌtsihu̱ 10 yä bideo nuꞌu̱ faxkägihu̱ gä esplikahu̱ nuꞌu̱ ntheke ehe ha rä foyeto Äjuä pe̱ꞌtsi rꞌa yä hogä noya pa nuꞌi. Rꞌabu̱ rä titulo näꞌä rä bideo di nthe̱ ko nꞌa de nuꞌu̱ yä ntꞌani ehe de gä mboi ha rä foyeto. Näꞌä rä foyeto ja ha Internet di ñꞌoui nꞌa rä vínculo pa dä bengägihu̱ hämꞌu̱ debe gä usahu̱ kada nꞌa de nuꞌu̱ yä bideo. Pe hingä ho̱nse̱ꞌä, ꞌnehe ha nuꞌu̱ «yä erramienta pa gä udihu̱» ehe märꞌa yä bideo nuꞌu̱ dä za gä usahu̱ ora di unihu̱ nꞌa rä curso de rä Mäkä Tꞌofo.

¿Di japi xä ñhei dä ntiende nꞌa rä tema näꞌä rä jäꞌi gi umbäbi nꞌa rä curso de rä Mäkä Tꞌofo, o thogi po nꞌa rä xuñha? Nuꞌmu̱ dä za gi hyoni ha jw.org/ote® o ha JW Broadcasting® nꞌa rä bideo näꞌä gi handi ge ma dä nupäbi rä mfeni. Dä za gi hyandihu̱ mähye̱gi näꞌä rä bideo gä huahni ꞌne ñähu̱ de geꞌä.

Tatꞌä zänä po̱ni yä rꞌayꞌo bideo. Ora xki hyandi nꞌa rä rꞌayꞌo bideo, mbeni ngu toꞌo dä za gi ꞌñuti nuꞌu̱ yä bideoꞌu̱.