Hanja dä za gä usahu̱ rä foyeto ¿Toꞌo pe̱päbi rä bolunta Jeoba mäpaya?

Rä foyeto ¿Toꞌo pe̱päbi rä bolunta Jeoba mäpaya?a, nunä nꞌa rä erramienta xä thoki pa gä nxadihu̱ nꞌa hängu minuto änte o ꞌme̱fa de gä umbäbihu̱ rä estudio nꞌa rä jäꞌi. Yä ntheke 1 asta 4 udi toꞌo nuju̱ yä testigo rä Jeoba, yä ntheke 5 asta 14 udi te di pe̱fihu̱, ꞌne yä ntheke 15 asta 28 udi te pe̱fi mä organisasionhu̱. Mu̱ dä za, mänꞌa dä hogi gi nxadihu̱ dende ri mu̱di ꞌne ja ngu bi ehe ordenädo nuꞌu̱ yä ntheke de rä foyeto. Kada nꞌa rä ntheke pe̱ꞌtsi ho̱nse̱ nꞌatho rä nxii ꞌne dä za gi nxadihu̱ ko ho̱nse̱ ku̱tꞌa o rꞌe̱tꞌa minuto.

• 

  No̱ni näꞌä ntꞌani hutsꞌi ngu rä titulo.

• Dä za gi hñetihu̱ xo̱ge rä ntheke o rꞌa mä nꞌa rä subtítulo.

• Ñähu̱ de näꞌä ja huadi gä hetihu̱. Usa yä kꞌoi ꞌne nuꞌu̱ yä ntꞌani ehe asta hai de kada nꞌa rä ntheke. Huahni te mä testo ma gi hñetihu̱. ꞌÑuti hanja nuꞌu̱ yä letra ehe de gä mboi thädi näꞌä ntꞌani ehe de gä titulo.

• Mu̱ ha näꞌä ntheke gi nxadihu̱ ehe nꞌa rä rekuadro habu̱ enä «Pa gi pädi mä nꞌa tu̱i», hñetihu̱ ꞌne nupäbi rä mfeni ri estudio pa dä me̱fi näꞌä tsꞌofo.