Comstock Images/Stockbyte via Getty Images
¡ÑHOKI ꞌNE NDO̱ꞌMIHU̱!
¿Toꞌo ma gi huahni ngu ri gobernante? | ¿Te udi rä Biblia?
Yä jäꞌi pe̱ꞌtsi te dä huahni toꞌo ma dä hñutsꞌi ngu yä gobernante.
¿Te udi rä Mäkä Tꞌofo de yä botasio?
Yä gobiernu de nuua ha rä xiꞌmhai ꞌmu̱i po nꞌa tiempotho
Rä Mäkä Tꞌofo xikägihu̱ te mä tꞌo̱tꞌe hingi tsa dä me̱fi yä gobiernu de gekua ha rä xiꞌmhai.
«Ogi huxu̱ ri komfiansahu̱ ha nuꞌu̱ yä jäꞌi di mändaꞌihu̱, ninꞌa rä mexiꞌmhai, ngeꞌä nuꞌu̱ hindä za dä salbaꞌihu̱. Po̱ni rä hñä, ꞌne näꞌä rä jäꞌi pengi ha rä fonthai; näꞌä rä paꞌä ja huahnitho yä mfeni» (Salmo 146:3, 4, rä nota).
Gatꞌho nuꞌu̱ yä gobernante jaua ha rä xiꞌmhai ma dä uadi dä du. ꞌNe mäske xi xä yꞌo̱tꞌe ntsꞌe̱di po dä matsꞌi yä jäꞌi, hingi tsa dä ꞌñenä ge näꞌä ma nꞌa rä gobernante ma dä gohi ha rä luga ma dä me̱fi njabu̱ ꞌnehe o ge ma dä sigi ko nuꞌu̱ yä ꞌme̱fi himbi za bi huati (Eclesiastés 2:18, 19).
Rä Mäkä Tꞌofo udi ge Äjuä himbi hyogägihu̱ pa gä mändase̱hu̱.
«Nꞌa rä jäꞌi näꞌä yꞌo, hingo ri ꞌñepäbi dä yꞌe̱nse̱ yä paso» (Jeremías 10:23).
¿ꞌMu̱i nꞌa rä gobernante näꞌä hää dä za dä goberna xä ñho yä mexiꞌmhai?
Näꞌä rä Gobernante pe̱ꞌspäbi rä jäpi Äjuä
Rä Mäkä Tꞌofo udi ge rä Zi Dada Jeoba xä hñutsꞌi nꞌa rä Gobernante näꞌä hää dä za dä mändagihu̱ xä ñho: geꞌä rä Ñhesukristo (Salmo 2:6). Rä Hesu geꞌä rä rey de rä Tsꞌu̱tꞌhui Äjuä, ꞌne näꞌä ya bi mända dende mähetsꞌi (Mateo 6:10).
Xi nuꞌi, ¿ma gi huahni rä Hesu ngu ri gobernante? Änte de gi ju̱ nꞌa rä desision, hyandi te mä raso uni rä Mäkä Tꞌofo:
«Nsundahu̱ rä Tꞌu̱ [Ñhesukristo]; nuꞌmu̱ hinä, Äjuä ma dä bo̱ rä kue̱ ꞌne nuꞌähu̱ ma gi tuhu̱ ha rä ꞌñuu, ngeꞌä näꞌä dämä po̱ rä kue̱. ¡Xi ma dä johya nuꞌu̱ toꞌo di joni kongeꞌä pa dä ntaki! (Salmo 2:12).
Nubye̱ gehnä rä tiempo pa gi desidi te mä gi pe̱fi, ngeꞌä ja ngu udi nuꞌu̱ yä profecía de rä Mäkä Tꞌofo, rä Hesu ya bi hudi de gä Rey ha mähetsꞌi dende rä je̱ya 1914. ꞌNe mänꞌitꞌho, rä Hesu, ngu rä rey de rä Gobiernu Äjuä; ma dä huati gatꞌho nuꞌu̱ yä gobiernu ja mäpaya (Daniel 2:44).
Mu̱ gi ne gi pädi hanja dä za gi apoya rä Hesu ngu ri rey, hyandi nunä artikulo rä thuhu «Apoyemos ahora el Reino de Dios».