¿Por hanja hindi usahe rä ponza?

Ndunthi yä jäꞌi mbeni ge rä ponza, geꞌä nꞌa rä simbolo de yä relijion yä kristianu. Mäske yä testigo rä Jeoba drä kristianuhe, hindi usahe rä ponza nixi hindi ndänehe, ¿por hanja hinä?

Rä Mäkä Tꞌofo hingi udi ge rä Hesu bi du ha nꞌa rä ponza, udi ge bi du ha nꞌa rä zaa näꞌä xmä njuänitho. ꞌNehe, ha rä Mäkä Tꞌofo ehe nunä mhända pa yä kristianu: «Ogri nsundahu̱ yä kꞌoi. ꞌUegehu̱ de nuꞌä rä nzäiꞌä». Nunä mhända ne dä mää ge hingi debe gä usahe rä ponza, pa gä xo̱kämbenihe Äjuä (1 Corintios 10:14; 1 Juan 5:​21).

Rä Hesu bi mää hanja ma xä nheki nuꞌu̱ xä mäjuäni yä kristianu nuꞌmu̱ bi ꞌñenä: «Mu̱ gi mädihu̱ nꞌa ngu mänꞌaa, nuꞌmu̱ njabu̱ dä bädi gatꞌho yä jäꞌi ge mäjuäni mä nxadiꞌihu̱» (Juan 13:34, 35). Hänge di nheki toꞌo xä mäjuäni yä kristianu po näꞌä rä mhäte udi po märꞌaa, hingä po di usa rä ponza o märꞌa yä imagen.