Toꞌo di nthäti: Pa gatꞌho rä bida

Nuꞌu̱ yä medinthäti pe̱fi nuꞌu̱ yä konseho uni rä Biblia, ꞌmu̱i ko rä johya ꞌne eꞌspäbi rä nsu rä Zi Dada Jeoba (Mr 10:9). Hänge yä soltero ꞌne yä soltera mähyoni dä yꞌo̱tꞌe ngue̱nda nuꞌu̱ yä konseho uni rä Biblia änte de dä huahni kontoꞌo ma dä nthätui, pa njabu̱ dä mabi xä ñho ha rä medinthäti ꞌne dä dura pa gatꞌho rä bida.

Rä Biblia hingi rekomiendabi yä kristianu ge dä hyoni yä nobio o yä nobia nuꞌmu̱ tobe xa yä bäsjäꞌitho. Ngeꞌä nuꞌmu̱ xa yä bäsjäꞌitho, ya xtä du dä nthäti ꞌne rꞌabu̱ geꞌä hingi fatsꞌi dä huahni yä hogä desision (1Co 7:36). Hänge nꞌa rä bäsjäꞌi näꞌä ne dä nthäti, dä hogi dä do̱ꞌmi ꞌne dä probecha näꞌä rä tiempo pe̱ꞌtsi pa dä tede rä mhäte po rä Zi Dada Jeoba ꞌne dä sigi dä yꞌo̱tꞌe ntsꞌe̱di po dä ꞌñudi rä mhäte, rä ñhojäꞌi ꞌne märꞌa yä hogä mꞌu̱i nuꞌu̱ ma dä matsꞌi mꞌe̱fa nuꞌmu̱ xti nthäti.

Änte de gi nthäti, mꞌe̱tꞌo konose xä ñho tengu rä uso näꞌä jäꞌi gi ne gi nthätui (1Pe 3:4). Mu̱ gi pe̱ꞌtsi yä duda, ñäui ꞌne xipäbi te jaꞌi gi turimu̱i. Rä Biblia mändagihu̱ gä hombäbihu̱ rä ñho märꞌaa. Njabu̱ ꞌnehe, beni ge nu xki nthäti hingä ma gi hyoni ri ñhouise̱, sino ke ma gi hyombäbi rä ñho näꞌä jäꞌi ma gi nthätui (Flp 2:3, 4). Hänge mu̱ gi ne gi ꞌmu̱i ko rä johya nu xki nthäti, mähyoni ge dende nubye̱ gi pe̱fi nuꞌu̱ yä tsꞌofo uni rä Noya Äjuä.

HYANDIHU̱ RÄ BIDEO NÄꞌÄ MÄHYONI GI YꞌO̱TꞌE NGUE̱NDA MU̱ GI NE GI NTHÄTI. PARTE 3: BENI MꞌE̱TꞌO XÄ ÑHO. MꞌE̱FA THÄDIHU̱ NUYA YÄ NTꞌANI:

• Ri mu̱di, ¿tengu mi pa näꞌä rä ntsitsꞌi mi pe̱ꞌtsi näꞌä rä zi nju ko rä nobio?

• Ngu mi thogi yä pa, ¿de te bi da ngue̱nda näꞌä rä zi nju?

• ¿Te mä mfatsꞌi bi hñäni näꞌä rä zi nju de rä dada ꞌne rä nänä, ꞌne te mä desision bi huahni?