¿Te ma dä me̱fi rä Gobiernu Äjuä ko nuꞌu̱ yä hyate gobiernu?

Yä jäꞌi honi nꞌa rä gobiernu näꞌä dä za dä me̱ꞌspäbi rä komfiansa; ngeꞌä gatꞌho nuꞌu̱ yä gobiernu xä me̱ꞌtsi nzäntho xä hyatꞌi. Ha rä je̱ya 2023, bi bo̱ni nꞌa rä imforme habu̱ mi mää ge yä jäꞌi de gatꞌho rä xiꞌmhai ya hingi pe̱ꞌspäbi rä komfiansa yä gobiernu.a

Rä Biblia ñä de nꞌa rä gobiernu ꞌne nꞌa rä Ndä näꞌä hingi hate ꞌne nzäntho o̱tꞌe rä justisia. Näꞌä geꞌä rä Gobiernu Äjuä ꞌne näꞌä rä Ndä go geꞌä Ñhesukristo (Isaías 9:7).

Di pädihu̱ njabu̱, ngeꞌä nuꞌmu̱ rä Hesu bi mꞌu̱kua ha rä xiꞌmhai nzäntho bi durämu̱i ꞌne bi hueki yä zi jäꞌi (Mateo 9:35, 36). ꞌNe ngu rä Ndä de rä Gobiernu Äjuä, mänꞌitꞌho ma dä hä rä justisia ꞌne rä paz pa gatꞌho nuꞌu̱ toꞌo dä yꞌo̱te (Salmo 72:12-14).