Nuꞌi dä za gi mfaxte pa dä nja rä johya ha ri familia

Jeoba xa di ho ora handi ge yä familia ꞌmu̱i ko rä johya (Sl 127:3-5; Ec 9:9; 11:9). Pe mäpaya, yä familia thogi po yä xuñha ꞌne geꞌä japäbi dä mꞌe̱di rä johya. ¿Te dä za dä me̱fi yä dada, yä nänä ꞌne bätsi pa mänꞌa dä mꞌu̱i ko rä johya?

Rä däme ri ꞌñepäbi dä su ꞌne dä balora rä ꞌme̱hñä (1Pe 3:7). Pa geꞌä, mähyoni dä dedikabi rä tiempo, dä me̱ꞌspäbi rä pasensia ꞌne dä umbäbi njamädi po näꞌä pe̱fi po dä su rä nguu ꞌne rä familia (Col 3:15). ꞌNehe rä Noya Äjuä animäbi yä däme dä nzäi dä xipäbi yä ꞌme̱hñä hängu mädi ꞌne dä felisita po gatꞌho näꞌä pe̱fi (Pr 31:28, 31).

Rä ꞌme̱hñä ri ꞌñepäbi dä apoya rä däme (Pr 31:12). Rä Noya Äjuä mändabi yä ꞌme̱hñä dä yꞌo̱tꞌe ꞌne dä matsꞌi yä däme (Col 3:18). ꞌNehe, rä ꞌme̱hñä debe dä zofo rä däme ko rä tꞌekꞌei ꞌne hindä ñämäñꞌu̱ de geꞌä, nixi dä metuäbi märꞌaa de nuꞌu̱ yä error pe̱ꞌtsi (Pr 31:26).

Yä dada ꞌnehe ri ꞌñepäbi dä ꞌueke rä tiempo pa dä dedikabi yä bätsi (Dt 6:6, 7). Honi rä modo hanja dä xipäbi yä bätsi hängu di mädi (Mt 3:17). ꞌNehe ora ja mꞌe̱di, ko rä mhäte su, korreji ꞌne umbäbi yä konseho yä bätsi (Ef 6:4).

Yä bätsi ri ꞌñehe balora ꞌne dä yꞌo̱tꞌe yä dada (Pr 23:22). ꞌNehe, xipäbi yä dada te di mbeni ꞌne te di senti. Ora yä bätsi jamäsu nuꞌu̱ yä konseho tꞌumbäbi, udi rä tꞌekꞌei po yä dada (Pr 19:20).

HYANDIHU̱ RÄ BIDEO MFAXTE PA DÄ NJA RÄ JOHYA HA RI FAMILIA. MꞌE̱FA THÄDIHU̱ NUNA RÄ NTꞌANI:

• ¿Te bi me̱fi rä dada, rä nänä ꞌne yä tꞌixu pa bi nja rä johya ha rä familia?