Ogi pe̱fi nuya yä tꞌo̱tꞌe ora gi uni nꞌa rä estudio

Ogi ñä ndunthi. Ogi mbeni ge pe̱ꞌtsi te gi ñä ndunthi pa gi ꞌñudi. Rä Hesu bi usa yä ntꞌani pa bi matsꞌi yä jäꞌi dä dini yä mpengi nuꞌu̱ yä ntꞌani mi pe̱ꞌtsi (Mt 17:24-27). Mu̱ gä usahu̱ yä ntꞌani hingä ma dä mfada näꞌä jäꞌi di utihu̱ ꞌne ma dä maxkägihu̱ pa gä pädihu̱ te kamfri ꞌne mu̱ di ntiende näꞌä imformasion di nxadihu̱ kongeꞌä (be-S rä nxii 253, yä parr. 3, 4). Ora gi o̱tpäbi nꞌa rä ntꞌani ri estudio, pe̱ꞌtsi rä pasensia ꞌne to̱ꞌmi asta dä dädi. Mu̱ hingi pädi te dä dädi, yꞌo̱tpäbi märꞌa yä ntꞌani pa gi fatsꞌi dä dimbäbise̱ rä mpengi näꞌä ntꞌani (be-S rä nxii 238, yä parr. 1, 2). Ñä rꞌamätsꞌu̱ pa njabu̱ näꞌä jäꞌi gi uti dä za dä ntiende nuꞌu̱ yä ntꞌudi (be-S rä nxii 230, rä parr. 4).

Ogi japi dä ntꞌe̱tꞌi. Ogi trata gi ꞌñuti gatꞌho näꞌä gi pädi de näꞌä temaꞌä (Jn 16:12). Hyandi ge ri estudio dä ntiende xä ñho te udi näꞌä parrafo gi nxadihu̱ (be-S rä nxii 226, rä parr. 4; rä nxii 227, rä parr. 1). Mäske mähotho näꞌä tema, pe mu̱ gi umbi xi ndunthi rä imformasion ma gi japi dä ntꞌe̱tꞌi ꞌne hingä ma dä beni nuꞌu̱ yä punto xa mähyoni de kada nꞌa rä parrafo (be-S rä nxii 235, rä parr. 3). Mu̱ gä da ngue̱nda ge näꞌä jäꞌi gi uti ya bi ntiende näꞌä ntꞌudi, thogi ha mä nꞌa rä parrafo.

Ogi heti ho̱nse̱ yä parrafo ꞌne yä ntꞌani. Nuju̱ di nehu̱ gä tso̱mbäbihu̱ ha yä koraso yä jäꞌi, hingä ho̱nse̱ gä hetihu̱ näꞌä imformasion ehe ha yä he̱ꞌmi (Lu 24:32). Rä Noya Äjuä xa ja rä tsꞌe̱di, hänge dä hogi gi huahni xä ñho ndañꞌu̱ nuꞌu̱ yä testo ma gi hñeti (2Co 10:4; Heb 4:12; be-S rä nxii 144, yä parr. 1-3). Usa yä ejemplo nuꞌu̱ hinxä ñhei toꞌo dä ntiende (be-S rä nxii 245, yä parr. 2-4). Pa dä za gi umbäbi näꞌä rä fatsꞌi di japäbi mꞌe̱di nuꞌu̱ ri estudio, mähyoni gi hyandi te mä xuñha thogi, te kamfri ꞌne te mä nzäi pe̱ꞌtsi. Yꞌo̱tpäbi yä ntꞌani ngu: «¿Te gi mbeni de nuꞌu̱ yä ntꞌudi gä pädibye̱? ¿Te utkägihu̱ de rä Zi Dada Jeoba? ¿Hanja ma dä maxꞌäꞌi mu̱ gi pe̱fi nunä tsꞌofo?» (be-S rä nxii 238, yä parr. 3-5; rä nxii 259, rä parr. 1).