Nꞌa rä zi tꞌu̱kä kaha näꞌä di sirbe pa dä tꞌudi de rä Noya Äjuä

Ja ngu nunka xki nheki, ha nuya yä pa xä thogi, yä testigo rä Jeoba xä hñäni ndunthi rä ñhuni de rä Noya Äjuä näꞌä xä za xtä handihu̱ ko yä telefono, yä tablet ꞌne rä Internet. Pe ha ndunthi yä luga de rä Xiꞌmhai, mä zi kuhu̱ hingi tsu̱päbi rä bojä pa dä gutꞌi rä Internet. Märꞌa yä zi ku, ꞌmu̱i ha nuꞌu̱ yä luga menthi tso̱ni rä Internet, pe hingi tihi o xi njatꞌä di ꞌme̱di rä señal. Märꞌa yä zi ku, ꞌmu̱i ha nuꞌu̱ luga hingi tso̱ni rä Internet.

¿Pe gi pädi? Mäske njabu̱, ndunthi mä zi kuhu̱ häni näꞌä rä ñhuni ehe de rä Noya Äjuä. ¿Gi pädi hanja di japäbi?

Ja nꞌa rä zi tꞌu̱kä kaha tꞌembäbi JW Box. Nunä zi kaha di ꞌme̱mpäbi nuꞌu̱ yä mhuntsꞌi habu̱ otho o hingi tihi rä Internet. Nunä zi kaha JW Box di ñꞌoui: 1) nꞌa rä rúter näꞌä xä thambäbi nꞌa rä empresa, 2) nꞌa rä software o programa näꞌä go bi imbenta rä Departamento de Computación de rä ngu Betel, ꞌne 3) yä bideo ꞌne nuꞌu̱ yä imformäsio di tinihu̱ ha jw.org. Kada nꞌa rä zi kaha di bale 75 yä dolar.

Yä ku pa ha nuꞌu̱ yä Ngu de gä Mhuntsꞌi habu̱ ja nꞌa de nuya yä zi kaha. Ko näꞌä rä wifi po̱ni de näꞌä rúter di ñꞌoui näꞌä zi kaha JW Box, yä ku di conecta yä telefono o yä tablet ha nunä zi kaha pa di descarga yä bideo ꞌne gatꞌho näꞌä imformäsio di japäbi mꞌe̱di. Asta nuꞌu̱ yä zi telefono yä zi sencillo o nuꞌu̱ yä mu̱di telefono bi bo̱ni dä za dä conecta ko rä wifi ha nunä zi kaha. Pe mu̱ rä Internet hingi tso̱ni ha nꞌa rä Ngu de gä Mhuntsꞌi, ¿hanja dä za yä ku dä käꞌmi nuꞌu̱ yä rꞌayꞌo bideo o imformäsio ja xä bo̱ni? Yä ngu Betel, njatꞌä pe̱mpäbi nuꞌu̱ yä mhuntsꞌi, nꞌa rä memoria USB habu̱ pa nuꞌu̱ yä bideo o imformäsio ja xä bo̱ni ha jw.org. Nunä USB dri conecta ha näꞌä zi kaha JW Box, pa njabu̱ yä ku dä za dä käꞌmi näꞌä imformäsio honi.

¿Hanja xä matsꞌi nunä zi kaha JW Box gatꞌho nuꞌu̱ yä zi ku? Nathan Adruandra, nꞌa rä zi ku näꞌä bi ꞌmu̱i ha rä República del Congo enä: «Mä mꞌe̱tꞌo hängu xti trata gä käꞌmi yä bideo “Oh Jeoba, mä komfiansa ꞌmu̱i kongeꞌi” ꞌne Benihu̱ näꞌä bi thogi rä ꞌme̱hñä Lot, pe nunka bi za ꞌne xa mi desanimägi. Nubye̱ ya tsa di descarga ha mä telefono nuꞌu̱ yä bideo go gä ne, ꞌne geꞌä faxkägihe nuje dyä dadahe pa gä educahe xä ñho mä zi bätsihe».

Nꞌa rä zi ku näꞌä faxte pa di instala JW Box ha yä mhuntsꞌi de Nigeria enä: «Yä ku handi JW Box ngu nꞌa rä regalo näꞌä bi ehe de rä Zi Dada Jeoba. Yä zi ku xa di johya ngeꞌä nubye̱ tsa dä käꞌmi yä publicación ꞌne yä bideo ha yä telefono o yä tablet».

Ya xä ꞌme̱hni thogi de 1.700 yä zi kaha JW Box ha yä mhuntsꞌi de África, Oceanía, ꞌne Sudamérica. Pe tobe ma dä ꞌme̱ꞌmpäbi nunä zi kaha märꞌa yä mhuntsꞌi. Pe, ¿habu̱ bi ehe näꞌä rä bojä pa di thoki gatꞌho nuya yä ꞌme̱fi? Bi ehe de nuꞌu̱ yä zi donäsio ꞌne yä ꞌmo̱ñhä uni yä ku ha nuꞌu̱ yä mhuntsꞌi ja po gatꞌho rä Xiꞌmhai. Ndunthi de nuya yä zi ꞌmo̱ñhä di tꞌuni po mäde de rä página donate.jw.org. ¡Ndunthi di jamädihe po nuꞌu̱ ri zi ꞌmo̱ñhä o donäsio gi unihu̱!