ꞌÑudi ko rä johya

Mu̱ di predikahu̱ ko rä johya, yä zi jäꞌi asta ma dä ho dä yꞌo̱de. ꞌNehe, ma gä udihu̱ ge di handihu̱ ko ndunthi rä muui näꞌä di predikahu̱. Hindi mporta habu̱ dyä menguhu̱ o te mä mꞌu̱i xtä pe̱ꞌtsihu̱, gatꞌho dä za gä udihu̱ rä johya (Ro 12:11). ¿Te dä za gä pe̱fihu̱ pa njabu̱ gä sentihu̱ rä johya?

Nꞌaa, beni hängu rä balo pe̱ꞌtsi näꞌä gi udi. Beni ge nꞌa rä däta nsu näꞌä gi pe̱ꞌtsi de gi xipäbi märꞌaa nuꞌu̱ «yä hogä notisia de nuꞌu̱ yä hogä tꞌo̱tꞌe» (Ro 10:15). Yoho, beni hängu ma dä matsꞌi ha yä mꞌu̱i nuꞌu̱ yä zi jäꞌi ma dä yꞌo̱de nuꞌu̱ yä hogä notisia. Yä jäꞌi xa di japäbi mꞌe̱di dä yꞌo̱de näꞌä udi rä Noya Äjuä (Ro 10:13, 14). Hñuu, ꞌñudi rä Noya Äjuä ko ngatꞌho ri koraso. Ora di utihu̱ yä zi jäꞌi ko ngatꞌho mä korasohu̱, di nheki ha mä hmihu̱ ꞌne ora di äni mä yꞌe̱hu̱.

HYANDIHU̱ RÄ BIDEO TINI RÄ JOHYA DE GI FATSꞌI MÄRꞌA DÄ ME̱PÄBI ÄJUÄ: ꞌÑUDI MÄNꞌA XÄ ÑHO—ꞌÑUDI KO RÄ JOHYA. MꞌE̱FA THÄDIHU̱ NUYA YÄ NTꞌANI:

• 

  ¿Por hanja Rita ya himi senti ndunthi rä johya ora mi uti Coral de rä Mäkä Tꞌofo?

• 

  ¿Te bi matsꞌi Rita pa bi me̱ꞌtsi rä johya mänꞌaki?

• 

  En lugar de ho̱nse̱ gä handihu̱ te hingi pe̱fi xä ñho nuꞌu̱ yä zi jäꞌi di utihu̱, ¿por hanja mähyoni ge nzäntho gä handihu̱ nuꞌu̱ yä hogä mꞌu̱i pe̱ꞌtsi?

• Mu̱ di udihu̱ rä johya, ¿hanja ma dä matsꞌi nuꞌu̱ di utihu̱ rä Noya Äjuä ꞌne märꞌa yä zi jäꞌi?