Pa hingi sentise̱, fatsꞌi märꞌaa | ¿Te udi rä Biblia?

Po gatꞌho rä xiꞌmhai, ndunthi yä jäꞌi di sentise̱ ꞌne otho yä amigo. Rꞌa yä mediko enä ge pa hingi sentise̱, mähyoni gi hyandi te dä za gi pe̱fi pa gi fatsꞌi märꞌaa.

•  «Mu̱ gi fatsꞌi märꞌaa, ma dä maxꞌäꞌi gi senti xä ñho kongeꞌise̱ ꞌne njabu̱ ya hingi senti ge gi ꞌmu̱se̱» (Institutos Nacionales de la Salud, de Estados Unidos).

Rä Noya Äjuä xikägihu̱ te dä za gä pe̱fihu̱ pa gä fatsꞌihu̱ märꞌaa. Mu̱ gä o̱thu̱ ntsꞌe̱di po gä pe̱fihu̱, ma dä maxkägihu̱ pa hingä sentise̱hu̱.

Näꞌä dä za gi pe̱fi

ꞌÑudi rä ñhojäꞌi po märꞌaa. Umbäbi märꞌaa näꞌä gi pe̱ꞌtsi, ngu ri tiempo ꞌne ri tsꞌe̱di. Hyoni yä oportunida pa gi kombibi ko märꞌaa. Mu̱ gi ꞌñudi rä ñhojäꞌi ko märꞌaa, ma gi tini yä hogä amigo ꞌne nuꞌu̱ ꞌnehe ma dä maxꞌäꞌi ora go gi honi rä mfatsꞌi.

•  Näꞌä udi rä Mäkä Tꞌofo: «Nzäi gi unihu̱ de näꞌä gi pe̱ꞌtsihu̱ pa njabu̱ märꞌa yä jäꞌi ma dä rꞌaꞌähu̱ ꞌnehe» (Lucas 6:38).

Hyoni te gi pe̱fi po märꞌaa. Hyoni hanja dä za gi fatsꞌi nuꞌu̱ yä zi jäꞌi thogi yä xuñha. Dä za gi dedikabi rä tiempo pa gi yꞌo̱de te mbeni ꞌne te senti, ꞌne yꞌambäbi te dä za gi pe̱fi po geꞌu̱ pa dä ñhandui nuꞌu̱ yä xuñha pe̱ꞌtsi.

•  Näꞌä udi rä Mäkä Tꞌofo: «Nꞌa rä hogä amigo nzäntho ma dä mäꞌi» (Proverbios 17:17).

Mu̱ gi ne gi pädi hanja dä za gi tini yä hogä amigo, hyandi rä artículo «La familia y los amigos».