Rä Reino Äjuä geꞌä rä mensaje hutsꞌi po mäxo̱ge rä Mäkä Tꞌofo. Rä Zi Dada Jeoba ma dä usa näꞌä rä Reino pa dä hyoki nꞌa rä Paraiso ha rä Xiꞌmhai ja ngu mi ne dende ri mu̱di. Pe, ¿te me̱ꞌä näꞌä rä Reino Äjuä? ¿Hanja di pädihu̱ ge rä Reino Äjuä ya di mända? ¿Te ya xä me̱fi näꞌä rä Reino Äjuä ꞌne te ma dä me̱fi xudi ndämäni? Ha nunä lección ꞌne nuꞌu̱ mä yoho xä ꞌñepu̱ ma dä dädi nuya yä ntꞌani.

1. ¿Te me̱ꞌä rä Reino Äjuä ꞌne toꞌo näꞌä rä Rey?

Rä Reino Äjuä geꞌä nꞌa rä Tsꞌu̱tꞌhui o Gobiernu xä hñutsꞌi rä Zi Dada Jeoba, ꞌne xä huahni rä Hesu ngu rä Rey pa dä mända dende mähetsꞌi (Mateo 4:17, TNM; Juan 18:36, TNM). Rä Biblia enä ge rä Hesu «ma dä mända pa nzäntho ngu nꞌa rä Rey» (Lucas 1:32, 33, TNM). Hää, rä Hesu ya bi mända ha mähetsꞌi ꞌne mänꞌitꞌho ma dä mända gatꞌho rä Xiꞌmhai.

2. ¿Toꞌo nuꞌu̱ ma dä mända ko rä Hesu?

Rä Biblia udi ge ꞌmu̱i märꞌa yä jäꞌi nuꞌu̱ ma dä nrey ꞌne ma dä mända ko rä Hesu. Rä Zi Dada Jeoba xä huahni «yä jäꞌi de gatꞌho yä luga, yä idioma, yä pueblo ꞌne yä hnini [...]. ꞌNe nuꞌu̱ ma dä mända ha rä xiꞌmhai» (Apocalipsis 5:9, 10, TNM). ¿Hängu nuꞌu̱ yä jäꞌi ma dä mända ko Ñhesukristo ha mähetsꞌi? Mäske yä miyontho nuꞌu̱ yä jäꞌi xä me̱fi näꞌä bi mända rä Hesu, ho̱nse̱ 144.000 nuꞌu̱ yä jäꞌi ma dä ma ha mähetsꞌi pa dä mända kongeꞌä (hñeti Apocalipsis 14:1-4, TNM). Gatꞌho nuꞌu̱ märꞌa yä jäꞌi xä de̱mbäbi rä mꞌu̱i Ñhesukristo ꞌne xä me̱päbi rä Zi Dada Jeoba, nuꞌu̱ ma dä mꞌu̱i nuua ha rä Xiꞌmhai ngu yä siudadano de näꞌä rä Gobiernu Äjuä (Salmo 37:29).

3. ¿Por hanja rä Gobiernu Äjuä mänꞌa xä ñho ke nuꞌu̱ yä gobiernu di mända mäpaya ha rä Xiꞌmhai?

Mäske ꞌmu̱i rꞌa yä gobiernu o presidente nuꞌu̱ o̱tꞌe ntsꞌe̱di po dä me̱fi yä hogä tꞌo̱tꞌe, pe nuꞌu̱ hingi pe̱ꞌtsi rä tsꞌe̱di pa dä me̱fi gatꞌho näꞌä dä nehmä. ꞌNe koꞌmu̱ njatꞌä di mponi yä gobiernu, rꞌabu̱ go hudi nuꞌu̱ hingi tuyämu̱i po dä matsꞌi yä jäꞌi. Pe Ñhesukristo näꞌä rä Rey de rä Gobiernu Äjuä, hinto ma dä hñämbäbi rä puesto. Rä Biblia enä: «Rä Zi Dada de mähetsꞌi ma dä hñutsꞌi nꞌa rä gobiernu näꞌä hinto ma dä destrui» (Daniel 2:44). Ñhesukristo ma dä mända gatꞌho rä Xiꞌmhai ꞌne ma dä matsꞌi gatꞌho yä jäꞌi. Koꞌmu̱ näꞌä xa rä hojäꞌi ꞌne di mäkägihu̱, ꞌnehe ma dä ꞌñuti yä jäꞌi dä mädi nꞌa ngu mänꞌaa, dä ꞌñudi rä ñhojäꞌi, rä tꞌekꞌei ꞌne rä justisia (hñeti Isaías 11:9).

4. Rä Tsꞌu̱tꞌhui Äjuä mänꞌa xä ñho ke nuꞌu̱ yä gobiernu de nunä Xiꞌmhai

Ñhesukristo mänꞌa pe̱ꞌtsi ndunthi rä tsꞌe̱di ꞌne rä autorida pa dä mända ha rä Xiꞌmhai ke gatꞌho nuꞌu̱ yä gobernante xä mꞌu̱i. Hñetihu̱ Mateo 28:18, ꞌnepu̱ thädihu̱ nunä rä ntꞌani:

• ¿Por hanja näꞌä rä autorida pe̱ꞌtsi yä gobiernu nunka ma dä ñhe̱hui ko näꞌä rä tsꞌe̱di ꞌne rä autorida pe̱ꞌtsi Ñhesukristo?

Mäpaya, nuꞌu̱ yä gobiernu o yä presidente, njatꞌä di mponi ꞌne ho̱nse̱ di mända ha nꞌa xe̱ni rä luga de rä Xiꞌmhai. Pe, ¿te dä za gä mäñhu̱ de rä Tsꞌu̱tꞌhui Äjuä? Hñetihu̱ Daniel 7:14, ꞌnepu̱ thädihu̱ nuya yä ntꞌani:

• Koꞌmu̱ rä Gobiernu Äjuä «hinto ma dä destrui», ¿te mä benefisio ma dä nja?

• Koꞌmu̱ rä Gobiernu Äjuä ma dä mända gatꞌho rä Xiꞌmhai ꞌne hingä ho̱nse̱ nꞌadä rä hnini, ¿te mä benefisio ma dä nja?

5. Ma dä thäki gatꞌho nuꞌu̱ yä gobiernu yä jäꞌi

¿Por hanja ya xa di ja mꞌe̱di ge rä Gobiernu Äjuä dä hñäki gatꞌho nuꞌu̱ yä gobiernu ꞌmu̱kua ha rä Xiꞌmhai? Yꞌe̱ntsꞌihu̱ rä BIDEO, ꞌnepu̱ thädihu̱ nunä rä ntꞌani:

RÄ BIDEO: Nꞌa xe̱ni de rä bideo: ¿Te me̱ꞌä rä Tsꞌu̱tꞌhui Äjuä? (1:41)

• ¿Te xä me̱fi gatꞌho nuꞌu̱ yä gobiernu xä mända ha rä Xiꞌmhai?

Hñetihu̱ Eclesiastés 8:9, ꞌnepu̱ thädihu̱ nuya yä ntꞌani:

• ¿Gi kamfri ge rä Gobiernu Äjuä debe dä hñäki gatꞌho nuꞌu̱ yä gobiernu ꞌmu̱kua ha rä Xiꞌmhai? ¿Por hanja?

6. Nuꞌu̱ ma dä mända ha rä Gobiernu Äjuä di komprendegihu̱

Ñhesukristo ꞌnehe bi mꞌu̱i ngu nꞌa rä jäꞌi nuua ha rä Xiꞌmhai, hänge näꞌä di ntiendegihu̱ ꞌne di komprende gatꞌho näꞌä di thogihu̱ (Hebreos 4:15, TNM). Rä Biblia mää ge nuꞌu̱ 144.000 yä jäꞌi xä thahni pa dä mända ko rä Hesu, ehe «de gatꞌho yä luga, yä idioma, yä pueblo ꞌne yä hnini» (Apocalipsis 5:9, TNM). Hää, nuꞌu̱ yä ñꞌo̱ho̱ ꞌne yä ꞌme̱hñä ma dä mända ko rä Hesu, ꞌnehe xä mꞌu̱i nuua ha rä Xiꞌmhai ꞌne xä thogi nuꞌu̱ xuñha di thogihu̱.

• ¿Por hanja di nupꞌäꞌi ri mfeni gi pädi ge tanto rä Hesu ngu nuꞌu̱ ma dä mända kongeꞌä ha mähetsꞌi, ꞌnehe xä mꞌu̱i nuua ha rä Xiꞌmhai?

7. Mänꞌa xä ñho nuꞌu̱ yä ley xä hñutsꞌi rä Gobiernu Äjuä

Yä gobiernu xä hñuxä yä ley nuꞌu̱ debe dä yꞌo̱de gatꞌho yä siudadano pa yä benefisio. Rä Gobiernu Äjuä, ꞌnehe xä hñuxä yä ley nuꞌu̱ debe dä yꞌo̱de gatꞌho nuꞌu̱ ne dä mꞌu̱i ngu yä siudadano de rä Gobiernu Äjuä. Hñetihu̱ 1 Corintios 6:9-11, TNM, ꞌnepu̱ thädihu̱ nuya yä ntꞌani:

• ¿Te mä mꞌu̱i gi kamfri ge ma dä nja ha rä Xiꞌmhai xti zo̱ho̱ rä pa habu̱ gatꞌho yä jäꞌi ma dä yꞌo̱te yä konseho Äjuä?a

• Gatꞌho nuꞌu̱ yä jäꞌi ne dä nsiudadano de rä Gobiernu Äjuä, mähyoni dä yꞌo̱te nuꞌu̱ yä ley xä hñutsꞌi. ¿Gi kamfri ge rä Zi Dada Jeoba pe̱ꞌtsi nderecho dä yꞌadi njabu̱? ¿Por hanja?

• ¿Hanja di pädihu̱ ge nuꞌu̱ yä jäꞌi hingi o̱te yä ley rä Zi Dada Jeoba, hää dä za dä paati yä mfeni ꞌne yä mꞌu̱i? (Hyandihu̱ mänꞌaki rä versículo 11.

NÄꞌÄ DÄ PÄDIHU̱

Rä Reino Äjuä, geꞌä rä Tsꞌu̱tꞌhui o Gobiernu xä hñutsꞌi rä Zi Dada Jeoba ha mähetsꞌi, ꞌne ma dä mända po gatꞌho rä Xiꞌmhai.

Pa gä benihu̱

• ¿Toꞌo nuꞌu̱ ma dä mända ha rä Tsꞌu̱tꞌhui Äjuä?

• ¿Por hanja rä Gobiernu Äjuä mänꞌa xä ñho ke nuꞌu̱ yä gobiernu ꞌmu̱kua ha rä Xiꞌmhai?

• ¿Te to̱ꞌmi rä Zi Dada Jeoba de nuꞌu̱ yä jäꞌi ne dä nsiudadano de näꞌä rä Gobiernu xä hñutsꞌi?

HABU̱ DÄ ZA GI PÄDI MÄ NꞌA TU̱I

¿Habu̱ ma dä nja näꞌä rä Reino o rä Gobiernu Äjuä? Hyandi te bi mää Ñhesukristo.

«¿ꞌMu̱i ha mä korasohu̱ näꞌä rä Reino Äjuä?» (Ehe ha jw.org)

¿Por hanja yä testigo rä Jeoba mänꞌa o̱te rä Gobiernu Äjuä ke nuꞌu̱ yä gobiernu ꞌmu̱kua ha rä Xiꞌmhai?

Nuyu̱ yä jäꞌi ꞌmu̱i pa dä apoya rä Gobiernu Äjuä (1:43)

Hyandi te udi rä Biblia de nuꞌu̱ 144.000 yä jäꞌi xä huahni rä Zi Dada Jeoba pa dä mända ko rä Hesu.

«¿Toꞌo nuꞌu̱ ma dä ma ha mähetsꞌi?» (Ehe ha jw.org)

Nꞌa rä zi ꞌme̱hñä näꞌä mi o fadi, ¿te bi kombensebi ge ho̱nse̱ Äjuä ma dä za dä hä rä justisia ha rä Xiꞌmhai?

«¡Por fin dä pädi por hanja ja yä injustisia ha rä Xiꞌmhai!» (¡Despertad!, Noviembre de 2011)

Rä Tsꞌu̱tꞌhui o Gobiernu Äjuä, bi mu̱di bi mända ha mähetsꞌi dende rä je̱ya 1914. Ha nunä rä je̱ya bi mu̱di yä gäxä pa—pa nuꞌu̱ yä gobiernu yä jäꞌi—. ¿Hanja di pädihu̱? Ma gä handihu̱ rꞌa de nuꞌu̱ yä profecía hutsꞌi ha rä Biblia. ꞌNehe ma gä handihu̱ te xä thogi ꞌne te mä mꞌu̱i xä me̱ꞌtsi yä jäꞌi dende rä je̱ya 1914.

1. ¿Te ya xki mängä rä Biblia ge ma xä thogi?

Mäyaꞌmu̱ rä profeta Daniel bi mää ge rä Tsꞌu̱tꞌhui o Gobiernu Äjuä, ma xä mu̱di xä mända asta nuꞌmu̱ xti uadi «yoto yä tiempo» (Daniel 4:16, 17). Rꞌa yä nthebe yä je̱ya mꞌe̱fa, Ñhesukristo bi ꞌñenä ge nuꞌu̱ yä tiempoꞌu̱, mi signifika näꞌä rä plaso xki tꞌumbäbi yä dähni pa dä mända, pe nunä plaso tobe hixki uadi (Lucas 21:24, TNM). ¿Pe gi pädi? Nuꞌu̱ yoto yä tiempo o näꞌä plasoꞌä, ya bi uadi ha rä je̱ya 1914.

2. ¿Te xä thogi ꞌne hanja xä porta yä jäꞌi dende rä je̱ya 1914?

Nꞌa rä pa, yä apostol rä Hesu bi yꞌambäbi: «¿Te mä señä ma gä hanthe, pa njabu̱ gä pähe hämꞌu̱ ma gi ꞌmu̱i kongekhe ꞌne hämꞌu̱ ma dä zo̱ho̱ rä fin de nuꞌu̱ yä tsꞌo tꞌo̱tꞌe ja ha rä xiꞌmhai?» (Mateo 24:3, TNM). Rä Hesu bi ꞌñenä ge nuꞌmu̱ xti mu̱di dä mända rä Tsꞌu̱tꞌhui Äjuä ha mähetsꞌi, nse̱kitho ma xä nheki yä gerra, yä thuhu, yä mbiꞌmhai ꞌne märꞌa yä tꞌo̱tꞌe (hñeti Mateo 24:7, TNM). Rä Biblia ꞌnehe bi mää ge «ha yä gäxä pa», yä jäꞌi ma xi xä porta xä ntsꞌo ꞌne ge nuꞌu̱ yä mꞌu̱i xi strä «ñhei toꞌo dä ze̱ti» (2 Timoteo 3:1-5, TNM). Näꞌä bi mängä rä Biblia ge ma xä thogi ꞌne de hanja ma xä porta yä jäꞌi, mänꞌa bi nheki dende rä je̱ya 1914 pa ri ꞌñehe.

3. Mu̱ rä Gobiernu Äjuä ya bi mu̱di bi mända, ¿por hanja mänꞌa xä nheki yä sufrimiento ha rä Xiꞌmhai?

Nuꞌmu̱ bi thutsꞌi rä Hesu ngu rä Rey ha näꞌä rä Gobiernu Äjuä, ha mähetsꞌi bä nja nꞌa rä gerra: Rä Hesu ko nuꞌu̱ yä e̱nxe̱, bä ntunkui rä Zithu ko nuꞌu̱ yä u̱xjua. ¿Toꞌo bi ntäte? Rä Hesu ko nuꞌu̱ yä e̱nxe̱. Hänge rä Biblia enä ge rä Zithu ko nuꞌu̱ yä u̱xjua, bä jui de mähetsꞌi (Apocalipsis 12:9, 10, 12, TNM). Rä Zithu pädi ge mänꞌitꞌho ma dä thäki de ha rä xiꞌmhai. Hänge xa di nkue̱ ꞌne japi dä nja ndunthi yä u̱gi, yä dumu̱i ꞌne yä sufrimiento. Hää, dende nuꞌmu̱ rä Zithu bä tꞌe̱i de mähetsꞌi pa ha rä Xiꞌmhai, mänꞌa xä nheki yä kosa xi xä ntsꞌo. Pe rä Gobiernu Äjuä, ya ma dä hñäki gatꞌho nuya yä dumu̱i ꞌne yä sufrimiento.

HANJA DÄ ZA DÄ MAXꞌÄꞌI RÄ NOYA ÄJUÄ

4. Rꞌa yä dato uni rä Biblia, tsitsꞌi ha rä je̱ya 1914

RÄ BIDEO: Rä Gobiernu Äjuä bi mu̱di bi mända ha rä je̱ya 1914 (5:02)

Mäyaꞌmu̱, Äjuä bi japäbi bi me̱ꞌtsi nꞌa rä tꞌi näꞌä rä rey de Babilonia mrä thuhu Nabucodonosor. ¿Xi te ri bo̱ni näꞌä bi ꞌui Nabucodonosor? Rä profeta Daniel bi mää te mi signifika näꞌä rä tꞌi. Nunä tꞌi bi ꞌñudi te ma xä thogi ko rä gobiernu Nabucodonosor ꞌne ko rä Gobiernu Äjuä (hñetihu̱ Daniel 4:17).a

Pa gi thädihu̱ nuya yä ntꞌani xä ꞌñepu̱ hñetihu̱ Daniel 4:20-26. Kada nꞌa rä ntꞌani di ñꞌoui nꞌa rä dibujo näꞌä ehe ha rä tabla de rä nxii 133.

• A) ¿Te bi hyandi Nabucodonosor ha näꞌä rä tꞌi bi me̱ꞌtsi? (Hyandihu̱ mänꞌaki yä versículo 20 ꞌne 21).

• B) ¿Te ma xä thogi ko näꞌä arbol? (Hyandihu̱ mänꞌaki rä versículo 23).

• C) ¿Te ma xä thogi xti uadi nuꞌu̱ «yoto yä tiempo»? (Hyandihu̱ mänꞌaki rä versículo 26).

Näꞌä rä arbol bi ꞌui Nabucodonosor ꞌne rä Gobiernu Äjuä

RÄ PROFECÍA (Daniel 4:20-36)

Nuꞌmu̱ mi mända

A) Nꞌa rä arbol xa mrä däta ꞌne xa xmä mee

Ya hingä go bi mända

B) «Tse̱kihu̱ näꞌä rä arbol [...] ꞌne pe̱ꞌtsi te dä thogi yoto yä tiempo»

Bi mända mänꞌaki

C) «Ri gobiernu ma dä tꞌaꞌi mänꞌaki»

Nunä profecía mꞌe̱tꞌo bi kumpli ha rä gobiernu Nabucodonosor

• D) ¿Toꞌo bi representa näꞌä arbol? (Hyandihu̱ mänꞌaki rä versículo 22).

• E) ¿Hämꞌu̱ ya himbi za bi mända rä rey Nabucodonosor? (Hñetihu̱ Daniel 4:29-33).

• F) ¿Te bi thogi ko Nabucodonosor mi uadi nuꞌu̱ «yoto yä tiempo»? (Hñetihu̱ Daniel 4:34-36).

NUNÄ PROFECÍA MꞌE̱TꞌO BI KUMPLI HA RÄ GOBIERNU NABUCODONOSOR

Nuꞌmu̱ mi mända

D) Nabucodonosor näꞌä rä rey de Babilonia

Ya hingä go bi mända

E) Mꞌe̱fa de rä je̱ya 606 a.e.c., Nabucodonosor bi ꞌme̱di rä mfeni ꞌne ya himbi za bi mända durante yoto nje̱ya

Bi mända mänꞌaki

F) Nabucodonosor bi yo nja rä mfeni ꞌne bi mu̱di bi mända mänꞌaki de gä rey ha Babilonia

Nunä profecía mꞌe̱fa bi kumpli ha rä Gobiernu Äjuä

• G) ¿Toꞌo nuꞌu̱ bi representa näꞌä arbol? (Hñetihu̱ 1 Crónicas 29:23).

• H) ¿Dende hämꞌu̱ Äjuä ya himbi hñutsꞌi yä rey ha Israel? ¿Hanja di pädihu̱ ge mi mꞌu̱kua rä Hesu ha rä Xiꞌmhai, Äjuä tobe hixki hñutsꞌi nꞌa rä rey? (Hñetihu̱ Lucas 21:24, TNM).

• I) ¿Hämꞌu̱ ꞌne habu̱ bi hñutsꞌi Äjuä mänꞌaki nꞌa rä rey?

NUNÄ PROFECÍA MꞌE̱FA BI KUMPLI HA RÄ GOBIERNU ÄJUÄ

Nuꞌmu̱ mi mända

G) Nuꞌu̱ yä rey de Israel go geꞌu̱ mi representa rä Gobiernu Äjuä

Ya hingä go bi mända

H) Ha rä je̱ya 607 a.e.c., Babilonia bi destrui Jerusalén ko näꞌä rä gäxä rey xki hñutsꞌi Äjuä, ꞌne dende geꞌmu̱, Äjuä hinte mä rey bi hñutsꞌi durante 2.520 yä je̱ya

Bi mända mänꞌaki

I) Rä Hesu bi mu̱di bi mända ha mähetsꞌi ngu nꞌa rä Rey ha rä Gobiernu Äjuä

5. Rä xiꞌmhai bi mpadi ndunthi dende rä je̱ya 1914

Yꞌe̱ntsꞌihu̱ rä BIDEO.

RÄ BIDEO: Rä xiꞌmhai bi mpadi ndunthi dende rä je̱ya 1914 (1:10)

Rä Hesu bi mää te mä señä ma xä nheki xti mu̱di dä mända ngu nꞌa rä Rey. Hñetihu̱ Lucas 21:9-11, TNM, ꞌnepu̱ thädihu̱ nunä rä ntꞌani:

• De nuya yä tꞌo̱tꞌe no̱ni ha nuya yä testo dä hetihu̱, ¿ndaꞌu̱ xkä handige?

Rä apostol Pablo bi mää hanja ma xä porta yä jäꞌi ha nuꞌu̱ yä gäxä pa de rä gobiernu yä jäꞌi. Hñetihu̱ 2 Timoteo 3:1-5, TNM, ꞌnepu̱ thädihu̱ nunä rä ntꞌani:

• Xi nuꞌi, ¿hanja xkä handi ge di porta yä jäꞌi mäpaya?

6. Ma gä apoyahu̱ näꞌä rä Gobiernu Äjuä nubye̱ di pädihu̱ ge ya di mända

Hñetihu̱ Mateo 24:3, 14, TNM, ꞌnepu̱ thädihu̱ nuya yä ntꞌani:

• ¿Te mä ꞌme̱fi di tꞌo̱tꞌe mäpaya näꞌä udi ge rä Gobiernu Äjuä ya di mända?

• Xi nuꞌi, ¿hanja dä za gi partisipa ꞌnehe ha nunä ꞌme̱fi?

Rä Tsꞌu̱tꞌhui Äjuä ya bi mända ha mähetsꞌi, ꞌne ya di ꞌme̱di tsꞌu̱tho pa dä mända ha gatꞌho rä Xiꞌmhai. Hñetihu̱ Hebreos 10:24, 25, ꞌnepu̱ thädihu̱ nunä rä ntꞌani:

• ¿Te debe gä pe̱fihu̱ nubye̱ ya di pädihu̱ ge rä pa Äjuä «ya ꞌmu̱i getbu̱»?

NÄꞌÄ DÄ PÄDIHU̱

Näꞌä ya xki mängä rä Biblia ge ma xä thogi ꞌne ko näꞌä di handihu̱ mäpaya ha rä Xiꞌmhai, udi ge rä Gobiernu Äjuä ya bi mu̱di bi mända. Nuju̱ di udihu̱ ge di kamfrihu̱ ꞌne di apoyahu̱ rä Gobiernu Äjuä, ora di predikabihu̱ märꞌaa ꞌne di ntinihu̱ ha yä mhuntsꞌi.

Pa gä benihu̱

• ¿Te bi thogi mi uadi nuꞌu̱ «yoto yä tiempo» no̱ni rä Biblia ha rä mfistꞌofo Daniel?

• ¿Te di kombenseꞌi ge rä Gobiernu Äjuä ya bi mu̱di bi mända dende rä je̱ya 1914?

• Xi nuꞌi, ¿hanja dä za gi ꞌñudi ge gi kamfri ge rä Gobiernu Äjuä ya di mända mäpaya?

HABU̱ DÄ ZA GI PÄDI MÄ NꞌA TU̱I

Hyandi hanja rꞌa yä bämhñä enä ge dende rä je̱ya 1914, yä jäꞌi mänꞌa bi zitsꞌi nꞌa rä mꞌu̱i näꞌä hingi tꞌaxi.

«Yä jäꞌi mänꞌa bi zitsꞌi nꞌa rä mꞌu̱i näꞌä hingi tꞌaxi» (¡Despertad!, abril de 2007)

Hyandi hanja nꞌa rä zi ñꞌo̱ho̱ bi paati rä mꞌu̱i mi hyandi hanja mäpaya, ꞌmu̱i nuꞌu̱ toꞌo di predika ja ngu mängä Mateo 24:14.

«¡Hinto ndi mädi ja ngu ndi mädi rä ntꞌeni de gä béisbol!» (La Atalaya, núm. 3 2017)

¿Hanja di pädihu̱ ge näꞌä rä profecía hutsꞌi ha rä Biblia, ha rä mfistꞌofo Daniel, ha rä capítulo 4, ñä de rä Gobiernu Äjuä?

«¿Hämꞌu̱ bi mu̱di bi mända rä Gobiernu Äjuä? (Parte 1)» (La Atalaya, 1 de octubre de 2014)

¿Hanja di pädihu̱ ge nuꞌu̱ «yoto yä tiempo» no̱ni ha rä mfistꞌofo Daniel, ha rä capítulo 4, bi uadi ha rä je̱ya 1914?

«¿Hämꞌu̱ bi mu̱di bi mända rä Gobiernu Äjuä? (Parte 2)» (La Atalaya, 1 de noviembre de 2014)

Rä Tsꞌu̱tꞌhui o Gobiernu Äjuä ya bi mända ha mähetsꞌi, ꞌne mänꞌitꞌho ma dä hä yä mpadi nuua ha rä Xiꞌmhai. Ma gä handihu̱ te ma dä logra rä Gobiernu Äjuä ꞌne te mä benefisio ma dä za gi pe̱ꞌtsige.

1. ¿Te ma dä me̱fi rä Gobiernu Äjuä pa dä hñäki yä tuhni ꞌne dä hä rä justisia ha rä Xiꞌmhai?

Rä Hesu—näꞌä rä Rey de rä Gobiernu Äjuä—ma dä huati gatꞌho yä tsꞌomꞌu̱i jäꞌi ꞌne gatꞌho yä gobiernu ha näꞌä rä gerra rä thuhu Armagedón (Apocalipsis 16:14, 16). Nubye̱ hää, ma gä handihu̱ hanja Äjuä ma dä kumpli näꞌä rä promesa hutsꞌi ha rä Biblia ora enä: «Tsꞌu̱tho yä pa di ꞌme̱di pa dä uadi gatꞌho yä tsꞌomꞌu̱i jäꞌi» (Salmo 37:10). Ha rä Gobiernu Äjuä, rä Hesu go geꞌä ma dä nkargo de dä hñäki gatꞌho yä tsꞌomꞌu̱i jäꞌi, ꞌne ma dä hä rä justisia po gatꞌho rä Xiꞌmhai (hñeti Isaías 11:4).

2. ¿Te mä mꞌu̱i ma dä me̱ꞌtsi gatꞌho yä jäꞌi xti mända rä Gobiernu Äjuä nuua ha rä Xiꞌmhai?

Rä Biblia enä: «Nuꞌu̱ yä jäꞌi o̱tꞌe rä justisia ma dä mꞌu̱i ha rä xiꞌmhai, ꞌne ja ma dä mꞌu̱hni pa nzäntho» (Salmo 37:29). Imäjinä näꞌä rä mꞌu̱i temäꞌentho ma gä pe̱ꞌtsihu̱: ¡Gatꞌho yä jäꞌi ma dä mädi rä Zi Dada Jeoba, ma dä yꞌo̱tꞌe rä justisia ꞌne ma dä mädi yä mikꞌei! Ninꞌa rä jäꞌi hingä ma dä ñheni ꞌne gatꞌho ma dä za dä mꞌu̱i pa nzäntho.

3. Xti uadi dä hñäki nuꞌu̱ yä tsꞌomꞌu̱i jäꞌi, ¿te mä nꞌa ma dä me̱fi rä Gobiernu Äjuä?

Ya dä handihu̱ ge rä Hesu mꞌe̱tꞌo ma dä huati gatꞌho yä tsꞌomꞌu̱i jäꞌi. ꞌNepu̱ ma dä mända ngu nꞌa rä Rey po 1.000 yä je̱ya. Durante näꞌä tiempoꞌä, rä Hesu ꞌne nuꞌu̱ 144.000 xä thahni pa dä mända kongeꞌä ha mähetsꞌi, ma dä matsꞌi gatꞌho yä jäꞌi dä kꞌotꞌi rꞌamätsꞌu̱ de rä pekado. Xti uadi nuꞌu̱ 1.000 yä je̱ya, rä Xiꞌmhai ma dä gohi xa mähotho. Gatꞌho yä jäꞌi ma dä mꞌu̱i ko ndunthi rä johya ngeꞌä gatꞌho ma dä yꞌo̱te rä Zi Dada Jeoba. Nubye̱ hää, rä Hesu ma dä umbäbi mänꞌaki rä Zi Dada Jeoba näꞌä rä Gobiernu bi yꞌe̱ntꞌuäbi ha rä yꞌe̱, ꞌne rä thuhu rä Zi Dada Jeoba ma drä nsundabi ja ngu nunka änte xki nheki (Mateo 6:9, 10, TNM). Ya hinte mä duda ma dä nja ge rä Zi Dada Jeoba, näꞌä nꞌa rä hogä gobernante näꞌä di mädi ꞌne turämu̱i po nuꞌu̱ yä jäꞌi o̱te. Xti gohi claro nunä asunto, nubye̱ rä Zi Dada Jeoba ma dä destrui rä Zithu ko nuꞌu̱ yä u̱xjua. Jeoba ꞌnehe ma dä huati gatꞌho nuꞌu̱ yä jäꞌi hindä ne dä yꞌo̱te yä mhända (Apocalipsis 20:7-10, TNM). Näꞌä rä hogä mꞌu̱i ma dä hä rä Gobiernu Äjuä, ma dä dura pa nzäntho.

HANJA DÄ ZA DÄ MAXꞌÄꞌI RÄ NOYA ÄJUÄ

4. Rä Gobiernu Äjuä ma dä huati gatꞌho nuꞌu̱ yä gobiernu ꞌmu̱kua ha rä Xiꞌmhai

«Rä jäꞌi xä dominä rä mi jäꞌiui pa rä u̱gise̱» (Eclesiastés 8:9). Rä Zi Dada Jeoba ma dä usa näꞌä rä Gobiernu, pa dä hñäki gatꞌho nuꞌu̱ yä injustisia xä yꞌo̱tꞌe nuꞌu̱ yä gobiernu ꞌmu̱kua ha rä Xiꞌmhai.

Hñetihu̱ Daniel 2:44 ꞌne 2 Tesalonicenses 1:6-8, TNM, ꞌnepu̱ thädihu̱ nuya yä ntꞌani:

• ¿Te ma dä me̱fi rä Zi Dada Jeoba ꞌne rä Hesu ko nuꞌu̱ yä gobiernu ꞌmu̱kua ha rä Xiꞌmhai ꞌne nuꞌu̱ yä jäꞌi di apoya nuꞌu̱ yä gobiernuꞌu̱?

• Ko näꞌä ya xkä pädi de rä Zi Dada Jeoba ꞌne de rä Hesu, ¿hanja dä za gi mꞌu̱i seguro ge gatꞌho näꞌä ma dä me̱fi ma dä yꞌo̱tꞌe ko rä justisia?

5. Rä Hesu go geꞌä rä Gobiernu näꞌä xa di honihu̱

Ñhesukristo—näꞌä rä Rey de rä Gobiernu Äjuä—ma dä hä ndunthi yä benefisio pa gatꞌho yä jäꞌi. Yꞌe̱ntsꞌihu̱ rä BIDEO pa gi hyandihu̱ hanja nuꞌmu̱ rä Hesu bi mꞌu̱kua ha rä Xiꞌmhai, bi ꞌñudi ge xä hñäni rä tsꞌe̱di ꞌne rä autorida de rä Zi Dada Jeoba pa dä matsꞌi yä jäꞌi.

RÄ BIDEO: Rä Hesu bi ꞌñudi näꞌä ma dä logra rä Gobiernu Äjuä (1:13)

Nuꞌmu̱ rä Hesu bi mꞌu̱kua ha rä Xiꞌmhai, bi ꞌñudi ho̱nse̱ nꞌa tu̱i de gatꞌho näꞌä ma dä logra rä Gobiernu Äjuä. De gatꞌho nuꞌu̱ yä jäpi ma dä hä rä Gobiernu Äjuä, ¿ndaꞌu̱ ya gi ne gi hyandige? Hñetihu̱ gatꞌho nuꞌu̱ yä testo xä ꞌñepu̱ habu̱ udi rꞌa de nuꞌu̱ yä milagro bi ja rä Hesu mi mꞌu̱kua ha rä Xiꞌmhai, ꞌne nuꞌu̱ yä jäpi ma dä hä pa gatꞌho yä jäꞌi.

6. Rä Gobiernu Äjuä ma dä hänkägihu̱ nꞌa rä hogä mꞌu̱i

RÄ BIDEO: ¡Dä za gä handihu̱ dende nubye̱ näꞌä rä mꞌu̱i xa mähotho ma gä pe̱ꞌtsihu̱! (4:38)

Hñetihu̱ Salmo 145:16, ꞌnepu̱ thädihu̱ nunä rä ntꞌani:

• ¿Te jaꞌi gi senti ora gi pädi ge rä Zi Dada Jeoba ma dä «umbäbi näꞌä desea» nuꞌu̱ yä jäꞌi ma dä mꞌu̱kua ha rä Xiꞌmhai?

NÄꞌÄ DÄ PÄDIHU̱

Ko näꞌä rä Gobiernu xä hñutsꞌi rä Zi Dada Jeoba, ma dä me̱fi gatꞌho näꞌä mi ne dende ri mu̱di. Nunä Gobiernu ma dä logra dä hyoki xa mähotho gatꞌho rä Xiꞌmhai. Yä jäꞌi ma dä za dä mꞌu̱i pa nzäntho ꞌne ma dä xo̱kämbeni ho̱nse̱ rä Zi Dada Jeoba.

Pa gä benihu̱

• ¿Hanja ma dä usa rä Zi Dada Jeoba näꞌä rä Gobiernu pa dä nsunda rä thuhu?

• ¿Por hanja dä za gä kamfrihu̱ ge rä Zi Dada Jeoba ma dä usa näꞌä rä Gobiernu pa dä kumpli gatꞌho näꞌä xä prometegihu̱?

• De gatꞌho nuꞌu̱ yä jäpi ꞌne yä benefisio ma dä hä rä Gobiernu Äjuä, ¿ndaꞌu̱ ya gi ne gi hyandi?

HABU̱ DÄ ZA GI PÄDI MÄ NꞌA TU̱I

Pädi te me̱ꞌä rä Armagedón.

«¿Te me̱ꞌä rä gerra de Armagedón?» (Ehe ha jw.org)

Ha Mateo 24:21, rä Hesu bi ꞌñenä ge ma dä nja nꞌa «rä däta mbidi». Hyandi te ma dä thogi durante näꞌä tiempoꞌä.

¿Te meꞌä rä däta mbidi? (Ehe ha jw.org)

Hyandi hanja yä familia, dä za dä mplatika ꞌne dä imäjinä näꞌä rä bida ma dä me̱ꞌtsi xti mända rä Gobiernu Äjuä nuua ha rä Xiꞌmhai.

Imäjinä ge ya gi ꞌmu̱i ha rä Paraiso (1:50)

Ha rä esperiensia «Hingä ndi tsu gä tu, pe xa ndi pe̱ꞌtsi ndunthi yä ntꞌani», hyandi hanja nꞌa rä ñꞌo̱ho̱ näꞌä xki nju̱tsꞌi kontra rä autorida, bi bädi toꞌo xa mäjuäni ma dä hä nꞌa rä hogä mꞌu̱i pa gatꞌho yä jäꞌi.

«Rä Mäkä Tꞌofo bi patuäbi yä mꞌu̱i» (Ehe ha jw.org)