Yä misionero tso̱ni «asta ha nuꞌu̱ yä luga bi kohi ha rä ñäni rä Xiꞌmhai»

Rä Hesu bi mändabi yä de̱ni: «Nuꞌähu̱ ma gi ntestigohu̱ de gekägi [...] asta ha nuꞌu̱ yä luga bi kohi ha rä ñäni rä Xiꞌmhai» (Hechos 1:8). Yä testigo rä Jeoba o̱tꞌe ntsꞌe̱di po dä ꞌñuti de Äjuä nuꞌu̱ yä jäꞌi de gatꞌho rä Xiꞌmhai. Mäske rꞌabu̱ di japäbi xä ñhei ngeꞌä rꞌa yä luga bi kohi xa yabu̱ o ꞌmu̱i xä ndunthi yä jäꞌi, pe tsꞌu̱tho nuꞌu̱ toꞌo di predika (Mateo 9:37, 38). ¿Te di pe̱fihe pa gä fatsꞌihe nuꞌu̱ yä jäꞌiꞌu̱?

Rä Comité de Servicio de rä Cuerpo Gobernante de yä Testigo rä Jeoba, pe̱hni yä misionero ha gatꞌho rä ngu̱ni rä Xiꞌmhai. Mäpaya ꞌmu̱i 3.090 nuꞌu̱ yä misionero uni rä mfatsꞌi.a Kasi gatꞌhoyu̱ xä ma ha nꞌa rä ngunsadi, por ejemplo ha rä Ngunsadi pa yä Evangelizador de rä Tsꞌu̱tꞌhui Äjuä. Nuꞌu̱ xä zopu̱ yä nguu pa dä ma dä uni rä mfatsꞌi habu̱ mänꞌa bi ja mꞌe̱di toꞌo dä predika. Ko näꞌä rä mfädi ꞌne näꞌä rä capacitación xä tꞌumbäbi, nuyu̱ dä za dä umbäbi ndunthi rä mfatsꞌi nuꞌu̱ ja yä zi jäꞌi ja fu̱di dä me̱päbi Äjuä.

Ma gä fatsꞌihu̱ yä misionero pa dä matsꞌi märꞌaa

Ha kada nꞌa rä ngu Betel rä Sección Ministros en el Campo de rä Departamento de Servicio di mpe̱fi mähye̱gi ko rä Comité de rä ngu Betel pa umbäbi näꞌä rä mfatsꞌi di japäbi mꞌe̱di yä misionero. Nuyu̱ fatsꞌi pa dä hyoni habu̱ dä mꞌu̱i, di supäbi yä nzaki, ꞌne di umbäbi nꞌa tu̱i rä bojä pa näꞌä te di japäbi mꞌe̱di. Ha rä je̱ya de gä servicio 2020 yä testigo rä Jeoba bi gasta 27 yä miyon yä dolar pa bi matsꞌi yä misionero. Njabu̱ nuꞌu̱ bi za bi usa yä tsꞌe̱di pa bi ungä ntꞌo̱de de rä Noya Äjuä ꞌne pa bi nupäbi yä mfeni yä ku de yä mhuntsꞌi.

¿Hanja faxte yä misionero? Frank Madsen nꞌa rä ku faxte ha rä Comité de Sucursal ha Malaui enä: «Nuꞌu̱ yä misionero fatsꞌi yä ku de rä mhuntsꞌi pa dä predikabi asta nuꞌu̱ yä jäꞌi hinte ne dä bädi de Äjuä. ꞌNehe o̱tꞌe ntsꞌe̱di po dä bädi de nuꞌu̱ yä nzäi ꞌne nuꞌu̱ yä idioma ñä yä jäꞌi. Njabu̱ nuꞌu̱ uni nꞌa rä hogä ejemplo, pa njabu̱ yä bäsjäꞌi dä ne dä me̱päbi Äjuä. Hängu di jamädibihe Jeoba po näꞌä rä mfatsꞌi uni yä misionero».

Nꞌa rä ku faxte ha rä comité de rä ngu Betel ha mä nꞌa rä dähni enä: «Nuꞌu̱ yä misionero xä ꞌñudi änte märꞌaa ge gatꞌho yä ku di ntsitsꞌi xä ñho, mäske habu̱räza yä mengu. Asta nuꞌu̱ hingä yä testigo rä Jeoba di da ngue̱nda ge hinte mä nzäi, nixi hinte mä idioma di ꞌuegägihu̱. Näꞌä udi rä Mäkä Tꞌofo geꞌä japi gä ntsitsꞌihu̱ xä ñho ko ngatꞌho mä kuhu̱ de gatꞌho rä Xiꞌmhai».

¿Te mä mfatsꞌi uni yä misionero? Paulo de rä Timor Oriental xa di jamädi ndunthi po näꞌä rä mfatsꞌi uniꞌu̱. Näꞌä enä: «Nuua xi xä pa rä hyadi ꞌne mäske rꞌa de nuꞌu̱ yä ku xpi ꞌñehe de nuꞌu̱ yä luga habu̱ xä tse̱, hingä po rängeꞌä hopäbi ge rä hyadi dä hñäkuäbi de dä predika. Nuꞌu̱ di ntini ha nuꞌu̱ yä mhuntsꞌi pa gä po̱ni gä predikahe de di xudi, ꞌnehe rꞌabu̱ kohi asta hñuxadi pa o̱tꞌe yä rebisita. Pe ꞌnehe po̱ni di predika de di ndee. Nuꞌu̱ xä matsꞌi xa ndunthi yä jäꞌi pa dä bädi de Äjuä, ꞌne asta nuga bi maxkägi. Nuꞌu̱ di usa yä te pa dä me̱päbi Äjuä ko ndunthi rä johya ꞌne njabu̱ di nupäbi yä mfeni gatꞌho yä ku de rä mhuntsꞌi».

Nꞌa rä nju rä thuhu Ketti, näꞌä pe̱päbi Äjuä de gä precursora regular ha Malaui, pede te mä mfatsꞌi xä hñäni de yä misionero. Näꞌä enä: «Nuꞌmu̱ bi zo̱ho̱ yä misionero ha rä mhuntsꞌi, de mä familia se̱he̱ nuga ndi pe̱päbi Äjuä. Pe nuꞌu̱ bi maxkägi ndunthi ꞌne bi zo̱ho̱ bi me̱ꞌtsi nꞌa rä hogä ntsitsꞌi ko mä familia. ꞌNehe bi matsꞌi ndunthi mä zi bätsi, nuꞌu̱ bi da ngue̱nda ge gä pe̱päbihu̱ Jeoba geꞌä xa mäjuäni uni rä johya. Nubye̱, nuꞌu̱ hñuu mä tꞌixu pe̱päbi rä Zi Dada Jeoba de gä precursora regular. ꞌNe asta mä däme ya bi mu̱di bi ntini ha yä mhuntsꞌi».

¿Habu̱ po̱ni näꞌä rä bojä tꞌumbäbi nuꞌu̱ yä misionero? De nuꞌu̱ yä donäsio di tꞌo̱tꞌe pa mä mäkä ꞌme̱fihu̱. Ndunthi de gehya di tꞌuni po mäde de donate.jw.org. ¡Xa di jamädihe po gatꞌho nuꞌu̱ yä donäsio gi unihu̱!