¿ʼBe̱ʼä gi mbëni dä thogi yu̱ pa bä ëpu̱?

NUʼÄ ʼBE̱ʼÄ MANʼÄ BIBLIA

“ʼNe gese̱ Ojä di üni ra njohya, ʼne hinma nja yu̱ gida̱ yu̱ jäʼi, ʼne hindi nja ra ndäte maho̱nʼäbu̱, ʼne hindi nja yu̱ dümu̱ibu̱. Geʼtho ga̱ʼtho ʼbe̱ʼä ma nʼu̱mbi mi ja, ya bi thogi” (Apocalipsis 21:4, Ra ʼDaʼyonhogui nangue ma Hmuhu̱ ra Jesucristo, ko yu̱ letra ge nuʼä ñuhü ja ya).

YU̱ NHO GE GÄ PÄHMU̱ʼÄ

Di njaju̱ ʼna hogä ʼbe̱fi ge di jakju̱ gä njohyahu̱ (Isaías 65:21-23).

Ya hingä nʼu̱mbähu̱ ʼne hindi njaju̱ yu̱ nza̱manʼu̱ (Isaías 25:8; 33:24).

Gä njohyahu̱ʼu̱ ma familiahu̱ ʼne ma amigohu̱ pa mazäi (Salmo 37:11, 29).

¿HA DÄ ZA̱ GÄ ËʼKYËIHU̱ NUʼÄ ʼBE̱ʼÄ MANʼÄ BIBLIA?

Ähä, geʼtho:

• Ojä ja na ʼtse̱di pa dä ʼyo̱ʼte nuʼä ʼbe̱ʼä bi ma. Nubu̱ Biblia i ma ge ho̱nse̱ʼä Ojä nuixtethoho na ʼtse̱di geʼtho njämʼbu̱ i nthege (Apocalipsis 15:3). Njabu̱ nuʼbu̱ ma ge di hoʼkä ximha̱i, hindi hyonyathohu̱ ge majuäni dä ʼyo̱ʼte. Tengü mambu̱ Biblia, nuʼä Ojä ga̱ʼtho sa̱ dä ʼyo̱ʼte (Mateo 19:26).

• Ojä i ne ge dä ʼyo̱ʼte nuʼä ʼbe̱ʼä bi ma. Nuʼä Biblia ma ge Jeoba di ünna te nuʼu̱ yu̱ jäʼi bi dü (Hechos 14:15).

  Kexʼtä i ma ge nuʼä na ʼtsu̱nʼtu̱ Ojä na thühü Jesús, bi ʼyo̱the nuʼu̱ yu̱ nza̱manʼu̱ geʼtho geʼä mi neʼä (Marcos 1:40, 41). Nangeʼä bi ʼyo̱ʼte bi ʼyüdi ʼbe̱ʼä ne na Ta, ge dä ze̱ʼu̱ di nʼu̱mbi (Juan 5:19).

  Njabu̱ di pähmu̱ ge Jeoba ʼne Jesús ne ge di njaju̱ ʼna hogä mʼbu̱i nuʼu̱ yu̱ pa bä ëpu̱ (Salmo 72:12-14; 145:16; 2 Pedro 3:9).