Hanja dä za gä fatsꞌihu̱ nꞌa rä jäꞌi pa dä desidi dä me̱päbi rä Zi Dada Jeoba

1, 2. a) ¿Por hanja rꞌa de nuꞌu̱ yä zi jäꞌi di xahnihu̱ de rä Mäkä Tꞌofo tsu dä nxixtehe? b) ¿Te ma gä handihu̱ ha nunä ntꞌudi di nxadihu̱?

XI NUꞌI, ¿änte de gi nxixtehe mi jabu̱ rꞌa yä tꞌo̱tꞌe nuꞌu̱ mi hu̱tsꞌäꞌi pa hingi ntestigo rä Jeoba? Tal vez ngi tsu ge nuꞌu̱ yä jäꞌi habu̱ ngi mpe̱fi, ri amigo o ri familia xä nkue̱. O tal vez ngi mbeni ge nunka ma xä za gi ꞌmu̱i ja ngu adi rä Zi Dada Jeoba. Mu̱ gä senti njabu̱, zäi ge gi komprendebi nuꞌu̱ yä zi jäꞌi gi uti de rä Mäkä Tꞌofo ora gi handi ge hingi ne dä desidi dä nxixtehe ngu nꞌa rä testigo rä Jeoba.

² Rä Hesu mi pädi xä ñho ge ora nꞌa rä jäꞌi di senti njabu̱, geꞌä dä za dä hñäkuäbi pa hindä me̱päbi rä Zi Dada Jeoba (Mat. 13:​20-22). Pe rä Hesu ꞌnehe mi pädi xä ñho ge nꞌa rä jäꞌi dä za dä däpäbi nuya yä ntsu ꞌne dä za dä gu̱ rä balo pa dä me̱päbi rä Zi Dada Jeoba. Hänge rä Hesu bi matsꞌi nuꞌu̱ yä jäꞌi de goho yä forma: 1) Bi matsꞌi pa bi hyandi te mi häkuäbi dä nxixtehe. 2) Bi matsꞌi pa mänꞌa bi mädi rä Zi Dada Jeoba. 3) Pa bi bädi dä hyandi ndaꞌä mänꞌa xa mähyoni dä me̱fi mꞌe̱tꞌo ha yä bida. ꞌNe 4) pa dä däpäbi yä xuñha. Ja ngu bi ja rä Hesu, ma gä handihu̱ hanja dä za gä fatsꞌihu̱ ꞌnehe yä zi jäꞌi dä me̱päbi rä Zi Dada Jeoba. Pa geꞌä di pe̱ꞌtsihu̱ nꞌa rä mfatsꞌi: rä mfistꞌofo ¡Johya pa nzäntho!

FATSꞌI DÄ HYANDI TE HÄKUÄBI DÄ NXIXTEHE

3. ¿Te mi häkuäbi Nicodemo dä de̱ni rä Hesu?

³ Mi mꞌu̱kua rä Hesu ha rä Xiꞌmhai, ꞌnehe bi mꞌu̱i nꞌa rä ñꞌo̱ho̱ mrä thuhu Nicodemo. Nuni ñꞌo̱ho̱ mi ja nꞌa rä däta nsu ngeꞌä go geꞌä mrä gobernante yä judío. Nuꞌmu̱ rä Hesu ya mi pe̱ꞌtsi rꞌato nzänä de mi ungä ntꞌo̱de rä Noya Äjuä, Nicodemo bi da ngue̱nda ge mi geꞌä rä Mesías, pe näꞌä bi desidi hindä de̱ni (Juan 3:​1, 2). ¿Por hanja? Rä Mäkä Tꞌofo enä ge ngeꞌä mi tsu te dä xipäbi yä judío (Juan 7:13; 12:42). Zäi ge Nicodemo mi tsu dä thäkuäbi näꞌä rä däta nsu mi pe̱ꞌtsi mu̱ xä thandi ge mi kamfri rä Hesu.a

4. ¿Te bi me̱fi rä Hesu pa bi matsꞌi Nicodemo dä ntiende xä ñho te mi to̱ꞌmi rä Zi Dada Jeoba de geꞌä?

⁴ Nicodemo mi pädi xä ñho te mi udi nuꞌu̱ yä ley xki tꞌumbäbi Moisés. Pe mi ja mꞌe̱di toꞌo dä matsꞌi pa dä ntiende xä ñho te mi to̱ꞌmi rä Zi Dada Jeoba de geꞌä. Hänge rä Hesu bi dedikabi rä tiempo Nicodemo ꞌne asta bi mꞌu̱i dispuesto dä nthe̱ui de gä xui. Rä Hesu bi esplikabi xä ñho te mi debe dä me̱fi mu̱ mi ne dä de̱ni. Bi ꞌñembäbi ge mi ja mꞌe̱di dä arrepenti de yä pekado, dä nxixtehe ꞌne dä ꞌñudi ge mi kamfri rä Hesu (Juan 3:​5, 14-21).

5. ¿Te dä za gä pe̱fihu̱ pa gä fatsꞌihu̱ nꞌa rä zi jäꞌi dä hyandi te hu̱kuäbi dä me̱päbi rä Zi Dada Jeoba?

⁵ Mäske rꞌabu̱ di handihu̱ ge nꞌa rä zi jäꞌi mäntꞌä di ntiende näꞌä di utihu̱ de rä Mäkä Tꞌofo, rꞌabu̱ di ja mꞌe̱di gä fatsꞌihu̱ dä hyandi te hu̱kuäbi dä nxixtehe ꞌne dä me̱päbi rä Zi Dada Jeoba. Pa geꞌä dä hogi gi yꞌo̱tꞌe nuya yä ntꞌani: «¿Xa di mpe̱fi ndunthi nuni zi jäꞌi ꞌne kasi otho rä pongi pa dä me̱fi näꞌä adi rä Zi Dada Jeoba? ¿Di nkue̱ rä familia ꞌne häkuäbi dä ntestigo rä Jeoba?». Mu̱ ya gä handi te mä xuñha thogi näꞌä zi jäꞌi gi uti de rä Mäkä Tꞌofo, nubye̱ dä hogi gi de̱mbäbi rä ejemplo rä Hesu ꞌne gi dedikabi rä tiempo. Por ejemplo dä za gi mbitabi nꞌa rä zi ñhuni o nꞌa rä zi café, o dä za gi mbitabi gi uñhu̱ nꞌa rä gatꞌi. Mu̱ gi pe̱fi njabu̱, ma gi hyandi ge näꞌä zi jäꞌi hingä ma dä japäbi xä ñhei dä mää te mä xuñha thogi ꞌne njabu̱ dä za gi umbäbi rä mfatsꞌi. Ora gi fatsꞌi pa dä hyandi te mä mpadi di debe dä ja ha rä bida, ꞌnehe xa mähyoni gi bembäbi ge mu̱ ma dä ja nuya yä mpadi, ma dä ja ngeꞌä xa di mädi rä Zi Dada Jeoba hingä pa dä gohi xä ñho kongeꞌi.

6. ¿Hanja dä za gi fatsꞌi näꞌä rä zi jäꞌi gi uti de rä Mäkä Tꞌofo pa dä gu̱ rä balo ꞌne dä me̱fi näꞌä yꞌo ri bädi? (1 Corintios 16:13).

⁶ Nꞌa rä jäꞌi näꞌä di utihu̱ de rä Mäkä Tꞌofo ma dä gu̱ rä tsꞌe̱di ꞌne rä balo pa dä me̱fi näꞌä yꞌo ri bädi; mu̱ hinte mä duda ma dä me̱ꞌtsi ge rä Zi Dada Jeoba ma dä matsꞌi ꞌne hingä ma dä hye̱gise̱ (hñeti 1 Corintios 16:​13, TNM). ¿Pe hanja dä za gi fatsꞌi? Nꞌa rä hogä xahnäte, hingä ho̱nse̱ uti nꞌa rä zi jäꞌi näꞌä udi rä Mäkä Tꞌofo, sino ke ꞌnehe fatsꞌi pa dä da ngue̱nda ge ko rä mfatsꞌi rä Zi Dada Jeoba hää ma dä logra dä ja yä mpadi pa dä mꞌu̱i ja ngu di mändaꞌä. ¿Pe te mä nꞌa dä hogi gi pe̱fi po geꞌä?

FATSꞌI PA MÄNꞌA DÄ MÄDI RÄ ZI DADA JEOBA

7. Mi mꞌu̱kua rä Hesu ha rä Xiꞌmhai, ¿hanja bi matsꞌi yä zi jäꞌi pa bi bädi bi mädi rä Zi Dada Jeoba?

⁷ Rä Hesu mi pädi xä ñho ge mu̱ yä jäꞌi xä mädi rä Zi Dada Jeoba, geꞌä ma xä matsꞌiꞌu̱ pa xä me̱fi ha yä bida näꞌä di mändaꞌä. Po geꞌä rä Hesu bi hyoni rä modo hanja bi tso̱mbäbi ha yä koraso nuꞌu̱ yä jäꞌi nuꞌmu̱ mi uti tenguꞌä rä mꞌu̱i rä Zi Dada Jeoba. Ora nuꞌu̱ yä zi jäꞌi bi da ngue̱nda ge rä Zi Dada Jeoba xa di mäkägihu̱ ꞌne rä hojäꞌi, geꞌä bi japäbi bi senti ndunthi rä mhäte po geꞌä. Por ejemplo, bi matsꞌi nuꞌu̱ yä zi jäꞌi pa bi ntiende ge rä Zi Dada Jeoba, ꞌñenä ngu nꞌa rä dada näꞌä umbäbi yä hogä tꞌo̱tꞌe yä zi bätsi (Mat. 7:​9-11). Zäi ge nuꞌu̱ yä jäꞌi xa bi johya mi yꞌo̱de hängu di mäkägihu̱ rä Zi Dada Jeoba, ngeꞌä ndunthi de geꞌu̱ hixki hñäni rä mhäte de yä dada. Rä Hesu ꞌnehe bi xipäbi ge rä Zi Dada Jeoba ꞌñenä nꞌa rä dada näꞌä ko ndunthi rä johya ꞌne rä nhuekäte, bi umbäbi nꞌa rä hogä ꞌñehe rä tꞌu̱, mäske nuni xki desidi dä bo̱ni de rä nguu ꞌne xki zitsꞌi nꞌa rä mꞌu̱i xä ntsꞌo. ¿Dä za gi imäjinä te bi senti nuꞌu̱ yä zi jäꞌi mi yꞌo̱de hängu di huegägihu̱ rä Zi Dada Jeoba ꞌne di punꞌgägihu̱? Zäi ge nuꞌu̱ yä jäꞌi bi ntiende xä ñho ge rä Zi Dada Jeoba xa di mäkägihu̱ (Luc. 15:​20-24).

8. ¿Hanja dä za gi fatsꞌi nꞌa rä zi jäꞌi pa dä te näꞌä rä mhäte di senti po rä Zi Dada Jeoba?

⁸ Nuꞌi ꞌnehe dä za gi fatsꞌi yä zi jäꞌi dä mädi rä Zi Dada Jeoba, mu̱ ora gi uti de rä Mäkä Tꞌofo gi fatsꞌi pa dä ntiende xä ñho tenguꞌä rä mꞌu̱i ꞌne hängu di mäkägihu̱. Fatsꞌi pa dä hyandi hanja näꞌä ja huadi bi bädi udi hängu di mäkägihu̱ rä Zi Dada Jeoba. Fatsꞌi näꞌä zi jäꞌi pa dä da ngue̱nda ge rä Zi Dada Jeoba bä pe̱hni rä Tꞌu̱ pa bi du po geꞌä ꞌnehe (Rom. 5:8; 1 Juan 4:10). Mu̱ näꞌä rä jäꞌi dä ntiende xä ñho ge rä Zi Dada Jeoba xa di mädi, geꞌä ma dä japäbi dä mädi ꞌnehe (Gál. 2:20).

9. ¿Te bi matsꞌi Michael pa bi ja yä mpadi ha rä mꞌu̱i ꞌne bi nxixtehe?

⁹ Ma gä handihu̱ te bi thogi nꞌa rä ku rä thuhu Michael de rä dähni Indonesia. Michael xki bädi de rä Zi Dada Jeoba nuꞌmu̱ mi bätsi pe himbi nxixtehe. Nuꞌmu̱ ya bi me̱ꞌtsi 18 nje̱ya, bi ma ha mä nꞌa rä dähni pa bi mpe̱fi. Mꞌe̱fa bi mengi ha Indonesia, bi nthäti ꞌne bi me̱ꞌtsi nꞌa rä zi tꞌu̱kä nxutsi. Pe Michael bi sigi bi mpe̱fi ha mä nꞌa rä dähni yabu̱ de rä familia. Ko rä tiempo rä ꞌme̱hñä ꞌne rä tꞌixu bi mu̱di bi nxadi rä Mäkä Tꞌofo ꞌne bi ja ndunthi yä mpadi ha yä mꞌu̱i. Nuꞌmu̱ bi du rä nänä Michael, bi desidi bi mengi ha rä nguu pa bi su rä dada ꞌne bi hñäni nꞌa rä ntꞌudi de rä Mäkä Tꞌofo. Nuꞌmu̱ bi tso̱ni ha rä lección 27 de rä mfistꞌofo ¡Johya pa nzäntho! habu̱ enä «Habu̱ dä za gi pädi mä nꞌa tu̱i», bi tso̱ni ha rä koraso näꞌä bi bädi. Michael xa bi nzoni ora bi imäjinä hängu rä u̱gi bi senti rä Zi Dada Jeoba ora bi hyandi hanja xa bi sufri rä Tꞌu̱. Pa dä ꞌñudi hängu mi jamädibi rä Zi Dada Jeoba po näꞌä xki me̱fi po geꞌä, Michael bi desidi bi ja yä mpadi ha rä mꞌu̱i ꞌne bi nxixtehe.

FATSꞌI PA DÄ HYANDI NDAꞌÄ MꞌE̱TꞌO MÄHYONI DÄ ME̱FI

10. ¿Hanja bi matsꞌi rä Hesu nuꞌu̱ yä de̱ni pa dä hyandi te mi debe dä me̱fi mꞌe̱tꞌo? (Lucas 5:​5-11; hyandi ꞌnehe rä kꞌoi).

¹⁰ Nuꞌu̱ yä mu̱di de̱ni rä Hesu mäntꞌä bi da ngue̱nda ge mi geꞌä rä Mesías, pe mi japäbi mꞌe̱di rä mfatsꞌi pa dä ntiende xä ñho ge dä predika, geꞌä mi debe dä me̱fi mꞌe̱tꞌo ha yä bida. Nuꞌmu̱ rä Hesu bi mbitabi Pedro ꞌne Andrés dä zopu̱ gatꞌho pa dä umbäbi mäxo̱ge de yä tiempo, nuyu̱ ya mi pe̱ꞌtsi nꞌa rä tiempo de mi de̱ni rä Hesu (Mat. 4:​18, 19). Pedro ꞌne Andrés xki nsosioui Santiago ꞌne Juan pa mi ju̱u̱ ꞌne mi pa yä peskado ꞌne xa mi pabi xä ñho (Mar. 1:​16-20). Nuꞌmu̱ rä Pedro ꞌne Andrés bi zopu̱ nuꞌu̱ yä ꞌme̱fi mi pe̱ꞌtsi, zäi ge nuꞌu̱ bi hyoni rä modo hanja nuꞌu̱ yä familia hinxä mꞌe̱päbi te xä zi ꞌne te xä hyee, mentä nuꞌu̱ mi de̱ni rä Hesu. ¿Te bi matsꞌi pa bi hyandi xä ñho te mi debe dä me̱fi mꞌe̱tꞌo? Rä mfistꞌofo Lucas pede ge rä Hesu bi ja nꞌa rä milagro pa bi matsꞌi nuꞌu̱ yä de̱ni dä hyandi ge rä Zi Dada Jeoba nunka ma xä hye̱gise̱ ꞌne ge nzäntho ma xä umbäbi näꞌä ma xä japäbi mꞌe̱di (hñeti Lucas 5:​5-11, TNM).

11. ¿Hanja dä za gi fatsꞌi nꞌa rä zi jäꞌi pa dä te näꞌä rä komfiansa pe̱ꞌtsuäbi rä Zi Dada Jeoba?

¹¹ Nuju̱ nunka ma dä za gä jahu̱ yä milagro, pe hää dä za gä fatsꞌihu̱ nꞌa rä zi jäꞌi pa dä me̱ꞌtsuäbi rä komfiansa rä Zi Dada Jeoba ge näꞌä nzäntho ma dä matsꞌi mu̱ dä me̱päbi. Xi nuꞌi, ¿gi beni hanja bi maxꞌäꞌi rä Zi Dada Jeoba nuꞌmu̱ gä fu̱di gä ntini ha yä mhuntsꞌi? Zäi ge mꞌe̱tꞌo bi ja mꞌe̱di gä ñäui ri patro pa gä xipäbi ge koꞌmu̱ ya ma xkä fu̱di gi ntini ha yä mhuntsꞌi; ya hingä ma xä za xkä kohi pa gi mpe̱fi demäs. Xipäbi näꞌä rä zi jäꞌi gi uti de rä Mäkä Tꞌofo hanja nuꞌmu̱ gä fu̱di gä ja yä mpadi ha ri bida, gä handi hanja rä Zi Dada Jeoba bi maxꞌäꞌi ꞌne geꞌä bi japäbi bi ze̱di ri komfiansa po geꞌä.

12. a) ¿Por hanja dä hogi gi mbitabi rꞌa nꞌañꞌo yä ku pa dä kompañäꞌi ora gi umbäbi rä ntꞌudi de rä Mäkä Tꞌofo nꞌa rä zi jäꞌi? b) ¿Te mä nꞌa dä hogi gi pe̱fi pa gi fatsꞌi dä da ngue̱nda ge xa mähyoni dä me̱päbi mꞌe̱tꞌo rä Zi Dada Jeoba?

¹² Näꞌä zi jäꞌi gi uti de rä Mäkä Tꞌofo ꞌnehe ma dä matsꞌi ndunthi mu̱ dä yꞌo̱de te xä me̱fi märꞌa yä zi ku pa xä logra xä me̱päbi mꞌe̱tꞌo rä Zi Dada Jeoba. Hänge, dä hogi gi mbitabi märꞌa yä zi ku dä kompañäꞌi ora gi tso̱ni näꞌä rä zi jäꞌi pa gi umbäbi rä ntꞌudi de rä Mäkä Tꞌofo. Mbitabi nuꞌu̱ yä zi ku dä mete näꞌä zi jäꞌi hanja bi bädi de rä Zi Dada Jeoba ꞌne te bi me̱fi pa bi logra bi da ngue̱nda ge xa mähyoni dä me̱päbi mꞌe̱tꞌo. ꞌNehe, ha rä mfistꞌofo ¡Johya pa nzäntho! habu̱ enä «Hanja dä maxꞌäꞌi rä Noya Äjuä» o habu̱ enä «Habu̱ dä za gi pädi mä nꞌa tu̱i» ehe yä bideo nuꞌu̱ ma dä matsꞌi ndunthi näꞌä zi jäꞌi. Hänge dä hogi gi ꞌueke rä tiempo pa gi hyandi nuya yä bideo kongeꞌä. Por ejemplo ora gi tso̱nihu̱ ha rä lección 37, dä hogi gi hyandihu̱ mähye̱gi nuꞌu̱ yä tsꞌofo ehe ha rä bideo Jeoba nunka ma dä hye̱gäse̱hu̱.

FATSꞌI DÄ BÄDI HANJA DÄ DÄPÄBI YÄ XUÑHA

13. ¿Te bi xipäbi rä Hesu ge mi debe dä me̱fi nuꞌu̱ yä de̱ni pa xä ñhandui yä ntꞌu̱tsate?

¹³ Ndunthi yä mꞌiki, rä Hesu bi xipäbi nuꞌu̱ yä de̱ni ge ma xä ꞌñepäbi ndunthi yä ntꞌu̱tsate, ꞌne ge asta yä familia ma xä u̱tsa (Mat. 5:11; 10:​22, 36). Änte de xä tho rä Hesu, bi xipäbi nuꞌu̱ yä de̱ni ge yä bida ma xä mꞌu̱i en peligro ꞌne ge rꞌa de geꞌu̱, ꞌnehe ma xä tho (Mat. 24:9; Juan 15:20; 16:2). ꞌNehe bi ꞌñembäbi ge pa xä sigi xä predika, xa mi debe dä nsu de yä peligro ꞌne ora xä hyandi ge yä jäꞌi xä nkue̱, nuꞌu̱ mi debe xä ma de gehni ꞌne hinxä gohi xä diskuti kongeꞌu̱.

14. ¿Hanja dä za gä fatsꞌihu̱ nꞌa rä zi jäꞌi pa dä ñhandui yä ntꞌu̱tsate? (2 Timoteo 3:12).

¹⁴ Ja ngu bi ja rä Hesu, nuju̱ ꞌnehe dä za gä fatsꞌihu̱ nuꞌu̱ yä zi jäꞌi di utihu̱ de rä Mäkä Tꞌofo hanja di debe dä ñhandui yä ntꞌu̱tsate. Dä za gä fatsꞌihu̱ pa dä bädi te dä me̱fi o te dä mää ora dä nkue̱ kongeꞌä yä amigo, yä familia o nuꞌu̱ yä jäꞌi habu̱ di mpe̱fi (hñeti 2 Timoteo 3:​12, TNM). Rä familia o märꞌa yä jäꞌi dä za dä deni o dä u̱tsa ora dä hyandi ge di ja yä mpadi ha rä mꞌu̱i. Hänge ora nꞌa rä zi jäꞌi dä mu̱di dä nxadi rä Mäkä Tꞌofo kongeꞌi, dä hogi ge mäntꞌä dä za gi xipäbi ge dä za dä ꞌñepäbi yä ntꞌu̱tsate, pa ora dä thogi njabu̱, näꞌä ma bädi te dä me̱fi o te dä dädi.

15. Mu̱ näꞌä zi jäꞌi toꞌo di utihu̱ de rä Mäkä Tꞌofo di tꞌu̱tsa ha rä familia, ¿te dä za gä pe̱fihu̱ pa gä fatsꞌihu̱?

¹⁵ Rꞌabu̱ näꞌä zi jäꞌi di utihu̱ de rä Mäkä Tꞌofo, dä za dä thogi yä ntꞌu̱tsate ha rä familia. Ora thogi njabu̱, dä za gä fatsꞌihu̱ näꞌä zi jäꞌi pa dä hyandi por hanja di tꞌu̱tsa. Pa geꞌä, dä hogi gä fatsꞌihu̱ dä hyandi mu̱ rä familia di nkue̱ kongeꞌä ngeꞌä nuꞌu̱ huyämu̱i ge di hatꞌihu̱ o ngeꞌä di u̱tsa yä testigo rä Jeoba. Asta rä Hesu bi thogi njabu̱ ꞌnehe nuꞌmu̱ bi mꞌu̱kua ha rä Xiꞌmhai. Rꞌabu̱ rꞌa de nuꞌu̱ yä familia bi ꞌñembäbi ge xki ꞌme̱di rä mfeni (Mar. 3:21; Juan 7:5). Dä hogi gä fatsꞌihu̱ näꞌä zi jäꞌi dä bädi dä me̱ꞌtsi rä pasensia. ꞌNehe, dä hogi gä utihu̱ hanja dä ñä ko rä tꞌekꞌei ꞌne rä mhäte ora xipäbi märꞌaa ꞌne rä familia näꞌä kamfri.

16. ¿Hanja dä za gä fatsꞌihu̱ nꞌa rä zi jäꞌi pa dä bädi hanja dä esplikabi rä familia näꞌä yꞌo ri bädi?

¹⁶ Rꞌabu̱ rä familia näꞌä zi jäꞌi di utihu̱ de rä Mäkä Tꞌofo, dä za dä yꞌambäbi te di utihu̱. Hänge, mähyoni gä xipäbihu̱ ge mu̱ ma dä esplikabi näꞌä yꞌo ri bädi de rä Mäkä Tꞌofo, dä hogi dä xipäbi ho̱nse̱ nꞌa zi tu̱i pa njabu̱ nuꞌu̱ hindä mfada ꞌne mä nꞌa rä pa nuꞌu̱ dä ne dä bädi mä nꞌa tu̱i (Col. 4:6). ꞌNehe dä hogi dä xipäbi rä familia ge dä za dä dini mä nꞌa tu̱i rä imformäsio ha jw.org. Njabu̱, nuꞌu̱ dä za dä yu̱tꞌi ha nunä página ora go dä ne pa dä hyoni mä nꞌa tu̱i rä imformäsio de näꞌä kamfri yä testigo rä Jeoba.

17. ¿Hanja dä za gi fatsꞌi näꞌä zi jäꞌi gi uti de rä Mäkä Tꞌofo pa dä bädi dä dädi xä ñho ora te sipäbi o te tꞌambäbi? (Hyandi ꞌnehe rä kꞌoi).

¹⁷ Ha jw.org ehe ndunthi rä imformäsio habu̱ enä «Näꞌä di ñꞌani yä jäꞌi de yä testigo rä Jeoba». Hänge dä hogi gi ꞌueke rä tiempo pa gi ꞌñuti näꞌä zi jäꞌi hanja dä usa nunä imformäsio pa dä dädi nuꞌu̱ yä ntꞌani tꞌo̱ꞌtuäbi (2 Tim. 2:​24, 25). Beni ge nuꞌmu̱ huadi kada nꞌa de nuꞌu̱ lección de rä mfistꞌofo ¡Johya pa nzäntho!, dä za gä handihu̱ habu̱ enä «Rꞌa yä jäꞌi enä». Nsayahu̱ mähye̱gi ko näꞌä zi jäꞌi gi uti de rä Mäkä Tꞌofo, pa dä bädi hanja dä dädi ora te sipäbi o te tꞌambäbi. Mu̱ gi pe̱fihu̱ njabu̱, gi nuhmä ge geꞌä ma dä umbäbi rä balo näꞌä zi jäꞌi pa dä defende näꞌä yꞌo ri bädi de rä Mäkä Tꞌofo.

18. ¿Hanja dä za gi fatsꞌi näꞌä zi jäꞌi pa dä desidi dä bo̱ni dä predika ko rä mhuntsꞌi? (Mateo 10:27).

¹⁸ Rä Hesu bi ꞌñembäbi nuꞌu̱ yä apostol ge xä ꞌñuti gatꞌho yä jäꞌi nuꞌu̱ yä hogä notisia de rä Tsꞌu̱tꞌhui Äjuä (hñeti Mateo 10:27).b Hänge mu̱ gi fatsꞌi näꞌä zi jäꞌi gi uti de rä Mäkä Tꞌofo pa dä bädi hanja dä xipäbi märꞌaa näꞌä yꞌo ri bädi; näꞌä ma dä hyandi hanja rä Zi Dada Jeoba fatsꞌi ꞌne geꞌä ma dä japäbi dä te näꞌä rä komfiansa pe̱ꞌtsuäbi. Pe, ¿xi hanja dä za gi fatsꞌi näꞌä zi jäꞌi pa dä desidi dä bo̱ni dä predika ko rä mhuntsꞌi? Ora ha rä mhuntsꞌi drä anunsia ge ma dä mu̱di dä tꞌumbäbi yä imbitasio gatꞌho yä jäꞌi pa dä ntini ha rä Fenäte de rä du rä Hesu o pa dä ntini ha rä däta mhuntsꞌi, gehnä rä oportunida gi pe̱ꞌtsi pa gi xipäbi näꞌä zi jäꞌi te mä rekisito tꞌadi pa dä za dä mu̱di dä predika ꞌnehe. Xipäbi ge ora tꞌuni nuya yä imbitasio, mänꞌa hingi hei toꞌo dä mu̱di dä predika. ꞌNehe xipäbi ge mu̱ dä mu̱di dä thogi pa dä uni yä thoꞌtsi ha näꞌä rä mhuntsꞌi ja de gä semänä, geꞌä ma dä matsꞌi ndunthi pa dä bädi hanja dä xipäbi märꞌaa näꞌä xä bädi de rä Mäkä Tꞌofo.

JAPÄBI DÄ SENTI NÄꞌÄ JÄꞌI GE HÄÄ MÄ DÄ ZA DÄ ME̱PÄBI RÄ ZI DADA JEOBA

19. ¿Hanja bi ꞌñudi rä Hesu ge mi pe̱ꞌtsuäbi rä komfiansa nuꞌu̱ yä apostol, ꞌne hanja dä za gä de̱mbäbihu̱ rä ejemplo?

¹⁹ Änte de xä du rä Hesu ꞌne xä mengi ha mähetsꞌi, bi ꞌñembäbi nuꞌu̱ yä apostol: «Nuga ma gä ma pa gä hokꞌähu̱ ha gi ꞌmu̱hu̱». Pe nuꞌu̱ yä apostol himbi ntiende ge rä Hesu bi mꞌe̱tꞌo pa dä do̱ꞌmiꞌu̱ ha mähetsꞌi. Mäske rä Hesu bi hyandi ge nuꞌu̱ yä apostol himbi ntiende gatꞌho näꞌä bi ꞌñuti, näꞌä mi pädi xä ñho ge nuꞌu̱ xa mi ne dä me̱päbi rä Zi Dada Jeoba (Juan 14:​1-5, 8). Rä Hesu mi pädi xä ñho ge nuꞌu̱ yä apostol mi japäbi mꞌe̱di mä nꞌa tu̱i rä tiempo pa dä ntiende gatꞌho näꞌä xki ꞌñuti, ngu näꞌä rä humu̱i mi pe̱ꞌtsi de dä ma ha mähetsꞌi (Juan 16:12). ¿Te dä za gä pädihu̱ de rä Hesu? Nuju̱ ꞌnehe xa mähyoni gä japäbihu̱ dä senti ge di pe̱ꞌtsuäbihu̱ rä komfiansa näꞌä zi jäꞌi di utihu̱ de rä Mäkä Tꞌofo ꞌne ge hinte mä duda di pe̱ꞌtsihu̱ ge näꞌä xa ne dä me̱fi näꞌä di ho rä Zi Dada Jeoba.

20. ¿Hanja bi ꞌñudi rä zi nju Chifundo ge mi pe̱ꞌtsuäbi rä komfiansa näꞌä nxutsi mi uti de rä Mäkä Tꞌofo?

²⁰ Xa mähyoni gä pe̱ꞌtsuäbihu̱ rä komfiansa näꞌä zi jäꞌi ge hää ne dä me̱fi näꞌä di mända rä Zi Dada Jeoba. Nꞌa rä zi nju rä thuhu Chifundo näꞌä bi ꞌmu̱i ha rä dähni Malaui, pede ge bi mu̱di bi ꞌñuti de rä Mäkä Tꞌofo nꞌa rä nxutsi rä thuhu Alinafe. Nunä nxutsi mrä católica. Nuꞌmu̱ ya bi tso̱ni ha rä lección 14 de rä mfistꞌofo ¡Johya pa nzäntho!, rä zi nju Chifundo bi yꞌambäbi näꞌä nxutsi te mi mbeni de nuꞌu̱ yä imagen di xo̱kämbeni yä jäꞌi. Näꞌä nxutsi xa bi nkue̱ ꞌne bi ꞌñenä: «¡Nuga go ma gä desidi mu̱ di ne gä xo̱kämbeni yä imagen o hinä!». ¿Te bi me̱fi rä zi nju Chifundo? ¿Ma xä sigi xä umbäbi rä ntꞌudi de rä Mäkä Tꞌofo näꞌä nxutsi o ya hinä? Rä zi nju Chifundo bi me̱ꞌtsuäbi rä komfiansa näꞌä nxutsi ge nꞌa rä pa, ma xä ntiende te di mbeni rä Zi Dada Jeoba de yä imagen. Mi thogi rꞌa yä zänä, nuꞌmu̱ ya bi tso̱ni ha rä lección 34, bi yꞌo̱tuäbi nunä ntꞌani ehe ha nunä lección habu̱ enä «¿Te mä benefisio xkä häni de gi nxadi rä Biblia ꞌne gi pädi toꞌo rä Zi Dada Jeoba?». Rä zi nju Chifundo pede ge xa bi johya nuꞌmu̱ bi yꞌo̱de hanja näꞌä rä zi nxutsi, bi mää yä noya xa mähotho ꞌne bi ꞌñenä ge xki hyandi ge yä testigo rä Jeoba, hingi pe̱fi nuꞌu̱ yä tꞌo̱tꞌe di proibi rä Mäkä Tꞌofo. Himbi thogi ndunthi rä tiempo, nunä nxutsi ya himbi xo̱kämbeni yä imagen ꞌne bi desidi bi nxixtehe.

21. ¿Te dä za gä pe̱fihu̱ pa gä fatsꞌihu̱ nꞌa rä zi jäꞌi dä tomä rä desision de dä me̱päbi rä Zi Dada Jeoba?

²¹ Di pädihu̱ xä ñho ge rä Zi Dada Jeoba go geꞌä japäbi dä te rä jamfri nꞌa rä jäꞌi. Pe nuju̱ dä za gä mfaxtehu̱ pa gä fatsꞌihu̱ näꞌä zi jäꞌi dä ne dä me̱päbi (1 Cor. 3:7). Hingä ho̱nse̱ ma gä utihu̱ te adi rä Zi Dada Jeoba de geꞌä, sino ke ꞌnehe ma gä fatsꞌihu̱ pa dä motꞌi nꞌa rä dängä mhäte po geꞌä. ꞌNehe, de gatꞌho näꞌä te pe̱fi, ma gä fatsꞌihu̱ pa dä hyandi ndaꞌä mꞌe̱tꞌo xa mähyoni dä me̱fi pa njabu̱ dä ꞌñudi hängu di mädi rä Zi Dada Jeoba. Ma gä utihu̱ näꞌä rä zi jäꞌi pa dä me̱ꞌtsuäbi ndunthi rä komfiansa rä Zi Dada Jeoba hindi porta te mä xuñha dä thogi. Ora di japäbihu̱ näꞌä zi jäꞌi dä senti ge di pe̱ꞌtsuäbihu̱ ndunthi rä komfiansa ge ma dä logra dä me̱fi näꞌä xä ñho, geꞌä xa ma dä nupäbi rä mfeni pa hindä duda dä me̱päbi rä Zi Dada Jeoba.